Jɛnɛsis 17

Ketiafoo akɛ Kpãŋmɔ lɛ he okadi

1 # Jɛn 35.11; Ɛks 6.3; Jɛn 48.15 Be ni Abram eye afii nyɔŋmai nɛɛhu kɛ nɛɛhu lɛ, Yehowa jie ehe kpo etsɔ̃ɔ lɛ, ni ekɛɛ lɛ akɛ, “Mi ji Nyɔŋmɔ Ofe lɛ, ba ojeŋ yɛ mihiɛ koni shwamɔ ko akahi ohe. 2Mikɛ mikpãŋmɔ lɛ baaŋmɛ mi kɛ bo teŋ, ni mahã oshwiei afa babaoo diɛŋtsɛ.” 3Kɛkɛ ni Abram ŋɔ ehiɛ ebu shi, ni Nyɔŋmɔ kɛɛ lɛ akɛ, 4“Mi kɛ bo miikpãŋ kpãŋmɔ nɛɛ, ni oootsɔ̃ maji pii atsɛ. 5#Rom 4.11, 17 Atsɛŋ bo Abram dɔŋŋ, shi moŋ aaatsɛ bo Abraham, ejaakɛ mahã ofee maji pii atsɛ. 6Mahã owo shwiei babaoo diɛŋtsɛ, ni mahã majimaji ajɛ omli ni maŋtsɛmɛi aaajɛ omli.

7“Mahã mikpãŋmɔ ni kã mi kɛ bo teŋ lɛ ama shi shiŋŋ, ni eeetsɔ̃ naanɔ kpãŋmɔ ehã oshwiei ni aaaba yɛ osɛɛ lɛ yɛ amɛyinɔi fɛɛ mli; matsɔ̃ Nyɔŋmɔ mahã bo kɛ oshwiei ni aaaba yɛ osɛɛ lɛ. 8#Bɔf 7.5; Jɛn 35.27; Heb 11.9-16 Mikɛ shikpɔŋ ni obato gbɔ yɛ nɔ nɛɛ baahã bo kɛ oshwiei ni aaaba yɛ osɛɛ lɛ. Kanaan shikpɔŋ muu lɛ fɛɛ aaatsɔ̃ oshwiei anɔ kɛya naanɔ, ni matsɔ̃ amɛNyɔŋmɔ.”

9Asaŋ Nyɔŋmɔ kɛɛ Abraham akɛ, “Yɛ nyɛgbɛfaŋ lɛ, bo kɛ oshwiei ni aaaba yɛ osɛɛ lɛ, nyɛyea mikpãŋmɔ lɛ nɔ yɛ amɛyinɔi lɛ fɛɛ mli. 10#Lev 12.3; Bɔf 7.8; Rom 4.11 Bɔ ni nyɛbaato mikpãŋmɔ lɛ ni yɔɔ mi kɛ bo kɛ oshwiei ni aaabaye osɛɛ lɛ teŋ nɛ: nuu fɛɛ nuu ni yɔɔ nyɛteŋ lɛ afo lɛ ketia. 11Afolɔ nyɛ ketia, ni no atsɔ̃ kpãŋmɔ ni yɔɔ mi kɛ nyɛ teŋ lɛ he okadi. 12Binuu fɛɛ binuu ni eyɔɔ nyɛteŋ ni eye gbii kpaanyɔ lɛ, afo lɛ ketia; binuu fɛɛ binuu yɛ nyɛyinɔi fɛɛ mli, mɔ ni afɔ lɛ yɛ owe lɛ jio, akɛ oshika he lɛ yɛ gbɔ ni jɛɛɛ oshwiei lɛ ateŋ jio, afo lɛ ketia. 13Fo afo mɔ ni afɔ lɛ yɛ owe lɛ mli kɛ mɔ ni okɛ oshika he lɛ fɛɛ ketia koni mikpãŋmɔ lɛ ahi nyɛheloo mli akɛ naanɔ kpãŋmɔ. 14Nuu foolɔ ko ni afoko lɛ ketia lɛ akabu lɛ ashi mimɛi lɛ anɔ; eku mikpãŋmɔ lɛ mli.”

15Asaŋ Nyɔŋmɔ kɛɛ Abraham akɛ, “Oŋa Sarai lɛ, kaatsɛ egbɛi akɛ Sarai dɔŋŋ, shi abaatsɛ lɛ Sara. 16Majɔɔ lɛ ni asaŋ mahã okɛ lɛ afɔ binuu. Majɔɔ lɛ, ni eeetsɔ̃ maji anyɛ, ni maji anɔ maŋtsɛmɛi aaajɛ emli.”

17 # Jɛn 18.12; 21.6; Luk 1.18 Kɛkɛ ni Abraham kɛ ehiɛ bu shi ni eŋmɔ, ni ekɛɛ ehe akɛ, “Ani nuu ni eye afii oha lɛ aaanyɛ ekɛ yoo afɔ bi lo? Sara ni eye afii nyɔŋmai nɛɛhu lɛ aaanyɛ afɔ bi lo?” 18Abraham kɛɛ Nyɔŋmɔ akɛ, “Ao, mina ni kulɛ Ishmael yi na wala yɛ ohiɛ.”

19 # Jɛn 26.3 Nyɔŋmɔ kɛɛ akɛ, “Okɛ oŋa Sara lɛ baafɔ binuu, ni obaawo lɛ gbɛi akɛ Isak. Mahã mi kɛ lɛ kpãŋmɔ lɛ ama shi ni etsɔ̃ naanɔ kpãŋmɔ ehã eshwiei ni aaaba yɛ esɛɛ lɛ. 20#Jɛn 16.10; 21.18 Yɛ Ishmael hu gbɛfaŋ lɛ, mibo bo toi. Naa, majɔɔ lɛ; mahã eshwere ni ewo shwiei babaoo diɛŋtsɛ. Eeefɔ lumɛi nyɔŋma kɛ enyɔ, ni mahã efee maŋ kpeteŋkple. 21Shi mikpãŋmɔ lɛ, Isak mɔ ni Sara kɛ bo aaafɔ biɛ afi naakplɔ lɛ, lɛ mikɛaakpãŋ.” 22#Jɛn 35.13 Be ni Nyɔŋmɔ kɛ Abraham ewie egbe naa lɛ, Nyɔŋmɔ shi Abraham ni etee ŋwɛi.

23Kɛkɛ ni Abraham ŋɔ ebi Ishmael kɛ hii fɛɛ ni afɔ yɛ ewe lɛ kɛ hii fɛɛ ni ekɛ eshika he, nuu fɛɛ nuu ni yɔɔ eshĩa mli bii lɛ ateŋ lɛ, ni efolɔ amɛ fɛɛ ketia yɛ nakai gbi lɛ nɔ nɔŋŋ, tamɔ bɔ ni Nyɔŋmɔ kɛ lɛ wie lɛ. 24Abraham eye afii nyɔŋmai nɛɛhu kɛ nɛɛhu be ni afo lɛ ketia lɛ, 25ni ebi Ishmael eye afii nyɔŋma kɛ etɛ̃ be ni afo lɛ ketia lɛ. 26Nakai gbi lɛ nɔ nɔŋŋ afo Abraham kɛ ebi Ishmael fɛɛ ketia. 27Abraham we lɛ bii fɛɛ, mɛi ni afɔ yɛ shĩa kɛ mɛi ni akɛ shika he yɛ gbɔi adɛŋ fɛɛ, afolɔ amɛ ketia afata ehe.

Currently Selected:

Jɛnɛsis 17: NEGAB

Highlight

Copy