Yohana 11

Tər Li'azaru

1Vanya ndə da na shiləka, tləm nyi Li'azaru vu Baitanya, mələm ka Maryamu ana kwamə nyi Marta. 2Maryamu, mala nda tə pətə nyi mal nda kwa shi'uni kwikwitəu nə Tlakə Yesu ga kəkəɗənda hya cha na shishir kəra cha nda, nacha nə kwamənya Li'azaru nə na shiləkə na. 3Ka kwamə nyi inda tə sətə nyi mafakə nə Yesu, ga na, “Tlakəu, ndə nda ko i nda, a da cha yiying wa.”

4Nda Yesu tə ngatə ənga, ngə cha na, “Shiləkə nga a da ɗa ka nə tə wa. Kəl nda ka ga Hyel uya səli, ətsəu cho ɗa ka laku nda Zər Hyel kwa uya səli.”

5Yesu kwa nyida ka Marta ana Maryamu ba'a zamən nda Li'azaru. 6Dəhə ka ənga, nda cha ngatə mafakə ənda Li'azaru da yiying wa, ngə cha tsakətə hanyi mətlə səkəu tangnda cha tə nda. 7Ahir nga, ngə cha nar nyi nə ka shawa nyi, “A mən ɓəl yi Yahudiya.”

8Ngə nda nar nyi, “Maləm, kacha'anə nda njir Yahuda tə gwa'a vakənda nghə na hangu. Ko i ka ɓəl yi nda səka?”

9Ngə Yesu tə nar nda, “A saka kwabəmətləu aku ɓupəchi ma? Aka ənga ma ndə nda tə ma'i tsə'u vichaməu, a cho tləhi wa, aka cho la'a vimbəlmbəl nə dunəya na. 10Kəl ja, ma ndə tə ma'i ku kutla cho tləhi, aka a vicham da ku cha wa.” 11Ahir nda Yesu tə na ənga, ngə cha na, “Bazhin mən Li'azaru kwa njihanyi, a mən yi hya'andə nyi.”

12Ngə shawa nyi tə na, “Tlakəu, ma cha hanyi tanyi ngə cho nja, cho tsəu hya'ati.”

13A təkəra tər Li'azaru ngə Yesu kwa ndəra, kəl ja, ka shawa nyi tə hətə ənda hanyi ɓəlsar ngə cha kwa nja. 14Ngə Yesu tə chabiya nda tə babal ga na, “Li'azaru təti. 15Kəl ja, ana hirgyaɗi ya aka a da ya hinda wa, aka əngə hyo na'a jiri, sənga ɗa aka mənakəkur kəhi. Sakan ja a mən yada cha.”

16Toma, nda njo nga Zər Ɓəli, tə nar nyi nə kuvanyi shawa inda, “A məni, nja yi kuɗənda mən kə'i cha.”

Yesu ngə Hya'atər Nji Kuɗəkuɗa ya Nacha ngə Pi

17Nda Yesu tə yi, ngə cha ngatə ənda Li'azaru hanyitə fwaɗə ku hwa. 18Pama Baitanya ana Urshalima a da ndiya myal mətlə wa. 19Ya njir Yahuda ɗang tə shili ka ga nda fətənyi ɗufə nə ka Marta na Maryamu a təkəra tər zamən nda.

20Nda Marta tə ngatə ənda Yesu kwa shili, ngə cha təra biya aka cha lali nyi, kəl ja, Maryamu nənyi tə ngya ku ki kə'i mihiɓi. 21Ngə Marta tə nar nyi nə Yesu, “Tlakəu, ma cha tangnə ka, a zamə ɗa do nda tə wa. 22Kəl ja, zəndətə ya mada sakana dəhə sənda ka gədi tsa Hyel, cho nə ngha.”

23Ngə Yesu tə nar nyi, “Zamə nghə kwa hya'atə na pi səkəu.”

24Ngə Marta tə nar nyi, “A zəndətə ya cho da hya'atə na pi bəji ngə zəkəu.”

25Ngə Yesu tə nar nyi, “Naya ngə na gyalkur hya'andə nji ku hwa, ana gyalkur nə nda pi. Dəhə ndə nda tə na'a jiri mada cha ta cho ɗa na pi. 26Ya kala ndə nda na pi ya kwa na'a jiri a da cha kwa tə pa'a wa. A nənyi təkə jiri nə ɓwanya ngə ya?”

27“Ah, a nənyi təya jiri Tlakəu, ənda nakə ngə Kəristi Zər Hyel, nda tə shili tə dunəya.”

Yesu tə Pənda Sələm

28Ahir nda Marta tə na ənga, ngə cha ɓəl yo ki ga yi nga kwamə nyi Maryamu ga nar nyi, “Maləm shili ti, ya cho jau ngha.” 29Manda Maryamu tə ngatə ənga, kuskustanyi cha hya'ati ga təra yada Yesu. 30Aka sakanda Yesu da ta gwa ku ta mələm wa, tsə'u tanyi biya nda Marta tə həya nyi tə nda. 31Njir Yahuda inda tə shili ka nda fətənyi ɗufəu nə Maryamu nda la'a cha hya'atə ana kusa, ga təra biya, ngə nda hya'atə ga nəu nyi ana kusa. Manda fiya cho təra ya tə hwa, ka cha yi tiwi.

32Nda Maryamu tə shili tangnda Yesu ti ga la'a nyi, ngə cha uzhi a huɗə nyi, ga na, “Tlakəu, ma cha tangnə ka, a zamə ɗa ngə do nda tə wa.”

33Nda Yesu tə la'a ənda Maryamu kwa tiwi, ana dəhə njir Yahuda inda tə nəu nyi shili kwa tiwi kə'i cha, kəl cha ngatə təhuɗə kə nda. 34Cha jawa, “Aman hya haɗiya nya?” Ngə nda nar nyi, “Tlakəu anda ka la'a.”

35Kəl ngə Yesu tə pənda sələm. 36Ngə njir Yahuda inda tə na nə kərnənda, “La'a ma ənda cho i nyi.”

37Kəl ja, alenya nji tangnda tə na, “A nacha nda tə wuniya lya ndər wuləfə nda ma, mya gwa'atə a da cha nda katə Li'azaru tsa tə wa?”

Yesu tə Hya'andə Li'azaru ku Hwa

38Nda təhuɗə tə nyandə ɗufwa Yesu, ngə cha təra ya tə hu nda. Hu nda tləl cha, ngə nja haɗiya nya cha na mbungulma. 39Ngə Yesu tə na, “Dangəlnda ma mbungulma nga.” Marta kwamənya Li'azaru tə nar nyi, “Tlakəu, sakana a ghəya tə cha yiɗa, aka hanyi fwaɗə nə mər cha nda nja haɗiya nyi.”

40Yesu tə nar nyi, “A ya nar nghə ənda ma ka nənyi jiri ya, ko la'a səlir Hyel ma?” 41Nda nda dangəlnda mbungulma nda. Ngə Yesu tə har huɗəma cha shi huɗamələm ga na, “A usaku nghə təya Ada, aka ko səhimi da ya. 42Aka a zəndətə ya mada sakamani ko ngatə ɗa, aka əngə sənda ka sə ɗa kari, ga nji'inə nənyi jiri ənda nakə ngə tə sə ɗa.” 43Ahir nda cha wur na pətlənya, ngə cha nga na kurakə dzəgam dzəgaməu, “Li'azaru, zəbiya!” 44Ngə ndə tətə nda hya'atə ga biya, cha cha ana hya cha baɗəbaɗənyi ana sər haɗa, ma'a huɗəma cha baɗəbaɗənyi. Ngə Yesu tə na, “Walnda ma sə'ingə dzə nyi nga, cha təra.”

Nja Mbanya Ɗimi təkəra Yesu

(Mat 26:1-5; Mar 14:1-2; Luk 22:1-2)

45Njir Yahuda inda shili ka usar Maryamu ana tər zamə nyi nda la'atə sənda Yesu tə məra, ngə nda nənyi jiri. 46Kəl ja, alenya nji ku pama nda, tə ɓəl shili da njir Farisi ga dəkar nda dəhə sənda Yesu tə məra. 47Aka ənga, gau fərist ana njir Farisi inda tə tsəmiya njir tla nəuma ga na, “Mi məno ɗə bəji kara? Jan ndə nə kwa mər səshinshin ɗang tə lya mən! 48Ma məna ngya nyi ənga, nji ɗang kwa nənyi jiri, ya njir Roma kwa səgwa səwandə mbwa karti kəmən ana hə'i kəmən.”

49Zhang ku pama nda tləm nyi Kayafa, na cha ngə gau fərist ku fa nda, ngə cha na, “A da hyo zəndə sə pa'a wa. 50A hya zəndə a ndiya tə vi ndə zhang cha tah ka dəhə nji, atsa dəhə nji da sa ma?” 51A da ku jigadəmar kərnyi ngə cha dəkə ngə na sə wa. Kəl ja, mangə nacha ngə gau fərist ku fa nda, ngə cha takər, ənda Yesu kwa da tah ka dəhə njir Yahuda, 52ya a da ka njir Yahuda tanyi wa, kəl nda ka ga cha tsəmiya dəhə nguli Hyel inda wiɗəwiɗənyi nda shili ɗa zhang.

53Fwatə tə pəchi nda, njir Yahuda tə ghəya mbanya ka nda tsəya Yesu. 54Aka ənga Yesu da zha ma'i tə babal ku huɗa njir Yahuda wa, kəl ja, cha ma'i tanyi ya tə vanyi mbwa ləhə dza lya wua, yo vanyi mələm na tləm nyi Ifra'imu, ngə nda yi ngya ka shawa nyi hinda.

55Bəjir Ladər Dləgəlnda njir Yahuda kaɗa ɗa, ngə nji ɗang tə yi Urshalima, aka ga nda yi chinda kərnənda təvi Ladər nda. 56Nda nda ku Mbwa'alə Hyel, nda kwa ndzam laku aka ga nda la'a Yesu, daɓə nda kwa jau tsa kərnənda, “Mi sənda la'a hya? Cho shili nanə ja?” 57Wawa'ar fərist inda, ka njir Farisi tə fiya gadlagadla ənda ma ndə nda tə la'a nyi, cha nar nda, ga nja yi səya nyi.

Currently Selected:

Yohana 11: hbbNT

Highlight

Copy