Lukas 15

Prumpamaan tentang tu domba yang da dapa ulang

(Mat. 18:12-14)

1 # Luk. 5:29-30 Satu kali tu petugas-petugas pajak deng orang-orang yang orang ja anggap berdosa datang pa Yesus for badengar pa Dia. 2Kong di situ lei ada orang-orang dari golongan Farisi deng ahli-ahli Taurat. Dorang lia itu kong dorang babafeto bagini, “Ni Orang ini trima tu orang-orang berdosa deng makang sama-sama deng dorang.”

3So itu, Yesus se tau satu prumpamaan pa dorang, 4“Kalu ada di antara pa ngoni yang ada sratus ekor domba, kong tailang akang satu ekor, apa tu dia mo beking? Pasti dia mo kase tinggal tu sambilan pulu sambilan ekor di padang rumpu kong dia pi cari sampe dapa tu satu ekor yang da ilang itu. 5Kalu dia so dapa tu domba itu, dia jadi snang kong pikul tu domba pa de pe bahu. 6Kong pe sampe di ruma, dia pangge de pe tamang-tamang deng birman-birman kong bilang pa dorang, ‘Mari jo basnang-snang deng kita, lantaran tu kita pe domba yang da ilang itu so dapa ulang.’ 7Kita bilang pa ngoni, bagitu lei kalu ada satu orang berdosa kong dia bertobat, samua tu ada di sorga lei mo snang skali. Tu dorang pe snang waktu tu satu orang bertobat itu, lebe dari dorang pe snang lantaran tu sambilan pulu sambilan orang yang so butul, tu nyanda perlu lei bertobat.”

Prumpamaan tentang satu doi perak tu da dapa ulang

8Yesus se tau satu prumpamaan lei, “Ada satu parampuang yang ada spulu doi perak. Kong dia tailang akang satu doi perak. Trus apa tu dia mo beking? Tantu katu dia mo se manyala tu pelita, trus dia sosapu tu de pe ruma kong cari bae-bae tu doi sampe dia dapa tu doi itu. 9Kong waktu dia dapa tu doi itu, dia pangge pa de pe tamang-tamang deng birman-birman kong babilang, ‘Mari jo basnang-snang deng kita, lantaran kita so dapa ulang tu kita pe doi yang da ilang.’ 10Kita bilang pa ngoni, bagitu lei kalu ada satu orang berdosa kong dia bertobat, di sorga Tuhan Allah pe malaekat-malaekat lei snang skali.”

Prumpamaan tentang bapak yang da trima ulang tu de pe anak

11Yesus se tau satu prumpamaan lei, “Ada satu bapak yang ada dua anak laki-laki. 12Satu kali, tu bungsu babilang pa dia pe papa, ‘Papa, kase jo kwa pa kita tu warisan yang jadi kita pe bagean!’ Kong dia pe papa kase berbage tu dia pe kepunyaan pa dia pe dua anak itu. 13Kong serta so bebrapa hari, tu bungsu jual samua tu de pe bagean itu kong pigi ka negri yang jao. Di sana dia kase boros tu de pe doi deng hidop bafoya-foya. 14Waktu de pe doi samua so abis, di negri itu ada kelaparan pe hebat skali, sampe dia mulai susa. 15Kong dia pi bakarja pa satu orang di negri itu. Tu orang itu suru pa dia pigi ka kobong for jaga tu orang itu pe boke. 16Dia pe lapar skali sampe dia suka mo makang tu boke-boke pe makanan. Mar biar dia lapar, nyanda ada satu orang yang da kase makanan pa dia.

17Kong de pe laste, dia sadar deng de pe keadaan trus babilang, ‘Pa kita pe papa pe ruma, samua tu orang karja pe makanan talebe-lebe, mar kita di sini amper mo mati kelaparan. 18Lebe bae kita pulang pa kita pe papa, kong kita mo bilang pa dia, “Papa, kita so berdosa pa Tuhan Allah deng pa papa lei. 19Kita nyanda pantas mo jadi papa pe anak lei. Jadi skarang beking jo kita ini jadi papa pe orang karja.” ’ 20So itu dia pulang pa de pe papa.

Kong masi lei dari jao, tu de pe papa so lia pa dia. Kong de pe papa jadi rasa kasiang skali pa dia, sampe dia pe papa lari pi badekat trus polo kong ciong pa dia. 21Tu anak itu babilang pa de pe papa, ‘Papa, kita so berdosa skali pa Tuhan Allah deng pa papa lei. Kita nyanda pantas lei mo jadi papa pe anak.’

22Mar dia pe papa itu babilang pa de pe orang-orang karja, ‘Capat bawa akang kamari tu juba yang paling bagus kong se pake pa dia. Trus se pake lei tu cincin pa de pe jare deng capatu pa de pe kaki. 23Kong ambe jo tu sapi muda yang gode kong potong. Abis itu, mari jo torang makang deng basnang-snang. 24Soalnya kita pe anak ini sama deng so mati kong so hidop ulang. Dia so ilang, kong so dapa ulang.’ Trus dorang mulai basnang-snang.

25Waktu itu, tu anak yang tua ada di kobong. Waktu dia pulang kong so dekat deng de pe ruma, dia dapa dengar ada suara musik deng orang-orang yang da bamanari. 26Kong dia pangge satu orang karja trus batanya pa tu orang karja itu, ‘Ada apa pa kita pe ruma kang?’

27Tu orang karja itu manyao, ‘Bos pe ade so pulang! Kong bos pe papa so suru potong sapi muda yang gode lantaran bos pe ade so pulang ulang deng slamat.’

28Pe dengar itu, tu anak yang tua itu jadi mara kong dia so nimau mo maso ka ruma. So itu de pe papa kaluar kong pi buju pa dia. 29Mar dia tare cuma da manyao pa de pe papa, ‘Papa, kita so deng taong-taong da karja kras for papa, deng kita lei blum perna langgar tu papa pe prenta. Mar papa blum perna kase akang pa kita biar cuma satu ekor kambing supaya bole makang for basnang-snang deng kita pe tamang-tamang. 30Mar tu papa pe anak itu, dia so se boros tu papa pe kepunyaan deng tu parampuang-parampuang nakal. Kong skarang waktu dia so pulang, papa potong akang sapi muda yang gode for dia.’

31Kong dia pe papa manyao pa dia, ‘Hei papa pe anak, ngana ini slalu ada sama-sama deng papa kong samua tu papa pe kepunyaan, ngana punya lei. 32Torang skarang musti snang deng beking pesta lantaran tu ngana pe ade sama deng so mati, mar skarang dia so hidop ulang. Dia itu sama deng so ilang mar skarang so dapa ulang.’ ”

Currently Selected:

Lukas 15: MDO

Highlight

Copy