Luka 14

Yesu tə Mbandə Ndə Səkəu tə Pəchir Ngyaməngya

1Vanya Pəchir Ngyaməngya, Yesu tə gu ki vanya dəgalər Farisi ka cha səm sərsuma. Nji tsəu tə piya li nda kwa ndzam nyi. 2Kəl jan vanya ndə nda cha cha ka hya cha tə mbatə dza tə shili da Yesu. 3Ngə Yesu tə jawar ka maləm gadlagadla ka njir Farisi, “Gadlagadla kəhi ngyar tə nja mbandə ndə tə Pəchir Ngyaməngya zəma, aa a da wa?”

4Kəl ja, a səda nda na wa. Ngə Yesu tə gəzəya ndə nda ga mbandə nyi, ga nar nyi cha təra. 5Kəl Yesu tə jawar nji'inda, “Ma zər kəhi ndara tla kəhi tə təɗə gu ka'u ndzuɗakəu, a da hyo kusa həbiya nyi mada tə Pəchir Ngyaməngya ma?” 6Ya nji'inda da uya sər pə wa.

Fiya Kərnghə wi a da Kə Vanya Sə wa

7Nda Yesu tə la'a ənda alenya nji'inda nja nga ka səm sərsum nda kwa gwa'a kəl mbwar ngya tsəkəɗəu, ngə cha par nda ba'ada na. 8“Ma nja nga nghə ka ladər gha mala, ngwa kə da ba'a ngya tə sərngya dzəgam wa, kwa nau cha ɗa a ngatə nji vanya ndə nda tə ndəɗə nghə na dəgalkur. 9Cha da ɗa ndə nda nga hi kya'a hi nda kwa shili nar ngha, ‘Hya'atə ka nənyi sər ngya nə ndə na.’ A la'a təkə wa? Kuzhi kwa səya ngha, aka ko ɓəl səya tə vir ngya nda tashiu. 10Kəl ja, ma nja nga nghə ka ladər, ka yi gwa'ar sər ngya tashə ka ngyata ngha, tsa'aka ma ndər nga nghə ka ladər nda shili cho nar ngha, ‘Bazhi ɗa, anda ka ngya tangə tə sər ngya dzəgam na.’ Səngə kwa gwa'atə dəhə alenya mihiɓi inda kwa la'a səli ngha. 11Aka dəhə ndə nda tə həkəra kərnyi, njo tashiya nyi, ndə nda tə tashiya kərnyi tsəu njo hətə nyi səli.”

Mər Mənakəkur

12Ngə Yesu tə nar nyi nə ndər nga nyi nda, “Ma ka nga ndə ka səm sərsuma, ndara ka ɓatliya ladər, əngwa ka da ba'a nga ka bazhi ngha, ndara ka zamə ngha, ndara njikə hi, ndara ka təwul nghə njir gəna wa, aka ndo da nga nghə ma'a nanda. Təwa əngə nda kwa kinda nghə dəhə sənda ka mərtə nda. 13Ma'a ɗa ko nga nji aka ladər, ka nga njir ɗali, nji'inda dzanda sanyadza, njir gadal, ana njir wuləfəu. 14Ma ka mər əngə ko uya papa'akur, aka a chul nji'inə da kwa nau kinda nghə wa. Hyel ngə kwa da kinda nghə pəshinda nji'inda mər sə tsa'atsa'a kwa da hya'atə ku hwa.”

Ba'ada nə Ladər Dəgaləu

(Mat 22:1-10)

15Nda zhang ku pama nji'inda kwa səm ka Yesu nda ngatə ənga, cha na, “Ndər papa'akur ngə ndə ngo da səm ku ladər təlkur Hyel nga.”

16Yesu tə wum nənyi, “Vanya ndə da tə ɓatliya ladər dəgaləu ga nga nji ɗanghəu. 17Nda bəjir ladər nda ɗa, cha sə mava nyi cha yi nar nyi nə nji'inda cha nga inda, ‘Anda ma, aka a ɓatliya tə nji dəhə səu!’ 18Kəl dəhə nda tə ghəya shili na alenya ɓwanya. Ndə nda tangərma tə na, ‘Ya ɗəlbiya fa, tuku yo gwa la'a ənda cha, yo gədi ngha, ngya ɗa,’ 19Vanyi ndə nda tsəu tə na, ‘Ya ɗəlbiya tla zwa kuma, ku laku naya ka ya ki dzar nda, yo gədi ngha, ngya ɗa.’ 20Vanyi ndə tə na, ‘Aku hanyi inə ya hə mala, aka əngə a da ya kwa uya lakur yi wa.’

21“Mava nda ɓəl ga yi nar nyi dəhə sə'ingə nə tlakər ki nyi. Huɗa tlakər ki nda tla, kəl ngə cha nar nyi nə mava nda, ‘Kusa biya, ka nəu kəra laku ka ngwamngwam ana ta mələm, ka tsəmtə njir ɗali, nji'inda dzanda tə sanyadza, njir wuləfəu, ana njir gadal, ka shili nanda tangna.’ 22Mava nda ma'i ga ɓəla shili, ga na, ‘Tlakəu, a mər tə nji sənda ka na, kəl ja, tsə'utanyi mbwa ba'a sakana.’ 23Tlakər ki nda nar nyi nə mava nyi, ‘Ma'i biya tə ya mələm ku laku wawa'a ka shiɗəɗənyi, ka nga nji ka ga ki ɗa nyi.’ 24Aka yo nar hi, mada ndə zhang da ku pama nji'inda nja ghəya nga inda da kwa ɗar sərsum ladər nə ya ɓatliya nə wa.”

Dzaukur nda ku Nəu Yesu

(Mat 10:37-38)

25Vanya bəji, dlama nji ɗang kwa nəu Yesu, ngə cha sha ga nar nda, 26“Dəhə ndə nda kwa i cha nəu ɗa, kəl cha i ɗa matsa ada nyi, ama nyi, mala nyi, ngulisha'a nyi, ka zamə nyi ka kwamə nyi, ana ma'a pya cha, pa'a əngə wa, a da cho nau ɗa ka shawa ɗa wa. 27Ndə nda pa'a da hətə taməngəla nyi ga nəu ɗa, a da cho nau ɗa ka shawa ɗa wa.

28“Ma ndə zhang ku pama hi kwa gwa'a hər ki dəgaləu, cho ghəya ngya cho nəɗar sənda hər nda kwa kwasənya gwadagəu, cha la'a ndara gəna da tsa cha nda kwa nji ka cha wurandə hər nda. 29Macha səya hya hər nda ya a da cha nau udiya wa, dəhə nji'inda tə la'a tlər nga, kwa gyaɗi nyi, 30nda kwa na, ‘Ndə na ghəya həra, a da cha nau udiya wa!’ ”

31“Ma təl ndana njir pa dəbu kuma kwa biya ka ki pa təl ndana njir pa dəbu mətləkumənyi, kəl cha ngya gwadagə cha la'a ndara dunama da tsa cha nda cho nau kura vanya təl nda. 32Macha a da cho nau wa, tsəu cha naɗəu, cho sətə nyi nji, aka yi gwa'a ngya mənakəu. 33Əngə tanyi madawa ku pama hi, pa'a cha təkə na dəhə sənda tsa cha wa, a da cho nau ɗa ka shawa ɗa wa.”

Ba'ada təkəra Wuna

(Mat 5:13; Mar 9:50)

34“Wuna sə mənakə cha, kəl ja, ma wuna tə təkə na ngarngarkur nyi, a da njo nau ɓatlətə nyi ngarngar səkə wa. 35A tsə'u sakəda nyi da wa, mada ku fa, ndara ka kuɓa, kəl nda nja pənda. Ndə nda na himi ngati, cha ngati.”

Currently Selected:

Luka 14: hbbNT

Highlight

Copy