Mphattuwelo 21

Uyaryaa wa Isaki

1Mwanene Nluku ari ooloka ni Sara, toko camwiirenlyawe, ni ahompanka toko cankhuluvelihilyawe. 2Ukati waacilyawe Nluku, Sara ahonnyarana mwana Aparahamu nooluvanle. 3Mwana annyarannyawe Sara, Aparahamu ahonvaha ncina na Isaki. 4Isaki wapiihenryawe mahuku mathanu na mararu ookumi, Aparahamu ahomuuliha icantto, toko caalamuleliyawe ni Nluku. 5Ukati wannyanryawe Isaki, Aparahamu ahaana myakha iminya. 6Sara heera: Nluku hokiteeha, ni othene anhala ucuwela ila itthu ila anaahala uthyaa ni mi wamoca. 7Ni ahopwaherera eeraka: Aacuwela tipani wiira Sara nohala umwaamwiha mwana? Mothene mmo, mi kihonnyarana mwana Aparahamu nooluvanle.

Uthama wa Hakari ni Sumayili ntthoko na Sara

8Isaki ahonnuwa ni ahohiihiya nipele. Ni nenno nihuku nno Aparahamu ahopanka isukuhuulu. 9Woonnyawe Sara wiira mwana a Hakari, munnaciipitu, aananveha Isaki, 10ahomwiirela Aparahamu: Woomole ipottha ila ni mwanaya uyo, kontha mwana o'pottha ula khanhala ukhala mayowaakhela mihakhu wamoca ni mwanaka.#21.10 Akalata 4.30 11Iyo yahoncukuliha venci Aparahamu kontha ahokela mpwiini mmo mwanawe. 12Nanso Nluku ahomwiirela Aparahamu: Uhicukulace nlattu wo mwana ni wo'pottha. Upanke yothene inhalawe uhimya Sara, kontha mwa Isaki, phinhalaya ukhumelela ucuulu aa.#21.12 Aroma 9.7; Annaheperi 11.18 13Nanso, ciicammo ni mwana eepottha unakhala unethi, kontha ni uyo ri mwanaa.

14Wasilyaya wicisuru, Aparahamu ahokusa mikatthe ni nipinka no maasi oocarene, phunvahaka Hakari wiira akuse wanikhatani wawe ni ahonleeha wamoca ni mwanawe ule. Uyo ahottotta nttala, phurwaaka arukureryacaka itakhwa yo Peresepa.

15Wamanlyaya maasi nnipinkani mmwe, ahonhiya mpaka wanvelavelaya muupa wovonyinya ni muura, kontha eera: Akintthuna umoona mwanaka akhwakaya mwanawe waniphumpuluni 16ni ahonkoma wakhiviru wene, mattalivelo aya yaari toko muupa woolathiya. Nonkomilene vaavale, ahopacera wunla.

17Nluku aheewa wunla wo mwana, ni ncelo a Nluku o wirimu, ahomwiihana Hakari ni ahomwiirela: Unocukulani, Hakari? Uhoove, kontha Nluku heewa wunla wa mwanaa nwo nipuro nimweesilyaa nno. 18Unkuse mwanaa uyo, kontha mwa yooyo kimmopanka unethi mwinci.

19Vano Nluku ahontthukula wiitho Hakari ni ahoona iluusi. Ahorwaa mpaka nenne nipuro nne, ahocariha maasi nnipinkani mmwe n'unvaha mwanawe wiira awurye. 20Nluku ari ni mwan'oyo. Uyo ahonnuwa, ahokhala ntakhwani ni ahokhala mayolupattha ni muura. 21Aakhala itakhwa yo'Parani, ni anumwane yahomphavelela nthiyana o'lapo yo wIciipitu.

Aparahamu nawaatana ni Apimeleke

22Yoole ukati ule, Apimeleke naveleeliyene ni Fikoli, nhooleli a anatoropa awe, ahomwiirela Aparahamu: Nluku ri ni we ni citthu cothene cimpankaa. 23Vano, ukilupelele, wamiithoni wa Nluku, wiira khunkithepya tho, ukhuma mi mpaka asaanaka ni ucuulu aka wothene. Ulokihe ilapo iwaakhelenle unari nletto ni malokelo yupakilyaka. 24Aparahamu ahaakhula eeraka: Mi kiholupela.

25Nanso Aparahamu ahonkuphula Apimeleke nlattu wo'luusi yakhiyaya ipottha cawe ni nkhitto. 26Nanso Apimeleke ahomwaakhula: Akinoncuwela pankile iyo itthu iyo. Khunakihimerya itthu, ilelo va phincuwelaka.

27Paahi, Aparahamu ahowiha ikhontwaa ni imope, phimmahaka Apimeleke ni othene yaholeehana itthu imoca. 28Aparahamu ahothanlela nipuro naya ikhontwaa saapa. 29Apimeleke ahonkoha eeraka: Inthoonyera isiyani ikhontwaa saapa cikumihilyaa munhuwoni mmo? 30Uyo ahaakhula: Utthune ikhontwaa cinoovahaka nnya, toko usaahiti wocuwanyaa wiira thi mi kithipile iluusi ila.

31Phimaana nne nipuro nne niihaninyaka uPeresepa, kontha oyeeli wonwo phaatanacilyaya. 32Anaatanacilene uPeresepa, Apimeleke ni Fikoli, nhooleli a anatoropa awe, yahohokoleela ilapo yo annafilisitiya. 33Aparahamu arwaaka ahomphattyaa wepa uPeresepa ni vaavale aholapela ncina na Mwanene Nluku Oohimala. 34Ni Aparahamu ahokhala ukati mwinci ilapo yo annafilisitiya.

Currently Selected:

Mphattuwelo 21: NNI

Highlight

Copy