Markus 9

1Ngə cha nar nda, “Jiri yo nar hi, alenya nji da tangna sakana, a da nda kwa tə wa, kəl nda la'a təlkur Hyel tə shili ana gyalkur.”

Yesu tə Shabiyadzə Paməu

(Mat 17:1-13; Luk 9:28-36)

2Ahir hanyi kwah, Yesu tə hətə Bitrus, Yakubu ana Yohana, ga təra na nda gyo kəra mə dzəgaməu, na nda səkənda. Sakanda nda kwa ndzam nyi, kəl ngə nda la'a Yesu tə sha matsa nda cha parang. 3Dzaki nyi tə ɗa pərtə tyaləu, a ndə da kwa nau chinda wi nda a tə dunəya wa. 4Kəl jan Iliya ana Musa njir mətakər inda Parakə tə chabiyadza, nda kwa ɓwanya na Yesu. 5Bitrus tə nar nyi nə Yesu, “Maləm, mənakə cha gagaɗa təmən tangna, ma cha kwa i ka, yo latə madləɓa makər tangna, nənghə patləu, nə Musa patləu ana nə Iliya patləu.” 6Sər pə ngə cha tari, aka ləvər səya nda tə gagaɗa.

7Kəl ləmbəkə pərtə nda kwa mbəla tə səya haɗiya nda dərdla'a, kəl nda ngatə kurakə tə səya kyo ləmbəkə nda kwa na, “Nənnə ngə Zər Ɗa, nda yo nyida, səma himi da cha.” 8Gəɗə tanyi, manda la'a, a tsə'u ndə da kə'i nda wa kəl Yesu zhang tanyi.

9Ma ndo səya kyo mə nda, ngə Yesu tə tsau nda bar tsa nda nda ba'a dəkar nyi sənda ɗa nə madawa, kəl ma Zər Ndə tə hya'atə ku hwa. 10Ngə nda gəzəya ɓwanya ngə ku pama kərnənda, kəl ja, nda kwa ɓwanya təkəra ndara mi ngə “Hya'atə ku hu,” ngə kwa cha.

11Ngə nda jau nyi, “Ma'a ngə ka maləm gadlagadla Musa kwa na, tuku Iliya ndər mətakər kwa ghəya shili təvi Kəristya?”

12Ngə Yesu tə wuma ga na, “Vəvəl tuku ngə Iliya kwa ghəya shili, ya tuku cho məməlabiya dəhə səu. Ya mangə nja tsəfətə ənda tuku Zər Ndə kwa sa ɓwaɓwatə pampaməu gagaɗə njo ngya nya? 13Kəl ja, yo nar hi, Iliya#9:13 Yohana ndər mər baɓtisma ngə Yesu kwa ɓwanya təkər tangna. shili ti, ngə nda mərtə nyi dəhə sənda kəra nda i, tang wi nda nja tsəfətə təkəra cha.”

Yesu tə Mbandə Vanya Zər nda na Məlləm

(Mat 17:14-20; Luk 9:37-43a)

14Nda Yesu ka shawa makər inda ɓəla shili da alenya shawa inda, ngə nda la'a dlama nji a ɓandə nda, ba'a ka maləm gadlagadla Musa kwa kəpal kə'i nda. 15Nda dlama nji'inda la'a Yesu ngə nda mər məngəl gagaɗa, ngə nda mə na hwi ga yi usa nyi. 16Yesu tə jau nda, “Mi ngə hyo kəpal təkər ka shawa ɗa?”

17Ngə vanya ndə ku pama dlama nji'inda wuma, “Maləm, jan ya shili na nghə zər ɗa ana Məlləm nda kwa katə nyi tsa ndəra ku cha ka kə mbandə nyi. 18Dəhə bəji nda cha fəltənyi ti, kəl cho tsatə nyi hə'i, mburum kwa biya ku nyacha, cho ɗə hira cha, cho ndəɗanda nyi ndza'a. A gədi tiya shawa nghə nda gədləbiya nyi, ya a da nda nau wa.”

19Yesu tə wum ga na, “Kara nahi njir bəji na, nji kəla jiri! Ba'a sakamani yo ngya kə'i hya? Ba'a sakamani yo səsə'u hya? Anda ma na zər nga.”

20Ngə nda shili na nyi zər nda. Nda məlləm nda la'a Yesu, ngə cha dəgə zər nda, dza cha kwa dzədzi, cha dla hu'i cho takəla, mburum kwa biya ku nya cha.

21Ngə Yesu tə jau adanya zər nda, “Nawa ngə sənga uya nya?”

Adanya zər nda na, “Tsə'u cha zər kushiu. 22Kwa bəzəu nyi cha gu hu'u ka biti ka cha tsəya nyi. Macha sə da ko nau məra, maki, ngatə təhuɗə kəea ka vala ea.”

23Ngə Yesu tə nar nyi, “Mangə ko jau ɗa ndara kwa nau ya? Dəhə səu kwa ɗa nə dəhə ndə nda nənyi jiri.”

24Təma adanya zər nda har kuraka cha ga na, “A nənyi təya jiri, vala ɗa ja, ga ya kura tar jiri!”

25Nda Yesu tə la'a ənda dlama nji kwa tsaka, nda kwa shili na hwi, ngə cha tsə məlləm nda ga na, “Nakə məlləm nda kwa ka zər nə tsa ndəra ana ngatə ɓwanya, ya nar ngha, ka biya ku cha, ngwa ka da tsakətə shili da cha pa'a wa.”

26Məlləm nda ləlla ga gudzaɓətə zər nda gagaɗa ga biya. Zər nda piya wi ndə təta, badəgal nji kwa na, “A tətə cha.” 27Kəl ja, ngə Yesu tə gəzəya cha zər nda ga hya'andə nyi, ngə zər nda hya'atə tə ta'i.

28Nda Yesu tə go ta ki, ngə shawa nyi inda jau nyi tə ɗəwa, “Mi nda katə ea tsa gədləbiya məlləm nda?”

29Yesu tə wuma, “A chul məlləm ngə nda kwa biya əngə tanyi wa, kəl ana pətlənya.”

Yesu tə Tsakətə Ndər təkəra Tə Nyi ana Hya'atə Nyi

(Mat 17:22-23; Luk 9:43-45)

30Ngə Yesu ka shawa nyi a ngyar mbwa nda ga tərabiya tahə mələm Galili. A Yesu da i madawa zəndə mbwa nda nda tə wa, 31aka cho i cha uya bəji ka shawa nyi ga cha dlədləɓar nda səu, ngə cha na, “Njo tləɗanda Zər Ndə nə nji, nda kwa tsəya nyi. Ahir hanyi makərəu cho hya'atə na pi.” 32Kəl ja, a nanda ngabiya nda mi ngə cho ɓwanya təkər wa, ya ləvər kwa tənda tsa jau nyi.

Ndə nda Ndiya na Dəgalkur

(Mat 18:1-5; Luk 9:46-48)

33Nda yi Kafarnahum, nda Yesu tə gu ta ki, ngə cha jau shawa nyi, “Mi nda hyo kəpala təkər ku lakwa?”

34Kəl ja, nda da'a tanda, aka aku laku, nda kəpal təkəra ndara wa nga ndiya na dəgalkur ku pama nda. 35Nda Yesu tə ngya, ngə cha nga shawa kwabəmətlə inda ga nar nda, “Ma ndə nda kwa gwa'a dəgalkur, tuku kəl nacha ɗa kushiu ana cha ɗa ka mava madawa.” 36Cha nga zər kushiu ga ta'ində nyi ku pama nda, ngə cha gəzəya zər nda ga nar nda, 37“Madawa tə dləutsə zər kushiu wi nənna aku tləm ɗa, naya nda dləutsə cha. Ndə nda dləutsə ɗa tsə'u a naya nda dləutsə cha wa ndər sə ɗa nda dləutsə cha.”

Ndə nda Pa'a kwa Mər Dawa na Mən Nəkəmən Cha

(Luk 9:49-50)

38Ngə Yohana nar nyi nə Yesu, “Maləm, ea la'a vanya ndə kwa gədlə məlləm ana tləm ngha, ngə ea nar nyi cha ngyari, aka a da cha ku pama mən wa.”

39Kəl ja, Yesu tə nar nyi, “Ngwa hya da ka nyi wa, a ndə da kwa mər səshinshin na tləm ɗa cho nda sha cho pə səɗimi təkəra ya wa. 40Aka ndə nda pa'a kwa mər dawa namən, nəkəmən nda. 41Jiri yo nar hi, dəhə ndə nda nə hi ɓiti mada ɗeɗika zhang, aka nə Kəristi hi, tsa'anyata, a da cho tar zhar nyi wa.”

Səpəla'a ana Zhar Nyi

(Mat 18:6-9; Luk 17:1-2)

42Madawa tə gwa'atə zhang ku pama ngulisha'a shiɗəɗə inə#9:42 Mbwa ngə kwa ɓwanya təkəra nji'inda shiɗəɗə ku nəuwa. kwa na'a jiri nə tə mər səpəla'a, bəliya nja mbatə nyi bəra dəgal tə wulya tlakə nyi nja bəzəu nyi gwatə kwar fa'a. 43Macha chakə kwa gwa'atə ko mər səpəla'a, gəganda.#9:43 A tangna ana alenya mbwa mətlə biyama Yesu tə ɓwanya təkəra mədlə dzə inda nji kwa mər səpəla'a ni. Cha na mən təkə na dəhə sənda kwa gwa'atə məno mər səpəla'a, məlməl na mən tar chi, hi ba'a li. A ndiya nghə tə vi ka gwa ku pi nda ba'anawa ana chi zhang, tsa ko gyo hu'u nda pa'a kwa tah ana chi mətləu.#9:43 Alenya tsəfə inda nja tsəfə na chi tə tsakətə chada 44 ənda, “A hinda, hwa'ami inda kwa ɗə nda, a da kwa tə wa, ya a hu'u hu'unyi da kwa tə wa.” 45Macha hya kə kwa gwa'atə ko mər səpəla'a, gəganda! A ndiya nghə tə vi ka gwa ku pi nda ba'anawa ana hi zhang, tsa ko gyo hu'u nda pa'a kwa tah ana hi mətləu.#9:45 Alenya tsəfə inda nja tsəfə na chi tə tsakətə 46 ənda, “A hinda hwa'ami inda kwa ɗə nda da kwa tə wa, ya a hu'u hu'unyi da kwa tə wa.” 47Macha lyakə kwa gwa'atə ko mər səpəla'a, chakubiya! A ndiya nghə tə vi ka gwa ku təlkur Hyel na li zhang tsa njo bəzəu nghə gwa ku hu'u nda pa'a kwa tə ana lyakə mətləu. 48A hinda,

“ ‘Hwa'ami inda da kwa kuɗə wa,

ya a hu'u nda da kwa tə wa.’

49Ɓwaɓwatə wi hu'u cha nda kwa tsakətə nyi dunama nə njir nəuwa, tang wi ngə njo pə wunə ku səkwar ga cha mərtə nyi məsəɗakəu.

50“Wuna sə mənakə cha, kəl ja, ma wuna təkə na ngarngarkur nyi ya, ana mi nja kwa ɓəlandə ngarngarkur nya? Hya ɗa wi wuna, hyo ngya piyarɗufəu na kərnəhi.”

Currently Selected:

Markus 9: hbbNT

Highlight

Copy