Markus 4
4
Ba'ada na Ndər Tləka
(Mat 13:1-9; Luk 8:4-8)
1Yesu kwa dlədləɓə nə nji səkəu nya fa'a Galili. Dlama nji ɗang gagaɗə tə tsəmtədzə ga ɓandə nyi, ngə Yesu tə gwatanyi ku param ga gwa ngyata nyi, nji'inda tsəu biya nya bam. 2Cha dlədləɓar nda sə ɗang ana ba'ada i wi nənna, cho na: 3“Səya ma himi, vanya ndə tə biyar gwa tləka#4:3 tləka: Chul nəna tləka uchi njo uchi chuli, wi nda njir Isra'ila tsəl ni.. 4Nda cho huɗa uchə chuli, ngə alenyi tə pəpə ku laku, ngə eakə tə shili tsakuti. 5Alenya chuli tə pəpə səya tə hya fafa mbwa nda a hə'i da dur wa. Ɗəɗəu tanyi nda tsa aka a hə'i da dur tangnda wa. 6Nda pəchi tə dəda, ngə nda titi'ua ga ula, aka a nanda chiya ngilang wa. 7Alenyi tsəu tə pəpə gu lya shikəɗi, ngə shikəɗi inda tə hə ga tsakə nda chi, aka ənga, anda mər sakəda wa. 8Kəl ja, alenyi tə səya tə hə'i mənakəu. Nda tsa ga ha, ga hətə kər, alenyi makərkumənyi, alenyi kwakumənyi ba'a alenyi gharəu gharəu.”
9Ngə cha na, “Ndə nda na himi ngati, cha ngati.”
Yesu tə Dəkəbiya Sənda Ba'ada Ndər Tləka ngə təkəri
(Mat 13:18-23; Luk 8:11-15)
10Ahir dlama nji'inda tə wiɗa, Yesu tə ngya ka shawa nyi ana alenya nji, ngə nda jau nyi sənda ba'ada inda kwa cha. 11Ngə cha nar nda, “Nahi, a ngya hi tə nji hya zəndəbiya dəhə sə'inda tə ɗəwa ku təlkur Hyel, kəl ja, a nə nji'inda pa'a ku pama hi, madami kəl ana ba'ada. 12Ga cha ɗa wi nda likatəkatə tə na,
‘Nda kwa ndzama,
ya a səda nda kwa la'a wa,
nda kwa ngati,
ya a da nda kwa ngabiya wa.
Manda ngabiya,
nda kwa shar ngya kənda
ya njo farbikə kənda.’#4:12 Ndzamar tsəu ku: Ish 6:9-10. ”
13Ngə Yesu tə nar nda, “Macha a da hya ngabiya ba'ada nə wa, aman ngə hyo ɗana ngabiya alenya? 14Ndər tləka nga, ɓwanya Hyel ngə cho ucha. 15Chuli inda səya ku laku, nanda ingə ba'adar nji'inda ngatə ɓwanya Hyel. Təma Shantan tə shili həbiya ɓwanya nda nja tləkəya ku ɗufwa nda. 16Əngə tanyi chuli inda səya tə hya fafa inda, nanda ingə ba'adar nji'inda ngatə ɓwanya Hyel, ga kusa dləutsə na hirgyaɗi. 17Kəl ja, manda a nda chiya ngilang ku ɓwanya Hyel wa, nda nənyi jiri nə bəji kushiu tanyi. Nda nda gwa ku ɓwaɓwatə ana izza aka ɓwanya Hyel, ɗəɗəu tanyi nda ɓəla yahi. 18Chuli inda pəpə ku lya shikəɗi nda, nanda ingə ba'adar nji'inda ngatə ɓwanya Hyel, 19kəl ɗəngha na ngyar dunəya, ana gwa'a gəna, daɓə huɓər alenya səu, tə tsakər chi təkəra ɓwanya nda ga katə nda tsa mər sakəda. 20Chuli inda səya tə hə'i mənakəu, nanda ingə ba'adar nji'inda ngatə ɓwanya Hyel, ga dləutsi, ga mər sakəda, alenyi makərkumənyi makərkumənyi, alenyi tsəu kwakumnyi kwakumnyi, alenyi ma'a gharəu gharəu.”
Ba'ada təkəra Təkəsəu
(Luk 8:16-18)
21Ngə Yesu tə jau nda, “Ndər ngirnya hu'u da nya təkəsəu kwa nda mbuya na shala ndara cha fəu gwatə kiɗa gangər ya? A da wa, kəl nda nja hakəya tə chaka'i nyi, mbwa nda cho mbəl ti. 22Dəhə sənda tə ɗəwa cho chabiyadzə tə babaləu, ya njo chabiya hi dəhə sənda pa'a hya ngabiya sakana tə vichaməu. 23Ndə nda kwa i cha ngabiya, cha səya himi.”
24Cha ɓəla nar nda, “Səya ma himi mənakəu, shala nda hya dəkə kwa nə alenya nji, nacha njo dəkəu hi ni, njo ma'a tsakə kəhi. 25Ndə nda na ngabiya, njo tsakətə nyi, kəl ja, ndə nda pa'a da na ngabiya, njo dləuya mada kush nda cha ni.”
Ba'ada təkəra ma Chuli tə Tsa
26Yesu tə ɓəla na, “Təlkur Hyel kwa pabiya vanya ndə nda biya ka cha uchi chuli ku fah nyi. 27Ahir nga, piya hya'ati, vu'i na pəchi, ngə chuli nda tsa ga həa, ya ana cha zəndə ndara aman sənda ɗa wa. 28Hə'i ngə kwa biyandə sakəda tə kərnyi, tangərma chiva, cho nda həkər, ahir əngə tsə'u cho pə li. 29Ma bəjir mər fa ɗa, tlakər fa kwa shili na tlaku nyi cho tliya.”
Ba'ada təkəra Məla Mustad
(Mat 13:31-32; Luk 13:18-19)
30Cha ɓəla na, “Ana mi məno məməlandə təlkur Hyella? Ana ba'ada manə məno char ənda cha? 31Wi məlar Mustad cha, kush cha ku huɗa chuli, nda vanya ndə tə tləkəya. 32Ahir nja tləkəya, cho həa cho ndəɗə na dəgaləu aku huɗa wu nda ku ngakəu, eakə tsəu kwa la ki kənda tə cha wu nda.”
33Ana ba'ada ɗang Yesu tə par nda ɓwanya Hyel aku dəhə laku nda nda kwa ngabiya. 34A da cha dəkə madami nənda wa, kəl nda ana ba'ada. Kəl ja, macha ka shawa nyi, cho dəkəbiya nda dəhə səu.
Yesu tə Ta'ində Gyang Par
35A ba akəu, Yesu tə nar nyi nə shawa nyi, “A mən təra biya tiya fa'a na.” 36Ngə nda gwa ku param nda Yesu kwa nda, nda təra ga ngyar dlama nji'inda. Alenya param da nəu nda tsəu. 37Gyang par tə hya'atə gagaɗa kwa fi, ngə ɓiti tə ghəya kətsaɗə gu param nda kwa gwa'a nyandi. 38Yesu kwa njihanyi biyahir param nda, cha dəhətə kəra cha na sər dəhə kər. Shawa nyi tə yi hya'andənyi ga na, “Maləm, jan məno gwa'a kuɗa a da ko ɗəngha wa ya?”
39Ngə Yesu tə hya'ati ga tsə gyang nda, ana cha nar nyi nə ɓitir fa'a nda “Ta'i! Ka bəgə ɗiyu!” Ngə gyang nda ta'i, ngə mbwa nda ɗa shwanghəu.
40Ngə cha nar nyi nə shawa nyi, “Mya gwa'atə ləvəra səya hi əna? Ba'a sakanə a da hi na jirikur wa ya?”
41Ngə ləvəra udə səya nda, nda kwa na nə kərnənda, “Chul ndə manə nə əna? Ma'a gyang ana ɓitir fa'a kwa nəu nya cha!”
Currently Selected:
Markus 4: hbbNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
