Yohanes 3

Em pepaaren i Yesus wo si Nikodemus

1Awéan esa tou makangaran Nikodemus. Sia itu tou Farisi wo kikiiten é agama Yahudi. 2Asi sangawengi sia mai an tampa i Yesus, wo icuana ai Sia, “Guru, kailekan ami si Guru ayutus i Amang Kasuruan en sumusui ai cami. Ampa'paan, ra'ica wana tou e ro'na méma' sé kakaya'kaan kaputé sé niéma' i Guru, sa si Amang Kasuruan ra'ica mewali-wali wo isia.”

3Isowat i Yesus, “En ulitna icua-Ku mangé ai co, sa si esa tou ra'ica touen sumawel sia ra'ica mamuali tou i Amang Kasuruan ang Kakolanoan-Na.”

4Icua i Nikodemus ai Sia, “Tumambisa réén si esa tou matu'ao wo ro'napé' touen? Ro'napé' réén sia muntep sumawel am poot i inangna wo touené' ka'i?”

5Isowat i Yesus, “En ulitna icua-Ku mangé ai co, sa si tou ra'ica touen sumawel an dano wo e Roh i Amang Kasuruan, sia ra'ica muntep ang Kakolanoan i Amang Kasuruan. 6En owakta anio' tumou asi matu'ata, taan e rohta itumou asi Roh i Amang Kasuruan owo. 7Tioo ko mangaya'ka', sa icua-Ku sapaoka icamu im baya musti touen weru. 8Si esa wo si esa tou si tumou asi Roh i Amang Kasuruan, ra'ica makailek tambisa e Roh-Na itu matawoi. En itu ro'na ipeputé wo in deges si mengareges am bisa-wisa wo téngéna ke' si ro'na kalingaanmu taan ra'ica kailekanmu am bisa owo en deges itu imai wo am bisa en angéanna.”

9Wo icua i Nikodemus, “Tumambisa réén en itu ro'na mamuali?”

10Isowat i Yesus, “Ico guru agama si pasiri-siriin é tou Israel, kéitu réén ra'ica kaangéanmu sé andumoro' in itu? 11En ulitna icua-Ku mangé ai co, ipakua ami sapa sé kailekan ami, wo em pasairi ami sapa sé sinéréo ami, taan kamu sé kikiiten é tou Yahudi ra'ica kiim tumerima ing kasairian ami. 12Yaku ra'ica pinercaya miow an tutuw-Ku i mapaar ai camu andumoro' sé ang kayo'baan anio'. Tambisa réén percayan iow Aku sa Aku numuwu' andumoro' sé an sorga? 13Ra'ipé' wana esaan tou ka'i en sumangkumo imangé an sorga. Wayake' Yaku si Toyaang i Tou si mai an sorga owo, anaé Yakuo si makailek andumoro' sé an sorga.

14 # Bil. 21:4-9 Wo an tutuw é apo-apo'ta an tana' kapayasan, wo émaan i Musa esa koloi' an tambaga owo wo iwérénna si coloi' itu asi sangapokol kayu. Taniitu ka'i si Toyaang i Tou, musti iwérén an tiang ing kayu, 15wosama' si esa wo si esa tou si maéman ai Sia ro'na makéré ing katouan akar ing kauré-uré.

16Ampa'paan taloso wangko' eng kaupusan i Amang Kasuruan a sé tou ang kayo'baan anio' akar iwéé-Na mai si Toyaang-Na si Esa-esa, wosama' si séike' si maéman ai Sia ra'ica maté taan makéré ing katouan akar ing kauré-uré. 17Ampa'paan si Amang Kasuruan mutus si Toyaang-Na ang kayo'baan ra'ica mai makim sé tou iméma' ing kamesé-meséaan, taan Sia mai en lumowir sé tou an ukuman ing kamesé-meséaan éra. 18Si séike' si maéman a si Toyaang-Na ra'ica ukumen i Amang Kasuruan. Taan si séike' si ra'ica maéman aitantuo i Amang Kasuruan in ukumen, ampa'paan séra ra'ica maéman a si Toyaang-Na si Esa-esa.

19Si anioo e mangémai si Amang Kasuruan mukum sé tou ang kayo'baan anio': En sendot mayo ang kayo'baan, taan sé tou masalé'ke' ing kariréimbengan, ra'ica masalé' in sendot itu, ampa'paan séra masalé-salé'ke' mengaéma' ing kaléwo-léwo'an. 20Si séike' mangé sé mengéma-ngéma' ing kaléwo-kaléwo'an, sia masuut in sendot wo ra'ica kiim mai sumusut an sendot itu, wosama' sé pengéma-ngémaanna léwo' itu ra'ica kaséréan. 21Taan si séike' mangé mengaéma' im butul, sia mai sumusut an sendot itu, wosama' kaséréan oka sapa sé pinengaéma'na itu kumiit ing kasalé'an i Amang Kasuruan.”

Si Yohanes Mabaptis kumua si Yesus en lébé iparangka' mai wo sia

22Kumawus in itu, si Yesus wo sé murit-Na tumela'u in Yerusalem wo mangé an tampa walina an Yudea. Sia mento' a mangé mbitu mewali-wali wo iséra wona' pira témpoke' eng kauréna wo mengabaptis sé tou. 23An tutuw itu, nibaptis ka'i i Yohanes Mabaptis sé tou an doong Ainon an duru in Salim, ampa'paan am bitu keli en dano. Sé tou mai am bitu im baptisen. 24#Mat. 14:3; Mrk. 6:17; Luk. 3:19-20 An tutuw itu si Yohanes ra'ipé' ayuntep am bui.

25Sé murit-murit i Yohanes meindo-indoan roma' wo si esa tou Yahudi walina andumoro' i mu'as in owak iciit in atoran an agama Yahudi.#3:25 Wona' awéan asé murit i Yohanes meindo-indoan roma' wo si esa tou Yahudi walina andumoro' si wisa en lébé wangko'mai, nibaptis i Yohanes kuma'pa nibaptis i Yesus (3:22-23, 26-30). 26Wo sé muritna itu mai a si Yohanes wo kumua andumoro' si Yesus, “Tuang Guru, kata'néiané' i guru si Tou si sumangkumo mewali-wali wo si guru an lewet in doyongan Yordan? Si Tou itu si aicua i guru tanu Mesias. Intarépé' Sia ka'i mengabaptis sé tou wo kelio tou sé mangé ai Sia.”

27Isowat i Yohanes ai séra, “En tou ra'ica toro tumerima in sapa-sapa sa ra'ica aiwéé i Amang Kasuruan ai sia. 28#Yoh. 1:20 Liningao miow in esa sé ipengakuaku indior sapaoka aku ra'ica si Mesias si aijanjio i Amang Kasuruan, taan aku ayutus rumiorai ai Sia wosama' tumu'tul in lalan wayaan-Na. 29Ang kinawéngan, si pengantén tuama makaanu si pengantén wéwéné. Wo si karapi i pengantén tuama si makatulung an duruna arui tutuw sia luminga in suarana. Taniitu ka'i mai wo yaku si Yohanes, intarépé' aku mendam in arui keli ampa'paan keli tou mai a si Yesus. 30Sia musti iparangka-rangka', wo yaku musti ipawawa-wawa'.”

31Sia si mai an dangka' owo ilumébémai asé pakasa in tou ang kayo'baan anio'. Sé tou mai asi kayo'baan owo asalo mengakua in andumoro' sé ang kayo'baan. Taan Sia si mai an sorga owo lumébémai asé pakasa in tou. 32Sia sumairi andumoro' sapa sé sinéréo wo sapa sé lininga-Nao, taan ra'ica ka'i wana esa tou e mercaya sé ipengua-ngua-Na itu. 33Taan si séike' si tou si mercaya sé ipengua-ngua-Na itu tantu pinangakunao sapaoka si Amang Kasuruan itu wutul. 34Ampa'paan si Yesus ayutus i Amang Kasuruan kumua in Taar-Na, ampa'paan winéan-Nao Roh ang karapi in da'- io icakua. 35#Mat. 11:27; Luk. 10:22 Si Amang mengaupus si Toyaang-Na wo aiwéé-Nao eng kawasa ai Sia e merénta am baya-waya. 36Si séike' mangé si mercaya a si Toyaang-Na itu, sia makaanuo ing katouan akar ing kauré-uré. Taan si séike' en da'ica le'tek maéman ai Sia ra'ica kawisa makéré ing katouan akar ing kauré-uré, wo sia ukumen oka i Amang Kasuruan akar ing kauré-uré.

Currently Selected:

Yohanes 3: TNT

Highlight

Copy