Luke 4
4
Jisü Ghuju keu
1Jisü ye Aghungu Kimthe no chhitoi shi no Jordan qhive püzü Alhou Ghungu no pa sasü küghünamokeu-a lo wuve, 2tile tüghami no atsala lhobidi pa ghujue.#4:2 Momu thejue Tipau tsalà dolo pa ye kiumu chu-shomoe, ikehu hipaqo tsalà ashekha shive kelo pa ye müzüthive.
3Tüghami no pa vilo pi, “Nono Alhou nu shi aghí aye atu hipau vilo asho ilhovelo pilo.”
4Jisü no khochile, “Ishi yèpüani: ‘Timi ye achuqupu shou likhi bepe xülu chemoe.’#4:4 Zaki 8:3”
5Tüghami hu no pa sasü chuqumghai keu-a lakhi lo saiku no anhekütsükhavi lono ayeghi lo kükaphuqo kümtsü pa pìye. 6Eno tüghami no Jisü vilo pi, “I no panoqo kükagha eno qhivütsüni akeu kümtsü O tsüní; hi kümtsü I tsüpe püani eno I no khukhumu tsüní shikeu tsüluve nani ke. 7Tsalá nono I mülá aye hi kümtsü ow shive nani.”
8Jisü no khochile: “Ishi yèpüani: ‘Ampeu O Lhou mülá lo eno pa likhi huthu lo.’#4:8 Zaki 6:13”
9Tüghami no Jerusalem lo Jisü sawu no pa pelo achineki kütsüqa lo puthugho pe. Pa no ishi pi, “Nono Alhou nu shi aghí aye, hile no ilhe iqivelo.” 10Kughengu ishi yèpüani:
“ ‘Pa no paw kungumi pelo O tucho
eno jukuto khe penike azah tsü nani;
11tishianguno O pukhu pelo atu shoumu püsüpuku pemo nani,
panongu no panongu u lono O khapeluve nani.’#4:11 Leshe 91:11,12”
12Jisü no khochile, “Ishi pipüani: ‘No ye Ampeu O lhou theju kepu kumoe.’#4:12 Zaki 6:16”
13Kughou tüghami no ghuju keu hi kümtsü tave keno, pa ye adokivi ithulumo ke kutólo Jisü qhive no wuve.
Nazareth lo Jisü Milive
14Jisü ye Aghungu küká lono Galilee lo ideighi, ikelo aphughi sükümxa kümtsü lo pa ghili pikülha wove. 15Pa no panonguw Synagogqo lo kütsü kelo panongu kümtsü no pa sheqhe ae.
16Pa no pa saputhukeu-a Nazareth lo wu, eno pa no shi chekeu kukhuaye kiqi lono pa ye Sabbath tsalà lo Synagog lo wu. Pa no liküküzü kaku phisü niye puthugho, 17eno tile tungkupu Isaiah kaku ikhipe pa tsü. Pa no liküküzü kaku lhaphe kelo ishi yèpüaghi keu ithulu:
18“Ampeu Ghungu I shou ani,
kughengu atsakiviu pe kumlhomi lau asheshu peniye
pa no ni nukishelu ke.
Akughumi lau khakiqhi kütüghü peniye
eno anhethi kighichemi pelo ithulu kithe peniye,
neda-qoda püa kemi phepuwu peniye
19eno Ampeu no paw timi xalu nikeu mpe shukiphe shipe niye I puwu ke.”#4:19 Isa 61:1,2
20Tishive no pa no kaku liküzüve no aghinikishiu tsü chileve no iqave. Synagog lo akemi kümtsü no anhethi süküqümo no pa ju ae. 21Pa no panongu vilo pithu: “Nongu no chilu akeu vechewo ishí no Kuchoyesü hipau shikupuvae.”
22Timi kümtsü no akishé pa tsü eno panongu ye pa kichí lono kimiyekini tsa pikeqo chilu no akichiqhive. Panongu no ishi iniju: “Hiye Joseph nopu ke kumo keshea?”
23Jisü no panongu vilo pi, “Kuchou no nongu ye I vilo ahole hipau tsatho pi nani: ‘Shikipivimi, O likhi O shipivi lo!’ Eno nongu no I vilo ishi pi nani, ‘Nono Capernaum lo mülà keu ningu no chilu keu toi O punugha hilehi ghí tipaqo shilo.’ ”
24Jisü no kibe ghi pi, “Kuchou no I no nongu vilo pìní, tungkupumi khiumu pano punugha lo ikhilu chemoe. 25I no mütsüqhei nongu vilo piakeu ye Elijah ghuloki lo kughou Israel lo ampe küthü tüxa ghumove no ayeghiqha kümtsü lo püqümiye ighi keno tilehi chimemi kutomo ache. 26Tishimu Elijah ye panongu lakhi laumu puwumoe, ikemu Sidon yeghi lo Zarephath phu lo chimemi lakhi lau puwue. 27Eno tungkupu Elisha ghuloki lo Israel lo apügha kupumi kutomo ache, ikemu Syrian Naaman nguno alau ye kütami lakhimu shipivi tsümoe.”#4:27 2Küka 5:1-24
28Kughou Synagog lo akemiqo no hi chilu keno panongu ye ighono muqhumüzaive. 29Panongu no puthughove no pa sasü mishiphu lono khalau saipeve, eno pa pesü mishiphu shipuku keu toghi nhekikhi lo kulusüve nike ghenguno saiku. 30Ikemu pa ye aqokitikhi mtá dolo no shoxüsü pa là lo chesü wuve.
Jisü no Mithekumo Ghungu Haphe
31Tisheno pa ye Galilee lo mishiphu Capernaum lo iqi, eno Sabbath tsalà lo timiqo kütsüe. 32Panongu ye pa kükütsü ini pe akümzave kughengu pa tsa lo kükagha ake.
33Synagog lo timi lakhi mithekumo ghungu tüghami hu no tsüghape ae. Pa no ighamuku vekipighi pi, 34“Wuvelo! Nazareth nó ghami#4:34 Mt 2:23 Jisü, no ye ningu lau no kiu avehupu shi ani kea? No ye ningu kütsave niye ighi ani keshea? No ye khuu keno I no ithi ani—no ye Alhou’w Akimtheu hu ke!”
35Ikemu Jisü no müghachhoi pa lomipi: “Inaqhoivelo! Pa lau no ipeghivelo.” Tishi kemtsa tüghaküsa no panongu kümtsü zülo no timi hu tukuluqhive püzü kiumu ghüza keu shimo no pa lau no ipeve.
36Timi kümtsü no akümzave no panongu lakhi no lakhi vilo ishi pi, “Hiye kiutoi keu tsa kea! Kükagha eno aküka lono pa no mithekumo ghunguqo vilo azah tsü kelo timi lau no ipeghivae!” 37Ikelo tipau sükümxa qha kümtsü lo pa ghili pikülha wove.
Jisü no Timi Kutomo Shipivi
38Jisü no Synagog qhive no Simon ki lo wu. Tile Simon pani ye muqhomüzai aghamiki aghí eno panongu no Jisü vilo li kuphu tsülo ipi. 39Ike pa no li phivilo itsaqi no aghakimki lomipi eno aghakimiki no li qhive no wuve. Li no paikhavi ithughive no achuqupu kutò pe panongu tsüe.
40Avelau shive kelo, timiqo no Jisü lau aküsǜ jeli no sǜ akemi kümtsü saighi, eno Jisü no pa u pesü panongu lakhi-khi shou be ghi panongu shipivi tsüe. 41Tinguno alau tüghaküsaqo no timi kutomo phi lono ipeghino ishi igha, “No ye Alhou Nu hu ke!” Ikemu pa no panongu lomipi eno panongu pelo atsa pipemo, kughengu panongu ye Jisü ye Messiah kepi ithi ake.
42Inaqhe vü ipeghive kelo, Jisü ye yenguikeu-a lo wuve. Timiqo ye pa phujua eno kughou panongu no Jisü no ngo akeu-a lo ighi keno panongu ye pa pelo panongu qhive pemo niye pükapütsae. 43Ikemu pa no pi, “Ni ye mishiphu kütauqo lo ghí Alhou kükaphu tsakiviu pikülha moayesa ani, kughengu hipau ghenguno I puwu ke.” 44Tisheno pa ye Judea lo Synagogqo lo kütsü auve.
Currently Selected:
Luke 4: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
