YOANA 16
16
Wĩa wa Veva Mũtheũ
1 #
Yoa 14.29. Maũndũ asu namũtavya, nĩ kana mũikese kũlulutĩkw’a. 2#Yoa 9.22; Mt 5.11; 24.9; Lk 6.22.Nĩmakamũlũngya masinakokenĩ: ĩĩ, na ĩngĩ saa nĩwũkĩte, ũla ũnũũmũaa akatalĩlya kana emũthũkũma Ngai. 3#Yoa 15.21.Na makeeka maũndũ asu, nũndũ maimwĩsĩ Asa, kana nyie. 4#Lk 22.53; Yoa 17.12.Ĩndĩ maũndũ aa namũtavya, nĩ kana saa wamo wavika, mũkamalilikana, ũndũ namũtavisye. Na maũndũ asu ndyaamũtavya mwambĩlĩlyonĩ, nũndũ naĩ vamwe nenyu. 5#Yoa 7.33.Ĩndĩ yu nĩngũthi kwa ũla wandũmie; na vai ũmwe wenyu ũngũlya, Wĩthi kũ 6Ĩndĩ kwondũ wa kũmũtavya maũndũ aa, ngoo syenyu syausũwa nĩ kĩmako. 7#Yoa 14.16,26.Ĩndĩ nĩmũtavya w’o: Nĩkũmwaĩle nyie nĩthi; nũndũ ethĩwa ndithi, ũla Mũtetheesya ndakoka vala mũĩ; ĩndĩ ethĩwa nĩngũthi, ngamũtũma vala mũĩ. 8#1 Ako 14.24; Aevl 4.12.Nake, yĩla wĩũka, akamĩĩkĩĩthya nthĩ ũndũ wa naĩ, na ũlũngalu, na ũsilĩlo: 9#Yoa 3.18; Alo 1.18.ũndũ wa naĩ, nũndũ maiũmbĩtĩkĩla; 10#Meko 5.31; Alo 4.25.ũndũ wa ũlũngalu, nũndũ nĩngũthi kwa Asa, na mũimbona ingĩ; 11#Yoa 12.31; 14.30.ũndũ wa ũsilĩlo, nũndũ mũnene wa nthĩ ĩno nĩ mũsilĩle. 12#1 Ako 3.1.Nĩndialĩtye maũndũ maingĩ ma ũmũtavya, ĩndĩ mũtitonya kũmomĩĩsya yu. 13#Yoa 14.26; 1 Yoa 2.27.Ĩndĩ yĩla wĩũka, ũla Veva wa w’o, akamũtongoeasya amwonelelasye w’o w’onthe: nũndũ ndakaneena kuma kwake mwene; ĩndĩ maũndũ onthe ala ũkew’aa nĩmo ũkaneena: na akamũtavya maũndũ ala makoka. 14Akandaĩa nyie: nũndũ akoosa maũndũ makwa, na akamũvuanĩsya inyw’ĩ. 15#Yoa 17.10.Maũndũ onthe o na meva ala Asa wĩ namo nĩ makwa: kwondũ wa ũu namwĩa kana nĩwosaa maũndũ makwa, na akamũvuanĩsya.
Ndeto sya mũtaanĩsyo
16 #
Yoa 14.19. Kũtiele ĩvinda ĩnini, na mũtimbona ĩngĩ; na ĩvinda yĩngĩ ĩnini, na mũkambona, nũndũ nĩngũthi kwa Asa. 17Na ĩndĩ amanyĩw’a amwe maneenan’ya. Ũndũ ũũ watwĩa nata, Kwĩ ĩvinda ĩnini, na mũtĩmbona; na ĩvinda yĩngĩ ĩnini, na mũkambona: na, Nũndũ nĩngũthi kwa Asa? 18Na indĩ masya, Nata ũu ũnũkwasya, Ĩvinda ĩnini? Tũtyĩsĩ ũndũ ũnũkwasya. 19Na Yesũ amanya kana menda ũmũkũlya, na amea, Mwĩkũlan’ya ũndũ namwĩa, Kwĩ ĩvinda ĩnini, na mũtimbona, na ĩvinda yĩngĩ ĩnini, na mũkambona? 20Nĩ w’o, nĩ w’o, nĩngũmwĩa, Inyw’ĩ mũkaĩa na kũmeta, ĩndĩ nthĩ ĩkatana: inyw’ĩ mũkeethĩwa na kĩmako, ĩndĩ kĩmako kyenyu kĩkaalyũlwa ũtanu. 21#Isa 26.17.Kĩveti kĩkyaũnya kĩthĩawa na woo, nũndũ saa wakyo nĩ mũviku: ĩndĩ kyasyaa kana, kĩililikanaa woo ĩngĩ, ĩndĩ no kũtana nũndũ wa mũndũ asyawa kũũ nthĩ. 22#Isa 66.14.Nenyu yu mwĩ na kĩmako: ĩndĩ ngamwona ingĩ, na ngoo syenyu ikatana, na ũtanu wenyu vai mũndũ wĩmũvena. 23#Yoa 14.13,14,20; 1 Yoa 5.14; Mt 7.7; Mko 11.24.Na mũthenya ũsu mũtikangũlya ũndũ. Nĩ w’o, nĩ w’o, nĩngũmwĩa, O ũla mũkavoya Asa syĩtwanĩ yakwa, akamũnenga. 24#Yoa 15.11.Kũvika yu mũiaavoya ũndũ syĩtwanĩ yakwa: voyai, na mũkanengwa, kana ũtanu wenyu wusũe.
25 #
Yoa 10.6. Maũndũ asu naneena nenyu na nthimo: saa nĩwũkĩte, yĩla ndakaneena nenyu na nthimo, ĩndĩ ngamũtavya ũvoo wa Asa vyũ. 26Mũthenya ũsu mũkavoya syĩtwanĩ yakwa: na ndiũmũtavya kana ngamũvoya Asa nũndũ wenyu; 27#Yoa 14.21.nũndũ Asa we mwene nũmwendete, nĩkwĩthĩwa nĩmwambendie, na kwĩtĩkĩla kana naumie kwa Asa. 28Naumie kwa Asa, nooka kũũ nthĩ: na ĩngĩ, nĩnguma kũũ nthĩ, nĩthi kwa Asa. 29#Yoa 16.25.Amanyĩw’a make mamwĩa, Sisya, yu nũũtũtavya ũtheinĩ, o na ndũũneena na nthimo. 30#Yoa 2.25.Yu nĩtwĩsĩ kana nĩwĩsĩ maũndũ onthe, o na ndwĩ vata wa ũkũlw’a nĩ mũndũ: na kwondũ wa ũu nĩtweetĩkĩla kana waumie kwa Ngaĩ. 31Yesũ amakũlya, Yu nĩmũkwĩtĩkĩla? 32#Nzek 13.7; Mt 26.31,45; Mko 14.27,50; Yoa 8.29.Nĩmwenei, saa nĩwũkĩte, ĩĩ na nĩ mũviku, yĩla mwĩnyaĩĩkw’a, kĩla mũndũ kwake, mũndie nyioka: na ĩngi ndi nyioka, nũndũ Asa e vamwe nakwa. 33#Yoa 14.27; Alo 5.1; 1 Yoa 5.4.Maũndũ aa namũtavya, nĩ kana nthĩnĩ wakwa mwĩthĩwe na mũuo. Kũũ nthĩ mwĩ na thĩna: ĩndĩ ĩthĩwai na ũnyiau; nyie, nĩngĩlĩtye nthĩ vinya.
Currently Selected:
YOANA 16: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
