लूका 16

च्लाक भंडारी

1फेरी यीसूए आपणे चेले जो एक होर उदाहरण दितेया, “केसी अमीरा माह्णुं रा एक भंडारी था, होर लोके भंडारी पर ये दोस ल्गाईरा था कि से तेस माह्णुं री सारी जायदाद डूआई करहा था। 2इधी कठे तिन्हें अमीर माह्णुंऐ तेस भंडारी जो सादी किन्हें बोल्या, ‘ये क्या आ जो हांऊँ तेरे बारे मन्झ सुणेया करहा? तैं मेरे पैसे रा क्या कितिरा तेता रा हिसाब किताब दे, क्यूंकि आगे ले तु मेरा भंडारी नी रही सक्दा।’ 3तेबे भंडारी सोचदा लग्या कि, ‘ऐबे हांऊँ क्या करूं? क्यूंकि मेरा माल्क ऐबे भंडारी रा काम मेरे ले छुटाया करहा, माटा ता मेरे ले नी खणणा, होर भीख मांगणे ले मुंजो सर्म आहूँआं ईं।’ 4मैं समझी गया कि, मुंजो क्या करणा चहिए, ताकि जेबे हांऊँ भंडारी रे कामा ले हटीई दितेया जाऊँ, ता लोका आपणे घरा मन्झ मेरा स्वागत करणा। 5होर तिन्हें आपणे माल्का रे सारे कर्जदार सादे होर पैहले कर्जदारा ले पूछेया कि, तेरे पर मेरे माल्का रा कितना कर्जा आ? 6तिन्हें बोल्या, ‘सौ मण#16:6 एक मण मन्झ सैंती किलो तेल तेल,’ तेबे तिन्हें तेस किन्हें बोल्या कि, आपणा खाता ले होर बैठी किन्हें झटपट पंज्याह मण लिख। 7फेरी दूजे कर्जदारा ले पूछेया, ‘तेरे पर कितना कर्जा आ?’ तिन्हें बोल्या, ‘सौ मण कणक,’ तेबे तिन्हें तेस किन्हें बोल्या, ‘आपणा खाता ले होर अस्सी मण लिखी दे।’”

8“माल्के तेस बईमान भंडारी री बड़ाई किती कि, तिन्हें चतुराई किन्हें काम कितेया। क्यूंकि एस संसारा रे लोक आपणे टैमा रे लोका साउगी व्यवहारा करणे मन्झ, ज्योति रे लोका ले ज्यादा चतर ऐं। 9होर हांऊँ तुस्सा किन्हें बोल्हा कि, सांसारिक दौलता किन्हें आपणे कठे दोस्त बणाई लऊआ, क्यूंकि तुस्सा रे मरणे रे बाद जेबे धन दौलत खत्म हुई जाणी, तेबे तिन्हा अनंत-काला रे घरा मन्झ तुस्सा रा स्वागत करणा। 10जो थोह्ड़े ले थोह्ड़ी गल्ला मन्झ ईमानदार आ, से बौह्ता गल्ला मन्झ भी ईमानदार आ, होर जो थोह्ड़े ले थोह्ड़ी गल्ला मन्झ बईमान आ, से बौह्ता गल्ला मन्झ भी बईमान आ। 11इधी कठे जेबे तुस्से सांसारिक धन दौलता रे कठे ईमानदार नी रहे ता स्वर्गा री सच्ची दौलता रे बारे मन्झ तुस्सा पर केस भरोसा करणा? 12होर अगर तुस्से पराये रे धन दौलता मन्झ ईमानदार नी रहे, ता केस तुस्सा जो से सौंपणा, जो तुस्सा रा ही आ?”

13“कोई सेऊआदार दो माल्का री सेऊआ एक ई टैमा पर नी करी सक्दा, क्यूंकि तेस एकी किन्हें दुस्मणी होर दूजे किन्हें प्यार रखणा; या एकी किन्हें मिली किन्हें रैंह्णां होर दूजे जो तेस घटिया समझणा, तुस्से परमेसरा होर ढब्बे री सेऊआ एक साउगी नी करी सकदे।”

यीसू रे कुछ उपदेस

(मत्ती 11:12,13; 5:31,32; मरकु. 10:11,12)

14फरीसी लोक जो लालची थे, ये सभ गल्ला सुणी किन्हें यीसू रा मजाक डुआन्दे लगे। 15यीसुए तिन्हा किन्हें बोल्या, “तुस्से ता माह्णुं रे साम्हणें आपणे आपा जो धर्मी लोक बणाहें, पर परमेसर तुस्सा रे मना जो जाणहां। क्यूंकि जो चीज माह्णुं री नजरा मन्झ बडी ई, से परमेसरा री नजरा मन्झ बड़ी नकम्मी ई। 16यहून्ना बपतिस्मा देणे रे टैमा तक ता मूसा री व्यवस्था होर नबिया रा प्रचार तुस्सा रे अगुवे करहे थे। होर ऐबे परमेसरा रे राजा रा खुसी री खबर सुणाया करहा ऐं, होर हर कोई तेता मन्झ बौह्त तेजी किन्हें दाखल करणा चाहां। 17आसमान होर धरती रा मिटी जाणा असान आ एता रे बजाय कि परमेसरा री व्यवस्था रा एक भी बिंदु मिटी जाए।”

18“उदाहरणा कठे, जो कोई आपणी लाड़ी जो तलाक देई किन्हें दूजी किन्हें ब्याह करहा, से व्यभिचार करहा, होर जो कोई एह्ड़ी तलाकसुदा ज्नाने किन्हें ब्याह करहा, से भी व्यभिचार करहा।”

अमीर माह्णुं होर गरीब लाजर

19“एक अमीर माह्णुं था जो हमेसा कीमती होर बांके कपड़े पैहना था। होर हर रोज राजाओं साहीं बांका खाणा खांहां था। 20होर हर रोज एक गरीब माह्णुं जेसरा नांऊँ लाज़र था, तेस जो अमीर आदमी रे घरा वाले छाडी देहां ऐं थे। 21होर से चाहां था कि अमीर आदमी री मेजा प्रयाल्हे ले पईरे जूठे खाने किन्हें आपणा पेट भरे। होर कुत्ते भी आई किन्हें तेसरे जख्मा जो चाट्हा ऐं थे। 22होर एह्ड़ा हुएया कि से गरीब भिखारी मरी गया, होर स्वर्गदूत तेस जो लई किन्हें अब्राहमा वाले आदरा री जगहा पर पुजाया। होर से अमीर आदमी भी मरी गया, होर गाड़ेया दितेया। 23होर नरका मन्झ तड़फ्दे हुए जेबे तिन्हें ऊपरा वखा जो देख्या, ता तिन्हें दूरा ले अब्राहमा री गोदा मन्झ लाज़र देख्या। 24होर तिन्हें चिंगी किन्हें बोल्या, ‘हे बापू अब्राहम, मेरे पर दया करी किन्हें लाज़रा जो भेजी दे, ताकि से आपणी गुठी रा सिरा पाणी मन्झ डुबोई किन्हें मेरी जीभा जो ठंडा करी दे, क्यूंकि हांऊँ एस आगा मन्झ तड़फेया करहा।’ 25पर अब्राहमे जबाब दितेया, ‘हे मह्ठेया तैं आपणी जिन्दगी मन्झ खरी चीजा लई लईरी, होर तिहां ई लाज़र बुरी चीजा पाईरी, पर ऐबे से एथी सांति पाया करहा, होर तू तड़पेया करहा।’ 26‘होर इन्हा सभ गल्ला जो छाडी किन्हें आस्सा रे होर तुस्सा रे बीचा मन्झ एक भारी गढ़हा ठैहराईरा कि जो एथी ले तेस पार तुस्सा वाले जाणा चाहें, स्यों ना जाई सके, होर ना कोई तेथी ले एस पार आस्सा वाले आई सके।’ 27तिन्हें बोल्या, ‘ता हे बापू, हांऊँ तुध किन्हें अर्ज करहा कि, तू लाजरा जो मेरे बापू रे घरा भेजी दे, 28क्यूंकि मेरे पांज भाई ऐं होर से जाई किन्हें तिन्हा जो चतन्न करी दे, एह्ड़ा नी हो कि स्यों भी एस पीड़ा री जगहा मन्झ आये।’ 29अब्राहमे तेस किन्हें बोल्या, ‘तिन्हा चतन्न करणे रे कठे ता मूसा री व्यवस्था होर नबिया री कताबा ई, स्यों तिन्हारी सुणे।’ 30तिन्हें बोल्या, ‘नंईं, हे बापू अब्राहम, पर अगर कोई मरिरे मन्झा ले तिन्हा वाले चतन्न करणे रे कठे जाए, ता तिन्हा पाप करणा छाडी देणा।’ 31तिन्हें तिन्हा किन्हें बोल्या कि, ‘जेबे स्यों मूसा होर नबी री नी मन्नदे, ता अगर मरिरे मन्झा ले कोई भी जी उठे तेबे भी तिन्हा तेसरा विस्वास नी करणा।’”

Currently Selected:

लूका 16: MJLNT

Highlight

Copy