Mphattuwelo 22

Nluku ahonlawiha Aparahamu

1Unavinre ukati vakani, Nluku ahonlawiha Aparahamu, amwiirelaka: Aparahamu. Uyo ahaakhula: Phi mi va. 2Vano Nluku aheera: Unkuse mwanaa, mwanaa mmoca yooyo, Isaki nonfentesaa uyo, ni urwee nttetthe wo'Muriyaa. Wakipankele yooyo wonwo isataka yoopahiya wamwaakoni unhalaka wuthoonyera.

3Wasilyaya vale, Aparahamu ahonwa ni ahontthenkemaniha puuru awe, ahaatthukana nloko amirawo awe eeli wamoca ni Isaki mwamwanawe, ahoparula ikhuni co'sataka, ahopwaha arwaaka nipuro naahimeriyawe ni Nluku. 4Nihuku noneeraru, Aparahamu ahowusa miitho awe ni ahoona nipuro nno nari uttayi. 5Ule aheerela amirawo awe: Nhalaceke va ni puuru ula. Mi ni mmirawo ola ninrwaa uswali nwe ninawuphwanyacani.

6Aparahamu ahokusa ikhuni nnye coorwa upaha isataka ni ahonrya Isaki, ni uyo ahokusa makhala o mooro ni mwaalo. Ni yeettacaka wamoca. 7Isaki aheerela athumwane: Paapa! Aparahamu ahaakhula: Phi mi va, mwanaka. Isaki ahaakoha: Makhala o mooro ni ikhuni phi nnya, vano iri vayi ikhontwaa yo'tthuvo yoopahiya? 8Aparahamu ahaakhula: Mwanaka, Nluku nawiivaha ikhontwaa yo'tthuvo yoopahiya. Ni yahopwahaca yeettacaka wamoca.

9Waphilyaya nipuro nathoonyeriyawe ni Nluku, Aparahamu ahoteka ikhilompi yoopaha isataka ni ahotataanihaca ikhuni vaavale. Ahontthuka Isaki, phumweesaka waculu ikhuni vale. 10Vano ahaawula ntata nakusilyawe mwalo ule wiira anhitte mwanawe. 11Nanso Ncelo a Mwanene Nluku ahomwiihana eeraka: Aparahamu! Aparahamu! Ule ahaakhula: Phi mi va. 12Vano Ncelo ule aheera: Uhinhonone mmirawo uyo. Uhimpanke itthu. Vano kihocuwela wiira we unamoova Nluku, kontha khukithuwile mwanaa, mwanaa yooyo rinaa mmoca paahi.

13Aparahamu ahowusa miitho awe ni ahoona ikhontwaa inaphanre inyaka caya nnyo wataparikhwani. Ahorwaa ukusa ni ahovaherera itthuvo yoopahiya nipuro no mwanawe. 14Aparahamu ahovaha nenno nipuro nno ncina na Mwanene Nluku Naavaha. Phimaana mpaka ilelo waneereliyaya: Mmwaakoni mwa Mwanene Nluku naavaha.

15Ikwaha yonayeeli Ncelo a Mwanene Nluku ahomwiihana Aparahamu 16eeraka: Mwanene Nluku heera: Kinaalupela mwa ncina naka, mwa nlattu wa yeela itthu ipankilyaa, uhikithuwa mwanaa mmoca yooyo urinaa, 17waamini wiira kinawureriha, ni ucuulu aa kinaawuncerera toko itthoottwa co wirimu ni nhaava wo mpharyaa. Ucuulu aa unkotthema isittatti c'eenani aya. 18Muucuuluni waa, maloko othene o mwiilaponi anaahala urerihiya, kontha we uhokiiwelela.#22.18 Miteko 3.25

19Vano ahohokoleela Aparahamu waaryaya amirawo awe ni othene wamoca yahoturuwela uPeresepa wakhalawe.

Ucuulu wa Nahori

20Unavinre ukati vakani, ahohimerya Aparahamu wiira Milka ahaayara asaana ni Nahori, munnawe Aparahamu. 21Usi aari ontthaara, Pusi munnawe, Kemuweli, athumwane Aramu, 22Kesete, Haso, Piltasi, Yitlafi ni Petuweli, 23athumwane Repeka. Ala asaana athanu na araru yaayanryawe Milka ni Nahori, munnawe Aparahamu.

24Ni mwaarawe oohitteeliheraniya, neehaninya Reyuma, ahaayara asaana ala: Tevaa, Kahami, Tahasi ni Maaka.

Currently Selected:

Mphattuwelo 22: NNI

Highlight

Copy