Luk 21
21
Kunlanvolɛ raalɛ ne azubɔdeɛ ne
(Mak 12.41-44)
1Gyisɛse dole ɔ nye na ɔnwunle kɛ sukoavolɛma lɛ bɛ ahyɛlɛ ninyɛne ɛlɛgua Ɛzonlenlɛ Sua ne gya ɛlɛka ne anu. 2Eza ɔnwunle kɛ kunlanvolɛ raalɛ ehyianli ko noko lɛ ɛkpɔsɛba nwiɔ ɛlɛgua gya ne anu. 3Gyisɛse zele kɛ, “Meka meahile bɛ, kunlanvolɛ raalɛ ehyianli ne ɛva mɔɔ le kpole la ɛgua gya ne anu ɛdɛla bɛ kɔsɔɔti. 4Ɔluakɛ bɛdabɛ kɔsɔɔti, mɔɔ bɛlɛ la anwo nvasoɛ ne bie a bɛvale bɛraguale nu a, na raalɛ kunlanvolɛ ne, yemɔ, ye kpokpoti ne ala a yeva yeragua nu la.”
Gyisɛse ka Ɛzonlenlɛ Sua ne ɛzɛkyelɛ nwo edwɛkɛ
(Mat 24.1-2; Mak 13.1-2)
5Ɛdoavolɛma ne bie mɔ hanle Ɛzonlenlɛ Sua ne anwo edwɛkɛ, ye kɛnlɛma, awolɛ ngɛnlɛma mɔɔ bɛvale bɛzile nee azubɔdeɛ mɔɔ bɛvale bɛmanle Nyamenle la. Na Gyisɛse zele kɛ, 6“Ɛhye mɔ amuala mɔɔ bɛnwu bɛ la, mekɛ bara mɔɔ bolɛ ko bɔbɔ ɛnrɛla bolɛ zo a; bɛbagologolo bɛ muala bɛagua aze.”
Ngyegyelɛ nee anwongyelelɛ
(Mat 24.3-14; Mak 13.3-13)
7Bɛbizale ye kɛ, “Kilehilevolɛ, kenlenzu a ɛhye mɔ bazi a? Duzu debie a bazi ahile kɛ mekɛ ɛdwu mɔɔ ɛhye mɔ si a?”
8Gyisɛse zele kɛ, “Bɛnlea boɛ; bɛmmamaa bɛbɛlɛbɛla bɛ. Ɔluakɛ menli dɔɔnwo balua me duma nu ara na bɛaraze bɛ kɛ, ‘Mame a mele Kelaese ne a,’ na eza bɛaha kɛ, ‘Mekɛ ne ɛbikye.’ Na bɛmmatoa bɛ. 9Saa bɛte konle nee nzakadolɛ nganeɛ a, bɛmmasulo; ɔwɔ kɛ ninyɛne ɛhye mɔ dumua sisi, na bɛngile kɛ awieleɛ ne ɛbikye.”
10Ɔzɔle zolɛ ɔhanle kɛ, “Maanle maanle baho atia bɛ nwo, yɛɛ arelemgbunli badwazo arelemgbunli nwo zo. 11Azɛlɛ bakpusu, ɛhɔne nee ewule ngakyile bara ɛleka dɔɔnwo, sɛkɛlɛneɛ mgbole nee ninyɛne ɛzulolɛ ngakyile basisi anwomanyunlu. 12Bɛbahyehye bɛ, bɛayɛ bɛ kpɔdekpɔde, bɛbaye bɛ bɛamaa bɛali bɛ edwɛkɛ wɔ bɛ nyianu azua ne mɔ anu na bɛagua bɛ efiade; bɛbava bɛ bɛahɔgyinla arelemgbunli nee maanle mgbanyima nyunlu wɔ me ti kolaa na ɛhye mɔ asisi. 13Mekɛ ne anu yɛɛ ɔwɔ kɛ akee bɛbɔ Edwɛkpa ne nolo a. 14#Luk 12.11-12 Bɛzie bɛ adwenle koonwu, bɛmmadwenle mɔɔ bɛbaha bɛalie bɛ nwo la anwo; 15ɔboalekɛ mebamaa bɛ nrɛlɛbɛ nee edwɛkɛ agbɔkɛ meamaa bɛaha na bɛ kpɔvolɛma biala ɛnrɛhola bɛ nyunlu gyinla yeye bɛ nloa azo. 16Bɛ awovolɛma nee bɛ mediema, bɛ mbusuafoɔ nee bɛ gɔnwo mɔ baye bɛ amaa, yɛɛ bɛbahu bɛ bie mɔ. 17Ɔlua me ti, awie biala bakpɔ bɛ. 18Na bɛ ti enrinli ko bɔbɔ ɛnrɛminli. 19Bɛgyinla kpundii, na bɛkɛnyia ngoane.”
Gyisɛse ka Gyɛlusalɛm ɛzɛkyelɛ nwo edwɛkɛ
(Mat 24.15-21; Mak 13.14-19)
20“Na saa bɛnwu kɛ ɛlɔnema ɛbɔ ɛyia Gyɛlusalɛm a, ɛnee bɛnwu ye kɛ ɔnrɛhyɛ biala na bɛazɛkye ye. 21Saa ɔba ye zɛhae a, bɛdabɛ mɔɔ bɛwɔ Dwudiya la ɛnriandi ɛhɔ awoka ne mɔ azo lɔ; bɛdabɛ mɔɔ bɛwɔ suakpole ne azo la ɔwɔ kɛ fi ɛkɛ, yɛɛ bɛdabɛ mɔɔ bɛhɔ namule nu la mmaba suakpole ne azo. 22#Hoz 9.7 Ɔluakɛ mekɛ ne le ‘Ndeanlɛ Mekɛ’ mɔɔ bamaa mɔɔ Nyamenle Edwɛkɛ ne ka la ayɛ nɔhalɛ a. 23Mekɛ ne anu, mraalɛ mɔɔ ɛva ɛkolɛ nee mɔɔ via mraalɛ la, bɛ gyakɔ! Nyanenwunlɛ ɛzulolɛ kpole kpalɛ bara azɛlɛ ye azo, na Nyamenle ndeanlɛ ne bara menli ɛhye mɔ anwo zo. 24Bie mɔ badɔ dadeɛ nloa, bɛbahye bie mɔ nuokɛ bɛ nee bɛ ahɔ maanɔne; menli mɔɔ ɛnze Nyamenle la barava Gyɛlusalɛm azɛlɛ ye adɛnla zo kɔkpula kɛ bɛ mekɛ kɛdwu la.
Sonla Ra ne ɛralɛ
(Mat 24.29-31; Mak 13.24-27)
25 #
Aye 13.10; Yiz 32.7; Dww 2.31; Yek 6.12-13 “Sɛkɛlɛneɛ ɛzulolɛ basisi sɛnzɛne ne, siane ne nee nwɔlɔra ne mɔ anyunlu. Maanle maanle arɛle babɔ, na bɛ ti akunlu azɛkye nyevile ne ɛzɛkyelɛ nee ye ɛhululɛ nwo. 26Ɛzulolɛ ngome bamaa menli nye zo abulu wɔ mekɛ mɔɔ bɛlɛkendɛ mɔɔ bazi aleɛabo amra anwo zo la, ɔluakɛ bɛbadudu anwumaneamra bɛavi bɛ ndenle ne mɔ azo. 27#Dan 7.13; Yek 1.7 Na akee bɛbanwu medame, Sonla Ra kɛ melua amungu ne anu, melɛ tumi nee anyunlunyia kpole melɛba. 28Mɔɔ ninyɛne ɛhye mɔ kɛbɔ ɔ bo kɛ bɛsisi la, anrɛɛ bɛmaa bɛ nye zo bɛnlea maanle nu, ɔboalekɛ ɛnee bɛ ngoanelielɛ ne ɛbikye.”
Feege baka ne anwo ɛzukoalɛdeɛ
(Mat 24.32-35; Mak 13.28-31)
29Akee Gyisɛse bule bɛ ɛrɛlɛ ɛhye: “Bɛnlea feege baka ne nee mbaka mɔɔ ɛha la kɔsɔɔti. 30Mekɛ mɔɔ bɛkɛbɔ ɔ bo kɛ bɛyeye nya fofolɛ la ɛnee bɛze kɛ wawaa ɛbikye. 31Zɔhane ala yɛɛ mekɛ mɔɔ bɛkɛnwu kɛ ninyɛne ɛhye mɔ ɛlɛsisi la, ɛnee bɛnwu ye kɛ Nyamenle Belemgbunlililɛ ne ɛbikye a.
32“Bɛhakye kɛ ninyɛne ɛhye mɔ basisi kolaa na menli mɔɔ kɛkala de aze la amuala awie wu. 33Anwuma nee aze bapɛ nu aze, na me nloa edwɛkɛ ɛdeɛ ɔnrɛpɛ nu ɛlɛ.”
Ɔhyia kɛ bɛsinza
34“Bɛnlea bɛ nwo boɛ! Bɛmmamaa anyelielɛ dɔɔnwo, nza ɛbolɛ nee ɛbɛla ye anu ɛvɛlɛvɛlɛ di bɛ adwenle somaa, anrɛɛ Ndɛnebualɛ Kenle ne ɛralɛ kɛli bɛ nvunu kɛhye bɛ kɛ ɛhane; 35ɔluakɛ ɔbara awie biala mɔɔ wɔ aleɛabo la anwo zo. 36Zɔhane ati bɛzinza na bɛzɛlɛ dahuu na bɛanyia anwosesebɛ bɛali ninyɛne ɛhye mɔ mɔɔ basisi la anwo zo konim, na bɛahola medame Sonla Ra, me nyunlu gyinla.”
37 #
Luk 19.47
Gyisɛse vale mekɛ ɛhye hilehilele wɔ nyianu sua ne anu, na ye nɔsolɛ nu yeahɔla Ɔlivi Boka ne azo. 38Nwonlomɔ biala menli ne amuala yia ye wɔ nyianu sua ne anu kɛ bɛbadie ye edwɛkɛ.
Currently Selected:
Luk 21: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
