TOHI GAUE A TE KAU APOSITOLO 3
3
Fakamauli o he tagata ketu
1Nee hake fakatahi Petelo mo Soane ki te fale tapu, i te hola o te faikole: Ko te hola tolu aia o te hili hoata.
2Pea nee i ai he tagata ketu mai tana tupu, nee aumai i te aho fuli, o tuku i mua o te matapa lahi o te fale tapu, ae nee higoa ko Matalelei, ke kaikolekole paaga i ai kia natou nee ulu ki te fale tapu. 3Ko te tagata aia, i tana sio kia Petelo mo Soane ka na ulu ki te fale tapu, nee kaikolekole paaga leva ia kia naua. 4Pea nee sio fakamamau leva Petelo, feia mo Soane, kia ia, pea nee ina ui age kia ia: Sio mai kia maua. 5Pea nee ina sioi naua, mo amanaki ki he mea maia naua. 6Pea nee ui age leva e Petelo kia ia: E mole au mau he paaga pe ko he aulo; kae ko te mea e au mau, e au foaki atu ia kia koe: I te huafa o Sesu-Kilisito mai Nasaleti, tuu ki oluga pea ke haele. 7Pea nee too leva e Petelo tona nima matau, o fakatuu ake ia ki oluga. I te temi pe aia, nee malohi leva ona vae mo ona tapuga vae; 8pea nee hopo aipe ia ki oluga o tuu, pea nee kamata haele leva ia. Nee ulu leva ia mo naua ki te fale tapu, o haele, mo hopohopo, pea mo fakavikiviki ki te Atua.
9Pea nee sio leva te hahai katoa kia ia, kua haele mo fakavikiviki ki te Atua. 10Pea nee natou iloi ko ia ae nee nofo i te matapa Matalelei o te fale tapu, o kaikolekole paaga i ai, pea nee natou fonu leva i te punamauli mo mataku o tupu ko te mea kua hoko kia ia. 11Kae nee mole kei mavae ia ia Petelo mo Soane, nee feohofi age leva te hahai katoa kia natou, i tonatou punamauli, ki te matapa lahi nee higoa ko te matapa o Salomone.
Palalau a Petelo
12Ko Petelo, i tana sio ki te mea aia, nee palalau leva ki te hahai, o ui: Kau tagata Iselaele, kotea e koutou punamauuli ai ki te mea aeni? Kotea e koutou sio fakamamau mai ai kia maua, o hage nee ma fakahaele te tagata aeni aki homa malohi pee aki hama tauhi lelei ki te Atua? 13Ko te Atua o Apalahamo, mo Isaake, mo Sakopo, ko te Atua o atatou tamai, kua ina fakakololiai tana tagata faifekau, ko Sesu, ae nee koutou fakatau mo fakafisi ki ai ia mua o Pilato, i te lakaga nee ina fakatotonu ai ke fakamauli Sesu. 14Kae ko koutou, nee koutou fakafisi ki te Maonioni mo te Agatonu, pea nee koutou kole ke fakamauli atu kia koutou he tagata fakapo. 15Nee koutou tamatei te Tupuaga o te mauli, ae kua fakatuu ake e te Atua mai te kau mate, pea ko matou ko he kau fakamooni ki ai. 16Pea ko te tui ki tona huafa kua fakamalohii ai e tona huafa ia ia e koutou sisio ki ai mo iloi; ko te tui kia Sesu ae kua foaki ai ki te tagata aeni he malolo katoa, ia mua o koutou fuli.
17Pea i te lakaga nei, u tehina, e au iloi nee koutou fai te mea aia i te fakapouli, tatau pe mo okotou pule. 18Kae i te mea aia nee fakahoko ai e te Atua te mea nee ina fakaha fakatomua i te gutu o ana polofeta fuli, e tonu ke mamahi tona Kilisito.
19Koia, kotou fakahemala mo koutou tafoki, ke fakamolemole ai akotou agahala, 20koteuhi ke aumai ni temi fakamokomoko e te Aliki, pea ke ina fekaui mai ia ia nee ina fakatuutuu kia koutou, Sesu Kilisito, 21ae e tonu ke tali e te lagi o kaku ki te temi o te fakafoou o te u mea fuli, ae nee palalau ki ai te Atua i te gutu o ana polofeta maonioni i te temi mua. 22Nee ui Moisese: ko te Aliki tokotou Atua e ina lagai ake anai i okotou tehina he polofeta kia koutou o hage ko au; e koutou fakalogo anai kia ia ia mea fuli e ina fakaha atu anai kia koutou, 23pea ko ae e mole fakalogo anai ki te polofeta aia e motuhi anai ia mai te lotomalie o tana hahai. 24Ko te kau polofeta fuli, o kamata maia Samuele mo ona fetogi, nee natou palalau pea nee natou fagonogono te u aho aeni. 25Ko koutou ko te u fanau a te kau polofeta pea mo te hai nee fai e te Atua mo atatou tamai, i tana ui kia Apalahamo: E tapuakina anai te u famili fuli o te kele i tou hakoga. 26Nee lagai e te Atua tana tagata faifekau ko Sesu kia koutou pe mua, pea nee ina fekaui mai ia ke ina tapuakii koutou, i takotou tafoki takitahi mai ana agakovi.
Currently Selected:
TOHI GAUE A TE KAU APOSITOLO 3: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
