Mbete Marki 9
9
1Zezu el ɓahri : « Ɓa ketina gaŋ. Mi ƴo ɓah hi̧ wuri, nzuk a haniri ké sakra wah-ay hul ɗi riŋ woyri ya ɓáy, mí ku kó lák mbay Ŋgerzah ké gi ke ŋgerna ke nun. »
2Falu laɓ nam tɔtɔklɔ bale, Zezu fa̧h Piyer, Zak, Za̧h. Ku si ziŋ ni, ku laɓ niŋ. Ku hil kasaw ké gaŋ zeŋleŋleŋ ke hȩk woyri. Ké nun Piyer-ri mí mun Zezu sɔɓ na ɓoɗ. 3Gar ye su nda̧w nda̧w el pu rak rak. Nzuk mbew ké tusiɓa ta hi̧ gar ɓá pu kandɔkaw ya. 4Eli ke Moyiz gun nzak pihna Ŋgerzah a lewsa̧ri ti̧h nun woyri gi ziŋ Zezu. Ku ƴo lu mberem ziŋ ni. 5Piyer ba, ɓah hi̧ Zezu ɓahri : « Metere, gel ké nah ƴo ri-ay su-su. Nah yih pɔr vul ɓa say hi̧ wuri. A mbewu ɓa nzuku a wo, a mbewu ɓa nzuku a Moyiz, a mbewu ba, ɓa nzuku a Eli. » 6Ɓayaw, Piyer ɓah va̧h ɓay hȩkme ké se niri mbamba. 7Mí ɗikmambam gi guɓ tul woyri gbukru bale, kusol ti̧h ke ɓilu ɓahri : « A ye-ay, ke ɓa gun sana bi. Í lah nzak ye. »
8Mí ku ko kona ɗoŋ niri gbuk ɓay ko nzuk ɓah ɓayaw, mí ku ko nzuku ya. Sa ɓa Zezu ke hȩk ye mí toŋ ké ta̧w woyri.
9Ɗerna woyri ke tul kasaw ra, Zezu hah niri ɓáh ɓay fe kú-u ko hi̧ nzuk. Ke ɓahri, gun nzuk pirmatul ɓá ti̧h ke puh záh ke pa̧ymun a foyu dara kú ɓah ɓayu ɓáy. 10Kandɔkaw ku ŋga̧h ɓayu ké ɓil law woyri. Ké haŋsekle woyri ku fakla ɓay tu sa̧wɓay ti̧hna gun nzuk pirmatul ke puh záh ke pa̧ymun a foyu ra wa, ɓayu yih ɓah ani munu le ?
11Mí nzuk-dih fal yeri ké sayaw vbi ni ɓahri : « Nzuk-sɔk mbete bolkusol Ŋgerzahri ɓahri, Eli a lewsa̧ ɓay gi pol dara Ŋgermbay ɓay gi ɓáy ra wa, ani le ? »
12Mí Zezu ɓah ɓay ɓahri : « Eli ɓá gi pol ɓay lek gel ɓá ƴo gelu hi̧ Ŋgermbay. Mí kaŋaw ba, ani mí mbete Ŋgerzah ɓah ɓay tul gun nzuk pirmatul ɓahri, ku ɓay saŋ ni, ku ɓay laɓ ni koseh mbamba pi ra wa, i lah wuri ya le ? 13Mi ƴo ɓah hi̧ wuri ɓahri, Eli gi da, mí nzukri laɓ ni kandɔk kú-u yih. Fe-u laɓ kandɔk kú-u vbeh si tul ye ké ɓil mbete lewsa̧. »
14Zezuri ka̧h ɗih ya ké ta̧w nzuk-dih fal ye a ɓoruri ké toŋ fal, mí ku ko daɓa nzukri ɓa ŋgi̧-u ké ɗoŋ niri. Nzuk-sɔk mbete bolkusol Ŋgerzah a haniri ƴo fah ɓay ziŋ niri. 15Daɓa nzukri-aw gbam ɓá ko Zezu ké ƴo gina le, sa gelaw mí law woyri lu ba̧y ba̧y, mí ku ur ke ɗukna si vah ni. 16Zezu vbi niri ɓahri : « Ɓay tul fe mí i fah ɓay le ? »
17Mí nzuk a hani ké sakra daɓa nzukri-aw gi ɓahri : « Metere, mi gi ke gun bi ma ta̧w wo. Záh ƴo tul ye. Ke hi̧ ni ke ɓah ɓay ya. 18Gelke záh ra mgba ni dale, vbu ni siɓa gbirik. Mbihsam ye fur tuka tuka. Ke su̧ sel ye ŋger ŋger. Mun ye kpo-kpoŋ pi. Mi ɓah ɓayu hi̧ nzuk-dih fal wori ɓay kú ni̧h záh ra, mí ku ta̧h va̧na ni̧h-u kpu̧y. »
19Zezu ba, ɓahri : « Uwa, gun tukala-ayri, nzukri ké i poŋ Ŋgerzah ma fal, toŋ nam ka̧h ani mí-i ƴó ziŋ wuri ɓáy le ? Toŋ nam ka̧h ani mí-i ík law bi ké tul woiri ɓáy le ? Í gi ke gun ra hi̧ mi. »
20Ku si gi ke gun ra hi̧ ni. Záh ɓá ko Zezu le, sa gelaw mí ke mgba gun ra, ke laŋ ni yik yik, ke ndih ni vbu siɓa hi̧ ni ke ta kpeleŋ kpeleŋ. Mbihsam ye fur tuka tuka. 21Zezu vbi bah gun ra : « Ke seh suŋ mí záh titil laɓ ni le ? »
Ke ɓahri : « Fe-u titilu ke lele ye kaŋ. 22Kpatara, záh ra ƴo mgba ni vbu hɔrɔ. A hani le, ƴo mbi ni vbu mbih ɓay zi tul ye, mí ŋgerna wo ƴo ra ri le, mú so na, mú ya̧ ta̧hna wah ge. »
23Bale Zezu ɓah hi̧ bah gun ra ɓahri : « Mu ɓahri, ŋgerna bi ƴo ra ri le ley ? Ké ta̧w nzuk ké kan law tul bi le, ŋgerna ƴo ri ɓay laɓ feri gbam. »
24Sa gelaw mí bah gun ra vba̧ nzak ɓahri : « Mi kan law bi tul wo. Mú so law bi ɓá te sa tul wo. »
25Zezu ɓá ko daɓa nzukri ké mbu̧h hani yir ɗoŋ tul ye le, ke hah záh tukala ra ɓahri : « A wo záh ké mu gboh gunay gel-ɓah ɓay pi gel-lah ɓay pi ra, mi ƴo ɓah ɓayay hi̧ mu, mú ti̧h ke tul gunay. Mú el gi tul ye mba. »
26Záh ra vba̧ nzak. Ke laŋ mun gun ra yik yik, mí ke ti̧h poŋ gun ra na siɓa zarak eŋ hul kaŋ hi̧ nzukri ɓahri, gunaw hu-hu. 27Mí Zezu mgba ndɔk gun ra, mí ke ɔr ni ƴo síɓa zekre.
28Zezu ke nzuk-dih fal yeri tɔr si rih vul ke hȩk woyri. Ku vbi ni ɓahri : « Ɓay fe mí ŋgerna wah mah ni̧h záh ra ya le ? »
29Mí ke ɓahri : « Nzuk ta ni̧h záh a kandɔkaw ke ŋgerna ye ya, ŋgerna-u ɓa góŋ Ŋgerzah mbew yaŋ. »
30Ku ti̧h poŋ gelaw si kal tusiɓa Galile. Mí Zezu sa ɓay hi̧ nzuk ɓá tu gel kaɓna woyri ya, 31ɓayu ké-e ƴo firma ɓayay hi̧ nzuk-dih fal yeri ɓahri, ku ɓay ndoh ni ye gun nzuk pirmatul ndɔk nzukri. Ku í ni. Nam a sayu le, ke tí̧h ke puh záh ke pa̧ymun a foyu.
32Mí ɓayu guh law woyri ya. Hȩkme vbí sa̧wɓayu se niri pi.
33Zezu ke nzuk-dih fal yeri ka̧h Kapernayum. Ku si kaɓ ɓil vul mí Zezu vbi nzuk-dih fal yeri ɓahri : « Ɓay fe mí i fah ɓay ké mahfulaw le wo ? »
34Bale ku kaɓ silili ɓayu ké ku fah ɓay ziŋ hani ké mahfulaw ɓay tu a ge mí ɓa ŋgernzuk ké haŋsekle woyri le. 35Wara mí Zezu el kaɓ siɓa. Ke mbu̧h nzuk-dih fal ye a boh falu seɗeri ma ta̧w ye, ke ɓahri : « Nzuk a suŋ suŋ ké yih na ɓa ŋgernzuk le, ke láɓ mun ye ɓa gun. Ke ná ɓa gun-laɓ pihna hi̧ mbaŋ yeri. »
36Mí Zezu mbi gun a lele gi ƴo keni haŋsekle woyri. Ke hu̧hru ni, mí ke ɓahri : 37« Gelke nzuk mgba gun a kandɔkayri ma law ye ɓay tul riŋ bi le, a bi mí ke mgba mi-aw. Nzuk a suŋ suŋ ké mgba mi ma law ye le, ɓa a bi ya wara le, ɓa nzuk-pih mi mí ke mgba ni-aw. »
38Kandɔkaw mí Za̧h mbi ɓay ɓahri : « Metere, nah ziŋ nzuk a hani-u ƴo ni̧h záhri ke riŋ wo, mí nah gboh ni ɓay fe le, ke ɓa bɔh sina wah ya. »
39Mí Zezu ɓahri : « Í gboh ni ya ɓayu ké nzuk laɓ fe saŋ hi̧ riŋ bi kan ri le, ta el mbi riŋ bi ɓah keni suya ya, 40ɓayu ké-e ɓa nzukbaa wah ya. Ke ɓa nzuk fal ŋgaŋ wah munu. 41Nzuk a a̧y ké ƴo ke Ŋgermbay mí ke kah mbih hi̧ wuri i nzo ɓay fe le, i ɓa nzuku a Ŋgermbay le, ɓa ketina, mi ƴo ɓah hi̧ wuri ɓahri se, kpaŋndɔk nzuku ta zi ya. 42Mí nzuk a a̧y ké hɔl ndaw lihna le, ŋgá̧h baw kasaw ké sol ye mbi ni vbu ɓil mahmbih mí su, koseh ye-aw su mba poŋ ni ké mgba gun a mah gelu ké kan law tul bi ɓá saŋ riŋ bi. 43Ndɔk wo ɓa ndaw lihna hi̧ mu saŋ riŋ bi le, mú kuŋ vbu kpah. Hú ɓa kpere si kaɓ ke ɔkna su mba hú ke ndɔk wo seɗe mbɔk si kaɓ ɓil hɔrɔ ké ri-rimna ya. 44#9.44 Mbete sa̧w nzak a haniri ta ke gel ki̧na-u ya. 45Bɔk wo ɓa ndaw lihna hi̧ mu le, mú kuŋ vbu kpah. Hú ɓa kpere si kaɓ ke ɔkna su mba hú ke bɔk wo seɗe mbɔk si kaɓ ɓil hɔrɔ ké ri-rimna ya. 46#9.46 Mbete sa̧w nzak a haniri ta ke gel ki̧na-u ya. 47Nun wo mí ɓa ndaw lihna hi̧ mu le, mú lur ku̧ kpah. Ríh ɓil lák mbay Ŋgerzah ɓa ra̧w su mba káɓ ɓil hɔrɔ ké ri-rimna ya ke nun wo seɗe mbɔk. 48Gel hɔrɔ ra ɓa gel ké kay hu hul ya mí su̧ záhri, hɔrɔ-u ri-rimna ya pi. 49Í gboh nzuk ké laɓ fe hi̧ riŋ bi kan ri ra ya ɓayu ké nzuk a suŋ suŋ gbam, tom ɓay ku̧ tul ye hi̧ ni ke ɓa fe puhna kú-u kan tul hɔrɔ hi̧ Ŋgerzah#9.49 Mahful puh fe puhna hi̧ Ŋgerzah ɓa laɓ tom ku̧ ri. Ɓayu na ɓil Mbete Lévitique 2.13. Mahful a ɓoru ɓay sɔk kerɓay ké na ɓil sa̧w nzak mí na-ay : Hɔrɔ ra eŋ tom ké ɓay ku̧ tul nzukri gbam.. 50Tom ra ɓa fe a suki, mí tomu nuŋ mba le, a fe mí ɓay laɓ hi̧ tom ɓá el nuŋ ɓáy le ? Í hi̧ tom ɓá ku̧ tul woiri, í hi̧ ɗeŋ ɓá ƴo ziŋ wuri. »
Currently Selected:
Mbete Marki 9: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
