ɛLuka 15
15
iBol ne nTsabhak ne iHywɛ kɛ Birit
(ɛMac 18.12-14)
1Kaa ne sɛ ɛdɛ ɛtuk ka, ninaa ne saasel ijam ne ivel la, nɛ nidɛng ninaa ne ɛfɔt ta ne bhɛ tumɛy ɛlɔ ɛYɛso gha, nibhɛ tenes ɛbhɛ. 2niFarisawa na nɛ Ninaa ne Kpɛl ɛShara gha ne yaa wunga ndɔ nibhɛ, nibhɛ bo, “ɛNyi yɛghaa wo kɛ wum ìtsɛm nɛ ninaa ne ɛfɔt, ɛɛ re ire nɛ nibhɛ.”#15.2 Ta yɛɛn: ɛLuk 5.29-30. 3ɛYɛso gha ne tɔng nibhɛ ibol ne igɔrɔp pɛdee:
4“ɛDɛ mon sɛɛ bok ᐩigyol ne ihywɛ kɛ hɔn ikɔl idaan; ìzɛng ne ji birit. Ɛ sɛ mɔn ɛli daa mɛɛ? Nzi bo, ɛ sɛ ne tek ihywɛ nzuwubɔ ɛnduwujɛng ne ifɛ ɛnduwujɛng ngga nɛ ne ibang ngɛ, ɛbhɛ tɔk ihywɛ izaan de, ɛ sɛ ihywɛ nyɛɛn. 5Yaa ne sɛ ɛ kɛ bhɛ sɛ ihywɛ, irway ihwala ɛbhɛ ba yaa ne te ɛbhɛ ɛ tɔɔk ihywɛ ɛgoy, 6ɛ yɛɛsey yɛ. Ne ji yel-le nitaay ɛbhɛ gbik nɛ ninaa ɛcɛcɛk ɛbhɛ ɛ yaak nibhɛ, ‘Yɛɛs ɛn ɛ phyik ɛn mɛɛn ne irway ihwala, nggɛ sɛ igyol nge ne ihywɛ kɛ birit!’ 7Nzi ne tɔng nyini, ɛlɛy ne iphɛ ne so daa ne irywa wo, sɛ bok irway ihwala daa ɛhaa ne ɛfɔt ɛnyi ɛdaan ne ɛ kɛ san ɛbɔk i phyin ɛli ne yaa bok daa ninyi nzuwubɔ ɛnduwujɛng nɛ nibhɛ ɛnduwujɛng nɛ nibhɛ ku so cik nibhɛ i sang tɔk isan ɛbɔk.
iBol ne iJam ne ihywɛ kɛ Birit
8“ɛKuk sɛɛ bok ntsɔk ne ijam ɛnduwubɔ, ihywɛ izaan ne ji birit, aa ne mɔn ɛli daa mɛɛ? Nzi bo wu aa ne yɛk ne igboo ndɔ ne ijwee wo, ɛ yes ifɛ, ɛ tɔk ninggbyak kɛ hywɛɛ, ɛbhɛ sɛ ihywɛ nyɛɛn. 9Yaa ne sɛ ɛ kɛ sɛ ihywɛ, aa ne yeres nitaay ɛbhɛ, gbik nɛ ninaa ɛcɛcɛk ɛbhɛ, ɛ yaak nibhɛ, ‘Yɛɛs ɛn ɛ phyik ɛn mɛɛn ne irway ihwala, nggɛ sɛ jam nge ne ihywɛ kɛ birit.’ 10Nzi ne tɔng nyini, ɛlɛy ne iphɛ so, niMalɛka ɛTaanggbey ya yaa ne bok irway ihwala daa ɛhaa ne ɛfɔt ɛdaan ne ɛ kɛ san ɛbɔk ka.”
iBol ɛNyi ne Ɛ Sim ɛNgɔn Ɛbhɛ
11ɛYɛso gha ne re ɛnu ɛyisɛ, ɛ yɔngɔ, “ɛDɛ ɛnyi gha kaa sɔ nɛ, ne ɛ bok ninɔn ifaa. 12ɛShɛɛrɛng ngɛ ne yaak ɛkyɛɛ gha, ‘ɛTaa, ku nang me ɛkɔn na ne ɛ so ɛhaa nge ndɔ ne iryat de, ɛlyilyɛghaa wo.’ ɛKyɛɛ gha ne hobhose nibhɛ iryat de.”
13Ne phyɔngɔle ncɛt, ɛngɔn ɛshɛɛrɛng nga ne kpuru nikɔn ɛbhɛ gbik ɛ phɛ ɛhak ɛgarang ne ɛ so kyakyak. ɛNggyɛy yo ne ɛbhɛ bees iryat ɛbhɛ de ndɔ ne ishwɛɛ ɛbuu. 14Kɛ ne sɛ ɛ kɛ taal iryat ɛbhɛ de gbik, iyɔm ne ji lel ɛgarang nga, ne ɛ yaa tɔk ɛkɔn na ne aa cwaak ɛnu nzeet. 15Ne ɛbhɛ tɔk ɛtomɛ ɛlɔ ɛdɛ ɛnyi ɛgarang ngɛ ne ɛ kaa bok itsɔɔm. ɛNyi gha ne nang ɛbhɛ ɛtomɛ ne wɛɛ itsɔɔm ɛbhɛ da. 16iYɔm be ne te ɛbhɛ, yaa tɔk te ɛ sɛ re ire ne itsɔɔm ba ne ɛ wɛɛ wo, sɔng ɛnyi ne nang ɛbhɛ nang. 17“Kɛ ne sɛ ihywɛɛ ɛbhɛ kɛ bhɛ kyii ɛlɔ ɛdaan. Ne ɛ ji yɔngɔ, ‘Ɔɔy!’ Nikpuru ɛkyɛɛ nge naa nibhɛ re de, nibhɛ tek, iphɛ dee naa ne ku ne ikpyak ɛbɛ buu. 18Naa kyii mbɛ sɛ ɛkyɛɛ nge gha n yaak ɛbhɛ, ‘ɛTaa, nggɛ mɔn ɛTaanggbey ye ɛfɔt; nggɛ ne ma ta mɔn nɛ nɛ. 19Sɔng n da tɔ te ɛ sɛ ta yaak me ɛngɔn mo nang maa say me, te n te me ɛdaan ndɔ nikpuru mo na.’ ” 20Ne ɛ bo nikɔn, ɛ phɛɛs ɛlɔ ɛkyɛɛ gha.
Kɛ ne sɛ ɛ tɔ gɔɔ, ɛkyɛɛ gha ne shii seng ɛbhɛ, ne san iyɔm ɛbhɛ, ne ɛ zugha ɛbhɛ sɛ ɛbhɛ ɛ wum ɛbhɛ, ɛ kumure ɛ kyili ɛbhɛ.
21“ɛNgɔn na ne yaak ɛkyɛɛ gha, ‘ɛTaa, nggɛ mɔn ɛTaanggbey ye ɛfɔt, nggɛ ne ma ta mɔn nɛ nɛ. Sɔng n da tɔ te ɛ sɛ yaak me ɛngɔn mo gha dɔng nang.’ ”
22“ɛKyɛɛ gha ne yel-le nikpuru ɛbhɛ, ɛ yaak nibhɛ, ‘Yɔngɔ ɛn ɛhywarat ɛbhɛ tɔk ɛn ɛtura ne ɛbhɛ kɛ jam ɛbhɛ shɛs, ɛ yɛk ɛn ɛbhɛ nɛ, te ne ɛ yɛk ɛn ɛbhɛ ne ikpikpangat ne isu ne ikɛn ne iwɔ. 23Te ne ɛ wum ɛn ɛgbaang ɛngɔn ne irwandɔng ɛ hyɛ ɛn, te njwɛɛn re idira te yel isham.’ 24Daa ɛli ne ɛNgɔn ngeghaa wo kaa ku, ɛ kɛ ne bhɛ kyii dɔng. Ɛ kaa birit, kɛ ne ta sɛ ɛbhɛ.” Nibhɛ ho ne ijɔwɔ de.
25Ɛlɛy, ɛngɔn ɛkɔɔn na bhɛ kyii ɛhay. Kɛ ne sɛ ɛ yaasooy, ɛ yungaa tuu ijwee, ne ɛ phok i hal igbin, i yel isham. 26Ne ɛ yel-le ɛdɛ ɛkpuru ɛkyɛɛ gha, ɛ phom ɛbhɛ ɛkɔn na ne ɛ tes.
27“ɛKpuru gha ne yaak ɛbhɛ, ‘ɛGwaa mo ɛbhɛ kɛ bhɛ kyii, ɛkyɛɛ mo gha ne kɛ ne yɛk ngɛ kɛ hyɛ ɛgbaang ne iben ne irwandɔng, daa ɛli ne ɛ kɛ bhɛ kyii ɛbhɛ ncaang ɛ so ɛken.’ ”
28“ɛGwaa ɛkɔɔn na ne te njenjek gbom, ɛ mbaray tang lel ndɔ ne ijwee wo. iPhɛ ɛlɛy ɛkyɛɛ gha ne wuru ɛbhɛ roo ɛbhɛ wu te ɛ lel ndɔ ne ijwee wo. 29Ne ɛ kyii ɛkyɛɛ gha nɛ ɛ yɔngɔ, ‘Yaang! Gbik ndɔ ne ishay yɛdee wo, nzi maa luu me ɛlɔ mo te ɛkpuru mo, sɔng nggɛ ne ku bɛɛs idɛ ibol mo de nang. Gbik ne iphɛ ɛlɛy, sɔng ɛ kɛ ne ku nang me ɛgyogyool n ji re nɛ nitaay nge nang.’ 30Kɛ ne ji sɛ ɛngɔn mo yɛghaa wo, ne ɛ kɛ bhɛ sanga iryat mo de, ɛlɔ nikuk ka kɛ bhɛ kyii, ɛ kɛ ne phoo ɛbhɛ ɛgbaang ɛngɔn ne irwandɔng!”
31“ɛKyɛɛ gha ne yaak ɛbhɛ, ‘ɛNyɛn ɛɛy! Njwi so ɛbɛ wo ne igyɛ, iryat nge de so izee mo gbik. 32iPhɛ kɛ ne jam mɛ njwɛɛn tɔɔl irway ihwala ba, daa ɛli ne ɛgwaa mo gha kaa ku ɛ kɛ ne bhɛ kyii, ɛ kaa birit kɛ ne sɛ ɛbhɛ.’ ”
Currently Selected:
ɛLuka 15: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
