Gaoi 14

Paulo mo Palenapa i Ikonia

1I Ikonia na ulu loa Paulo mo Palenapa ki le sinakoka o le kau Sutea, ti na la akonaki loa i ai, ti na tui loa se kakai toka api o le kau Sutea mo le kau Keleka. 2Kae ko le kau Sutea lee tui na fakavelii ia loa le kau pagani ke lotou loto veli ki fetaina. 3Kae na la nofo loa o fualoa i Ikonia, o masau makeke i le Aliki, leia na fakamaoki ki le folafola o lona kalasia, o tuku ke fai e lola lima ni milakulo mo ni nea fakaofolele. 4Na vae lua loa le kakai o le kolo : na kau a iki mo le kau Sutea ti na kau a la ake mo le kau apositolo. 5I le temi leia na teuteu ai le kau pagani mo le kau Sutea, o fakatasi mo olatou pule, ke fakavelivelii mo tuki fatui laua, 6na iloa loa e Paulo mo Palenapa le nea lena, ti na la sosola loa ki kolo o Likaoni, ko Lisite mo Telepe, ti mo ola tafatafa. 7Ti na la fakasa loa i ai le folafola.

Paulo mo Palenapa i Lisitia

8I Lisitia, na nofo ai se tagata leia na maimoa ona vae, ti na sapaea talu mei lona tupu, ti na leikiaise saele fua. 9Na fakalogo a ia ki le masau a Paulo, leia na tio fakamaumau loa kiate ia, o iloa loa e ia kua maua e ia le tui ke mauli ai, 10ti na pati leo lasi loa a ia kiate ia : Tuu fakasako ki aluga i ou vae. Ti na tuu ake loa le tagata ki aluga, o saele.

11I le tio a le kakai ki le nea kua fai e Paulo, na kalaga loa a ia i le pati fakalikaonia : Kua ifo mai a atua i ni tino o ni tagata kia tatou. 12Ti na lotou fakaigoa loa Palenapa ko Supitele, kae na lotou fakaigoa loa Paulo ko Mekulio, talie ko ia leia na tuku ia le folafola. 13Ko le pelepitelo o Supitele, leia na tuu lona fale tapu i le matapa o le kolo, na aumai ia loa ni pipi tagata kua tau kasoa ki le matapa o le kolo, ti na loto loa a ia, mo le kakai, ke momoli se sakilifisio. 14I le iloa e le sa apositolo ko Palenapa mo Paulo le nea lena, na la sae loa ola kofu, kae la oso loa ki lotomalie o le kakai, o kalaga : 15Ei tagata, kolea e kotou fai ai le nea lena ? Ko maua foki, ko ni tagata e natula tatau mo koutou ; ti e ma fakasa atu kia koutou se logo malie, ti e ma kole atu kia koutou ke kotou fakafiti ki nea vaiga ana, kae ke kotou tafoki ki le Atua mauli, leia na fakatupu ia le lagi, mo le kele, mo le tai, ti mo nea fuli i ai. 16Ko le Atua lena, i tautupu kua sili, na tuku ia a puleaga fuli ke muli i olatou ala, 17kae na leaise toe tuku lana fakamaoki kiate ia i ana nea malilie, o soli kia koutou a ua mei le lagi, mo temi mou, ti mo fakapelepelei koutou ki nea kai mo le fiafia. 18Kae na leaise la meimei mafai ia le taofi o le kakai ki masau ana, ke lotou momoli ake kia laua se sakilifisio.

Tuki fatu o Paulo i Lisitia

19Ti na kaku mai loa mei Atiokia mo Ikone ni kau Sutea, ala na fakalotoveli ia loa le kakai ; ti i le oki o lalatou tuki fatui Paulo, na lotou toso loa a ia ki le tua kolo, talie na lotou tuku kua mate a ia. 20Kae na takatakai loa Paulo e le kau tisipulo, ti na tuu ake loa a ia ki aluga, o toe ulu ki le kolo. I leia ake a aso, na ano loa a ia ki Telepe mo Palenapa.

Filifili o fakamatuatua i Ekelesia

21I le oki o lala fakamafola le Evaselio i le kolo lena ti mo fai ni tisipulo toka api, na la toe liliu loa ki Lisite, mo Ikone, ti mo Atiokia, 22o fakamakeke le laumalie o le kau tisipulo, mo akonaki kia latou ke lotou tuu mau i le tui, o pati : e tonu ke tou ulu ki le Puleaga o le Atua i ni mamae lasi ai. 23Na la fakanofo loa kia latou ni kau fakamatuatua i Ekelesia taki tasi, ti i le oki o le faikole mo le sesunio, na la tuku loa latou ki le Aliki leia kua lotou tui ki ai. 24Ti na la toe fakalaka loa i Pisitia, o toe au ki Pafilia. 25I le oki o le fakasa o le folafola i Pelese, na la ifo loa ki Atalia.

Toe liliu ki le Ekelesia o Atiokia

26Mei ai na la eke loa ki se vaka, o toe ano ki Atiokia, le kolo leia na tuku ai laua ki le kalasia o le Atua o uiga mo le gaoi leia kua la fakasoko.

27I lala kaku ki Atiokia, na la fakatasii loa le Ekelesia, ti na la fakamatala loa a nea fuli ala na fai e le Atua ia laua, lana fakamavaa ki le kau pagani le matapa o le tui. 28Ti na la nonofo loa i ai o fualoa mo le kau tisipulo.

Currently Selected:

Gaoi 14: FB2000

Highlight

Copy