TOHI GAUE A TE KAU APOSITOLO 4
4
Petelo mo Soane ia mua o te fono lahi
1Kei lolotoga palalau Petelo mo Soane ki te hahai, kae nee feohofi ake te kau tagata faisakilifisio, mo te pule o te fale tapu, pea mo te kau Satuseo, 2i tonatou iita i tana akonaki ki te hahai, o fakaha te toe tuuake a Sesu mai te kau mate. 3Pea nee natou puke leva naua, o fakahu ki te pilisoni o kaku ki te aho ake, he ko te afiafi aia. 4Kae nee tui leva he kaugamalie o natou nee logo ki te folafola, pea nee lau leva te lahi o te u tagata ki te toko nima afe ape.
Palalau a Petelo ki te fono lahi
5I te aho ake nee fakatahi leva ki Selusalemi te u pule o te hahai, mo te kau matua, mo te kau sekelipa, 6mo Anasi, ko te pule faisakilifisio, mo Kaifa, mo Soane, mo Alesatelo, mo natou fuli nee kau i te hakoga o te kau pule faisakilifisio. 7Pea nee natou fakatuu leva Petelo mo Soane i lotomalie o natou, pea nee natou fehui leva kia naua: ko te malohi fea, pea ko te huafa o ai, nee kolua fai ai te mea aia?
8Nee fonu Petelo i te Laumalie Maonioni, pea nee ina ui age leva kia natou: kau pule o te hahai, mo te kau matua o Iselaele, 9kapau kua fakafehui maua i te aho nei o uhiga mo he gaue lelei nee fai ki he tagata mahaki, ke ma fakaha pe nee feafeai tona fakamauli, 10ke kotou iloi fuli, pea ke iloi e te hahai katoa o Iselaele, ko te higoa o Sesu Kilisito mai Nasaleti, ae nee koutou kolusifikoi, pea kua fakatuuake ia e te Atua mai te kau mate, ko te huafa aia kua tuu ai te tagata aeni i he malolo katoa i okotou mua. 11Ko Sesu
ko te maka ae nee liaki e koutou ko te kau tufuga, pea kua liliu ia ko te maka tafito o te agele.
12E mole i ai he haofaki i he tahi age, koteuhi e mole i ai i te lalo lagi he tahi age higoa nee kua foaki ki te u tagata, e tonu ke koutou haofaki ai.
Tapui o te akonaki i te huafa o Sesu
13I tanatou sio ki te matamua a Petelo mo Soane, nee natou punamauli, he nee natou iloi ko he u tagata kaifenua naua nee mole ako; pea nee natou iloi nee na nonofo mo Sesu. 14Kae i tanatou sio ki te tuu a te tagata nee fakamauli i ona tafa, nee mole natou mau leva he tali. 15Pea nee natou fekau leva kia natou ke natou mavae ki fafo mai te fono lahi, pea nee natou fono leva ia natou, o ui: Kotea ka tou fai anai ki te u tagata aeni? 16Koteuhi kua ha ki te hahai katoa o Selusalemi nee na fai he milakulo lahi, pea e mole feala ke tou fakafisi ki ai. 17Kae, ke aua naa toe mafola te mea aeni i te hahai, tou tapui fakamalohi kia naua te toe palalau ki he tahi i te higoa aia. 18Pea nee natou paui leva naua, pea nee natou tapui fakamalohi age leva kia naua te palalau mo te akonaki i te huafa o Sesu. 19Pea nee tali leva e Petelo mo Soane kia natou: Koutou sisio pe e totonu ia mua o te Atua ke ma fakalogo age kia koutou i te Atua; 20koteuhi e mole feala ke aua naa ma palalau ki te mea nee ma sisio mo logo ki ai. 21Nee natou toe fai leva kia naua ni ihi fakamatakutaku foou, pea nee natou tuku age leva naua, koteuhi nee mole natou iloi he fahiga mea ke tautea ai naua, uhi ko te hahai; he kua fakakololia te hahai katoa ki te Atua o uhiga mo te mea nee hoko. 22Koteuhi nee kua tau fagofulu tupu te tagata aia nee fakahoko ki ai te mauli fakamilakulo.
Faikole a te kau kilisitiano
23I tona tuku age, nee na olo leva ki ona kaumea o fakamatala kia natou te u mea fuli ae nee ui age kia naua e te kau pule faisakilifisio mo te kau matua. 24I te osi o tanatou fagono ki tana fakamatala, nee natou hiki ake leva ki te Atua onatou leo, e natou fuli fakatahi, o ui: Aliki, ko koe nee ke fakatupu ia te lagi, mo te kele, mo te tai, mo te u mea fuli e mau i ai, 25ko koe nee ke fakaha i te Laumalie Maonioni, aki te gutu o tamatou tamai, tau tagata faifekau ko Tavite:
Kotea te maveuveu aena i te u puleaga,
Pea mo ni manatu vaiga aena i te hahai?
26 Kua malaga ki oluga te u hau o te kele,
Pea kua fakatahi te u pule o agatuu ki te Aliki mo tona Kilisito.
27Koteuhi e mooni nee fakatahi Helote, mo Posio Pilato i te kolo aeni, mo te atu puleaga, pea mo te u hahai o Iselaele, o fakafehagai ki tau tagata faifekau Maonioni ko Sesu, ae nee ke takai, 28o natou fai te u mea fuli nee fakatuutuu fakatomua e tou nima pea mo tou poto. 29Pea i te lakaga nei, Aliki, sio mai ki anatou fakamatakutaku pea ke tuku ki au tagata faifekau ke natou fakaha tau folafola i te malohi katoa, 30o ke faoi tou nima, ke fai ni fakamauli, mo ni milakulo, pea mo ni mea fakaofoofo i te huafa o tau tagata faifekau maonioni ko Sesu.
31I te osi o tanatou faikole, nee galulu leva te kogamea nee natou fakatahi ai; pea nee natou fonu leva i te Laumalie Maonioni, pea nee natou fakaha leva te folafola a te Atua i te malohi katoa.
Mauli vaevae o te kau kilisitiano
32Ko te kaugamalie o natou nee tui, nee natou mau he loto e tahi mo he laumalie e tahi. Pea nee mole he tahi nee i ai hana mea nee ina ui a ana natou, kae nee fakatahi anatou mea fuli. 33Pea nee fai e te kau apositolo te fakamooni ki te toe tuuake o te Aliki Sesu aki he malohi katoa, pea nee nofo ia natou fuli he kalasia lahi. 34Koteuhi nee mole he tahi nee fakaofaofa ia natou: ko natou fuli nee mau ia ni kele pee ko ni fale, nee natou fakatau natou, pea nee natou aumai te totogi o te u mea nee natou fakatau, 35o tuku kia vae o te kau apositolo; pea nee fai leva ni tufa kia natou takitahi o mulimuli ki te mea e aoga kia ia.
36Ko Sosefo, nee fakahigoa e te kau apositolo ko Palenapa, ko tona uhiga, foha o te fakalotomalohi, tagata Levita*, mai te motu ko Sipele, 37nee ina fakatau leva he gaueaga nee ina mau, pea nee ina aumai leva te paaga, o tuku kia vae o te kau apositolo.
Currently Selected:
TOHI GAUE A TE KAU APOSITOLO 4: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
