Матай 15

1Сол кездері Иерусалимнен бірнеше дін мұғалімдері мен парызшылдар келді. Олар Исаға мына сұрақты қойды:

2— Шәкірттеріңіз неге ата-бабаларымыздан қалған дәстүрлерді бұзады? Олар қол жуу рәсімін#15:2 Түсіндірмедегі «Тазару рәсімдерін» қараңыз. орындамай-ақ тамақтана береді екен! — 3Исаның жауабы мынау болды:

— Ал сендер неге өз дәстүрлеріңе бола Құдайдың өсиеттерін бұзасыңдар?! 4Құдай: «Ата-анаңды сыйла!» және «Егер біреу әкесін не шешесін жамандайтын болса,#15:4 Немесе: әкесін не шешесін қарғайтын болса. ол өлтірілсін!» деп бұйырған еді ғой.#15:4 Мыс 20:12; 21:17; Заң 5:16; Леу 20:9. 5Бірақ сендер адамның өз әкесіне не шешесіне: «Менен көрмек игіліктеріңізді мен Құдай жолына бағыштадым» деуіне рұқсат бересіңдер. 6Осылай ол әке-шешесін сыйлап, парызын орындауға міндетті емес деп үйретесіңдер. Сөйтіп сендер өз дәстүрлеріңе бола Құдайдың бұйрығын жоққа шығардыңдар!#15:6 Немесе: Құдайдың сөзінің (яки өсиеттерінің) күшін жойдыңдар! (15:4)

7Екі жүзділер! Сендер жайында Ишая пайғамбар алдын ала дәл айтып кеткен: 8«Бұл халық Мені тек ауызбен ғана сыйлайды, ал жүректері Менен тым алшақ. 9Адам баласы шығарған ережелерді үйретіп, Мені құрметтегенсиді, бірақ солары бекершілік!»#15:9 Иш 29:13.

10Содан Иса жиналған жұртты қасына шақырып алып, оларға былай деп ескертті: «Құлақ салып, жақсылап ұғып алыңдар: 11адамның аузынан енген нәрселер оны арамдай алмайды. Керісінше, аузынан шыққандары адамды арамдайды».#15:11 15:18-20.

12Кейінірек шәкірттері Исаға келіп:

— Парызшылдардың осы айтқандарыңызға өкпелеп қалғанын байқадыңыз ба? — деп сұрады. 13Иса оларға:

— Көктегі Әкем екпеген әр өсімдік түбірімен жұлынып тасталмақ!#15:13 13:40-41; 3:10; 7:19; Жох 15:2-6. 14Оларды қойыңдар, өздері — соқырлардың соқыр жетекшілері! Ал соқырды соқыр жетелесе, екеуі де орға құлап түсер, — деді.#15:14 23:16,24; Лұқ 6:39. 15Сонда Петір:

— Алдыңғы астарлап айтқандарыңызды түсіндіріп беріңізші, — деп өтінді.

16— Сендер де айтқандарымды әлі түсінбей тұрсыңдар ма? — деп жауап берді Иса. 17— Адамның аузы арқылы енген барлық тағамдар асқазанға жетіп, кейін денеден шығып кетеді, мұны ұқпайсыңдар ма? 18Бірақ адамның аузынан шыққандары оның жүрегінен, яғни ішкі дүниесінен, шығады. Адамды арамдайтын, міне, осылар!#15:18 12:34; Мар 7:20; Пат1 24:14; Нқл 15:28. 19Себебі жүректен шығатындар мыналар: жаман ойлар, кісі өлтіру, неке адалдығын бұзу, азғындық, ұрлық, өтірік, жамандау.#15:19 (Жыр 13:1; Рим 3:13-14; Ғал 5:19-21) Немесе: неке адалдығын бұзу, нәпсіқұмарлық (яки жезөкшелік), ұрлық, өтірік, Құдайды қорлау. 20Осылар адамды арамдайды. Ал қол жуу рәсімін орындамастан тамақ ішу ешкімді арам қылмайды.

Шетелдік әйелдің Мәсіхке деген ғаламат сенімі

21Иса сол жерден кетіп, Тир мен Сидон аймағына#15:21 Тир мен Сидон Ғалилеядан елу не сексен шақырымдай қашықтықта қазіргі Ливан елінің (ежелгі Финикия өлкесінің) теңіз жағасында орналасқан, кеме тоқтайтын үлкен қалалар болатын. барды.

22Бұл өңірден шыққан бір қанахандық#15:22 Сол жердің алғашқы қоныстанушылары болған қанахандықтар яһуди діні мен әдет-ғұрыптарын ұстанбайтын. Сондықтан яһудилер оларды «арам» деп есептейтін. әйел Оған: «Тақсыр, Дәуіттің Ұрпағы,#15:22 Яһудилер көптен бері күтіп келген Мәсіхтің атағы (1:1; 9:27; 12:23; Түсіндірмені де қараңыз). рақым етіңіз! Қызымды жын соғып, қатты қинап жатыр!» — деп айқайлады. 23Бірақ Иса оған бір сөз де айтпады.#15:23 Осылай Иеміз бұл әйелдің сенімінің шынайылығын сынамақ болды (15:26,28; Заң 8:2). Сонда шәкірттері Ұстазына келіп:

— Мынаның тілегін орындап, жібере салыңыз. Ол соңымыздан қалмастан айқайлап келеді, — деп өтінді. 24Ал Иса:

— Мен тек адасып кеткен қойларға ұқсас Исраил халқына ғана жіберілгенмін, — деді.#15:24 Алғашқыда Иса Құдай ерекше Келісім жасаған Исраил халқына арнап қызмет еткенмен, кейін барлық халықтарға да Жаңа Келісім арқылы Құдаймен тікелей байланыс жолын ашты (10:5-6; 12:21; 26:26-28; 28:18-20). 25Әйел Оның алдына келіп, иіліп тағзым етіп:

— Тақсыр, маған көмектесе көріңіз! — деп жалынғанда, 26Иса оған астарлап:

— «Балалардың нанын алып қойып, үй күшіктеріне тастау дұрыс емес»,#15:26 Мар 7:24-28. — деді. Әйел:

27— Айтқаныңыз дұрыс, Тақсыр! Дегенмен «үй күшіктері» де иелерінің дастарқанынан түскен ұсақ-түйек қалдықтармен қоректенеді ғой, — деп жауап берді. 28Иса:

— Қарындас, сенімің ғаламат зор екен! Тілегенің болсын! — деді. Сол сәтте-ақ оның қызы сауығып кетті.

Мәсіхтің көптеген шетелдіктерді сауықтырып, тамақтандыруы

29Иса сол жерден кетіп, Ғалилея көлінің бойымен жүрді. Бір төбенің басына шығып, отырды.#15:29 Бұл жер Құдайға мойынсұнбайтын шетелдік Онқала аймағында орналасқан еді (Мар 7:31). 30Исаның қасына қарақұрым халық жиналды. Олар сал болғандар, соқырлар, мылқаулар, мүгедектер және басқа да көптеген ауру-сырқауларды алып келіп, Оның алдына жайғастырды. Иса оларды сауықтырып жіберді. 31Жұрт мылқаулардың сөйлегенін, мүгедектердің сауыққанын, сал болғандардың жүргенін және соқырлардың көздерінің ашылғанын көргенде, Исраилдің Құдайын мадақтап дәріптеді.#15:31 Мар 2:12; 7:37; Елш 3:10-13.

32Кейінірек Иса шәкірттерін қасына шақырып:

— Халыққа жаным ашиды. Олар үш күннен бері қасымда болып, жейтін азықтары қалмады. Оларды аш күйлерінде қайтарып жібергім келмейді: жолшыбай әлсіреп, құлап қалар, — деді. 33Шәкірттері:

— Осы құлазыған далада соншама көп халықты тамақтандыруға жететін нанды қайдан табамыз? — деп жауап берді. Иса:

34— Қанша нандарың бар? — деп сұрағанда олар:

— Жеті күлше мен бірнеше кепкен ұсақ балық#15:34 Яки: бірнеше тұздап кептірілген шабақ (14:17). қана, — деді.

35Сонда Иса жұртқа жерге жайғасуға бұйырды. 36Жеті күлше мен балықтарды қолына алып, шүкіршілік етті де, үзіп-үзіп шәкірттеріне бере берді. Олар халыққа үлестірді. 37Бәрі де тамақтанып, тойып алды.

Соңынан қалдықтарды жинап алғанда жеті үлкен себет толды. 38Әйелдер мен балаларды есептемегеннің өзінде төрт мың ер адам тамақтанған болатын.

39Иса халықты таратып жіберген соң қайыққа мініп, Мағдала#15:39 Мағадан деп те аталатын бұл қала (мағдалалық Мәриямның шыққан жері: 27:56) Ғалилея көлінің батыс жағасындағы Далманутаға жақын орналасқан еді (Мар 8:10). қаласының маңына кетті.

Currently Selected:

Матай 15: КК 2010

Highlight

Copy