ɛYohana 9
9
ɛYɛso gha kɛ Te ɛWil ɛKen
1Kɛ ne sɛ ɛYɛso gha hyel ne ɛ yaang ɛnyi ne kaa yɛk ɛbhɛ, ɛ bok iwil. 2Ninɔn ne icwam ɛbhɛ na phom ɛbhɛ nibhɛ yɔngɔ, “ɛKyɛɛ ne iCwam, ɛfɔt ɛhay ɛbhɛ kɛ te ɛnyi yeghaa wo bok iwil daa? ɛFɔt Ɛbhɛ? Hang ɛwoo ɛkyɛɛ? Hang ɛwoo ɛgyinɛ?”
3ɛYɛso gha ne kyii nɛ ɛ yɔngɔ, “Sɔng iwil ɛbhɛ da lenɛ ne ɛfɔt ɛbhɛ nang. Sɔng ifɛ ne lenɛ ne ɛwoo ɛkyɛɛ, ne ɛgyinɛ nang. ɛKɔn nɛghaa wo kɛ te te ɛ yaang ɛn ɛtomɛ gha ne ɛTaanggbey yaa mɔn daa ɛbhɛ. 4iPhɛ so nggbinggbing njwɛɛn mɔn ɛtomɛ ɛnyi gha ne ɛ kɛ tom me wo ɛlɔ yɛ tɔ igbey, ɛtuk yaaso ne hame ɛnyi yaa tang yɛɛ ne mɔn ɛtomɛ gha. 5Nten de ne Nzo ndɔ ɛzay ya, Mee ne nzo me iwɛwɛy ɛzay de.”
6ɛTsim mɛ ne ɛ kɛ boote ɛlɛ wo, ɛYɛso gha ne tuki ncwincway ne ivel ɛ rughare ives, ɛ ji bone ives da ne ɛ kɛ rughare wo, ɛ ruki ɛnyi gha nɛ ne irwisɛ da, 7ɛ yaak ɛbhɛ, “Cwi ɛbhɛ kuus ɛyisɛ mo gha ɛrenes ne iSilɔm.” Kaa ne i bok irywɛɛk ne iSilɔm mo “ìTom.” ɛNyi gha ne phɛ ɛbhɛ kuus ɛyisɛ ɛbhɛ gha, ɛbhɛ kyii ɛɛ wɛɛ.
8Ninaa ɛcɛcɛk ɛbhɛ, gbik nɛ ninyi na nɛ nibhɛ yaang ɛbhɛ ɛ roro wo ne yɔngɔ, “Sɔng ɛnyi yeghaa wo bhɛ kaa sooset to ɛ roro wo nang nge?” 9Nidɛng ne yɔngɔ, “Ɛbhɛ ghaa wo.”
ɛByin nɛ ne yɔngɔ, “Kwa, ɛ yang so te ɛbhɛ.”
ɛNyi gha ne yɔngɔ, “Mee nzo ɛbhɛ.”
10Nibhɛ ne phom ɛbhɛ nibhɛ yɔngɔ, “Kɛ ne mɔn ɛlii ɛ kɛ yaa wɛɛ woo?”
11Ne ɛ kyii nɛ ɛ yɔngɔ, “ɛNyi gha ne i bok ɛbhɛ ɛYɛso gha ɛbhɛ kɛ rughare ives, ɛ ruki me nɛ ne irwisɛ, ɛ ji yaak me wu te n phɛ ɛrenes ne iSilɔm mbɛ kuus; ne n phɛ, mbɛ kuus, ne n ji yaa wɛɛ.”
12Nibhɛ ne phom ɛbhɛ nibhɛ yɔngɔ, “ɛNyi yɛghaa wo ne so ɛbii.”
Ne ɛ yɔngɔ, “Sɔng nzi yɛɛ nang.”
niFarisawa na Kɛ Phɛl ɛLi ne Kɛ Te ɛNyi ɛKen
13Nibhɛ ne bo ɛnyi gha ne ɛ kaa bok iwil ba nibhɛ phɛ nɛ ɛlɔ niFarisawa. 14ɛTuk ka ne ɛYɛso gha kaa rughare ives da ɛ te ɛnyi gha ne ɛken na kaa ne so ɛTuk ne iWɛsɛ. 15iPhɛ ɛlɛy, niFarisawa na ne ta hante ne phom ɛnyi gha ɛli ne kɛ mɔn ɛ yaa wɛɛ wo. ɛNyi gha ne yɔngɔ, “Ɛ kɛ ruki me ne ives ne irwisɛ da ne mbɛ kuus, ɛlyilyɛghaa wo nzi ne wɛɛ.”
16Nidɛng niFarisawa na ne yɔngɔ, “ɛNyi gha ne ɛ kɛ mɔn ɛkɔn neghaa wo, sɔng ɛ le daa ɛlɔ ɛTaanggbey yang, daa ɛli ne ɛ mbaray tang shɛɛ ne iWɛsɛ ba.”
ɛByin nɛ ne yɔngɔ, “Yaa ne mɔn ɛlii ɛhaa ne ɛfɔt ta yɛɛ ne mɔn nikɔn ne kparat tɛnaa woo?” iPhɛ ɛlɛy nibhɛ ne hobhos en.
17Nibhɛ ne kyii ta phom ɛnyi gha ne ɛ kaa bok iwil da dɔng nibhɛ yɔngɔ, “Aa ne ji yɔng ikyee daa ɛbhɛ, ne ɛbhɛ ɛ kɛ phaal lɛ irwisɛ daa?”
ɛNyi gha ne kyii nɛ ɛ yɔngɔ, “Ɛ so ɛnɛbi.”
18Sɔng nindiinday niYahodawa na kaa ne jung nang ne itin nɛ wu ɛnyi kaa tsa ɛ bok iwil da nang. iPhɛ ɛlɛy nibhɛ ne yel-le ɛkyɛɛ gbik ne ɛgyinɛ, 19Nibhɛ phom nibhɛ, nibhɛ yɔngɔ, “ɛNgɔn mon naa woo? Ɛbhɛ so ɛhaa ne ɛ bo ɛn kaa yɛk ɛbhɛ ne iwil baa? Kɛ ne mɔn ɛlii ɛ yaa wɛɛ woo?”
20ɛKyɛɛ ɛnyi gha ne ɛgyinɛ gha ne kyii nɛ nibhɛ yɔngɔ, “Njwii yɛɛ ɛ so ɛngɔn mos, Njwii ne ta yɛɛ kaa yɛk ɛbhɛ ɛ bok iwil. 21Sɔng njwii ne yɛɛ ɛli ne kɛ mɔn ɛ yaa wɛɛ wo nang. Sɔng njwii ne ta yɛɛ ɛnyi gha ne ɛ kɛ te ɛbhɛ ɛken nang. Phom ɛn ɛbhɛ, ɛ kɛ hɔn, aa yɛɛ ne bol ibol ne ito ɛbhɛ.” 22ɛKyɛɛ gha ne ɛgyinɛ gha kaa boote ɛlɛ wo daa ɛli nɛ nibhɛ kaa phok ɛnik niYahodawa na. niYahodawa na kaa ku sim me nɛ wu gbik ɛnyi gha ne ɛ kɛ nang ne itin nɛ wu ɛYɛso gha so ɛKiriti gha, yaa ne tul ɛbhɛ ne itɔɔy de. 23iPhɛ phɛ kaa ne te ɛkyɛɛ gha ne ɛgyinɛ gha yɔngɔ, “Ɛ kɛ hɔn, phom ɛn ɛbhɛ.”
24niFarisawa na ne kyii ta yel-le ɛnyi gha ne ɛ kaa bok iwil da dɔng nibhɛ yaak ɛbhɛ, “Mɔng itin nɛ te ɛ nang ɛTaanggbey ye ne ndiinday, njwii yɛɛ ɛnyi yɛghaa wo so ɛhaa ne ɛfɔt.”
25ɛNyi gha ne kyii nɛ ɛ yɔngɔ, “Sɔng nzi yɛɛ nang, hang ɛ soye ɛhaa ne ɛfɔt yɔɔ, hang ɛ ma sang soye nɛ yɔɔ. ɛKɔn ɛdaan ne nzi yɛɛ, nggaa so ɛwil ɛlyilyɛghaa nzi ne wɛɛ!”
26Nibhɛ ne phom ɛbhɛ nibhɛ yɔngɔ, “iKyee ne ɛ kɛ mɔn nɛ nɛ woo? Ɛ kɛ phaal irwisɛ mo da ɛlii?”
27ɛNyi gha ne kyii nɛ ɛ yɔngɔ, “Nggɛ ku tɔng nyini, sɔng ɛ kɛ ne phok ɛn nang, ikyee phɛ kɛ ne te ɛɛ ta sim aa phok ɛn noo? Hang ɛ ma sim ɛn ɛ sɛɛ te nyini ninɔn ne icwam ɛbhɛ na naa?”
28Nibhɛ ne toke ɛbhɛ nibhɛ yɔngɔ, “iGyɛ ɛ so ɛngɔn ne icwam ɛnyi yɛghaa nggyɛ wo, njwi so ninɔn ne icwam ɛMuusaa! 29Njwii yɛɛ, ɛTaanggbey ya kaa bol ne ɛMuusaa, ɛnyi yeghaa nggyɛ wo nang, sɔng njwii ma yung yɛɛ ɛlɔ gha ne ɛ le nang.”
30ɛNyi gha ne kyii nɛ ɛ yɔngɔ, “iPhɛ so ɛkɔn ne kparat, sɔng ɛ yɛɛ ɛn ɛlɔ gha ne ɛ le nang, gbik ne iphɛ ɛlɛy ɛ kɛ ne phaal me irwisɛ. 31Njwɛɛn ne yɛɛ sɔng ɛTaanggbey ya tenes ninaa ne ɛfɔt ta nang, ɛɛ tenes ɛnyi ɛcik, ɛhaa ne ɛ mɔn ɛkɔn na ne ɛɛ sim. 32Ne le tum ɛzay yo, sɔng ɛnyi kɛ ne ku phok wu ɛdɛ ɛnyi gha kɛ phaal irwisɛ ɛwil nang. 33Sɛɛ ne yɔng ɛnyi yɛghaa wo sang le ɛlɔ ɛTaanggbey ya, sɔng ɛ sɛɛ ne mɔn ɛkɔn nang.”
34Nibhɛ ne kyii nɛ nibhɛ yaak ɛbhɛ, “iGyɛ ne kɛ ma yɛk kɛ ɛ bok ɛfɔt, ɛ phyii hɔn ndɔ ne ɛfɔt to, aa ne mɔn ɛlii ɛ mɛmɛ njwii nɛ nikɔn naa?” Nibhɛ ne tul ɛbhɛ gɔɔ ne izay ne itɔɔy yo.
iWil ne iKabyik
35ɛYɛso gha ne phok ɛli nɛ nibhɛ kɛ tul ɛnyi gha gɔɔ ne izay ne itɔɔy yo, kɛ ne sɛ ɛ kɛ sɛ ɛbhɛ, ne ɛ yaak ɛbhɛ, “Ɛ kɛ nang ne itin nɛ ne ɛNgɔn ɛNyi ghaa?”
36ɛNyi gha ne kyii nɛ ɛ yɔngɔ, “ɛNdiinday, mɔng me ɛbhɛ, naa ne nang ne itin nɛ ne ɛbhɛ.”
37ɛYɛso gha ne yɔngɔ, “Ɛ ku yaang ɛbhɛ, ɛbhɛ ɛ bol ne igyɛ ɛlyilyɛghaa wo.”
38ɛNyi gha ne yɔngɔ, “ɛDaray, nggɛ nang ne itin nɛ.” Ne ɛ ji ɛ re ɛYɛso yegha ntsong.
39ɛYɛso gha ne yɔngɔ, “Nggɛ yɛɛs ndɔ ɛzay yeghaa wo te n bol ɛshara, tɛ niwil la yaa wɛɛ, ninaa nɛ nibhɛ wɛɛ wo ne ji tes se niwil.”
40Nidɛng niFarisawa na nɛ nibhɛ kaa sonɛ nibhɛ ɛnggyɛ wo ne phok ɛli ne ɛ kɛ boote ɛlɛ wo, nibhɛ ne phom nibhɛ yɔngɔ, “iKyee lɛɛ, njwi ma so niwil la ne mang ngee?”
41ɛYɛso gha ne yɔngɔ, “Sɛɛ yɔng ɛ sɔ ɛn niwil la, sɔng ɛ sɛɛ so ɛn ninaa ne ɛfɔt to nang, ɛli ne ɛ ne ji bo ɛn wu ɛ wɛɛ ɛn no, ne ɛ ji so ɛn ninaa ne ɛfɔt ta.”
Currently Selected:
ɛYohana 9: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
