Mataio 16

1Ina Parisea oubira Sadukea oubira nei naibaha o’uwaumo wia neiio nouido ematuhutiwaumo naiba atodoumo, tiaha modobo toboroudo neido iwaeviai. 2Iesuro neido naibaha imowameai naiba iaowa: Ina nou dohori, rio naiba rarodumo, dudueido hiwio meaha reheheaidai, nouri bani airoiiodoi. 3Ina nou aibo hiwio iheheaiwa rio naibaha rarodumo: hiwio nouri uba airoitidai nouri toboro kaikarawiri wia bubu godori. Rio kiromohuwodio oubi, toboro modobo nana’i rio umori; tounai doihabuo hiwio modobonu rio umo biahai? 4Nouri ubauba wia siwokori oubio modobo naibaha airomohodumo wia ata modobo neido imaai raihe, na’u lona modobo nou himia gauwoha. Ina nouro nei naibaha imeheai, naibaha o’u.

5Ina nou kitomudio mere ata hapuoito naibaha abumo. Neiio dodo’iha oitiumo dou kopi imidaimoi. 6Ina Iesu neido naibaha iaowa: Taiaurimo meaha rio, Parisea dou kiaupai na’i wia Sadukea dou kiaupai na’i rioo tore taimaatimo. 7Wia nei himia himia naiba iaowaumo: Nouri imo dou imidaimo biahai. 8Ina Iesu nou naiba umodaiti, nou neido naibaha iaowa: Rio kekekeke kiraromodio oubi, tou riaowadumo rio himia himia, nouri dou kopi imidai tato? 9Ina doihabuo rio umooitimo tatora? Wia nouri 5 dou kopi 5,000 oubi neido, wia nouri kiapeuti hao modoboi rioo naibaha ibiwaumo, rioo araromomo tatora? 10Naiba 7 dou kopi wia 4,000 oubido wia nouri kiapeuti hao rioo naiba ibiwaumo, rioo araromomo tatora? 11Teiri rio umoitimo tatora? Mo rioido dou kopi na’i orowaduo biahai, na’u Parisea dou kiaupai na’i wia Sadukea dou kiaupai na’i, rioo tore taimaatimo. 12Ina nou ta’uwa nei naibaha umoitimowa teiri dou kiaupai na’i nou neido imadohiomai biahai, na’u Parisea wia Sadukea kiatomuai wade’i.

13Ina Iesu Kaisarea Pilipi auwo‐turi baraito naibaha o’uro, nou kitomudio mereido nouro naibaha iatodoi, naiba iaowa: Mo Oubiha‐mereri, oubio mo botito nemahoodumo? 14Wia nei naibaha iaowaumo: Amida naiba riaowadumo, Ioane Babatiso wia amida naiba riaowadumo, Ieremaia e peroveta dubu ata. 15Nou neido naiba iaowa: Rio taiba rararomodumo mo botiri? 16Wia Simona, paina ata Pita, naibaha omowameai, naiba iaowa: Rovia Kerisori; Kiiro Urio‐abea, nou Mereri. 17Wia Iesuro naibaha omowameai, nouido naiba iaowa: Ro tiaha geiiri, Simona Baiona, mabu nouri hio wia sawi nouri wade roido owaevia biahai wia mo Abea toborowa airemidio, nouro roido tau iwaevia. 18Wia mo roido ainaro: Rovia Pita, wia mo Ekalesia nouri akabu ohuwa moro ainai‐ididi, wia Gehena pupuo na’i neiio nouido otoihiromo raihe. 19Wia Toboro‐bububati key amida roido ainamaai wia nouri nana batibatiwa roro aiwarotohiti nei Toboro‐bububutiwa aiwaimo‐itohiti; wia nouri nana batibatiwa roro aiwamopiwoi, toboro‐bububatiwa nei aiwaimopiwuti. 20Nou ta’uwa nou himia kitomudio mereido nou wade modoboito iaowa: Oubi amidaido rioo orowadoutimo aue mo Kerisori.

21Ina ta’ui noudo Iesuro nou himia kitomudio mereido iatomuai naibaha iai, nouri nou Ierualemaido ioro wia godogodo heauwo nana mamusi mamusi wia auwo kohena oubi wia titi oubi nei mabudo nouro aiwaiviai, wia nouvia neiio aiwaimo‐epiai wia hiwio neewa na’u oboiri nou ina aiwaroitorai. 22Ina Pitaro nouido naiba ohiai wia nouido naibaha emadohiomai, naiba iaowa: Naiba biahai, Pai dubu e! Nana nou aibo roido o’u raihe. 23Wia Iesu idaaraorairo wia Pitaido naibaha iaowa: Satani mo dooudo ta’uro. Ro mo gooa nowai, nouri Iehova nana roro iraromodio biahai, Na’uwia, oubiha nana kiraromodioi. 24Nou ta’uwa Iesuro nou himia kitomudio mereido naiba iaowa. Ina dubu nou niro mo dooudo o’ui, nou himia nana mimeheai ina tutuha o’ui, ina nou himia satauro memidai ina mo naibaha tanobodoro. 25Nouri dubu nou niro nou himia kiiro o’ui, do’o nou aiwaratoai; wia nouri dubu nou moido kiiro atoaiwa, nourowia kiiro aiwaweai. 26Ina dubu nou oopo oopo nana auwoha tau idabutiwaro wia nou himia urio naibaha katoairi, touna wiha mea’i nou? Touna wamaai nou, nou himia urio koromowa’umia na? 27Ina nou ta’uwa Oubiha‐mere aiwauro’ui nou himia Abea moariwa wia nou gururu meremu, oubi auwoha nouro wiha aiwaimaati, auwoha mereido nou himia kidodiai nana’i nou aibo. 28Naiheha mo rioido ainaro: Amida oubi nouowa airotoidumo, koroihi na neiio iviamo biahai, opuito Oubiha‐mere nou bububatiwa o’uwa neiio aiwaimo‐eauri.

Currently Selected:

Mataio 16: KXW1941

Highlight

Copy