Mphattuwelo 19

Ancelo eeli yahophiyaca uSotoma

1Waakelaya ncuwa nno ancelo eeli ale yahophiyaca uSotoma, ni Loti onkomile wankhora wo'sittatti. Ukati woonnyawe ahonwa ni ahorwaa waakhelelaca. Ahokhoroma ni ahopiiha iyuuci awe vathi, 2ni aheerelaca: Contte asuulupale aka, kharipu mpaani wa karumeya enyu. Wonwo nnaahala urapa n'urupa. Wasaka meelo mpwaheke nrwaaka. Ayo yahaakhulaca yiiraka: Mena, ninkorupa vate. 3Nanso ule ahaakhanyererihaca, ni ale yahontthara ni yahokelaca mpaani. Loti ahoruma watthonkomaniheraca iyolya ni woosa mikatthe coohi miropo, ni ale yaholyaca.

4Ahinaya urwaaca wurupani, alopwana othene o miphantte cothene co'Sotoma, ukhuma acikani ni oolupale yahovirelaca inupa eyo. 5Ni yahomwiihanaca Loti amwiirelaka: Ari vayi alopwana awacile wapuwani waa ayo ula uhiyu ula? Uniwiihere vate va nimphavela waarupana. 6Loti ahokhuma mpaani mmwe, ni ahotthyaa nkhora uyo nttuli nttuli, 7ni aheerelaca: Mena asimpwanaka! Nhipankace itthu yoonanara! 8Moonace, kihaana asaana eeli asimwarusi. Kinawaawaana wiira nyu mwapankace itthu imphavelenyu. Nanso ala asilopwana ala nhaapankace itthu, kontha ari mmatatani mwaka ni ankhikicera ipuwa aka. 9Yahokhuwelaca yiiraka: Ukhume va! Ni yaheeraca tho: Ula nlopwan'ola, nletto. Vano nophavela ukhala mayohukhumu! Ninkowupanka we itthu yootepa waavikana ayo. Vano yahonkakhaca Loti wonkhitto ni yahorwaaca uhoolo wiira yaakace nkhora. 10Commo, aletto eeli ale yahonvaraca Loti n'umpurulela mpaani ni yahotthyaca nkhora uyo. 11Vano yaharakalihaca ni iretta yohoona alopwana yaari wankhora wo'nupa ayo, ukhuma acikani mpaka oolupale, mpaka wahinooryaya woona nkhora.

Nluku ahokurusela mooro iparasa yo Sotoma ni uKomora

12Alopwana eeli ale yahonkohaca Loti: We uhaana tho ntthu mparasani mu, asivokohaa, asaana asilopwana na asithiyana, atthuna mmuci nkina? Mwaatamihace va, 13kontha nimphavela ukwanyulaca nna nipuro nna. Cinaariyelelawe Mwanene Nluku ala atthu ala ciri cinci, phimaana honiruma ukwanyula iparasa. 14Vano Loti ahorwaa wuulumana asivokohawe, ale yaahala waathelaca asaanawe, ni yaheerelaca: Nkhumace wowaakuvyaca nna nipuro nna, kontha Mwanene Nluku nophavela ukwanyulaca iparasa ela! Nanso ayo yooniha toko mwaha.

15Ukhuma waya ncuwa, ancelo ale yahonkhanyererihaca Loti yiiraka: Waakuve! Waakuse amwaaraa na asaanaa eeli, atthuna ni nyu nnaahala ukhwaca wanhalaya uttarusiya iparasa eyo. 16Amananihaka ukhotta, asilopwana ale yahommaraca moono, wamoca na amwaarawe na asaanawe, ni yahaakumihaca nipuro nno wo'kuru ni yahaahiyaca uta waya iparasa, kontha Mwanene Nluku ahoonelaca ikiriri. 17Ukumihiya waya mparasa mmwe, ncelo mmoca ahomwiirela Loti: Ntthawe mwa nlattu woofenta ukumi! Uhiwehe uttuli hata uheemele nipuro nnikuwani! Utthawele umyaakoni; waahitthuneke, we unaahala wiiviya!

18Wahoolo Loti aheerelaca: Mena, Pwiya aka! 19Karumeya enyu hokhala uwoopwa mwa nlattu wo'kiriri cinyu, kontha nyu nhokoonela ikiriri nrattavelelaka ukumi aka. Akinoorya utthawela mpaka umwaakoni, wiira yowerya ila ihikiphwanye ni mi kikhwaaka. 20Wakhiviru va ihaawo iparasa yankani. Iri wakhiviru cinene wahorera utthawa mpaka uphiya wonwo. Nkihiye kirwee wonwo! Hata ikhale yankani cinene, kinkokhala uwoopwene. 21Ule ahaakhula: Wahorera. Mi kinaahala wukavihera yeeyo ivekenlyaa eyo. Akinhala ukwanyula iparasa inhimilya eyo. 22Utthawe wowaakuvya. Akinhala upanka itthu we uhinaya uphiya wonwo. Phimaana iparasa iyo yiihaniyaka Sowari, maanaya ikani.

23Loti, uphiya wawe uSowari, ncuwa nahokhuma mwiilaponi mmo. 24Vano Mwanene Nluku ahokurusela ilapo yo'Sotoma n'uKomora mooro ni wooka wookhuma wirimu. 25Commo ahokwanyula nnye isittatti nnye ni nikuwa nothene, wamoca na atthu yaakhalaca ayo ni imatta caya nnyo. 26Nanso amwaarawe Loti yahoweha uttuli ni yahothatuwa iruwa yo maakha.

27Wasilyaya, Aparahamu ahonwa ni ahoturuwela nipuro namoonananyawe Mwanene Nluku. 28Ni ahoweha uSotoma ni uKomora, ni unikuwani nothene, ni ahoona mwiisi mwinci uwelaka ukhuma vathi, toko mwiisi wo nttukutthani.

29Ukati wakwanyunlyawe iparasa ciri unikuwani, Nluku ahomuupuwela Aparahamu ni ahonkumiha Loti mmasakhani wokwanyuliya iparasa cakhalawe.

Loti ahokhuma uSowari na asaanawe eeli asithiyana

30Loti ahokhuma uSowari na asaanawe eeli asithiyana ni yahorwaaca ukhala umyaakoni, kontha anawoova ukhala uSowari. Ule aakhala nnikhukuni wamoca na asaanawe eeli asithiyana.

31Nihuku nimoca, mwana mwanthiyana omuulupale, ahomwiirela omwankani uyo: Apaapehu ahooluvala, ni khaawo nlopwana wakhiviru oonithela toko ilemalelo yo'lapo yothene. 32Nrwee naavahe nipha apaapehu ni wahoolo va nathukumananeke wiira nloko nihu nihikhwelakhwele. 33Yoole uhiyu ule yahaavahaca nipha athumwanaya. Vano mwana mwanthiyana omuulupale uyo ahokela ni ahaathukumanana athumwane. Ni ale khayaacuwelenle ukati warupilyawe ni wonwilyawe. 34Usa waya, mwana mwanthiyana omuulupale uyo ahomwiirela omwankani uyo: Uhiyu kihaathukumanana apaapa. Nrwee naavahe tho nipha ula uhiyu ula, ni we unaahala waathukumanana, wiira nihikhwelakhwele nloko na apaapehu. 35Vano yahaavahaca tho nipha athumwanaya yoole uhiyu ule, ni mwana mwanthiyana omwankani uyo ahorwaa waathukumanana. Ni ayo khayaacuwelenle ukati waarupilyawe ni wonwilyawe. 36Commo, asaana oyeeli a Loti yahorupalihaciya na athumwanaya.

37Omuulupale uyo ahonnyara mwana, ni ahonvaha ncina na Mwape. Yooyo phiri athumwane Amwape o'lelo. 38Omwankani uyo ciicammo ahonnyara mwana, ni ahonvaha ncina na Pin-Amii. Ula phiri athumwane atthu Amonii o'lelo.

Currently Selected:

Mphattuwelo 19: NNI

Highlight

Copy