Lûqa 19
19
Tahsîldar Zaqay
1Îsa kewt sûka Erîha mîyan û uja ra ravêrdê. 2Uja di jew mêrdekêndo bol zengîn bi, nameyê ci Zaqay bi ew o jew pîlê tahsîldaran bi. 3O qayil bi bizano no Îsa kam o, heqûnheq Ey bivîno. Hima bejna ey kilm bî, qandê coy milet ra ey nêşayê ki Îsay bivîno. 4O zî vernî di vazda û vijya jû tûwêr#19:4 Orîjînal di, nameyê na dar sycamor, na dar Îsraîl di bena. Girdeya ci ew perrê ci zeydê tûwêra yê, hima mexelê ci encîlan maneno. ser ki Îsay bivîno, çiki Îsa do uja ra ravêrdayê.
5Senî ki Îsa ame tûwêr hetek, weyna cor ra û veynda ey, va: “Zaqay, rew bê war! Gerek ez ewro keyedê to di meyman ba.” 6Zaqay tûwêr ra ecele ame war û bol kêfa Îsa keyedê xo di qebul kerd.
7Merdiman senî no dî, pêro vajîyay û wuna va: “O şi jew merdimdê gunakarî rê bi meyman!”
8Hima Zaqay ageyra Îsay ew Ey rê va: “Rebbî, nîmeyê milkdê xo ez dana feqîran, ew eki mi kesî ra çîyê neheqeya giroto se, ez do çehar qatê ci vêşî peyser bida.”
9Wexta Îsay ey rê va: “Ewro reyayiş kewt nê keyî mîyan, çiki no merdim zî raşta lajê Îbrahîmî yo. 10Xora Lajê Însanî ame ki oyo ki bîyo vinî, bigeyro ey ew ey bireyno.”#19:10 Bewnîrê letedê 5:31-32.
Mesela Padîşa û Des Teney Koleyê Ci
(Matta 25:14-30)
11Wexto ki înan goştareya nê qisan kerdê, Îsay înan rê jûna mesel va, çiki O amebi nezdidê Yeruşalîmî ew înan vatê qay Hukumdareya Ellay do bol nezdi ra uja di biaso. 12Ay ra Îsay înan rê va: “Jew merdimêndo hesibnaye bi, o şi jew welatêndo dûrî ki uja di heqê hukumdarey bigîro ew bahdo peyser bîro welatdê xo. 13Hendik hewna nêşibi, veynda des kolandê xo ew des mînayê sêminî#19:13 Jû mînaya sêmin, nîm kîlo sêmî ra vêşî bi. înan mîyabeyn di kerdî bara. Ey va: ‘Hetanî ez fina bîra, nê perrana xo rê kar bikerê!’
14“Hima qewmê welatdê ey, ey rê dişmen bi ew mîyanikî ey dima merdimî riştî ki ê şirê, vajê: ‘Ma nê merdimî xo sero padîşa nêwazenê.’
15“Fina zî o bi padîşa û peyser ame. Ey emir da wa veyndê ê kola, êyê ki ey perrey daybî ci. Çiki o qayil bi bizano înan ê perrana çi kar kerdo. 16Sifteyênê ci yeno ey hetek ew vano: ‘Begê mi, jû mînaya to ya sêmin, des mînayê sêminî qezenc kerdî.’
17“Beg vano: ‘Eferim to rê, ti koleyêndo rind ê. Çiki ti girwedo wuna werdîkek di mezbut vijyayê, qandê coy, ti do des sûkan sero hukumdarey bikerê.’
18“Êdê didin yeno ew vano: ‘Begê mi, jû mînaya to ya sêmin, panj mînayê sêminî qezenc kerdî.’
19“Beg ey rê zî vano: ‘Ti do panj sûkan sero hukumdar bê.’
20“Naqor bahdoyênê ci yeno û wuna vano: ‘Begê mi, na mînaya xo ya sêmin fina bigî, mi a pişt jû dismal ra ew nimit. 21Ez to ra tersaya, çiki ti merdimêndo sert ê. Çîyo ki paya to çinî ya, ti gênê ew çîyo ki to nêkarrito, ti ey arêdanê.’
22“Beg ey rê vano: ‘Ey koleyo xirab, qiseyê ki to fek ra vijyayê, ez do ê qisana to mahkûm kera. Eki to zanayê ez merdimêndo sert a, çîyo ki paya mi tede çinî ya, ey gêna ew çîyo ki mi nêkarrito ey zî arêdana, 23winî yo se, çi to perreyê mi faîza nêday? Qenê wexto ki ez peyser ameya, mi faîzîya pîya girotê.’
24“Êyê ki çorşmedê ey di bî, beg ageyreno înan û vano: ‘Ey dest ra ê perran bigîrê ew oyo ki des qatî qezenc kerdê, bidê ey!’
25“Ê ey rê vanê: ‘Begê ma, ey di xora des mînay estê!’
26“O zî înan rê vano: ‘Ez şima rê vaja, kamî di esto se, vera vêşî do bideyo. Hima kamî di çinî yo se, çîyo ki ey di, o do zî ey dest ra bigêrîyo. 27Naqor dişmenê minê ki qayil nêbî ez ci rê padîşayîn bikera, înan bîyarê tîya ew çimandê mi vero bikişê!’ ”
Îsa Senî Şino Yeruşalîm
(Matta 21:1-11; Marqos 11:1-11; Yûhanna 12:12-19)
28Bahdê na mesela, Îsa fina rayda xo ra şi hetê Yeruşalîmîya. 29Wexto ki Îsa resabi nezdidê dewandê Beytfacê û Beytanya, Kerredê Zeytûnan di, Ey di teney telebeyê xo vernî di riştî. 30Ey înan rê va: “Dewa ki vernîda ma di, şirê a dew. Şima ki resay dew, şima do uja di jew kirrîyê herî girêdaye bivînê, hewna qe jew merdim ey nênişto. Wesarê ey akerê ew bîyarê tîya. 31Eki jew şima ra pers keno ew vano, şima yê qandê çiçî wesarê ey akenê, wexta vajê: ‘No Rebbî rê lazim o.’ ”
32Nê wirna şinê, ew heme çî zeki Îsay înan rê vatbi, înan eynî winî dî. 33Senî ki înan wesarê kirrî akerdê, wihêranê ci va: “Çi şima yê ey akenê?”
34Înan zî va: “O Rebbî rê lazim o.”
35Înan her ard Îsay hetek, çakêtê xo eştî herî ser ew Îsa zî na herî ser. 36Îsa herî sero şîyê ew merdiman zî vernîda ey di çakêtê xo Ey rê ray sero rakerdê. 37Senî ki Îsa ame nezdidê ray, raya ki Kerredê Zeytûnan ra şina cêr sûk mîyan, wexta telebanê ci hemin kêfa ew vengdo pêta Ellay rê hemd û şukur kerdê, kerematê ki înan dîbî, qandê înan hemin veyndayê ew vatê:
38“Qiralî rê mibarek bo,
Oyo ki namedê Rebbîya yeno!
Wa azmînî rê silametey
Ew Elladê corî di şukur bo.”
39Şêligî mîyan ra tayn Ferîsîyan va: “Begê ma, telebandê xo rê vaj, wa vengê xo nêkerê!”
40Îsay înan rê wuna va: “Ez şima rê vaja, eki ê vengê xo nêkerê, wexta nê sî do biqîrê!”
Îsa Qandê Yeruşalîmî Bermeno
41Îsa ame nezdidê sûk, senî ki a dî, qandê ay berma. 42Wuna va: “Kaşka to zî na roj bidîyayê ew bizanayê ki çiçî to rê silametey ano! Hima no çimandê to ra nimyayo. 43Qandê to do winî rojê bîro ki wexta dişmenê to do çorçorşmeyê to bigîrê ew heme ca ra do to teng fînê. 44Ew ê do to xirabe kerê, ew qeçê toyê ki to mîyan di roşenê, ê do înan zî bikişê. Ê do sî sîyer sero nêverdê, çiki to nêzana wexto ki Ella ame to bireyno, qe to fahm nêkerd.”
Îsa Qahrîyeno
(Matta 21:12-16; Marqos 11:15-18; Yûhanna 2:13-17)
45Bahdo Îsa şi Keyedê Ellay ew êyê ki uja di çîmîyê xo rotê, ê pêro qewirnay teber. 46Ey înan rê va: “Kitab di vano ki ‘Keyeyê mi do keyeyê duayan bo.’#19:46 Bewnîrê kitabdê Yeşaya'y di 56:7. Hima şima tîya kerdo mixareyê xirxizan!”
47Îsay hirg roj Keyedê Ellay di wahzî dayê. Serê kahînan, Alîmê Kitaban ew tayn merdimê hesibnayey geyrayê ki rayê bivînê ki senî Îsay bikişê. 48Hima înan nêzanayê ki se kerê, çiki milet pêro heta Ey bî ew goştareya qisandê ey kerdê.
Currently Selected:
Lûqa 19: diq
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
