ɛLuka 9
9
ɛYɛso gha kɛ Tom Ninɔn ne iCwam Ɛbhɛ Na
(ɛMac 10.5-15; ɛMar 6.7-13)
1ɛYɛso gha ne yel-le ninɔn ne icwam ɛbhɛ ɛnduwubɔ nɛ ninyi ifaa na ɛlɔ ɛdaan, ɛ nang nibhɛ ito-ndiinday gbik ne igbɔm ne tuul niphoo, tɛ nibhɛ ta tes ninyi niken. 2Ɛ ji tom nibhɛ, tɛ nibhɛ bhɛ tɔng ibol ne iGbɔm ɛTaanggbey ba, nibhɛ ta bhɛ tes nishwa na niken. 3Ɛ yaak nibhɛ, “Sɔng ɛ boos ɛn ɛkɔn ne ihywel ba nang. Sɔng ɛ boos ɛn ɛntsɛng, ne irambak, ne ire, ne ijam nang. Sɔng ɛ ma yung boos ɛn ɛhak ɛtura nang. 4Gbik ijwee wo ne kɛ bhɛ say nyini nɛ, shɛɛ ɛn nɛ ndɔ yɛ, ɛ hyep ɛn ɛtuk ka ne aa tek ɛn ɛgarang ngɛghaa nggyɛ wo. 5ɛGarang nga ne nɛ ninyi yɛ kɛ bhɛ mbaray tang say nyini nɛ, ne ɛ te ɛn ɛbung ne ita mon kokok, te ˆɛ nɛ wuru ɛn ne ɛgarang ngɛ, ɛbung ngɛghaa nggyɛ wo bhɛ sɛ ne wum nibhɛ.”#9.5 Ta yɛɛn: ɛLuk 10.4-11; ɛTom 13.51.
6iPhɛ ɛlɛy, nibhɛ ne roos nigarang nga gbik, nibhɛ tɔng ibol iyɛnɛng ngge, nibhɛ ne ta i tes nishwa na niken ndɔ nilɔ na nɛ nibhɛ kɛ roos so gbik.
ɛHyiridus sa kɛ te Buruburu
(ɛMac 14.1-12; ɛMar 6.14-29)
7Kaa ne sɛ ɛHyiridus sa, ne ɛ kaa soye ɛgɔm ne iGalili gha, kɛ phok ngka nikɔn de nɛ nibhɛ tes so, ne ɛ te buruburu, daa ɛli ne ɛbyin ninyi na bo, wu ɛYohana ne Yaak ne iBatisima ɛbhɛ kɛ bhɛ kyii ndɔ ne ikpuu, 8nidɛng ne i bo wu ɛLiya ɛbhɛ kɛ bhɛ yilitsik. Nidɛng ne ta i bo wu ɛdɛ ɛnɛbi ne le gha ɛbhɛ kɛ bhɛ yilitsik ndɔ ne ikpuu.#9.8 Ta yɛɛn: ɛMac 16.14; ɛMar 8.28; ɛLuk 9.19. 9ɛHyiridus sa ne yɔngɔ, “Ngga yɛk ngɛ i tul ito ɛYohana de. ɛHay ɛbhɛ ne mɔn nikɔn nɛnaa woo?” iPhɛ ɛlɛy, ɛHyiridus sa ne yaa tɔk te ɛ sɛ yaang ɛYɛso yegha.
ɛYɛso kɛ Re nɛ Ninyi Ninom iWii
(ɛMac 14.13-21; ɛMar 6.30-34; ɛYoh 6.1-14)
10Kɛ ne sɛ ninɔn ne tom ma kɛ bhɛ kyii, nibhɛ ne tɔng ɛYɛso yegha nikɔn na nɛ nibhɛ kɛ bhɛ mɔn no gbik. ɛYɛso gha ne ji tul nibhɛ zɔng, nibhɛ phɛ ɛdɛ ɛgarang nga ne i bok ɛbhɛ iBasɛda. 11Kɛ ne sɛ idira Ninyi de kɛ phok ibol lɛ, nibhɛ ne ta kungus. ɛYɛso gha ne bhɛ say nibhɛ, ɛ tɔng nibhɛ ibol ne igbɔm ɛTaanggbey ba, ɛ ta tes nisha na niken dɔng.
12Kɛ ne sɛ ɛlɔ yɛ yɛɛs ne phee ye, ninɔn ne icwam ɛnduwubɔ nɛ ninyi ifaa na ne yɛɛs nibhɛ yaak ɛbhɛ, “Yɛk ninyi yɛnaa wo nkiinɛ tɛ nibhɛ lel ndɔ nigarang nga, nɛ nigyigyaarang nga, nibhɛ bhɛ tɔk ire ne ɛlɔ ne ra. ɛLɔ yɛghaa wo so kyaam.”
13ɛYɛso gha ne kyii nɛ, ɛ yaak nibhɛ, “Nyinɛn no yang nang ɛn nibhɛ ire de.”
Nibhɛ ne yaak ɛYɛso yegha, “Njwi kɛ mak ne ivɛrɛdi ifɛ iwii, ne izing ihywɛ ihywaa zɔng, wu iphɛ so ɛlɛy yang, iphɛ yaa ne te nggbinggbing, njwi bhɛ say ire de ne njwi yaa nang idira yɛdee wo.” 14(Niras sa nɛ nibhɛ so ɛnggyɛ wo kaa so ninom iwii, kang nɛ nikuk gbik nɛ ninɔn).
ɛYɛso gha ne yaak ninɔn ne icwam ɛbhɛ na, “Yaak ɛn ninyi na tɛ nibhɛ sooset igbuu-igbuu; te iguu yɛ ne i so ninyi nzuwubɔ iwii.”
15Ninɔn ne icwam ma ne mɔng ninyi na, nibhɛ ne sooset igbuu-igbuu ba. 16ɛYɛso gha ne bo ivɛrɛdi ifɛ iwii ba, gbik ne izing ihywɛ ihywaa de; ɛ waal ito daa ne irywa, ɛ tɔɔrek ɛTaanggbey ye irway ihwala; ɛ ji kpɛl ifɛ ɛ naas ninɔn ne icwam ɛbhɛ na, nibhɛ ne ma ji hosop ninyi na. 17Nibhɛ gbik ne re, nibhɛ sighisi en. Ninɔn ne icwam ma ne tumɛ ɛbyin nɛ, nibhɛ yɛk iphɛ ne isap ɛnduwubɔ ne ifɛ ifaa hyɔrɔ.
ɛBiturus sa kɛ Seng wu ɛYɛso Ɛbhɛ so ɛKiriti Gha
(ɛMac 16.13-20; ɛMar 8.27-29)
18Kaa ne sɛ ɛdɛ ɛtuk kɛ ne ɛYɛso gha kɛ bhɛ tul le nggenggerey, ɛɛ roro ne ɛTaanggbey, ninɔn ne icwam ɛbhɛ na ne phɛ ɛlɔ ɛbhɛ. ɛYɛso gha ne phom nibhɛ, ɛ yaak nibhɛ, “iDira ninyi de jung bo wu nzo ɛhay lɛɛ?”
19Nibhɛ ne kyii nɛ, nibhɛ yaak ɛbhɛ, “ɛByin nɛ bo wu ɛ so ɛYohana ne Yaak ne iBatisima; ɛbyin nɛ ne bo wu ɛ so ɛLiya. ɛByin nɛ ne ta bo wu ɛdɛ ɛnɛbi ne le gha ɛbhɛ kɛ bhɛ kyii.”#9.19 Ta yɛɛn: ɛMac 14.1-2; ɛMar 6.14-15; ɛLuk 9.7-8.
20ɛYɛso gha ne ji phom nibhɛ, ɛ yaak nibhɛ, “Nyinɛn no lɛɛ? Ɛ ne bo ɛn nzo ɛhay?”#9.20 Ta yɛɛn: ɛYoh 6.68-69.
ɛBiturus sa ne kyii nɛ, ɛ yɔngɔ, “iGyɛ ɛ soyɛ ɛKiriti gha, ne ɛ le daa ɛlɔ ɛTaanggbey ya.”
ɛYɛso gha kɛ Mɔng ɛli ne Ɛ sɛ ku
(ɛMac 16.21-28; ɛMar 8.31–9.1)
21ɛYɛso gha ne kpɛngke nibhɛ ririk, ɛ yaak nibhɛ wu hang nibhɛ mɔng ɛnyi ibol lɛdee wo. 22Ɛ kyii ta yaak nibhɛ, “iPhɛ so nggbinggbing ɛNgɔn ɛNyi sɔ nggbang ngga ihywee-ihywee. Ninu nikɔɔn na, nɛ nindiinday nibo ɛTaanggbey ya nɛ Ninaa ne Kpɛl ɛShara gha sɛ mbaray ɛbhɛ. Nibhɛ sɛ ne phoo ɛbhɛ; ne sɛ ɛtuk ne itwat tɛ, ne iyiisik ɛbhɛ tsik ne iken.”
23Ɛ kyii ta boote nɛ nibhɛ gbik, ɛ yɔngɔ, “ɛNyi gha ne ɛ sim aa roos me wo, tɛ ne ɛ mbaray ito ɛbhɛ, ɛ bo itson ne gangat ɛbhɛ ɛ roos me nɛ izenge ne ihwɛlɛ.#9.23 Ta yɛɛn: ɛMac 10.38; ɛLuk 14.27. 24ɛHiha ɛNyi ne ɛ sim aa phɔt ito ɛbhɛ de, aa kyii wɔs iphɛ. ɛHaa ne ɛ kɛ ne mbaray ito ɛbhɛ ɛlɔ me wo, aa ne phɔt iphɛ.#9.24 Ta yɛɛn: ɛMac 10.39; ɛLuk 7.33; ɛYoh 12.25. 25iPhɛ so ɛnyi gha kyee, ne aa sɛ ɛzay ya gbik ko, ɛ ji wɔs iken ɛbhɛ dee? 26ɛNyi gha ne ɛ kɛ ne phok ncwa nge, ne ncwa ne ibol nge de; ɛNgɔn ɛNyi gha sɛ ne ma phok ncwa ɛbhɛ, nten de ne ɛ sɛ bhɛ kyii ndɔ ndiinday ɛbhɛ de, ne idee ɛKyɛɛ de gbik ne idee niMalɛka ɛTaanggbey de. 27Nzi tɔng nyini itin nɛ, ɛbyin mon so ɛbɛ wo ne hame nibhɛ sɛ kus nyɛɛn nibhɛ kyi yaang igbɔm ɛTaanggbey ba.”
iBek ɛYɛso de Kɛ Hyereey
(ɛMac 17.1-13; ɛMar 9.2-8)
28Kɛ ne sɛ ɛtsim nituk ɛnaras ne ɛYɛso gha kɛ bol ɛlɛ wo, ne ɛ bo ɛBiturus se, ne ɛYohana, gbik ne ɛYakub, nibhɛ bhɛ wara daa ne igol tɛ nibhɛ bhɛ boote ne ɛTaanggbey. 29Kɛ ne sɛ ɛYɛso gha so ndɔ ɛroo gha, ɛyisɛ ɛbhɛ ne hyereey, itsura ɛbhɛ ne te ihwala yɛ hyahyak. 30Ninyi ifaa, ɛdaan kaa so ɛMuusaa, ɛdɛng ne so ɛLiya ne wuru nibhɛ yaa bol ne ɛYɛso gha. 31Nibhɛ kaa wuru ne igbom ɛdaa ne irywa, nibhɛ bol ne ɛbhɛ ibol de ne ɛ yungaa shwaak iyɔngɔ ɛTaanggbey da ne ɛ sɛ bhɛ ku ne iYɛrushɛlɛm be. 32ɛBiturus sa nɛ nitaay ya kaa ne te nɛ yeyep, ne sɛ nibhɛ kɛ seme, nibhɛ ne yaang ndiinday ɛYɛso de gbik nɛ ninyi ifaa na nɛ nibhɛ kɛ kyinak nɛ nibhɛ wo. 33Ne sɛ ninyi na yaa tek ɛYɛso yegha, ɛBiturus sa ne shii yɔngɔ, “ɛNdiinday iphɛ kɛ jam mɛ ɛli ne njwi so ɛbɛ wo, shɛɛ yak te njwi ryɔng nyini ifo ifɛ icwat; idɛng yaaso idee mo, idɛng ne so idee ɛMuusaa, idɛng ne ji so idee ɛLiya.” Sɔng ɛ kaa ne i yɛɛ ɛkɔn na ne ɛ bol nang.
34Kɛ ne sɛ ɛBiturus sa tɔ ndɔ ne ivol ɛbhɛ ba, inɔp ne shii cwaal nibhɛ. Ninɔn ne icwam ma ne wum ɛnik ɛli ne inɔp be kɛ cwaal nibhɛ wo. 35iZɔlɔs ne ji le ndɔ ne inɔp be, ihywɛ yɔngɔ, “ɛNgɔn nge gha wo, ɛhaa ne nggɛ kasa, phok ɛn ɛbhɛ.”#9.35 Ta yɛɛn: ɛSh 42.1; ɛMac 3.17; 12.18; ɛMar 1.11; ɛLuk 3.22; 2ɛBi 1.17-18.
36Kɛ ne sɛ izɔlɔs de kɛ taal ivol da, nibhɛ ne shii yaang ɛYɛso gha kɛ mak nggenggerey. Ninɔn ne icwam ma ne boos ibol lɛ ndɔ nibhɛ, sɔng nibhɛ mɔng ɛnyi ɛkɔn na nɛ nibhɛ kɛ yaang ngo nang.
ɛYɛso gha kɛ Tul niPhoo ndɔ ɛNgɔn
(ɛMac 17.14-21; ɛMar 9.14-27)
37Kɛ ne cwiil ne ihwɛlɛ yɛ, ɛYɛso gha nɛ ninɔn ne icwam ɛbhɛ itwat ta ne tɔm daa ne igol de, idira ninyi de ne bhɛ sɛ ɛbhɛ. 38ɛDɛng ndɔ ne idira de ne kyangkey, ɛ yel-le, ɛ yɔngɔ, “ɛKyɛɛ ne iCwam, nzi roro yɛ san iyɔm ɛngɔn nge, ɛbhɛ ne nggu bok zɔng! 39iDɛ ikabyik ge bok ɛbhɛ, iphɛ mɔɔng iphɛ wum ɛbhɛ iphɛ cwaak, ɛ yaa tabha ɛkukun, ɛ yaa bo tsitsiy ɛ jii tuul ifurum ɛnu. Sɔng iphɛ kɛ ne tek ɛbhɛ nang, iphɛ tak ɛbhɛ iyɔm, 40Nggɛ ne roo nɛ ninɔn ne icwam mo na, wu tɛ nibhɛ tul iphɛ, sɔng nibhɛ kɛ ne yɛɛ nɛ nang.”
41ɛYɛso gha ne kyii nɛ ɛ yɔngɔ, “Nyinɛn ninaa ne izam mɛnaa wo ne ɛ sang ɛn ìnang ne itin de, ɛ ta bok ɛn ito ihet de nang, ishwɛɛ nge da ne nyinɛn no sɛ hɔn ne nggyibhii? ɛBɔk ngɛ gha ne nyinɛn no sɛ hɔn ne nggyibhii? Nang me ɛngɔn mo gha ɛbɛ.”
42Kɛ ne sɛ ɛli ne ɛngɔn na phɛɛs ne sɛ ɛYɛso yegha, ɛphoo gha ne ta shii yinɛ ɛbhɛ, ɛ cwaak ɛbhɛ ne ivel; ɛngɔn na ne ta yaa bo tsitsiy yo dɔng. ɛYɛso gha ne sit ɛphoo gha ne ɛbung, ɛ te ɛngɔn na ɛken ɛ nang ɛkyɛɛ yɛ. 43Gbik ninyi na ne yaang ɛkɔn ne kparat, daa ne igbom ɛTaanggbey de.
ɛYɛso gha kɛ ta Mɔng iBol ne iKu Ɛbhɛ de Dɔng
(ɛMac 17.22-23; ɛMar 9.30-32)
Ninyi na gbik kaa ne wum en zii daa nikɔn ne ɛYɛso gha kɛ mɔn no, ne ɛ boote nɛ ninɔn ne icwam ɛbhɛ na, ɛ yaak nibhɛ, 44“Sɔng ɛ te ɛn bap ne ibol de ne naa mɔng nyini wo nang: Yaa bhɛ nang ɛNgɔn ɛNyi ne iwɔ ne igbɔm ninyi.” 45Sɔng ninɔn ne icwam ɛbhɛ na ne jung seng ibol lɛ nang, kaa rɛɛ nibhɛ, nibhɛ ne kyii ta i phok ɛnik ne phom ɛbhɛ iphɛ.
ɛHay Ɛbhɛ Phyin ne iGbom Bee?
(ɛMac 18.1-5; ɛMar 9.33-37)
46Ninɔn ne icwam ɛYɛso na ne yaa dad ishamas ndɔ nibhɛ, nibhɛ tɔk tɛ nibhɛ sɛ̀ seng ɛhaa ne ɛ phyin ne igbom.#9.46 Ta yɛɛn: ɛLuk 22.24. 47ɛYɛso gha ne seng icwas nibhɛ, iphɛ ɛlɛy, ne ɛ yel-le ɛdɛ ɛnyinyɔn na ɛ yɛk ɛbhɛ nɛ ɛ kyinak ne ifam ɛbhɛ. 48Ne ɛ ji yaak nibhɛ, “ɛHiha ne ɛ kɛ say ɛnyinyɔn neghaa lenɛ ne irywɛɛk nge wo, mee ne ɛ kɛ say. ɛHiha ne ɛ kɛ ne say me wo, ɛ kɛ ne ma say ɛnyi gha ne ɛ kɛ tom me. ɛNyi gha ne ɛ kɛ taasek ɛ shɛs ndɔ mon no, ɛbhɛ ne ɛ phyin nyini ne igbom be.”#9.48 Ta yɛɛn: ɛMac 10.40; ɛLuk 10.16; ɛYoh 13.20.
ɛNyi gha ne ɛ Sang Bok iTsobhok ne Njwɛɛn no ɛ So ɛHaa Njwɛɛn
(ɛMar 9.38-40)
49ɛYohana gha ne shii yaak ɛYɛso yegha, “ɛDaray, njwi kɛ sɛ ɛdɛ ɛnyi gha ɛ tuul niphoo ndɔ ne irywɛɛk mo, njwi kɛ ne ring ɛbhɛ nɛ daa ɛli ne hame ɛ so ɛdaan ndɔ njwɛɛn.”
50ɛYɛso gha ne kyii nɛ ɛ yɔngɔ, “Sɔng ɛ ring ɛn ɛbhɛ nɛ wo nang. ɛNyi gha ne ɛ sang bok itsobhok ge ne nyinɛn no, ɛ so ɛhaa mon.”
Kɛ Mbaray ɛYɛso Ye ɛDɛ ɛGarang ne iSamariya Gha
51Kaa ne sɛ nten de ne yaa bo ɛYɛso yegha i kyii nɛ daa ne irywa wo yunga tuu, ɛYɛso gha ne yɛk ne iyɔk ne phɛ ne iYɛrushɛlɛm, ne ɛ ji bo nikɔn ɛ phɛɛs. 52Ne ɛ tom ninyi, nibhɛ ho ɛyisɛ nibhɛ phɛ ɛdɛ ɛgarang ne iSamariya gha te nibhɛ bhɛ ryɔng ɛbhɛ nilɔ yɛ. 53Ninyi ne ɛlɔ yɛnaa nggyɛ wo ne bhɛ mbaray tang say ɛbhɛ daa ɛli ne i ku yɛɛ ɛ phɛɛs ne iYɛrushɛlɛm. 54Ne sɛ ninɔn ne icwam ɛbhɛ, ɛYakub pa ne ɛYohana gha kɛ yaang ɛlɛ wo, nibhɛ ne yaak ɛbhɛ, “ɛDaray, ɛɛ sim te njwi sɛɛ yel-le igboo, ifɛ le daa ne irywa ifɛ re nibhɛ?”#9.54 iDɛ iWee ne ile da kaa hante nɛ ifɛ yɔngɔ, ɛLi ne ɛLya gha kaa mɔn noo?
55ɛYɛso gha ne hyereey, ɛ sit nibhɛ ne ɛbung. 56ɛYɛso gha nɛ ninɔn ne icwam ɛbhɛ na ne phɛ ɛhak ɛgarang.#9.56 iDɛ iWee ne ile da kaa hante nɛ ifɛ yɔngɔ, Sɔng ɛ yɛɛ ɛn ihywee ne ikabyik ge ne ɛ bok ɛn nang. Sɔng ɛNgɔn ɛNyi gha kɛ yɛɛs te ɛ phobho ikpen da nang, ɛ kɛ yang yɛɛs te ɛ phɔt ifɛ.
Nggbang ne Roos ɛYɛso Ye
57Kɛ ne sɛ niYɛso yena i hyel ne nkiinɛ, ɛdɛ ɛnyi gha ne yaak ɛbhɛ, “Naa kungus sɛ gbik ɛlɔ gha ne aa phɛ.”
58ɛYɛso gha ne kyii nɛ, ɛ yaak ɛbhɛ, “Nikwiy ya bok ivong, ninon na ne ma bok niryee; sɔng ɛNgɔn ɛNyi gha ne bok ɛlɔ ne ra nang.”
59ɛYɛso gha ne ji yaak ɛdɛ ɛnyi gha, “Roos me.” ɛNyi gha ne kyii nɛ, ɛ yaak ɛbhɛ, “ɛDaray shɛɛ yak, te nggyi bhɛ rɛɛ ɛkyɛɛ nge.” 60ɛYɛso gha ne kyii nɛ ɛ yaak ɛbhɛ, “Tek te ikpom ba rɛrɛs ikpom, igyɛ wo ne ɛ cwi ɛbhɛ tɔng ibol ne igbɔm ɛTaanggbey de.”
61ɛDɛ ɛnyi gha ne ta yaak ɛYɛso yegha, “ɛDaray, naa roos sɛ, ne ɛ shɛɛ yak te mbɛ mɔng ninaa ne ijwee nge nyɛɛn.”
62ɛYɛso gha ne kyii nɛ, ɛ yaak ɛbhɛ, “ɛNyi gha ne ɛ kɛ wum irwandɔng ngga itson no ne ifɛ hap ne ihwap ba ɛ kyii ta i hyeeme ɛ wɛɛ ɛtsim ma, sɔng ɛ kɛ ne jam ne igbɔm ɛTaanggbey ba nang.”
Currently Selected:
ɛLuka 9: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
