Luka 1
1
Dəlahimi
1Nji ɗang tanyi tə gwa'a ka nda tsəfəbiya sə'inda tə nyabiyadza ku pama mən.
2Tang wi nda nja nə ea nda, a təwa tangərmar mavi'i ɓwanya Hyel inda tə la'a sə'ingə na lya nda. 3Aka ənga, naya təkərɗa a gwa'abiya tə dəhə sə ghəyatə dzəguya nyi, yo har tsəu tsa'atsa'a tanyi ya tsəfətə nghə Tiyofilus ndə nda na səli, 4aka ga ka zəndəbiya ənda sənda nja dlədləɓtə nghə nda, vəlvələu.
Yar Yohana Ndər Mər Baɓtisma
5Aku bəji nda Hiridus kwa səm təlkur vu Yahudiya, vanya fərist da na tləm nyi Zakariya, fərist cha təwa nyandəla Abija, wi kərnyi, mala nyi tsəu nyandəla Haruna tangərmar fərist nə njir Isra'ila, tləm nyi Alisabatu. 6Tsa'a kya'a nda ta'ita'inyi nda mar Hyel, nda kwa nəu dəhə gadlagadla ana dəhə tsaubar Tlakə tsa'atsa'a. 7Kəl ja, a zər da tsa nda wa, aka Alisabatu mala kəla yah cha, ya kya'a nda hal ti.
8Atə vanya bəji, Zakariya ku dzukə kənda nacha ngə na mər tlər fərist mar Hyel. 9Nja tabiya nyi təwa ɓəlshi'u, wi nda ngyar njir mər tlər fərist tə chari, aka cha gwa ku vi nda nja tsabiya aku Mbwa'alə Hyel ka nja ngi sə nda kwa shi'uni kwitkwitə nə Hyel kwa. 10Nda bəjir ngi sə shi'uni kwitkwitə nda tə ɗa, dəhə njir həsəli nə Hyel tə tsəmtədza, nda kwa pətlənya biya.
11Kəl ngə Chama Tlakə tə chabiya nyi dzəa, a tə ta'i təwa chisəma dzəgana tə mbwa nda njo ɗəzə sə shi'uni kwitkwitə tə nda. 12Nda Zakariya tə la'a nyi kəl ngə ləvər tə səya nyi. 13Kəl ngə Chama Tlakə tə nar nyi, “Ngwa ka da ləvər Zakariya wa, a ngatə nji pətlənya ngha, mala nghə Alisabatu kwa yiya nghə zər sal, nakə tsəu ko fəndzə nyi tləm Yohana. 14Cho ɗa ka sər hirgyaɗi gagaɗə nə ngha, ana tsəu nji ɗang kwa mər hirgyaɗi aka yah nyi. 15Aka cho ɗa ndə dəgal mar Tlakəu, a cho sa sə nda kwa gwa'atə ndə kwa wi pa'a wa. Ya cho ɗa nyinyinyi na Shanguɗə Karti təvi njo yah nyi.”
16“Cho ɓəlandə nji ɗang ku huɗa njir Isra'ila shili da Hyel Tlakən nda. 17Ana cho ma'i mar Tlakəu, aku shanguɗəu ana gyalkur Iliya, cho shandə ɗufwa njir yah yada ngulisha'a kənda, nji kəla ngatə ndər tsəu nda kwa sha təwa dəmar njir mər sə tsa'atsa'a, aka cha ɓatliya nji nə Tlakəu.”
18Zakariya tə jau Chama nda, “Aman yo ɗana zəndəbiya jirikura sənga? Naya ndə halhal ya, ya mala ɗa tsəu hal ti.”
19Ngə Chama Tlakə nda tə wum nənyi, “Naya Jibra'ilu yo ta'i mar Hyel, aka ənga nja sə ɗa shili da ka, ka ya par nghə Mafakə Mənakə na. 20Ya mangə aka nənyi jiri nə ɓwanya ɗa wa, ko ɗa ka ndə nda kəla kwa nau ndəra, kəl ma sənga da ɗa, Dəhə sə'inga kwa ɗa tsa'atsa'a tə bəji nyi.”
21Nji'inda biya nda kwa səkə Zakariya ana jigadəmar ndara mi tə uya nyi ku Mbwa'alə Hyel nda. 22Nda cha zəbiya, a ɗa a da cho nau ndər wa, ngə nda ngabiya ənda uyatə cha takər ku Mbwa'alə Hyel nda. Cho mər ənda cha ɗana ndəra ya a ɓwanya do biya ku nya cha wa kəl nda ana cha cha cho cha səu. 23Nda bəjir tlər nyi tə wura, ngə cha ɓəl kyo ki. 24Ahir sənga, mala nyi Alisabatu tə hətə huɗəu, ngə cha mbunda kərnyi ana huɗə nda nə hya tufu. 25Ngə Alisabatu tə na nə kərnyi, “Tlakə nda mərtə ɗa səna, aku hanyi inənna cha ngatə təhuɗə ɗa, ana cha hənda ɗa sər həyatəvi aku pama nji.”
Mafakə Yar Yesu tə Shili da Maryamu
26Aku kwakunya hyar Alisabatu ana huɗəu, Hyel tə sə chama nyi Jibra'ilu yi Nazarat atə hə'i Galili, 27ana mafakə yada vanya kwapəlyakə nda ɓatliya ka cha hə vanya ndəu ana tləm nyi Yusufu, nyandəla Təl Dauda. Tləmər kwapəlyakə nda Maryamu. 28Chama Hyel nda yada cha ga nar nyi, “Usi, papa'akur təkəra kə 'ualəu, Tlakə tsa'a naka!”
29Ngə jigadəma Maryamu tə hya'ati təkəra ɓwanya nga, cho jigadəma ndara chul usa mi ngə ənga. 30Kəl ja, Chama Hyel nda nar nyi, “Ngwa ka da ləvər Maryamu wa, aka a uyatə kə kwambiyakur tsa Hyel. 31Ko hətə huɗəu, ko ya zər, ko fəndzə nyi tləm, Yesu.
32Cho ɗa dəgaləu,
njo nga nyi Zər Hyel,
Hyel Tlakəu kwa nənyi
dzəga təlkur ada nyi Dauda.
33Cho səm təlkur tsəu təkəra
nyandəla Jakop ba'anawa,
a təlkur nyi da kwa wur wa.”
34Ngə Maryamu tə jau Chama Hyel nda, “Aman sə wi ngə kwa ɗa? Jan ya kwapəlyakəu, a ya taa ɓə na sal pa'a wa.”
35Chama Hyel nda nar nyi, “Shanguɗə Karti kwa səya təkəra ka, gyalkur Hyel tsəu kwa səya təkəra ka, aka ənga, njo nga zər karti nə ko yah nga, Zər Hyel. 36Mada Alisabatu kwamə nghə kwa uya zər nyi aku halhaləkurnyi, nacha nda njo na mala kəla yah, ana huɗə hya kwah cha. 37Aka a səda dza'u nə Hyel wa.” 38Ngə Maryamu tə wuma, “Naya kwar mava Hyel ya, cha ɗa naya tang wi nda ka na.” Kəl ngə Chama Hyel nda təra.
Maryamu tə yada Alisabatu
39Atə bəji nga Maryamu tə batliya ga hya'atə na kusa a yo mələm nda ku pama mə a tə hə'i Yahudiya. 40Ngə cha gwa ku ki Zakariya ga usar Alisabatu. 41Manda Alisabatu tə ngatə Maryamu tə usa nyi, kəl ngə zər nda ku ta cha nda a sha, ngə Shanguɗə Karti tə nyandə Alisabatu. 42Ngə cha na ana kurakə dzəgam dzəgaməu, “Ndər papa'akur ka aku pama mahi'i, ana tsəu ndər papa'akur ngə zər ngə ko yiya nga! 43Aman nə ya ɗana uya mənakəkur na, ənda amanya Tlakə ɗa kwa shili da ya? 44Aka aku bəji nda ya ngatə ka usa ɗa, zər nda ku ta ya tə sha na hirgyaɗi. 45Ndər papa'akur kə Maryamu, aka ka nənyi jiri ənda sənda Tlaka na kwa nyabiyadza.”
46Ngə Maryamu tə na,
“Ɗufwa ya kwa həsəli nə Tlakəu.
47Ana pya ya kwa mər hirgyaɗi
aka Hyel Ndər Dləuya ɗa.
48Aka cha ɗənghatə butəbutəkura
kwar mava nyi.
Sakana dəhə nji kwa nga ɗa papa'a.
49Aka Ndər Gyalkur tə mərtə sə 'ual na'a,
tləm nyi karti.
50Hya'atə ku aji yo aji,
Hyel kwa ngatə təhuɗə njir ləvər nyi.
51A mərtə tə cha sə 'ual ana cha cha,
a wiɗənda tə cha njir həkəra kərnənda,
ana jigadəma kənda.
52A həyatə cha nji təltəl
tə mbwar ngya kənda,
ana tsəu cha hətə səlir nji kəla səli.
53A nyandə təcha nji'inda na huɓa
ana sə mənakəu,
əngə cha ngyar njir uyatə təra jwajwa'a.
54Cha vala mava nyi Isra'ila,
cha ɗənghatə na alkawal təhuɗə
nda cha məra,
55anə Ibrahim ana nyandəla cha
ba'anawa wi nda cha na nə ka adan mən.”
56Maryamu tə ngya na Alisabatu nə hya makərəu, ahir nga cha ɓəl kyo ki.
Yar Yohana Ndər Mər Baɓtisma
57Nda bəjir yah Alisabatu tə ɗa, ngə cha yah zər nyi. 58Mafakə tə həya ka təwul ka njikə nda, ənda Tlakə tə char nyi təhuɗə 'ualəu, ngə nda mər hirgyaɗi kə'i cha.
59Pəshir chisəkunya hanyi, nda shili aka ga nda tlanda nyi bədzang nə zər nda, ana ga nda fəndzə nyi Zakariya, tləmər ada nyi, 60kəl ja, ama nyi tə na, “A'a! Njo fəndzə nyi Yohana.”
61Ngə nda nar nyi, “A ndər tləm ngə da ku huɗa njikə hi wa.” 62Ngə nda char nyi ba'ada nə ada nyi aka ga nda gwa'abiya tləm nda cho i nja fəndzə nyi. 63Cha na nja shili na nyi təmbəl tsəfa, ngə cha tsəfəti “Tləm nyi Yohana.” Sənga ɗa ka sər məngəl nə madawa. 64Ɗəɗəu tanyi nya cha tə mbəɗa, kyara cha tə wala, təma cha ghəya ɓwanya, cho fal Hyel.
65Ngə ləvər tə səya ka təwul nyi, ana njir mələm inda ku pama məa atə hə'i njir Yahudiya kwa ɓwanya təkəra sə'ingə tə ɗa nga. 66Madawa tə ngatə sənga, kwa jigadəma təkəri, kwa jawa, “Mi sənda zər ngə kwa ɗakar ja?” Aka a ngabiya tənji ənda Tlakə tsa'a nacha. 67Ada nyi Zakariya tə nyabiyadzə na Shanguɗə Karti, ngə cha pə ɓwanya mətakər nda Hyel tə chabiya nyi.
68“Fal nə Tlakəu, Hyel njir Isra'ila,
aka cha shili ka cha dləuya nənyi na nji.
69Cha hya'andə Ndər Dləuya nda dəgaləu aku nyandəla mava nyi Dauda,
70wi nda cha na təwa nya njir mətakər karti nə Hyel ɗəɗəməu.
71Cha na ənda cho dləuya mən aku cha njir dawa kəmən,
ana ku cha dəhə nji'inda kwa ngya mən.
72Cha mər ənga ka cha char təhuɗə nə ka adan mən,
ana ga cha ɗənghatə na alkawal karti nyi,
73səmfəla nda cha mər nə adan mən Ibrahim.
74Cha na ənda cho dləuya mən ku cha njir dawa kəmən,
aka ga cha mərtə mən məna mərtə nyi tləra a da na ləvər wa,
75aku kartikur ana tsa'atsa'akur aku dəhə hanyi kəmən a manyi.
76Ana nakə tsəu zər ɗa,
njo nga ngha ndər mətakər Hyel nda Ndiya na Səli.
Ko təra biyamar Tlakəu,
aka ga ka batliya laku ka cha.
77Ko nənyi zəndə nə nji,
ənda nda kwa uya mbəɗa təwa farbikər səpəla'a kənda.
78Aka təhuɗə nda Hyel kəmən nə gagaɗa,
cho hya'andə vimbəlmbəl nə mən kya huɗamələm.
79Cho mbəl təkəra nji nda kwa ngya ku kutla,
ana nji'inda tə kiɗa shanguɗər tah,
aka cha nəu na hya mən yo lakur piyarɗufəu.”
80Əngə zər nda tə həa ga ɗa na dunama aku dza ana shanguɗəu, ngə cha ngya kwa takəu kəl bəji nda cha chabiya kərnyi nə njir Isra'ila.
Currently Selected:
Luka 1: hbbNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
