YOANA 19
19
Vilato aimũnengane Yesũ mokonĩ ma Avuti
(MATHAYO 27.15–31; MALIKO 15.16–20; Luka 23.13–25)
1Na ĩndĩ Vilato amwosa Yesũ, na amũvũa. 2Na asikalĩ mavĩlangan’ya ngovia ya miw’a, na mamwĩkĩa mũtwe, na mamũvw’ika ngũa ĩilyĩ ta ndune; 3#Yoa 18.22.na mathi vala ũĩ, maimwĩa, Nũvoo, Mũsumbĩ wa Ayuti! Na mamũmandũla. 4Na Vilato aumaala ĩngi, na amea, Sisyai, nĩnamumaalĩlya ũũ, nĩ kana mũmanye ndikwona ĩvĩtyo o na yĩva yake. 5Na ĩndĩ Yesũ aumaala, ekĩĩtwe ngovia ya mĩw’a na ngũa ĩla ĩilyĩ ta ndune. Na Vilato amea, Sisyai, mũndũ nĩwe ũũ! 6Na ĩndĩ athembi anene na makanga mamwona, mookĩlya mawasya, makyasya, Mwambe! Mwambe! Vilato amea, Mwosei inyw’ĩ ene, mũkamwambe: nũndũ nyie ndikwona ĩvĩtyo o na yĩva yake. 7#Yoa 5.18; 10.33; Ali 24.16.Na Ayuti mamũsũngĩa, mamwĩa, Ithyĩ twĩ na mwĩao, na ũndũ wa mwĩao ũsu nĩwaĩle kũkw’a, nũndũ etw’ĩte Mwana wa Ngai. 8Na ĩndĩ Vĩlato eew’a ndeto isũ, eew’a w’ĩa mũnene kwĩ ũla waĩ naw’o; 9na avota ĩngĩ kĩsilĩlonĩ, na amũkũlya Yesũ, Wumĩte va, we? Indĩ Yesũ ndaamũsũngĩa. 10Na ĩndĩ Vilato amwĩa. Ndũneena nakwa? We ndwĩsĩ kana nĩ na ũkũmũ wa ũkũthasya, na nĩ na ũkũmũ wa ũkwamba? 11#Yoa 10.18; Meko 2.23.Yesũ amũsũngĩa, O na ndwĩthĩwa na ũkũmũ ĩũlũ wakwa, keka ũnengetwe kuma iũlũ: na kwondũ wa ũũ ũla wĩkĩte naĩ ĩla nene nĩ ũla ũnenganĩte mokonĩ maku. 12#Meko 17.7.Kuma vau Vilato amantha nzĩa ya kũmũthasya: ĩndĩ Ayutĩ mookĩlya mawasya, makyasya, Ethĩwa nũũmũthasya mũndũ ũũ, ndwĩ, mũnyanyae wa Kaisali: o mũndũ ũla wĩtusaa mũsumbĩ elea Kaisali. 13Na Vilato eew’a ndeto isu, amumaalya Yesũ, na ekala kĩvĩlanĩ kya sila, syĩtwa ya vo nĩ Maviamalan’ye, ĩndĩ Kĩevelania vetawa Kavatha. 14Na kwaĩ Ũseũvyo wa vasaka: na kwaĩ ta saa wa thanthatũ. Na amea Ayuti, Sisya, Mũsumbĩ wenyu! 15#Yoa 19.6.Na kwa ũu mookĩlya mawasya, makyasya, Mũvete! Mũvete! Mwambe! Vilato amakũlya, Nĩmwambe Mũsumbĩ wenyu? Na athembi anene masũngĩa, Tũi na mĩsumbĩ ate o Kaisali. 16Na ĩndĩ amũnengane mokonĩ moo ambwe.
Kwambwa kwa Yesũ
(MATHAYO 27.32–44; MALIKO 15.21–32; Luka 23.26–43)
17Na ĩndĩ mamũtwaa Yesũ: na aumaala, ekuĩe ngelan’yo yake, kũvika vala vetwa Vandũ va kĩng’ala, na Kĩevelania vetawa Kolokotha: 18na mamwamba vau, na vamwe nake andũ angĩ elĩ, ngalĩ ĩmwe ũmwe, na ngalĩ ĩngĩ ũmwe, na Yesũ vu katĩ. 19Na ĩngĩ Vilato aandĩka ũandĩko, awĩkĩa ngelan’yonĩ. Naw’o waandĩkĩtwe, YESŨ MŨNASALETI, MŨSUMBĨ WA AYUTI. 20Na ũandiko ũsu wasomwa nĩ Ayuti aĩngĩ, nũndũ vala Yesũ wambiwe vaĩ vakuvĩ na ndũa: na nĩwaandĩkĩtwe Kĩevelania, na Kĩlatini, na Kikiliki. 21Na kwondũ wa ũũ athembi anene ma Ayuti mamwĩa Vilato, Ndũkaandĩke, Mũsumbĩ wa Ayuti, ĩndĩ, andĩka kana aisye, Ninyie Mũsumbĩ wa Ayuti. 22Vilato amasũngĩa, Ũla naandĩka nĩnamina kũandĩka.
23Na ĩndĩ asikalĩ mamina ũmwamba Yesũ, moosa ngũa syake na maaan’ya ianda inya, kĩla mũsikalĩ kĩanda kyake; o na ngũa yake ya ĩũlũ: ngũa ĩsu ndyaĩ nduman’ye, yaĩ o ĩmwe kuma mũthya kũvika yonthe. 24Na kwondũ wa ũu maisye, Tũikatembũe, ĩndĩ tũlimane, tũmanye ũla ĩnĩkũtw’ĩka yake: nĩ kana maandĩko meanĩw’e, ala maĩtye,
Nĩmaaanisye ngũa syakwa katĩ woo,
Na kwondũ wa kĩtonyeo kyakwa nĩmakĩlimanĩle.#Sav 22.18.
25Ũu nĩw’o asikalĩ meekie. Na vu ngelan’yonĩ ya Yesũ vaũngeme inyia wake, na mwĩĩtũ‐a‐inyia wa nyinyia, Meli kĩveti kya Kilova, na Meli Makatelene. 26#Yoa 13.23.Na ĩndĩ Yesũ amwona nyinyia, na mũmanyĩw’a ũla wendetwe nĩwe maũngeme vakuvĩ, amwĩa inyia wake, Kĩveti, sisya, ũũ nĩwe mwana waku! 27Na amwĩa ũla mũmanyĩw’a, Sisya, ũũ nĩwe inyia waku! Na kuma saa ũsu ũla mũmanyĩw’a amwosa amwĩkalya kwake.
Kĩkw’ũ kya Yesũ
(MATHAYO 27.45–56; MALIKO 15.33–41; Luka 23.44–49)
28 #
Yoa 13.3; 18.4; Sav 22.15. Na ĩtina wa ũu Yesũ amanya kana maũndũ onthe nĩmathelile, nĩ kana maandĩko meanĩw’e, asya, Nĩ na waũni. 29#Sav 69.21.Na vaiĩtwe nzele vo yausũĩtwe siki: na manyw’ĩthya sivanzi siki yakola, mamĩkĩa ĩsevenĩ ya mũtĩ wa ĩsovo na matwaa kanyw’anĩ wake. 30Na Yesũ avivita ũla siki, asya, Nĩwathela: na enamya mũtwe, na aumya veva wake.
Yesũ aitonywa mbaunĩ na ĩtumo, na kũthikwa Kwake
(MATHAYO 27.57–61; MALIKO 15.42–47; Luka 23.50–56)
31 #
Kũt 21.23. Na ĩndĩ Ayuti, nũndũ kwaĩ Ũseũvyo, kana simba itikekale ngelan’yonĩ mũthenya wa savato (nũndũ savato ũsu waĩ mũthenya mũnene), mamũvoya Vilato maũũ moo matũlwe, nĩ kana simba ivetwe. 32Na ĩndĩ asikalĩ mooka, matũla ũla wa mbee maũũ, na ũla ũngi wambiwe nake: 33ĩndĩ mavika vala ve Yesũ, na meethĩa nũkwie, maiaamũtũla maũũ: 34ate o mũsikalĩ ũmwe wamũtonyie mbaunĩ na ĩtumo, na oyu vauma nthakame na manzĩ. 35Na ũla wonie nĩwe ngũsĩ, na ũkũsĩ wake nĩ wa w’o: nake nĩwĩsĩ kana eneena w’o, nĩ kana nenyu mwĩtĩkĩle. 36#Kuma 12.46; Mot 9.12; Sav 34.20.Maũndũ aa meekiwe, kana maandĩko meanĩw’e ala maĩtye, Vai ĩvĩndĩ yake yĩkatũlwa. 37#Nzek 12.10; Ũvu 1.7.Na maandĩko angĩ maĩtye, Makamũsisya ũla matonyie.
38Na ĩtina wa maũndũ asu Yosevu, mũndũ wa ndũa ya Alimathia, nake aĩ mũmanyĩw’a wa Yesũ, ĩndĩ kwa kĩmbithĩ nũndũ wa ũkĩa Ayuti, amũvoya Vilato anengwe ũthei wa kwosa mwĩĩ wa Yesũ: na Vilato eetĩkĩla. Nake athi oosa mwĩĩ wake. 39#Yoa 3.2; Mt 2.11.Na Nikotemo nake ũla waendie mbee kwa Yesũ na ũtukũ, athi akuĩte mũvulan’yo wa manemane na uuti, ũvikya latili ĩana. 40Namo moosa mwĩĩ wa Yesũ, na moolingĩla ngũa sya katane vamwe na ũla mũvulan’yo wa mĩtĩ ĩla ĩnyungaa nesa, o ũndũ Ayuti mekaa makĩnzĩa nthĩ. 41Na vakuvĩ na vala wambiwe vaĩ mũũnda; na mũũndanĩ vaĩ mbũa nzaũ, ĩla ĩtaamba kwiwa mũndũ. 42Vandũ vau nũndũ wa Ũseũvyo wa Ayuti (nũndũ mbũa yaĩ vakuvĩ) nĩvo mamwiie Yesũ.
Currently Selected:
YOANA 19: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
