Matta 9

Yesu tə Mbandə Ndə Nda Dza cha Kuɗiyadza

(Mar 2:1-12; Luk 5:17-26)

1Kəl Yesu tə gwa ku param ga ɓəl biyatə ya fa'a nda yo mələm nyi. 2Alenya nji tə shili na nyi ndə nda dza cha kuɗiyadza, tə sərpiya nyi. Manda Yesu tə la'a jirikur kənda, ngə cha nar nyi nə ndə nda, “Pinda ɗufwa ka, zər ɗa, fartə nji bikə ngha.”

3Kəl ngə alenya maləm gadlagadla tə na ku ɗufwa nda, “Ndə nə kwa həyatə Hyel!”

4Nda Yesu zəndə sənda nda kwa jigadəma, ngə cha na, “Mya gwa'atə hyo jigadəma chul səɗimi wi ngə ku ɗufwa hya? 5Manə ngə kusa lya, nja na, ‘A fartə nji bikə nghə zəma,’ aa nja na, ‘Hya'atə ka ma'i?’ 6Kəl ja, ga hya zəndə ənda gyalkur farbikər səpəla'a da tsa zər ndə tə dunəya na.” Ngə cha nar nyi nə ndə nda dza cha kuɗiyadzə nda, “Hya'ati, hətə sərpiya ngha ka təra kyo ki.” 7Ngə ndə nda hya'atə ga təra kyo ki. 8Nda dlama nji tə la'a ənga, ngə ləvər tə səya nda, nda fal Hyel, nda nənyi gyalkur nə nji ənga.

Yesu tə Nga Matta

(Mar 2:13-17; Luk 5:27-32)

9Yesu tə ngyar mbwa nda, aku sakanda cho ma'i ti, ngə cha la'a ndər tsəm tsachi, tləm nyi Matta, atə mbwar tsəm tsachi. Ngə Cha nar nyi “Nəu ɗa.” Ngə Matta tə hya'atə ga nəu nyi.

10Vanya bəji Yesu ka shawa nyi kwa səm sərsum ku ki Matta, njir tsəm tsachi ka njir mər səpəla'a ɗang tə shili, nda kwa səm sərsum kə'i nda. 11Nda njir Farisi tə la'a ənga, nda jau ka shawa nyi, “Mya gwa'atə maləm kəhi kwa səm sə ka njir tsəm tsachi ka njir mər səpəla'a?”

12Manda Yesu tə ngatə ənga, ngə cha na, “Nji yiying do gwa'a ndər kuzəkə wa, Kəl njir shiləka. 13Ma'i ma hya ki gwa'abiya sənda Likatəkatə kwa cha, ‘Təhuɗə ngə ya ndiya i, a da hatəmachi wa.’ A da ya shili ka ga ya nga njir mər sə tsa'atsa'a wa, kəl nda njir mər səpəla'a.”

Jau təkəra Səmdzən

(Mar 2:18-22; Luk 5:33-39)

14Kəl ngə ka shawa Yohana ndər mər baɓtisma tə shili ga jau nyi, “Ma ngə na ea nəkəea ka njir Farisi kwa səmdzən wa'atanyi ya ka shawa nghə da kwa səmdzən wa?”

15Ngə Yesu tə wuma, “Ama ka bazhinya sal gambəl kwa mər huɗətla ya tsəu tanda ka sal gambəla? Bəji kwa shili nda njo hənda sal gambəl tsa nda, sakanda ngə nda kwa dzəgwa səmdzən.

16“A ndə nda kwa səbiya ləkutə halhal ana taɗənyi wa, aka macha mər ənga taɗənyi nda kwa tanda halhalənyi nda, ya cho tsakətə kutla 'ualəu matsa nda haaɗa. 17Ya a ndə nda kwa pəu taɗər ɓitir anap ku salakam halhal wa. Macha mər ənga salakam nda kwa pətla, ɓitir anap tsəu kwa pəa, ya salakam nda tsəu kwa pətla. Taɗər ɓitir anap kəl ku taɗər salakam, təwa ənga mbəɗandə tənji kya'a.”

Kwar Ndəradəgal ana Mala nda Tsəkar Ləkutə Yesu nda

(Mar 5:21-43; Luk 8:40-56)

18Sakanda Yesu kwa ɓwanya nə Shawa Yohana ndər mər baɓtisma, kəl ngə vanya ndəradəgal nə Isra'ila tə shili da cha, ga uzhi huɗə nyi ga na, “Saka nənna pya kwa ɗa tə biya, anda ka fəkənyi chi ga pya cha ɓəla shili.” 19Kəl Yesu ka Shawa nyi tə hya'atə ga nəu nyi.

20Vanya mala da fa kwabəu mətlə ana ɓwaɓwatəu, mashi kwa nəu nyi, tə shili hir Yesu ga tsəkar nyachira ləkutə nyi. 21Cha na ku ɗufwa cha, “Ma ya kur tsəkar mada'a nya cha ləkutə nyi, yo mbəa.”

22Nda Yesu tə sha ga la'a nyi, ndə cha, “Kwa ɗa fiya ɗufəu! Jirikur nghə mbandə nghə ti.” Təma mala nda mbəa.

23Kəl ngə Yesu tə təra yo ki ndəradəgal nda. Nda cha la'a nji kwa ləlla nda kwa jiga dəla tangnda, 24ngə cha na, “Təra ma biya! A kwan da tə wa, hanyi ngə cho nja!” Kəl ngə dəhə nda tə gyaɗənda nyi. 25Ahir nda nja gədləbiya dlama nji'inda biya, cha gwa gəzəya cha kwa nda, ngə kwa nda hya'ati. 26Ngə ɓwanya nda tə wiɗə tə hə'i nda dəhəu.

Yesu tə Mbandə Njir Wuləfə tsa'a Mətləu

27Nda Yesu tə ngyar mbwa nda, kəl ngə njir wuləfə mətləu tə nəu hi nyi ana kurakəu nda kwa na “Zər Dauda, ngatə təhuɗə kəea!”

28Nda Yesu tə gwa ku ki, ngə njir wuləfə inda tə shili da cha, ngə cha jau nda, “A nənyi təhi jiri ənda kwa nau ya mbandə hi ya?” Ngə nda na, “A, Tlakəu.”

29Ngə Yesu tə tsəkar lya nda ga na, “Cha ɗa nə hi tsa'atsa'a na jirikur kəhi!” 30Ngə lya nda tə mbəɗa. Ngə Yesu tə tsau nda bar, “Ngwa hya da dəkar nyi səna nə madawa wa!” 31Kəl ja, nda təra ga ki bəzəya tə hə'i nda dəhəu.

Yesu tə Mbandə Ndə Təngtəng

32Nda njir wuləfə mətlə inda nja mbandə nda kwa təra, kəl nja shili na nyi vanya ndə təngtəng, ndə nda pa'a kwa nau ndəra, nda na məlləm ku kəra cha. 33Yesu tə gədləbiya məlləm nda ku kəra cha, kəl ndə nda nau ndəra. Ngə dlama nji'inda mər məngəl ga na, “Adda! A mən taa la'a chul sənə ku Isra'ila wa.” 34Kəl ja, njir Farisi tə na, “Təl məlləm ngə tə nənyi gyalkur gədləbiya məlləm.”

Yesu tə Ngatə Təhuɗə Nji

35Ngə Yesu tə biya zhulitə dəhə məlləm inda tangnda. Cho dlədləɓə nə nji ku vi pətlənya kənda i, cho bəzə Mafakə Mənakə təkəra təlkur, ana cho mbandə nji na kala shiləka ana tar yiyingkur. 36Kəl ja, nda cha la'a dlama nji, ngə cha ngatə təhuɗə kənda, aka nda kwa wi na kərnənda, a ndər vala nda da wa, tang wi kətəng kəla ndər ɓəla. 37Ngə cha nar nyi nə shawa nyi inda, “Ja tlər bwaɓəu, ya njir mər tlər tsaɗəu. 38Gədi ma tlakə nda təkəra tləra, aka ga cha sətə njir mər tlər gu fa nyi.”

Currently Selected:

Matta 9: hbbNT

Highlight

Copy