ɛMacu 5
5
Niwɛng
(ɛLuk 6.20-23)
1Kɛ ne sɛ ɛYɛso gha yaang idira ninyi, ne ɛbhɛ wara daa ne ɛwarang ɛ soos, ninɔn ne icwam ɛbhɛ na ne phɛ nibhɛ bhɛ sɛ ɛbhɛ, 2ɛYɛso gha ne tsa ɛ yaa mɛmɛ nibhɛ nɛ, ɛ bok nibhɛ,
3“Ninaa ɛwɛng ngaa nggyɛy
nɛ nibhɛ kɛ seng itaasek
ne ikabyik nibhɛ da,
daa ɛli ne igbɔm ɛdaa ne irywa da
so ivaa nibhɛ.
4Ninaa ɛwɛng ngaa nggyɛy
nɛ nibhɛ bok irway ishwii da,
daa ɛli nɛ nibhɛ sɛ ne yɛk
irway ihwala.
5Ninaa ɛwɛng ngaa nggyɛy
nɛ nibhɛ roos nɛ lyaak,
daa ɛli ne ɛzay ya sɛ teye
isha nibhɛ.
6Ninaa ɛwɛng ngaa nggyɛy
nɛ nibhɛ bok ikpyak
ne ihywel cik ga,
nibhɛ ta i has irway
ne ihywel cik ga,
daa ɛli nɛ nibhɛ sɛ́ ne sighi
daa nikɔn nɛ nibhɛ tɔk.
7Ninaa ɛwɛng ngaa nggyɛy
nɛ nibhɛ bok irway
ne san iyɔm ba,
daa ɛli ne ɛTaanggbey sɛ ma
san iyɔm nibhɛ.
8Ninaa ɛwɛng ngaa nggyɛy
nɛ nibhɛ bok irway iwɛwɛy da,
daa ɛli nɛ nibhɛ sɛ ne yaang
ɛTaanggbey ye.
9Ninaa ɛwɛng ngaa nggyɛy
nɛ nibhɛ te i shɛɛ ncaang ngo,
daa ɛli ne sɛ yaak nibhɛ
ninɔn ɛTaanggbey.
10Ninaa ɛwɛng ngaa nggyɛy
ne i baasek nibhɛ nggbang
daa ɛli nɛ nibhɛ hyel cik
daa ɛli ne igbɔm ɛdaa ne irywa da
soye ivaa nibhɛ.
11“Ɛ so ɛn nyini ninaa ɛwɛng wu ninyi na i towos nyini, nibhɛ baasek nyini nggbang, nibhɛ robhos nyini ne ihyoo nikɔn nibebhe ihywee-ihywee ɛlɔ mee wo. 12Taasey ɛn ne irway ihwala, daa ɛli ne ɛ sɛ bhɛ pha ɛn gbom dak ne irywa wo. Ɛlɛy ne kaa ma baasek ninabawa na nggbang ngga nɛ nibhɛ ka so ɛyisɛ mon na.
Ngkal ne iWɛwɛy
(ɛMar 9.50; ɛLuk 14.34-35)
13“Ɛ so ɛn nyini ngkal ɛzay da, wu ngkal da kɛ ne te ntaghalak ko, yaa ne tang mɔn mpɛ ɛli mpɛ kyii ta teye ngkal daa? Sɔng tang ta mɔn mpɛ ne ɛkɔn nang, yaa lok mpɛ ninyi sɛng ne ita.
14“Ɛ so ɛn nyini iwɛwɛy ɛzay de. ɛGarang nga ne ɛ so daa ne igol de, sɔng ɛ ta rɛɛ ye nang. 15Sɔng ɛnyi gha i yɛk ne ɛpitila wo ɛ kyii bo ɛkpɛɛt ɛ cwaal lɛ nang, ɛ yang tek ɛpitila wo daa shak te ɛbhɛ tol ninyi na gbik ndɔ ne ijwee wo. 16Ɛlɛy ne mang, te iwɛwɛy mon de ne tol ɛnu ɛyisɛ ninyi na tɛ nibhɛ ne yaang nikɔn ne yɛnɛng mon na ne ɛ mɔn ɛn no, tɛ nibhɛ dɛp ɛKyɛɛ mon na ne ɛ so dak ne irywa wo.
ɛYɛso gha Ɛbhɛ kɛ Shwaak ɛShara Gha
17“Sɔng ɛ shɛɛ wɛɛ ɛn te nggɛ yɛɛs te bunga ɛShara gha ne ivol ninabawa da nang, sɔng n yɛɛs ne bunga ifɛ nang, nyang yɛɛs ne shwaasek ifɛ. 18Nzi tɔng nyini itin nɛ, ɛdaa ne irywa wo ne ɛzay ya gbik sɛ taal le, sɔng ɛdɛ byibyɔɔrɔk gbik ne ɛdɛ ɛlyilying ne ibol ɛShara gha sɛ phee nang, sɛ shwaasek nibhɛ gbigbik. 19ɛHiha ɛnyi ne ɛ kɛ mbaray ɛdɛ kyikyɔnɔ ncɛt ndɔ ne ikpii da, ɛ ma ta mɛmɛ nihak ngɛ tɛ nibhɛ mɔn ɛlɛy, ɛ sɛ ne bhɛ teye ɛtsim mɛ ne igbɔm ɛdaa ne irywa da, ɛhiha ɛnyi ne ɛ kɛ ne roos, ɛ ma ta mɛmɛ nihak ngɛ tɛ nibhɛ ma mɔn ɛlɛy ɛ sɛ ne bhɛ teye ɛgbaang ngɛ ne igbɔm ɛdaa ne irywa da. 20Nzi bok nyini, wu ɛ kɛ sang hyel ɛn cik ɛ phyin ɛn niFarisawa na nɛ ninaa ne kpɛl ɛShara gha, ɛtsak kɛ sɔng ɛ sɛ ne bhɛ lel ɛn ne igbɔm ɛdaa ne irywa da nang.
iBol ne nJenjek
(ɛLuk 12.57-59)
21“Ɛ kɛ phok ɛn ɛli ne kɛ mɛmɛ ninaa ne le na nɛ i bok nibhɛ, ‘Sɔng ˆɛ phoo ɛn ɛnyi nang, ɛhiha ɛnyi ne ɛ kɛ phoo ɛnyi gha, sɛ ne bol ɛbhɛ ɛshara.’ 22Mee wo nzi ne bok nyini, ɛnyi gha ne kɛ te njenjek ne ɛgwaa ɛbhɛ gha, sɛ ne bol ɛbhɛ ɛshara. ɛHiha ɛnyi gha ne ɛ bol ivol ivebhe da ɛgwaa ɛbhɛ gha, itɔrɔng ngge sɛ ne soosek ɛbhɛ ɛnu ɛyisɛ. ɛHiha ɛnyi ne ɛ kɛ ne ta yaak ɛgwaa ɛbhɛ wu ɛ soye ɛwamang, ɛ sɛ ne bhɛ lel ne ijwee ne igboo. 23iPhɛ ɛlɛy yang, wu ˆɛ so ɛnu ne ideng aa nang izɛɛng, ˆɛ taate ne idɛ bol de ne ɛgwaa mo bok ne igyɛ, 24tek izɛɛng mo de ɛnggyɛ wo ɛnu ne ideng nga, te ˆɛ kyii ɛbhɛ ryɔng ɛn ne ɛgwaa mo gha nyɛɛn ˆɛ ji bhɛ kyii ɛ nang izɛɛng mo de.
25“Ryɔng ɛn dodooy ne ɛnyi gha ne ɛ bok bol de ne igyɛ wo, ne ɛ kɛ bo yɛ ɛ phɛɛs ne icwam ɛshara wo. Ryɔng ɛn ɛ tɔ ɛn ne nkiinɛ aa yung bhɛ nang ngɛ ne ɛhaa ne bol ɛshara gha. ɛHaa ne bol ɛshara gha ne ji nang ngɛ ne ɛhaa ne rop pa, ɛhaa ne rop pa ji rop pɛ ne ijwee ne nyang ngge. 26Nzi tɔng ngɛ itin nɛ, sɔng aa bhɛ wuru tang ɛ kɛ tal ɛkyokyoobo gha ne kɛ hyɛ yɛnɛ wo nang.
iBol ne iHyop ne iBek
27“Ɛ kaa phok ɛn ɛli ne kɛ yɔngɔ, ‘Sɔng ɛ ra ɛn nzangas sang.’ 28Mee wo nzi ne bok nyini, gbik ɛnyi gha ne ɛ kɛ yɛɛn ɛkuk ka ne irwisɛ ne ihyop ne ibek, ɛ kɛ ne ku ra nzangas de ne ɛkuk ka nggyɛ wo ndɔ ne irway ɛbhɛ. 29iPhɛ ɛlɛy, wu irisɛ ne iwɔ ne irywe mo iphɛ phɛ yaa teyɛ ɛ mɔn ɛfɔt to, ne ˆɛ tul iphɛ ˆɛ hana, iphɛ phyin ˆɛ wɔs ɛdɛ ɛlɔ ne ibek mo gha, ne yaa bo ibek mo de gbik ko bhɛ cwaak ne ijwee ne igboo wo. 30Wu iwɔ ne irwye mo ifɛ aa teyɛ ɛ mɔn ɛfɔt to, hyɛ ifɛ ɛ hana, iphɛ phyin ɛ wɔs ɛdɛ ɛlɔ ne ibek mo gha ne yaa bo ibek mo de gbik ko bhɛ cwaak ne ijwee ne igboo wo.
iBol ne Kasa ɛKuk
(ɛMac 19.9; ɛMar 10.11-12; ɛLuk 16.18)
31“Kaa ne yɔngɔ, ‘ɛHiha ɛnyi ne ɛ kasa ɛkuk ɛbhɛ gha, te ne ɛ nang ɛkuk ka ɛwee ne kasa ɛbhɛ.’ 32Mee wo nzi ne bok nyini, ɛhiha ɛnyi ne ɛ kɛ ne kasa ɛkuk ɛbhɛ gha, wu tang so daa ne ibol ne nzangas, ɛ kɛ ne te ɛkuk ka ɛ teye ɛkuk ne nzangas. ɛHiha ɛnyi ne ɛ kɛ ne tul ɛkuk ka ne kɛ kasa ɛbhɛ wo, ɛɛ ne ra nzangas.
iBol Lɛlɛm iHywa
33“ɛLɛy dɔng, ɛ kɛ ne ta phok ɛn ɛli ne kaa tɔng ninaa ne ile na i yaak nibhɛ, ‘Sɔng ˆɛ lɛlɛm ɛn ihywa de daa ɛkɔn ne hame ˆaa sang shwaak ɛn no nang, ku shwaak ɛn ɛkɔn na ne ɛ lɛlɛm ɛn ihywa wu aa mɔn ɛDaray yegha nɛ wo.’ 34Mee wo nzi ne bok nyini, sɔng ɛ lɛlɛm ɛn ihywa de nang, ko ncɛt. Sɔng ɛ lɛlɛm ɛn ihywa de ne ɛdaa ne irywa nang daa ɛli ifɛ so ɛcuruu ne igbɔm ɛTaanggbey. 35Sɔng ne ɛ lɛlɛm ɛn ihywa de ne ɛzay yang, daa ɛli ɛbhɛ ɛ soye ɛlɔ ne tek ne ita ɛTaanggbey, sɔng ne ɛ lɛlɛm ɛn ihywa ne iYɛrushɛlɛm nang, daa ɛli iphɛ phɛ soye ɛgarang ɛgbaang ɛGɔm. 36Sɔng ne ɛ lɛlɛm ihywa de ne ito mo nang, daa ɛli ne sɔng ɛ sɛ yɛɛ ne hyere idɛ itsutsɔ ne ito mo da ifɛ ijwaan ifɛ teye ihwala yɛ, sɔng ɛ Sɛɛ ne yɛɛ ne hyere ifɛ, ifɛ teye ishwii yɛ nang. 37Wu ɛ kɛ ku yaak ibol de ‘Ɛɛy’ te phɛ ne shɛɛ ne ‘Ɛɛy,’ de wu ɛ kɛ ne ku yɔng ɛn ‘Kwa’ te phɛ ne shɛɛ ne ‘Kwa’ de. Wu ɛdɛ ɛkɔn na kɛ phee ɛlɛ wo, iphɛ ne le ɛlɔ ɛBebhe ɛNyi.
iBol ne Tal iBebhe ne iBebhe
38“Ɛ kɛ phok ɛn kaa yɔngɔ, ‘ɛHiha ɛnyi ne ɛ kɛ tul ɛnyi irisɛ, yaa ne ma tul ɛbhɛ nɛ, wu izinɛ yaa ne ma tul ɛbhɛ nɛ.’ 39Mee wo nzi ne bok nyini, sɔng ɛ tal ɛn ɛnyi gha ibebhe de ne ɛ kɛ mɔn nyini nɛ wo nang. Wu ɛnyi gha kɛ ma yung baal lɛ nggbaam ne iwɔ ne irwye, ne ɛ hyere ɛbhɛ ihoo ne iwɔ ne itsan dɔng. 40Wu ɛnyi gha kɛ ne bo yɛ ɛ phɛ nɛ ne icwam ɛshara, daa ɛli ne ɛ sim te aa phɔt ɛtura mo, ma yung nang ɛbhɛ ɛgbaang ɛtura mo dɔng. 41Wu ɛnyi gha kɛ ne yɛk kɛ nɛ ne ihwet, ɛ bo te ne hyel imɛɛl idaan, ne ɛ sim ɛbhɛ nɛ ɛ hyel ɛn imɛɛl iphaa. 42Wu ɛnyi kɛ roo yɛ ɛkɔn nang ɛbhɛ, wu ɛnyi kɛ yɔng wu te ɛ kɔp bhe ɛkɔn, kɔp ɛbhɛ.
Sim ɛn Ninaa ne iPhup Mon
(ɛLuk 6.27-28,32-36)
43“Ɛ kɛ phok ɛn i kaa yɔngɔ, ‘Sim ɛn ɛhaa ɛcɛcɛk mo ɛ ji mbaray yɛ ɛhaa ne iphup mo.’ 44Mee wo nzi ne bok nyini, sim ɛn ninaa ne iphup mon na, te ɛ bol ɛn ne ɛTaanggbey daa ninaa nɛ nibhɛ baasek nyini nggbang ngga. 45Te ɛ te ɛn ɛKyɛɛ mon ɛdaa ne irywa gha, Ɛɛ yɛk ngɛ iroy ɛbhɛ de wuru ninyi nibebhe na nɛ niyɛnɛng ngɛ, ne ɛ tom ninyi ne icik ka nɛ ninaa nɛ nibhɛ sang so cik ko ne inɛn da. 46Wu ɛ ne sim ɛn ninyi na nɛ nibhɛ ma sim nyini wo, ɛyakɔn ne ɛ sɛ ne ji pha ɛn ne? Nzo nzi shɛɛ bo ɛlɛy nɛ ninaa ne saasel ijam ne ivel la ma mɔn. 47Wu ɛ ne ta bol ɛn nɛ nigwaa mon na zɔng ngo, ikyee ne ɛ mɔn ɛn ɛ phyin ɛn ɛbyin ninyi naa? Nzo nzi shɛɛ wɛɛ te ɛlɛy nɛ ninaa nibhɛ doo ɛTaanggbey yegha ma mɔn? 48Ne ɛ ma te ɛn hyɔrɔ, ɛli ne ɛKyɛɛ ɛdaa ne irywa mon na ma so hyɔrɔ wo.
Currently Selected:
ɛMacu 5: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project