Matta 23

Yesu tə Təɗəhimi nə Nji təkəra ka Maləm Gadlagadla ka Njir Farisi

(Mar 12:38-39; Luk 11:43-46; 20:45-46)

1Ngə Yesu tə ɓwanya nə dlama nji ana shawa nyi. 2“Maləm gadlagadla ka Farisi ingə nja nənda gyalkur dlədləɓə gadlagadla Musa. 3Aka əngə ja, hya mər dəhə sənda nda dlədləɓətə hi hya nəubiya, kəl ja, ngwa hya da mər ənda nda kwa mər wa, aka anda kwa mər sənda nda kwa dlədləɓə nə nji wa. 4Nda kwa fəkənyi sə tədəɓə nə nji, ya a da nda kwa har mada kwar cha nda ka nda vala nda nə wa.

5“Nda kwa mər dəhə səu, ga nja na. Nda kwa mbatə tsəfətsəfər ɓwanya Hyel ku səu, kwa mbiya ku nyama nda ka shaha nda,#23:5 kwa mbiya ku nyama nda ka shaha nda: Njir Isra'ila kwa tsakətə Dzəgaməkura ləkutə kənda matsa nə alenya nji, ga cha char ənda dzəvədzəvənyi nda nə Hyel. LikJi 15:37-41. nda kwa ɓəliya ləkutə kənda na pa'ua dzəgamə dzəgaməu matsa nə alenya nji. 6Nda kwa i ngya tə mbwar ngya mənakə tə mbwar ladər, ana mbwar ngya nda na səli ku vi pətlənya. 7Nda kwa gwa'a ka nja usa nda na səli tə suku, ana nja nga nda maləm. 8Kəl ja, ngwa hya da i madawa nga hi ‘Maləm’ wa, aka ndə zhang tanyi ngə maləm kəhi, ya dəhə hi nji ka zamə nyi hi. 9Ya ngwa hya da nga madawa ‘Ada’ tə dunəya nə wa, aka Ada zhang tanyi tsa hi, nacha ngə Hyel nda kya huɗamələm. 10Ya ngwa nja nga hi ‘Gavərma’ wa, aka gavərma kəhi zhang tanyi, kəl nda Kəristi. 11Ndə nda dəgal ku pama hi dəhəu, kəl cha mər mavakur nə hi. 12Aka kala ndə nda tə həkəra kərnyi, njo tashiya nyi, kala ndə nda tə tashiya kərnyi tsəu, njo hətə nyi səli.

Yesu tə Kirpənda Dəmənkur

(Mar 12:40; Luk 11:39-42, 44, 52; 20:47)

13“Kirpəu nahi ka maləm gadlagadla ka njir Farisi, nji dəmən! Hya datə nyavi təlkur huɗamələm tsa nji, nahi tə kərnəhi da kwa gwa wa, ya katə təhi lakur gwa nə alenya nji.#23:13 Alenya tangərmar tsəfə na chi tə tsakəngər chada 14: Kirpəu nahi ka maləm gadlagadla ka njir Farisi, nji dəmən! Njir gugur mahi'ifi, hya kwa fa'aya ki kənda, ana hyo pətlənya pələkəu, ka nja la'a. Aka əngə ja, ɓwaɓwatə kəhi kwa ɗa ɗimi gagaɗa.

15“Kirpəu nahi ka maləm gadlagadla ka njir Farisi, nji dəmən! Hya kwa dləgəl fa'a hya kwa ma'i kyo mələm naɗəu ga hya uya ndə zhang, cha sha ya ku lakur nəu kəhi, ya ma hya uya, ba'a hya fiya nyi ka ndər mər tlər hu'u zhaka mətləu ndiya matsa hi.

16“Kirpəu, nahi nda kwa cha laku nə nji ya wuləfə hi, hyo dlədləɓə nə nji bəra, ‘Ma ndə nda tə səmfəla na Mbwa'alə Hyel a da cha mbiya kərnyi na səmfəla nda wa, kəl ja, macha səmfəla na bəjingha nda ku Mbwa'alə Hyel, mbiya tə cha kərnyi.’ 17Njir wuləfəu, nji kəkəng! Manə nga ndiya, bəjingha zəma, aa Mbwa'alə Hyel nda tə dzəvəya bəjingha nda? 18Ətsəu, hyo dlədləɓə bəra, ‘Ma nda səmfəla na dzəgana Hyel, a da cha mbiya kərnyi na səmfəla nda wa, kəl ja, macha səmfəla na sər hatəmachi nda kyatə dzəgana nda, a mbiya tə cha kərnyi.’ 19Njir wuləfəu, manə nga ndiya, sənda kyatə dzəgana nda zəma, aa dzəgana nda tə dzəvəya sənda kyatə nda? 20Aka əngə ja, ma ndə kwa səmfəla na dzəgana Hyel, a səm tə cha fəla tsa'a kya'a na sənda kyatə nda ni. 21Ma ndə tə səmfəla na Mbwa'alə Hyel tsəu, a səm tə cha fəla na Hyel nda kwa ngya kwa. 22Ma ndə tə səmfəla na huɗamələm, a səm təcha fəla na dzəga təlkur Hyel, ana ndə nda kwa ngya ku dzəga nda.

23“Kirpəu nahi ka maləm gadlagadla ka njir Farisi, nji dəmən! Hyo nənyi nə Hyel zhang ku kuma nə kala heli səkwar kəhi, kəl ja, hya ngyar ɓəlatə sə'inda ndiya ku gadlagadla wi ka jiri, təhuɗə ana jirikur. Tsa'atsa'a tanyi hya həbiya zhang ku kuma, kəl ja, a da kəl hya ngyar mər alenya sə mənakə ingə wa. 24Chachiratapa wuləfə i, hyo shishirbiya ɓiti kəhi tsa hya da sanya dəhə ka favəu, kəl ja, hya kwa ndasənya dləgwam!

25“Kirpəu nahi maləm gadlagadla ka njir Farisi, nji dəmən! Hya kwa chinda dagərya ɗeɗika ka shala, kəl ja, ta nda chaɓə na sənda hya uya təwa kamu'a ana ikər. 26Nahi njir Farisi nji wuləfəu! Chinda ma ta ɗeɗika ka shala tangərma, ahir nga dagərya cha kwa ɗa chichinyi tsəu!

27“Kirpəu nahi maləm gadlagadla ka njir Farisi, nji dəmən! Aka wi hu hi, inda nja yahitə na sə pərtəu, durdur tə li, kəl nda ta nda chaɓə na ɗihi nji kuɗəkuɗə ka sə hiɗahiɗa. 28Əngə hi, a biyabiya madawa kwa la'a hi wi njir mər sə tsa'atsa'a, ya ɗufwa hi nyinyinyi na dəmənkur ka pəla'akur.

29“Kirpəu nahi maləm gadlagadla ka njir Farisi nji dəmən! Hya kwa hərtə hu njir mətakər, ana hya kwa ɓatlətə hu nji'inda tə mər sə tsa'atsa'a, nda jival kəhi tə kuɗənda. 30Hya kwa na macha ana pi ea ku bəjir ka jival kəea, a da eo nda daɓəkər kanda ku kuɗə njir mətakər ingə wa. 31Təwa na ənga, a char təhi ənda nahi ingə nguli nji'inda kuɗənda njir mətakər! 32Yau, udiya ma tlər nda jival kəhi tə ghəya ja! 33Nahi pwabu i, nguli Tsapəu! Aman hyo ɗana mbəɗə tahi tsa nəumar hu'u nda ba'anawa? 34Aka ənga, yo sətə hi njir mətakər, ana njir dəma, ana maləm i, hyo kuɗənda alenyi, hyo kukwanda alenyi tə taməngəla, hyo tlatə alenyi na wuɗa ku vi pətlənya kəhi i, hyo nəu nda mələm mələm hya kwa nənda ɓwaɓwatəu. 35Aka ənga, shafa njir mər sə tsa'atsa'a nda nja kuɗənda kwa səya hi, ghəya tə Habila ndə kəla bikəu yi tsa'a tə Zakariya zər Barakiya, nda hya tsəya ku pama mbwa chicha ana dzəgana hatəmachi. 36Jiri yo nar hi, ngəna nəuma, kwa səya təkəra njir bəji na!

Yesu tə Char Huɗətla təkəra Urshalima

(Luk 13:34-35)

37“Njir Urshalima, njir Urshalima! Hya dlənda njir mətakər ga vəvakənda nji'inda Hyel tə sə na hangu! Zhaka yiɗawa ya gwa'a ya gapətə hi wi ngə təga kwa tsəməu nguli nyi gu babəka cha, ya a da hya i wa! 38Ndzama, njo ngyar ki nghə kwa ɗa jwajwa'a, ndə da kwa wa. 39Aka yo nar hi, a tsəu hyo tsakətə la'a ɗa wa, kəl sakanda hya na, ‘Ndər papa'akur ngə ndə ngə kwa shili ku tləmər Tlakə nga.’ ”

Currently Selected:

Matta 23: hbbNT

Highlight

Copy