Mphattuwelo 20

Aparahamu ni Apimeleke

1Aparahamu ahokhuma vale arwaaka nttetthe wo'Nekepi ni ahorwaa ukhala iriyariru uKatesi ni uSuri. Wahoolo ahokhala ukati vakani uKerari. 2Uyo eera Sara wiira mwanrokoraka. Vano, Apimeleke, mwene uKerari ahoruma urweeliya Sara ni ahonkusa ukhala awawe. 3Yooyo uhiyu uyo Nluku ahowa waApimeleke munttorani ni ahomwiirela: We unaakhwa! Athiyana yakusilyaa ayo ahotheliya. 4Nanso Apimeleke, hinaya waarupana aheera: Pwiya, nnowa ukwanyula unethi woohicuwela itthu? 5Kahimwe yooyo phikiirenle: Nthiyana ola mwanrokoraka? Ni ayo khayiinre: Nlopwana ola nrokoraka? Ipankilyaka iri yo nrima woorera ni woohi nlattu.

6Vano Nluku ahomwaakhula munttorani: Aye, mi kinaacuwela wiira upankile itthu iyo ni nrima woorera. Mi kihoohiiha wiira uhikufuru phimaana kiwaatelihaka warupana. 7Vano waaturusele athiyana ayo awannyaya. Maana awannyaya ayo nnapiyu, ni anawuswalela wowufentelela, wiira we uhikhwe. Nanso wahaaturuseke, ukupali wiira we ni awaa othene nnaakhwaca.

8Wasilyaya wicisuru Apimeleke ahaalattula mahumu awe ni waattonkela cothene cankhumelenle, ni yahoovaca venci.

9Wahoolo Apimeleke ahomwiihana Aparahamu ni ahomwiirela: Unipankile cani? Kukosenre isiyani mpaka ukikosiha venci ni umwene aka wothene? Ikipankile iyo khampankiya ntthu. 10Ni Apimeleke ahonkoha Aparahamu: Yupankihile isiyani commo? 11Aparahamu ahaakhula: Kahoopuwela wiira: Khweli khaawo nomoova Nluku nna nipuro nna ni kinawiiviya nlattu wa amwaaraka. 12Uhiya commo, ayo khweli mwanrokoraka mphantte wa apaapa, nanso woohikhala mphantte wa maama. Vano ahokhala amwaaraka. 13Ni Nluku wakikumihilyawe uwani wa apaapa, mi kaheerela amwaaraka ayo: Nkiweele iraati: Nipuro phi nipuro ninhalehu uphiya, nkiireleke wiira: Ule nrokoraka.

14Vano Apimeleke ahowiha ikhontwaa ni imope, ipottha cilopwana ni cithiyana, ahonvaha Aparahamu ni ahonturusela amwaarawe ayo. 15Ni Apimeleke aheera: Ilapo aka iri ni we. Ukhaleke nipuro phi nipuro ninoocivela. 16Apimeleke ahomwiirela Sara: Arokoraa ayo kihaavaha ncurukhu ilufu wo'pheeta, wiira walivyaane wutthekenlyaka va wamiithoni wa atthu othene. Commo othene phinhalaya ucuwela wiira we khiiwo incuwelaa yookosa.

17Wahoolo, Aparahamu ahonvekela Nluku wiira avone, ni Nluku ahonvoniha ni amwaarawe ni ipottha cawe, mpaka yahanca uyaraca, 18kontha Mwanene Nluku ahaapankaca eekupa asithiyana othene a Apimeleke nlattu wa Sara, amwaarawe Aparahamu.

Currently Selected:

Mphattuwelo 20: NNI

Highlight

Copy