TOHI GAUE A TE KAU APOSITOLO 6
6
Filifili o te u tiakono e toko fitu
1I te temi aia, i te kua asili te kaugamalie o te kau tisipulo, nee mumuhu leva te kau Helenise ki te kau Hepeleo, koteuhi nee fakanoai anatou finetaka i te tufa i te aho takitahi. 2Nee fakatahii leva e te toko hogofulu ma lua te kaugamalie o te kau tisipulo, o ui: E mole lelei ke matou tuku te folafola a te Atua kae matou tokaga ki te u laupapa. 3Koia, nai tehina, koutou filifili ia koutou ni tagata e toko fitu, ae e tuku ki ai he fakamooni lelei, ae e fonu i te Laumalie Maonioni pea mo te fakapotopoto, pea e matou tuku leva kia natou te kavega aia. 4Pea ko matou, e matou hoko atu anai tamatou tokaga ki te faikole pea mo te gaue ki te folafola.
5Nee lelei ia leva te tonu aia e te fakatahi katoa. Nee natou filifili leva ia Setefano, ko he tagata nee fonu i te tui mo te Laumalie Maonioni, mo Filipo, mo Polokole, mo Nikanole, mo Timone, mo Palemenasi, mo Nikola ko he poloselite* mai Atiokia. 6Nee natou ave leva natou kia mua o te kau apositolo, pea nee natou faikole leva mo hilifaki leva onatou nima kia natou.
7Nee mafola te folafola a te Atua o toe asilisili age, pea nee tupu o toe kaugamalie age te kau tisipulo i Selusalemi, pea nee fakalogo ki te tui he hahai kaugamalie o te kau faisakilifisio.
Gaohi kovii o te Ekelesia: Setefano
8Nee fonu Setefano i te kalasia mo te malohi, pea nee ina fai ni mea fakaofoofo mo ni milakulo lalahi i te hahai. 9Nee tutuu ake ni ihi o te sinakoka ae e ui ko te sinakoka o te kau ateaina, mo ni ihi o te kau Silene, mo ni ihi o te kau Alesatelo, pea mo ni Sutea mai Silisia mo Asia, o feleu mo ia; 10kae nee mole natou mafai tanatou tali ki te poto mo te laumalie nee ha i tana palalau. 11Koia nee natou totogi leva ni tagata ke natou fakaha: Nee matou logo ki tana palalau o laukovi kia Moisese mo te Atua. 12Pea nee natou lagai leva te hahai, mo te kau matua, mo te kau Sekelipa, ke natou feohofi o puke fakamalohii ia o ave ki te fono lahi. 13Nee natou aumai leva ni tagata fakamooni loi ke natou tala: E mole tuku e te tagata aeni tana fai ni palalau o fakafehagai ki te potu tapu mo te lao. 14Koteuhi nee matou logo ki tana ui: Ko Sesu, te Nasaleti aia, e ina maumaui anai te potu tapu aeni, pea e ina fetogi anai te u agaifenua ae nee tuku mai e Moisese kia tatou.
15Ko natou fuli nee nonofo i te fono lahi, nee natou siofia leva kia Setefano, pea nee ha leva tona fofoga kia natou o hage ko he fofoga o he aselo.
Currently Selected:
TOHI GAUE A TE KAU APOSITOLO 6: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
