Matta 22
22
Ba'ada təkəra Ladər Gha Mala
(Luk 14:15-24)
1Yesu tə ɓəla ɓwanya na ba'ada nənda cho na, 2“Təlkur huɗamələm kwa pabiya da ba'ada nənna. Vanya təl da ɗakaɗa nda tə ɓatliya ladər gha mala nə zər nyi. 3Ngə cha sə mavi'i nyi ka nda ki nar nyi nə nji'inda nja nga nda shili aka ɓatliya tənji dəhə səu, kəl ja, nji'inda ngyar shili.
4“Kəl ngə cha ɓəla sə alenya mavi'i nda ki nar nyi nə nji'inda nja nga, ‘Ɓatliya təya ladər, a tsəya təya hahaldi i'i ana tla nda nja ngalti, dəhə sə ɗati mənakəu. Anda ma tə mbwar ladər!’
5“Kəl ja, mihiɓi inda nja nga nda, da səhimi da nda wa, kala ndə tə təra ki tsa gadu nyi, ndə zhang tə tərata nyi kyo fa nyi, vanya ndə tə tərata nyi ki shafəli nyi, 6ngə alenya nji'inda tə səya mavi'i inda, ga dədəgənda nda, ga tsəya nda. 7Ngə huɗa təl nda tla gagaɗa, ngə cha sətə ləvaləva nyi nda yi kuɗənda njir tsa nji'inda ga nginda mələm kənda tlaɓətlaɓəu.
8“Ngə cha nga mavi'i nyi, ga nar nda, ‘A ɓatliya tənji ladər gha mala na, kəl nda nji'inda nja nga da ki nə wa. 9Sakana, təra ma kyo mətəkər laku i, hya nga kala nji'inda hya la'a, nda shili ku ladər na.’ 10Kəl ngə mavi'i inda tə biya ku lakur yauraki ga nga kala nji'inda nda uya shili ku ladər, nji mənakəu ana nji ɗimi dəhəu, vi ladər nda tə nyi chaɓəu.
11“Kəl ja, sakanda təl nda tə gwa ka cho tular mihiɓi inda, ngə cha la'a vanya ndə nda pa'a da na ləkutə ladər dzə nyi. 12Ngə təl nda nar nyi nə ndə nda, ‘Bazha, aman ka ɗana səgwa na, ya a ləkutə ladər da dzə nghə wa?’ Kəl ja, ndə nda da uya sər dəkə wa.
13“Təma ngə təl nda tə nar nyi nə mavi'i nyi, mbiya nya ma chi na hi hya vakəu nyi gu kutlə kyakyar nga. Tangnda nja kwa tiwi ana ɗəhir.”
14Ngə Yesu tə udiya ga na, “Ɗang nji'inda nja nga, kəl ja, ɗəmɗəmənyi tsaɗəu.”
Jau təkəra Tsachi
(Mar 12:13-17; Luk 20:20-26)
15Njir Farisi tə təra ki mbandər ənda nda kwa ɗa na səya nyi na bikə ku ɓwanya. 16Ngə nda sətə alenya shawa kənda kə'i njir nəu hir Hiridus, ngə nda na, “Maləm, zəndətə ea ənda ndər jiri ka. Ko dlədləɓə sənda jiri təkəra ɓwanya Hyel, ka hətə nji dəhə sə zhang, aka a da ko takəl ku nji wa. 17Dəkar ea ja, ndara mi sənda la'a ka? Tsa'atsa'a tanyi məna tsachi nə Kaisar zəma, aa a da tsa'atsa'a wa?”
18Kəl ja, Yesu zəndəbiyatə kwakunakur kənda, ngə cha na, “Na hi nji dəmən! Mya gwa'atə hyo nga ləbam na'a? 19Char ɗa ma kwaba nda njo tsachi ni!” Ngə nda shili na nyi kwaba nda, 20kəl ngə cha jau nda, “Səlirma wa ana tləmər wa nə tə kwaba na?”
21Ngə nda nar nyi, “Nə Kaisar nga.” Ngə Yesu tə nar nda, “Nənyi ma nə Kaisar sənda nə Kaisar, hya nənyi nə Hyel tsəu sənda nə Hyel.”
22Nda nda ngatə ənga, kəl nda mər məngəl, ngə nda ngya nyi ga tərata nda.
Jau təkəra Hya'atər Nji Kuɗəkuɗa
(Mar 12:18-27; Luk 20:27-40)
23Tsəu pəshinda tanyi alenya njir Saduki, nda kwa na, a hya'atər nji kuɗəkuɗə da wa, tə shili da cha ga jawa. 24“Maləm, Musa tə nar ea ənda ma nda tah a zər nyi da wa, tuku zamənya ɓwagu tsər na mala nyi nda ga cha yatsə nyi ngulisha'a nə zamə nyi nda. 25Alenya zama da məɗəfa ku pama ea ɗakaɗa. Ngə zə'ualə nda həbiya mala ga tah a zər da wa, ngə zamə nyi tə ɓwagu tsər na mala nyi nda. 26Tang wi ngə tanyi tsəu tə ɗa na mətləkunyi nda, ya əngə makərkunyi, tsa'a tə məɗəfəkunyi nda. 27Udiya jwamənyi ngə mala nda tah. 28Əja ya, atə pəchir hya'atər nji kuɗəkuɗə mala wa cho ɗa lya nda, aka dəhə nda hə nyi tə nda?”
29Yesu tə wum ga na, “A satə hi! Aka a da hya ngabiya sənda tsəfətsəfə nyi ku likatəkatə ndara gyalkur Hyel wa. 30Bəjir hya'atər nji kuɗəkuɗə njo ɗa wi Chama Hyel inda kya huɗamələm, mahi'i ka shili tsəu da kwa hədzə wa. 31Ətsəu ya, a təkəra hya'atər nji kuɗəkuɗə a hya kəratsəntə sənda Hyel tə dəkar hi ma? 32‘Naya ngə Hyel nə Ibrahim, Hyel nə Ishaku, ana Hyel nə Jakop.’ A da cha Hyel nə nji kuɗəkuɗə wa kəl nda Hyel nə nji'inda na pi.”
33Nda dlama nji'inda tə ngatə ənga, kəl nda mər məngəl na dlədləɓə nyi.
Gadlagadla nda Ndiya
(Mar 12:28-34; Luk 10:25-28)
34Manda njir Farisi tə ngatə ənda Yesu chiya tə njir Saduki na ɓwanya, ngə nda tsəmtədzə ga yada Yesu, 35zhang ku pama nda, maləm gadlagadla cha, cha gwa'a ngəya nyi ləbam na jawa.
36“Maləm, gadlagadla manə nga ndiya ku tsaubar kəmən dəha?”
37Ngə Yesu tə ɓəlakə nyi, “ ‘Nyida Hyel Tlakə ngha ana dəhə ɗufwa ka ana dəhə pya ka, ana dəhə jigadəma ngha.’ 38Na cha ngə tangərmar gadlagadla ana nda tə ndiya dəhəu. 39Mətləkunyi nda pabiya da nga, ‘Ka nyida təwul ngha wi da ko nyida kərngha.’ 40Dəhəkura gadlagadla Musa ana sənda njir mətakər tə dlədləɓa, ta'itə təkəra gadlagadla mətlə ina.”
Jau təkəra Kəristi
(Mar 12:35-37; Luk 20:41-44)
41Tsəutanyi njir Farisi tangnda tə mbwar zhang, ngə Yesu tə jau nda, 42“Mi jigadəma kəhi təkəra Kəristya? Zər wa cha?”
Ngə nda na, “Zər Dauda cha.”
43Ngə Yesu tə na, “Ya ma ngə Dauda təwa gyalkur Shanguɗə Karti, tə nga nyi Tlakə ɗa? Aka Dauda tə na,
44‘Tlakə tə nar nyi nə Tlakə ɗa,
Ngyata nghə tə chisəma ya,
kəl sakanda ya fiya njir dawa nghə
tə kiɗa hya ka.’
45“Macha Dauda tə nga nyi ‘Tlakə ɗa’ aman cha ɗana ɗa ka zər nya?”
46A ndə da nau ɓəlakə nyi wa, ya fwatə tə bəji nda, a ndə da zhaka nau jau nyi səkə wa.
Currently Selected:
Matta 22: hbbNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
