ɛTomɛ 9
9
ɛShawulu Kɛ Teye ɛHaa ne Roos
(ɛTom 22.6-16; 26.12-18)
1ɛShawulu gha kaa ma tɔ baasek ninaa ne roos sa nggbang ngga ɛ sim ɛli ne aa phobho nibhɛ. Ne ɛ phɛ ɛlɔ ɛgɔm nibo gha, 2ɛbhɛ phom ɛbhɛ ɛ yaak ɛbhɛ te ɛhaa ye ɛwee te i phɛ nɛ ne idee ne itɔɔy niYahodawa de ndɔ ne ivel ne iDimaskus. Te yaa sɛ ɛ kɛ bhɛ sɛ idɛ idira ninaa ne roos de ɛnggyɛ wo, hang nikuk kɛ yɔɔ, hang niras sɛ yɔɔ, te ɛ wum nibhɛ ɛ yɛɛs nɛ nibhɛ ne iYɛrushɛlɛm be. 3Kɛ ne sɛ ɛ so ne ihywel da ɛ yek cɛcɛk ne iDimaskus de, idɛ wɛwɛy de ne shii le dak ne irywa, iphɛ tolte iphɛ te ɛbhɛ gyɔɔ. 4Ne ɛ hɔ ne ivel, ne ɛ ji phok izɔlɔs ihywɛ bok ɛbhɛ, “ɛShawulu! ɛShawulu! iKyee iphɛ kɛ te ɛ baasek me nggbang nggaa?”
5ɛShawulu gha ne kyii nɛ ɛ yɔngɔ, “ɛDaray, igyɛ ɛhay?”
“iZɔlɔs de ne kyii nɛ ihywɛ yɔngɔ, ‘Me n so ɛYɛso gha ne ɛ baasek me nggbang ngga. 6Yilitsik te ɛ phɛ ndɔ ɛgarang ne iDimaskus de, yaa ne bhɛ tɔng ngɛ ɛkɔn na ne iphɛ so nggbinggbing ɛ mɔn.’ ”
7Ninyi na nɛ nibhɛ kaa sonɛ ɛShawulu gha ne kyinasek nggbyak. Daa ɛli nɛ nibhɛ kɛ phok izɔlɔs de sɔng nibhɛ ne kyi yaang ɛnyi nang. 8ɛShawulu gha ne yilitsik ne ivel da, ne sɛ ɛ kɛ phaal irwisɛ sɔng ne ɛ yaang ɛlɔ nang. Ninyi na ne wum ɛbhɛ iwɔ nibhɛ phɛ nɛ ndɔ ne iDimaskus de. 9Ne ɛ shɛɛ nituk itwat, sɔng ɛ yaang nang, sɔng ne ɛ re ɛkɔn nang, sɔng ɛ ta sɔ ɛkɔn nang.
10Ɛdɛ ɛhaa ne roos sa kaa ne so ne iDimaskus de ne kaa bok ɛbhɛ ɛHananiya. ɛDaray ya ne ji boote ne ɛbhɛ ndɔ ne iyuwa, ɛ yɔngɔ, “ɛHananiya!”
ɛHananiya gha ne kyii nɛ ɛ yɔngɔ, “ɛDaray, mee woo.”
11ɛDaray ya ne yaak ɛbhɛ, “Cwi ne ijwee ɛYahuza ndɔ ɛgarang nga, ne ɛwɛɛl lo ne i bok ɛbhɛ ɛWɛɛl ɛCik ko. Te ɛbhɛ phom ɛdɛ ɛnyi ne iTaasus sa ne i bok ɛbhɛ ɛShawulu. Ɛ so ɛnggyɛ wo ɛ bol ne ɛTaanggbey. 12Nggɛ ku tɔɔrek ɛbhɛ ndɔ ne iyuwa wu ɛdɛ ɛnyi gha ne i bok ɛbhɛ ɛHananiya kɛ tek ɛbhɛ ne iwɔ da ne ito ɛ ta yaa wɛɛ dɔng.”
13ɛHananiya gha ne kyii nɛ ɛ yɔngɔ, “ɛDaray, ninyi na gbom kɛ ku tɔng me ibol ɛnyi yɛdee nggyɛ wo, ɛli ne ɛ baasek ninyi mo na nggbang ngga ne iYɛrushɛlɛm be. 14iPhɛ dee ɛ kɛ ne yɛɛs ɛbɛ wo daa ne igbɔm nindiinday nibo na wu te ɛ wumus gbik ninyi na nɛ nibhɛ yeres daa ne irywɛɛk mo wo nɛ ɛbɛ wo.”
15ɛDaray ya ne jung yaak ɛbhɛ, “Cwi, nggɛ ku kasa ɛShawulu yegha te ɛ mɔn me ɛtomɛ. Ɛbhɛ aa bhɛ tɔng ninyi na ne hame nibhɛ so niYahodawa na nɛ nigɔm gbik nɛ niSɛrɛla na ibol nge de. 16Na tɔɔrek ɛbhɛ nggbang ngga ne iphɛ so ngbingbing ɛ sɔ mpɛ ɛlɔ me wo.”
17ɛHananiya gha ne bo nikɔn ɛ phɛ ne ijwee ɛYahuza wo. Ne ɛ bo iwɔ ɛbhɛ ɛ tek ɛShawulu yegha nɛ dak ne ito. Ne ɛ ji yaak ɛbhɛ, “Ɛgwaa nge ɛShawulu, ɛDaray ɛYɛso gha ne ɛ kɛ wuru yɛ ne nkiinɛ wo ɛbhɛ kɛ tom me te lenɛ ɛlɛy ɛ yaa wɛɛ dɔng ne ta yɛk kɛ ne iKabyik ɛTaanggbey hyɔrɔ.” 18Nɛ ne nten nɛ ɛdɛ ɛkɔn na ne ɛ so te ikpikpang ne izing ne le ndɔ ne irwisɛ ɛShawulu da ɛ ho. ɛShawulu gha ne ya wɛɛ dɔng! Ne ɛ ji yilitsik i yɛk ɛbhɛ ne ibatisima. 19Ne sɛ ɛ kɛ re ire, ne ɛ ji sɛ ihwet. ɛShawulu gha ne ji bonɛ nituk gbom nibhɛ shɛɛ nɛ ninaa ne roos ne iDimaskus sa.
ɛShawulu gha kɛ Sanga iBol ɛYɛso ne iDimaskus
20Ne phyɔngɔle ncɛt, ɛShawulu gha ne yaa sanga ibol ɛYɛso de ndɔ ne idee ne itɔɔy niYahodawa de wu ɛYɛso gha so ɛngɔn ɛTaanggbey. 21Gbik ninyi na nɛ nibhɛ kɛ phok ibol ɛbhɛ de ne wum en zii, nibhɛ ne yaa bol nibhɛ bo, “Sɔng ɛnyi yɛghaa wo ɛbhɛ kaa baasek ninyi na nɛ nibhɛ yeres irywɛɛk kɛwoo wo ne iYɛrushɛlɛm be nggbang ngga nang nge? Sɔng ɛbhɛ ɛ kɛ ne ta yɛɛs ɛbɛ wo te ɛ wumus nibhɛ ɛbhɛ nang nindiinday nibo na ne iYɛrushɛlɛm be nang nge?”
22ɛShawulu gha ne hante ne ihwet ne sanga ibol ɛTaanggbey de, ne ɛ tɔng niYahodawa na nɛ nibhɛ so ne iDimaskus de itin nɛ wu ɛYɛso gha ɛbhɛ ɛ soye ɛKiriti gha ɛli ne hame nibhɛ aa re ɛbhɛ ne ishamas.
ɛShawulu gha Kɛ Phɔrɔt ne iWɔ niYahodawa
23Ne sɛ kɛ phyɔngɔle, niYahodawa na ne rop ɛnu ɛli nɛ nibhɛ yaa phoo ɛShawulu yegha. 24ɛShawulu gha ne tɛrɛk ɛ seng ihwarap nibhɛ da. Nibhɛ kaa yaa ra ɛbhɛ ɛnu ne izuk ɛgarang nga ne igbey ne ɛtuk te nibhɛ sɛ nibhɛ phoo ɛbhɛ. 25Ne sɛ ɛtuk ninɔn ne icwam ɛShawulu gha ne bo ɛbhɛ nibhɛ cwaak ndɔ ne ishwap, nibhɛ ji yɛɛn ikɛk ne iwabha de ne kɛ gan ne ɛgarang nga nibhɛ tɔmɔsek ɛbhɛ nɛ.
ɛShawulu gha kɛ Kyii ne iYɛrushɛlɛm
26Kɛ ne sɛ ɛShawulu gha kɛ yɛɛs ne iYɛrushɛlɛm be, ne ɛ sim ɛli ne aa lel ndɔ ninɔn ne icwam ɛYɛso na, nibhɛ ne wum ɛnik ɛbhɛ, daa ɛli sɔng nibhɛ kɛ jung nang ne itin nɛ wu ɛ kɛ teye ɛhaa ne roos sa nang. 27ɛBanabas ɛbhɛ ne ɛ bo ɛShawulu yegha ɛ phɛ nɛ ɛlɔ ninɔn ne tom ma. ɛBanabas sa ne tɔng nibhɛ ɛli ne ɛShawulu gha kɛ yaang ɛDaray yegha ne nkiinɛ wo, ɛli ne ɛDaray ya kɛ bol ne ɛShawulu gha. Ne ɛ tɔng nibhɛ ɛli ne ɛShawulu gha kɛ sanga ibol iyɛnɛng ngge tɔrɔk ko ndɔ ne irywɛɛk ɛYɛso wo ne iDimaskus de. 28ɛShawulu gha ne yaa shɛɛ nɛ nibhɛ ndɔ ne iYɛrushɛlɛm be, ɛ ibol ne irway nviit ndɔ ne irywɛɛk ɛDaray yo. 29Ne ɛ bol nibhɛ ne i sini ne ivol da nɛ niYahodawa na nɛ nibhɛ bol ilem ne iGirik ge, nibhɛ ne yaa tɔk ɛli nɛ nibhɛ sɛɛ phoo ɛbhɛ. 30Ne sɛ ninaa ne roos sa kɛ tɛrɛk nibhɛ seng ibol lɛ, nibhɛ bo ɛShawulu yegha nibhɛ phɛ ne ɛbhɛ ne iKɛsɛriya, ne ɛ ji bhɛ le ɛnggyɛ wo nibhɛ tom ɛbhɛ ne iTaasus.
31iDira ninaa ne roos de nɛ nibhɛ so ne iYahudiya de, ne iGalili de, ne iSamariya de ne sɛ irway ne laal. Nibhɛ ne yɛk ihwet, iKabyik ɛTaanggbey de ne i tes nibhɛ itsɔngɔl gɛgɛy, nibhɛ te gbom, ihywel nibhɛ da ndɔ ne ɛnik ɛDaray yo ne hantey yɛ.
ɛBiturus kɛ te ɛNiyas se ɛKen
32ɛBiturus sa kaa hyel ɛ roos nilɔ na gbik, nɛ ɛ phɛ ɛbhɛ kyili ninyi ɛTaanggbey ya nɛ nibhɛ so ne iLida. 33ɛNggyɛ wo, ɛBiturus sa ne bhɛ sɛ ɛdɛ ɛnyi gha ne ɛ kɛ baghat ne i bok ɛbhɛ ɛNiyas. Ɛ bok ishay ɛnaras ɛlɔ ne laal la ne ishwa de. 34ɛBiturus sa ne yaak ɛbhɛ, “ɛNiyas, ɛYɛso ɛKiriti kɛ teyɛ ɛken. Yilitsik te ɛ harap iphuurang mo de.” ɛNiyas sa ne shii yilitsik. 35Gbik ninyi ne iLida na nɛ ninaa ne iSharon ne yaang ɛNiyas segha. Nibhɛ ne yaa roos ɛDaray yegha.
ɛBiturus sa kɛ Te ɛTabita ye ɛKen
36ɛDɛ ɛhaa ne roos sa kaa ne sonɛ ne iYopa ne kaa bok ɛbhɛ ɛTabita, ne ta yeres ɛbhɛ ɛDokas ne ilem ne iGirik. ɛTabita gha kaa mɔn nikɔn niyɛnɛng cɛcɛɛy, ɛ ta phyighis ninyi nihala. 37Nten nɛdee nggyɛ wo, ɛTabita gha ne te shwa ɛ ku. Ne kuus ikom mɛ bhɛ tek dak ne ijwee ne irywa. 38iLida de kaa so cɛcɛk ne iYopa de. Kɛ ne sɛ ninaa ne roos sa kɛ phok ɛli ne ɛBiturus sa so ne iLida de, nibhɛ ne tom ninyi ifaa ɛlɔ ɛbhɛ wu tɛ nibhɛ ne bhɛ yaak ɛbhɛ, “Nzi roro ne igyɛ, yɔng ɛhywarat te ɛ yɛɛs ɛlɔ mos sa!” 39ɛBiturus sa ne shii bo nikɔn ne ɛ roos nibhɛ. Ne sɛ ɛ kɛ bhɛ tuu nibhɛ ne phɛ ne ɛbhɛ dak ne ijwee ne irywa wo. ɛBiturus sa ne bhɛ sɛ nikusang ne ɛdak kɛ gbom. Nibhɛ ne te ɛBiturus segha gyɔɔ nibhɛ san nibhɛ tɔɔsel ɛbhɛ itsura ne igbaang ne itsura ne ɛDokas sa ne i ta bok ɛbhɛ ɛTabita gha kaa lɔl nibhɛ nɛ ɛli ne ɛ kɛ tɔ ɛken na. 40ɛBiturus sa ne tuul nibhɛ gbik ne izay, ɛ ji cwi ne irwa-nggburuk ɛ boote ne ɛTaanggbey. Ne ɛ ji hyereey ɛlɔ ne ikom ma ne ɛ yɔngɔ, “ɛTabita, yilitsik.” ɛTabita gha ne phaal irwisɛ, ne sɛ ɛ kɛ yaang ɛBiturus segha ne ɛ yilitsik ɛ soos. 41ɛBiturus sa ne wum ɛbhɛ iwɔ te ɛ phyik ɛbhɛ ɛ yilitsik. ɛBiturus sa ne ji yel-le ninaa ne roos sa gbik nɛ nikusang nga ɛ ji nang nibhɛ ɛTabita yegha ɛken nɛ. 42iBol lɛ ne shwalat ne iYopa de gbik. Ninyi na gbom ne nang ne itin nɛ ne ɛDaray ya. 43ɛBiturus sa ne bonɛ nituk gbom ɛ shɛɛ ne iYopa de ne ijwee ɛdɛ ɛnyi gha ne bok ɛbhɛ ɛSimɔn ne ɛ kaa so ɛhaa ne ryɔng ihuhu.
Currently Selected:
ɛTomɛ 9: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
