Luke 5
5
Jisü no Pa Khopemi Atüghimiqo Kulù
1Ghulo lakhi Jisü no Gennesaret#5:1 Hiye Galilee züghi ke yizükucho mükü lo puthugho akelo timi kutomo no pa sümxa pe ngo no Alhou tsa inia. 2Ikelo akhakükhami no ayizükucho lo ashuka kini qhive no akhameqo qhu aghí keu pa no ithulu. 3Pa no ashuka lakhi lo ilo, tiye Simon shuka shi aghí, ikehu pa vilo ashuka amükü lono kitila tupulo lo ipi iniju. Tisheno pa no ashuka lo iqa eno timiqo kütsüe.
4Kughou pa no atsa pitave keno, pa no Simon vilo pi, “Azü kuthò küdau ilolo eno akha kügha nike ghenguno akhameqo pesü aqhou vesülo.”
5Simon no khochile, “Ampeu, ningu ye puthotsü ime veju akemu lakhimu vemlae. Ikemu nono pikeu ghenguno I no akhameqo aqhou vesünie.”
6Kughou panongu no tishiju keno akha kutomo küghalu eno tishi keu lono panonguw akhameqo ixü thuve. 7Ikehu panongu no pano lojimi ashuka kütau lo akemiqo pelo ighino panongu kuphu penike ku, panongu no ighi eno ashuka kinikujo lo akha chhitoi sǘ eno tishi keu vechewo ashuka ye yimive nike toive.
8Kughou Simon Peter no hi ithulu keno, pa no Jisü pukhuphi lo qhoqhünhe no pi, “I lau no wuvelo, Ampeu; ni ye axinemi lakhi ke.” 9Kughengu pa eno pa küsàmi kümtsü no panongu no akha velu keu lo akichiqhive, 10eno titoi Zebedee nu James ngò John, Simon lojimi pama ghí akichiqhive.
Tipathiu Jisü no Simon vilo pi, “Msà kevilo; hinguno hilau ye no ye timi kükhami shini ake.” 11Ike panongu no ashukaqo azüghi mükü lo tuphe pe qhive eno thowkha kümtsü qhive no Jisü papesü wuve.
Jisü no Apügha Kupumi Shipivi
12Kughou Jisü no mishiphu lakhi lo akeno, timi lakhi apügha no aphi chhitoi xapusü ighi. Kughou pa no Jisü ithulu keno pa zülo agi pishiqholuve no Jisü vilo qhüiniju ghi pi, “Ampeu, nono pulo aghí aye no ye I shipivive tsülu nanie.”
13Jisü no pa u chhopuwo timi tipau bu no ishi pi, “Ni ye pulo anie, viluvelo.” Paikhavi lono apügha hu no timi phi lono kühave.
14Tithiu Jisü no azah pa tsü, “Khuu vilomu pi kevilo, ikemu no ye achinemiqo lau kimichikütsü shi wu no panongu pìyelo eno Moses no azah tsüpüa keu toi O shikimtheve keu kümlagho pesü mülá lo.”#5:14 Achine 14:2-32
15Ikemu Jisü ghili alau shi veküpha wove, tishi keu vechewo timi kutomo no pa tsa ini niye eno küsükini lono panongu shipivi tsü penike pa lau ighi. 16Ikemu Jisü ye ado kutomo lono yenguikeu-a lo wu no akighini shi ache.
Jisü no Aphimpi Ithamlave kemi Shipivi
17Ghulo lakhi Jisü no kütsüa, eno Phariseemi ngò ayeza kükütsümiqo ghí tile iqa ae. Panongu ye Galilee, Judea eno Jerusalem noqo phu kümtsü lono ighi. Eno Alhou’w shipivi kulupu küká Jisü gholo ae. 18Timi khami no ayephu lono aphimpi ithamlave kemi lakhi xapu ighi eno panongu no pa pesü Jisü zülo sasü ighi niye aki alou ilo nike pükapütsa ae. 19Kughou panongu no timi aqokitikhi ghenguno ilolu kepu là phumlave keno panongu no akimole lo iku eno amole kiyeve no azüa lono timi aqokitikhi mtá dolo no Jisü zülo pa kighiti piqi.
20Kughou Jisü no panongu küpülü ithulu keno pa no ishi pi, “Aküsàu, O xinéqo qhivetsüae.”
21Ayeza kükütsümi eno Phariseemiqo no hitoi kiqi kümsüju ae, “Timi hipau ye khuu keno Alhou thaigha keu tsa piani kea? Alhou likhi no kumo aye khuu no axiné pevetsülu nani kea?”
22Jisü ye panongu no kiu kümsü akeno ithive püzü iniju, “Nongu ye kushiye nongu mlo lo thime hipaqo kümsü ani kea? 23Khikhiu no akümláu kea: ‘O xinéqo qhivetsüae,’ ipikeu no keo, ‘Ithuve no alà chelo,’ ipikeu no kea? 24Ikemu I no nongu pelo ithi penishi akeu ye Timi Nu ye ayeghi lo axinéqo qhivetsülu kepu kükagha anie.” Ike pa no aphimpi ithamlave keu vilo pi, “I no O vilo piani, ithulo, O züa ikhipesü aki lo wovelo.” 25Tipa mtsa no aküsǜu hu no timi kümtsü zülo no ilheithughi no pa no qhazü chekeu phì ikhiluve püzü Alhou sheqhe ghi aki lo wove. 26Timi kümtsü no akichiqhive eno Alhou akishé tsü. Panongu ye thüghüive eno ishi pi, “Ningu ye ishí akümza kepu kümlàqo ithuluvae.”
Jisü no Levi Kulù eno Axinemiqo Gholo Chu-sho
27Hipathiu, Jisü no khalau ipe no zame küqhami lakhi Levi ipikeu no paw zame küqhau’w hiyam lo iqa aghí keu ithulu. Jisü no pa vilo pi, “I papelo,” 28eno Levi no ithughive no thowkha kümtsü qhive püzü Jisü pape wuve.
29Tithiu Levi no pa ki lo Jisü ghenguno aghulhu kijè lakhi kutò tsü eno tilehi zame küqhami kutomo eno kütamiqo panongu gholo chu-sho ae. 30Ikemu Phariseemi eno panongu mqo gholo ayeza kükütsümi akemiqo no Jisü khopemiqo lau nhenheshi pi, “Nongu ye kushiye zame küqhami eno axinemiqo gholo chu-sho ani kea?”
31Jisü no panongu khochile, “Küsükinimi no kumo aye ashi-aji viakemi ye shikipivimi avehupu shichemoe. 32Ni ye amikuchomiqo ku niye ighimoe, ikemu axinemiqo pelo xaideghi peniye ighike.”
Jisü Vilo Kümvü keu Ghili Iniju
33Panongu no Jisü vilo pi, “John khopemiqo ye ado akichiù lono kümvü eno akighini shi cheni, tihutoi Pharisee khopemiqo ghí tishi cheni, ikemu O khopemiqo ye chu-sho aghí keu likhie.”
34Jisü no khochile, “Nongu ye külapuu küsàmiqo pelo külapuu gholo ngo aphi lono kümvü peni keshea? 35Ikemu külapuu ye panoqo gholo no ikhisüwuve kepu do ighi nani; tipau tsalaqo lono panongu no kümvü nani.”
36Jisü no panongu vilo hipau hole pi: “Khunomu aphì akithé lono atachu süxü pe aphiküzü aqa lo pukhoda puku chemoe. Tishiaye aphiküzü akitheu ye ixüve kepu shinia, eno aphì tachu akithé ye aphiküzü aqa lo aküzümo nani. 37Eno khunomu atsaizü akithé pesü ashiyikohughi aqaqo lo lesü chemoe. Panongu no tishiaye ashiyiko mpakhove no atsaizü peleve nani eno ashiyikohughiqo ye kütsave nani. 38Moe, atsaizü akithé ye ashiyikohughi akithé lo lesü moayesae. 39Eno khunomu atsaizü aqa shove kethiu ye akithé shoni shichemoe, kughengu ishi pi cheni, ‘Atsayizü ye aqa shive keu pavie.’ ”
Currently Selected:
Luke 5: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
