Gaoi 17

Paulo mo Silasi i Tesalonika

1Ti na fakalaka loa Paulo mo Silasi i Afipolisi mo Apolonia, ti na la kaku loa ki Tesalonika, leia na tuu ai le sinakoka o le kau Sutea. 2Ti na ulu loa Paulo ki ai, ofaipe lana aga masani. I sapato e tolu, na masau a ia mo latou, ki nea o le Tosi tapu, 3o fakamatala mo fakasa kia latou na tonu ke mamae le Kilisito, ti ke toe tuuake a ia mei le kau mate. Ti na pati loa a ia : Ko le Sesu leia e kau fakasa atu kia koutou, ko le Kilisito a ia. 4Ti na tui loa ni iki o latou, o lotou kau kia Paulo mo Silasi, mo se toka api o le kau Keleka ala na i ki le Atua, ti mo ni fafine aliki. 5Kae na apele loa le kau Sutea i le finenonofo. Ti na lotou too loa ni tagata noa ala na lotou tae i ala o le kolo, ke tanaki ia ni kakai, ti mo fakatupu ia ni maveuveu i le kolo. Na lotou ano loa ki le fale o Sasone o afa Paulo mo Silasi ke aumai ki mua o le kakai. 6Ti i lalatou leaise maua laua, na lotou ave loa Sasone mo ni iki fetaina ki mua o le kau pule o le kolo, o kalaga : Kua fakamaveuveu e latou anei le malama nei katoa, ti kua lotou kaku mai foki ki leinei, ti na fakatalitali latou e Sasone. 7E lotou fakafesagai fuli ki lao a Sesale, o pati e i ai se tasi ake a sau, ko Sesu. 8Ti na lotou fakamamae loa ki alotou masau ana le loto o le kakai mo le kau pule, 9ala na fakalauatea ia loa Sasone mo fetaina i le oki o lalatou maua meia latou se paaga lasi.

Tali malie o Paulo i Pelea

10Ti na kakau aifai e fetaina a Paulo mo Silasi i le pouli ke ano ki Pelea. I lala kaku atu fai ki ai, na la ulu loa ki le sinakoka o le kau Sutea. 11Ti na loto malie ake le kau Sutea lena ia latou ala o Tesalonika ; ti na lotou tali loa le folafola i se loto oli, o lotou afa i le Tosi tapu i aso taki tasi, ke iloa le maoki o nea ala e fakasa ake kia latou. 12Ti na tui loa se toka api o latou, mo ni fafine aliki Keleka, ti mo ni tagata toka api. 13Kae i le logo loa a le kau Sutea o Tesalonika kua fakasa foki e Paulo le folafola a le Atua i Pelea, na lotou au loa ki ai, o fakamaveuveui le kakai. 14Ti na kakau loa e fetaina a Paulo ke ano aifai toka tasi ki le fetuu o le tai ; kae na nofo loa Silasi mo Timoteo i Pelea.

15Ko latou ala na fakasa ia le ala kia Paulo na taki ia loa a ia o kaku ki Atena. Ti na lotou toe liliu loa, mo le fakatotonu leinei kia Silasi mo Timoteo ke la pale vave ake kiate ia.

Akonaki a Paulo i Atena

16I le talitali a Paulo kia laua i Atena, na logoi loa e ia se ita i lona loto, i lana tio ki le apele o le kolo lena i taulaatua. 17Ti na masau a ia i le loto sinakoka mo le kau Sutea ti mo tagata ala na i ki le Atua, ti i le lapalasi lasi i aso taki tasi mo latou ala na maua e ia. 18Ti na kamata masau loa a ia mo ni tagata filosofia o le kau Epikulio mo le kau Sitoikoto. Ti na pati a iki : Kolea e fia masau ki ai le tagata gutu masau lena ? Ti ko iki, i le logo ki lana fakasa ia Sesu mo le toe tuuake, na pati loa : E sakinake e fakasa e ia ni taulaatua foou. 19Ti na lotou too loa a ia, o ave ki le Aleopasi, o pati : Pe mafai ke motou iloa le akonaki foou lena e ke masau ki ai ? 20Talie e motou logo ki ni nea faikese. E motou fia iloa le uiga o le nea lena.

21Kae, ko le kau Atena katoa mo le kau matapule leia na nonofo i Atena, na lotou matuaki fakaaoga lolatou temi ki le masau mo le fakalogo o logo ala e aumai saele.

22Ti na tuu loa Paulo i lotomalie o le Aleopasi, o pati : Tagata o Atena, e kau tio e makeke ake lakoutou tausi lotu i nea fuli. 23Talie, i laku taka i lokoutou kolo, ti mo laku tio ki nea fuli ala e kotou tausi ki ai, na kau maua foki se aletale leia e tuu ai le fakamailoga leinei : Ki se atua e leaise iloa ! Ko le nea leia e kotou tausi ki ai kae e leaise kotou iloa, ko ia leinei e kau fakasa atu kia koutou. 24Ko le Atua leia na fakatupu ia le malama nei mo nea fuli i ai, leia ko le Aliki o le lagi mo le kele, e leaise nofo fua a ia i ni fale tapu ala e fau e le lima o le tagata ; 25ti e leaise tausi a ia e ni lima o tagata, o sakinake e aoga kiate ia se nea, a ia leia e soli ia ki tagata fuli le mauli, mo le tukumanava, ti mo nea fuli. 26Ti na fakatupu e ia mei se tagata e tasi a puleaga fuli, ti na fakanofo e ia latou i le malama nei katoa, o fakatuutuu e ia kia latou a temi mo koiga o olatou fenua. 27Ti na fai e ia a nea ana, o tupu ke lotou afa le Aliki, o tautaufa ki ai, na saga e lotou maua loa a ia, kae e leaise mamao a ia meia tatou taki toka tasi, 28talie e tou maua iate ia le mauli, mo le taugaoi, ti mo le agaaga. Na fakasa foki le nea lena e ni iki o okoutou tagata maau : Talie tou kau foki ki lona lanu. 29Ti kapau ko tatou ko le lanu o le Atua, e leaise tonu ke tou manatu e tatau le natula fakaatua mo le aulo, mo le paaga, pe ko le fatu, ala na ta e le poto mo le fakakaukau a le tagata. 30Kae na leaise fakaaoga e le Atua a temi ala na nofo ai a tagata i le fakapouli, kae kua fakasa e ia i le temi nei ki tagata fuli i ganea fuli, e tonu ke lotou fakasemala, 31talie kua fakatuutuu e ia se aso leia e fakamaaui ai loa e ia le malama nei i le faitotonu, i se tagata leia kua filifili e ia, ti kua tuku e ia ki tagata fuli se fakamaoki maoki kiate ia i lana toe fakatuuake a ia mei le kau mate.

32I lalatou logo ki le masau ki le toe tuuake o le kau mate, na gologolo loa a iki, kae na pati loa a iki : Koi motou toe logo loa ki ai i se tasi ake faiaga. 33Ti na mavae loa Paulo meia latou. 34Kae na pipiki loa ni iki kiate ia, o lotou tui loa : Na kau loa i ai Tenisio o le Aleopasi, mo se fafine na igoa ko Tamalisi, ti mo ni iki ake.

Currently Selected:

Gaoi 17: FB2000

Highlight

Copy