Luka 9

Yesu tə Sə Shawa Kwabəmətləu

(Mat 10:5-15; Mar 6:7-13)

1Ngə Yesu tə nga shawa kwabəmətlə inda shili tə mbwar zhang, ga nə nda gyalkur nə gədləbiya dəhə məlləm ku kəra nji ana nda mbandə shiləkə pampaməu. 2Cha sə nda, nda ki bəzə mafakər təlkur Hyel ana nda mbandə njir shiləka. 3Cha nar nda, “Ngwa hya da ba'a hə madami aka ma'i kəhi wa, ndara zəwa, ndara mbəl, ndara sərsuma, mada kwaba wa. Ya əngwa hya da ba'a hə vanya ləkutə pam matsa nda dzən hi wa. 4Ma ki nda nja dləutsə hi kwa, hya ngya tangnda kəl bəji da hyo ngyar mələm nda. 5Dəhə nji'inda ngyar dləu hi, ma hyo biya ku mələm nda, hya tsa nda bərbər mələm nda tə hya hi, ga cha ɗa ka matauli kəhi.”

6Ngə nda hya'atə ga ghəya na ɓa mələm i, nda kwa bəzə Mafakə Mənakəu, nda kwa mbandə njir shiləkə tə mbwa pampaməu.

Ɗufwa Hiridus tə Tsafa

(Mat 14:1-12; Mar 6:14-29)

7Nda Hiridus nda kwa səm təlkur Galili tə ngatə mafakər dəhə sə'ingə kwa ɗa nga, ngə ɗufwa cha tə tsafə gagaɗa, aka alenya nji kwa na ənda Yohana ndər mər baɓtisma nda na hya'atə ku hwa. 8Alenya nji tsəu kwa na ənda Iliya ndər mətakər Hyel ngə tə ɓəla shili. Ətsə'u alenya nji kwa na ənda zhang ku huɗa njir mətakər Hyel inda ɗəɗəm inda na hya'ati. 9Ngə Hiridus tə na, “A zəndətə ya ənda a tlanda tə ya kəra Yohana. Ya ndə manə nə yo ngatə chul sə'inə təkəra cha?” Ngə cha gwa'a ənda cho ɗa na la'a Yesu.

Yesu tə Nənyi Sərsum nə Nji Dəbu Tufu

(Mat 14:13-21; Mar 6:30-44; Yoh 6:1-14)

10Changhabal inda ɓəl shili ga nar nyi dəhə sə'inda nda mər nə Yesu. Ngə nda təra yo vanya mələm njo nga Betsaida nanda səkənda. 11Kəl ja, nji ɗang tə zəndəbiya ga nəu nyi yi nda. Cha dləutsə nda, ga ndər nənda təkəra təlkur Hyel, ga mbandə njir shiləka.

12Nda pəchi kaɗə təɗa, ngə shawa kwabəmətlə inda shili da Yesu ga nar nyi, “Ngyar nji'inə nda təra gu mələm ka fa inə lələhə ina ga nda gwa uya sərsuma ana mbwar hanyi, aka a səda tangnə wa.”

13Ngə Yesu tə ɓəlakə nda, “Ya nənda ma sərsum ja nda səma.”

Nda nar nyi, “Kəl takwara tufu ba'a kalfi mətlə tanyi nə tsa ea tangna, kəl nda macha eo ki ɗəlbiya nyi sərsum nə chul nji ɗang na.” 14(Shili kwa ɗa dəbu tufu).

Kəl ja, cha nar nyi nə shawa nyi, “Nar nda ma nda ngya, nji tufkumnyi ku kala dzuku.” 15Ngə shawa inda mər ənga, dəhə nja uya mbwar ngya. 16Ngə cha hətə takwara tufu ana kalfi mətlə inda, cho ndzam shi huɗamələm cha usaku Hyel təkəri. Ngə cha pəpasəu takwara inda ga nənyi nə shawa nyi nda təkənda nyi nə dlama nji. 17Madawa tə səma ga nyi. Ngə shawa inda tə tsəmtə sənda həyadza, tsəla kwabəmətləu.

Bitrus tə Pəbiya ndara wa ngə Yesu

(Mat 16:13-19; Mar 8:27-29)

18Vanya bəji da Yesu tə ngyar dlama nji ka cha pətlənya zhang tanyi. Kəl nda shawa nyi ingə ka cha. Ngə cha jau nda, “Wa njo na naya?”

19Nda na, “Alenya nji kwa na Yohana ndər mər baɓtisma, alenya nji Iliya, alenya nji tsəu kwa na zhang ku huɗa njir mətakər inda haaɗa ngə tə ɓəla shili.” 20Ngə cha jau nda, “Nahi nəkə hi ya, wa hyo na naya?”

Bitrus tə wum ga na, “Nakə ngə Kəristi nə Hyel.”

21Ngə Yesu tə təɗəhima shawa nyi tsa nda da par nyi nə madawa.

Yesu tə Ɓwanya təkəra Tə Nyi

(Mat 16:20-28; Mar 8:31–9:1)

22Ngə cha nar nda, “Tuku Zər Ndə kwa sa ɓwaɓwatə pampaməu, njirawawa'a mələm, wawa'ar fərist ana ka maləm gadlagadla Musa kwa ngya nyi. Njo tsəya nyi, pəshir hanyi makərkunyi cho hya'atə na pi.”

23Kəl Yesu tə nar nyi nə dlama nji, “Dəhə ndə nda kwa i nəu ɗa, tuku ngə cha ngyar kərnyi, cha hətə taməngəla nyi cha nəu ɗa. 24Aka dəhə ndə nda kwa gwa'a cha mbəɗandə pya cha, cho sanda, ətsəu, dəhə ndə nda tə sanda pya cha ka ya, cho uya. 25Mi zhar nda ndə kwa uya, macha uya dəhə sər dunəya ga tar pya cha? 26Ma ka ngatə kuzhi ɗa ana kuzhir ɓwanya ɗa, Zər ndə kwa da ngatə kuzhi nghə tsəu macha da shili ku səli nyi ana səlir Ada nyi ana chama karti i nə Hyel. 27Jiri yo nar hi, alenya nji da tangna sakana, a da nda kwa tə wa, kəl nda la'a shilir Zər Ndə ku təlkur Hyel.”

Yesu tə Shabiyadzə Paməu

(Mat 17:1-8; Mar 9:2-8)

28Ahir hanyi chisəu nda cha dəkə sə'ina, ngə Yesu tə hətə Bitrus, Yohana ba'a Yakubu kə'i cha nda təra gyo ma ka pətlənya. 29Sakanda cho pətlənya, ngə huɗəma cha shabiyadza, dzaki nyi tsəu tə ɗa pərtə tyaləu. 30Kəl janə nji mətləu, ka Musa ana Iliya kwa ɓwanya kə'i cha, 31nda chabiyadza ku səli nda kwa mbəla, nda ɓwanya ka Yesu təkəra laku nda cho nyabiya dəhə sənda Hyel tə nar nyi vu Urshalima. 32Hanyi wurta hənda Bitrus ba'a alenya shawa inda, kəl ngə nda hya'ati ga la'a səli nyi kwa mbəla ana nji mətlə inda ta'i kə'i cha.

33Ma nji mətlə inda kwa ngyar Yesu, ngə Bitrus tə nar nyi nə Yesu, “Tlakəu, mənakə gagaɗa təmən tangna, ma cha kwa i ka, yo latə madləɓa makər tangna, nənghə patləu, nə Musa patləu ana nə Iliya patləu.” (A Bitrus da zəndəbiya səngə cho ɓwanya təkər ngə wa).

34Tsəu cha ku huɗa ndəra kəl ləmbəkə pərtə nda kwa mbəla tə səya haɗiya nda dərdla'a, ngə ləvər tə səya nda. 35Kəl kurakə tə səya kyo ləmbəkə nda kwa na, “Nənna ngə Zər ɗa nda ya tabiya, sə ma himi da cha.” 36Nda kurakə nda wur na ndəra, manda la'a kəl jan Yesu zhang tanyi. Shawa inda gəziya dəhə sənda nda la'atə ɗa, ya a da nda par nyi nə madawa ku bəji nda wa.

Yesu tə Mbandə Vanya Zər ana Məlləm ku Kəra Cha

37Vanya zəkəu nda Yesu ka shawa inda səya kyo mə nda, nda həya dlama nji kwa səkə nyi. 38Vanya ndə ku pama dlama nji'inda tə nga ga na, “Maləm, ndzamar zər ɗa, kəl nacha ngə tsa ya tangəlanghəu. 39Mələm ngo fəltənyi, cho bəzənda nyi cho ləlla kəl mburum tə biya ku nya cha. A cho ngya nyi wa kəl nacha takasiya nyi. 40A gədi tə ya shawa nghə ka nda gədləbiya, ya a da nda nau wa.”

41Yesu tə wum ga na, “Kara, nahi njir bəji na, nji kəla jiri! Ba'a sakamani yo ngya kə'i hya? Ba'a sakamani yo səsə'u hya? Anda na zər nghə ngə tangna.” 42Nda cho shili, kəl məlləm nda tsatə nyi hə'i kəl dzədzi cho dzədzi. Kəl ja, Yesu tə tsə məlləm nda, cha mbandə zər nda ga ɓəlandə nyi nə ada nyi. 43Dəhə nji tə mər məngəl ana gyalkur Hyel.

Yesu tə Ɓəla Ndər təkəra Tə nyi

(Mat 17:22-23; Mar 9:30-32)

Tsə'u nda kwa mər məngəl ana sənda cha məra, ngə cha nar nyi nə shawa nyi, 44“Səya ma himi mənakə da səngə yo gwa'a ya par hi nga! Njo tləɗanda Zər Ndə nə nji.” 45Kəl ja, a da nda ngabiya kəra ɓwanya ngə wa. Nja hiwanda tsa nda aka əngə a da nda ngabiya wa, ya ləvər kwa tənda tsa jawa.

Wa ngə Ndə nda Ndiya na Dəgalkura?

(Mat 18:1-5; Mar 9:33-37)

46Ngə kəpala tə hya'atə ku pama shawa inda a təkəra nda wa ngə kwa ndiya na dəgalkur ku pama nda. 47Kəl ja, nda Yesu tə zəndəbiya sənda ku ɗufwa nda, ngə cha nga zər kush ga ta'ində nyi ləhə dzə nyi. 48Ngə cha nar nda, “Madawa tə dləutsə zər kush wi zər na, aku tləm ɗa, naya nda cha dləutsi, ma ndə nda dləutsə ɗa tsəu, a dləutsətə cha ndə nda sə ɗa. Ndə nda kush ku pama hi, nacha ngə dəgaləu.”

Ndə nda Pa'a kwa Mər Dawa na Hi nəkəhi nda

(Mar 9:38-40)

49Yohana ndəra ga na, “Tlakəu, ea la'a vanya ndəu kwa gədlə məlləm ana tləm ngha, ngə ea gwa'a ea katə nyi aka a da cha nəkəmən wa.” 50Ngə Yesu tə nar nyi, “Ngwa hya da ka nyi wa, dəhə ndə nda pa'a kwa mər dawa na hi, nəkə hi nda.”

Alenya Njir Samariya tə Ngyar Dləu Yesu

51Nda kaɗə bəji ɗa ka njo hənda Yesu sha huɗamələm, ngə cha hətə ku ɗufwa cha ka cha təra yi Urshalima.

52Ngə cha sə alenya nji ka ga nda təra biyama nyi, ngə nda go vanya mələm njir Samariya ka ga nda ɓatliya ka shili nyi. 53Kəl ja, njir Samariya ngyar dləutsə nyi, aka zəndətə nda cha biya ka cha təra yi Urshalima. 54Manda ka shawa nyi, Yakubu ana Yohana tə la'a ənga, nda na, “Tlaka, aa ea ngatə hu'u hya'atə kya huɗamələm a səya kwasənya nda ya?” 55Kəl ngə Yesu tə sha ga tsə nda. 56Ngə nda təra kyo vanya zər mələm paməu.

Nji'inda kwa Gwa'a nda Nəu Yesu

(Mat 8:19-22)

57Nda nda kwa ma'i ngə vanya ndə tə nar nyi nə Yesu, “Ya kwa nəu ngha mada abari.” 58Ngə Yesu tə wum ga nar nyi, “Hyawi, ka'u kənda da, eakə tsəu ki kənda da, kəl ja, a mbwar fiya kər da tsa Zər Ndə wa.” 59Ngə cha nar nyi nə vanya ndəu, “Nəu ɗa.” Kəl ngə ndə nda na, “Tlakəu, ngya ɗa ya ki haɗənda ada ɗa gwadagəu.” 60Ngə Yesu tə nar nyi, “ngyar nji kuɗəkuɗa nda haɗə nji kuɗəkuɗə kənda. Nakə nənghə ma'i ka ki bəzə mafakə təlkur Hyel.” 61Ngə vanya ndə tsəu tə na, “Tlakəu, yo nəu ngha, kəl ja, ngya ɗa ya yi par nyi nə njir kiɗa gwadagəu.” 62Yesu tə nar nyi, “Ndə nda fətə cha cha tə gələ'u zwa, ga sha cho ndzam yahi, a da cho ki na təlkur Hyel wa.”

Currently Selected:

Luka 9: hbbNT

Highlight

Copy