Sant Matiéu 20
20
CHAPITRE VINTEN
Parabolo dis oubrié de la vigno. — Noste-Segne predis mai sa passioun e sa resurreicioun. — La demando di fiéu de Zebediéu. — Garisoun di dous avugle de Jericò.
1Retrais lou reiaume paradisen à-n-un paire de famiho que sourtiguè à la primo-aubo en cerco de louga d'oubrié pèr sa vigno.
2Aguènt fa pache emé lis oubrié d'un denié#20.2 Vèire la noto dóu chap. XVIII, 28. pèr sa journado, li mandè à sa vigno.
3E estènt sourti sus li tres ouro#20.3 Encò di Judiéu, la journado coumençavo à sièis ouro dóu matin; aquelo espressioun sus li tres ouro respond en counsequènci à nòu ouro., n'en veguè d'àutri que se tenien sus la plaço sènso rèn faire;
4E ié diguè: Anas-ié, vàutri tambèn, à ma vigno, e ço que sara juste vous lou baiarai.
5Éli i'anèron. Tourna-mai sourtiguè vers li sièis e vers li nòu ouro#20.5 Miejour e tres ouro., e faguè coume avié fa.
6Peraqui sus li vounge ouro#20.6 Cinq ouro de sero., sourtiguè mai; e n'en trouvè d'àutri qu'èron aqui, e ié diguè: Qu'istas eici, tout lou jour, pausadis?
7Éli ié fan: Degun nous a louga. Éu ié diguè: Anas dounc, vàutri tambèn, à ma vigno.
8Lou sero estènt vengu, veici que lou mèstre de la vigno dis à soun baile: Sono lis oubrié e pago-ié soun salàri en coumençant pèr li darrié e finissènt pèr li proumié.
9Adounc s'avancèron aquéli qu'èron vengu sus li vounge ouro, em'acò tirèron un denié cadun.
10Aquéli qu'èron vengu li bèu proumié se cresien de mai tira; e n'aguèron tóuti rèn qu'un denié.
11E, tout en lou prenènt, rouvihavon contro lou paire de famiho,
12E disien: Aquéli, li darrié, an fa qu'uno ouro, e lis avès mes parié 'mé nous-àutri qu'avèn pourta lou pes de la journado e de la calour.
13Mai éu respoundegnè à-n-un: Moun ami, te fau ges de tort; es pas d'un denié qu'ères counvengu 'mé iéu?
14Pren ço qu'es tiéu e filo; vole douna, iéu, à-n-aquéu qu'es di darrié autant coume à tu.
15Ai pas lou dre, iéu, de faire ço que vole? Toun uei es-ti marrit#20.15 Loucucioun judievo pèr marca la jalousié., sufis que iéu siéu bon?
16Ansin li darrié saran li proumié, e li proumié saran li darrié: car n'i'a forço d'apela, mai gaire d'elegi#20.16 Tóuti soun apela; mai tóuti n'auran pas de plaço d'ounour dins lou paradis, alusioun à ço que disié is Aposto que sarien asseta sus douge trone..
17Or, Jèsu, en mountant à Jerusalèn, prenguè li douge disciple à despart, e ié diguè:
18Nous vaqui en routo pèr Jerusalèn, e lou Fiéu de l'ome sara cita davans li prince di prèire emai lis Escribo que lou coundanaran à mort,
19E l'abandounaran i Gentiéu pèr que se trufon d'éu, lou flagellon e lou bouton en crous; mai au jour tresen, éu ressuscitara.
20Alor la maire di fiéu de Zebediéu s'aprouchè d'éu emé si dous drole, e l'adourè pèr ié demanda quaucarèn.
21Éu ié diguè: Dequé vos? Coumandas, elo venguè, qu' aquéli dous drole miéu siegon asseta l'un à vosto drecho, e l'autre à vosto gaucho dins voste reiaume.
22Mai Jèsu respoundeguè: Sabès pas ço que demandas#20.22 Jan e Jaque avien parla pèr la bouco de sa maire; es à-n-éli que Jèsu respond.. Lou poudès béure lou calice que iéu dève béure? Éli ié diguèron: Lou poudèn.
23Éu reprenguè: Verai, béurés moun calice; mai d'èstre asseta à ma drecho o à ma gaucho, depènd pas de iéu de vous l'acourda: sara pèr aquéli en quau moun Paire l'a alesti.
24Li dès, en ausènt acò, aguèron la maliço contro li dous fraire.
25Mai Jèsu li sounè e ié diguè: Sabès que li prince di nacioun an sus éli l'empèri e que li catau ié fan senti soun poudé.
26Sara pa 'nsin entre vautre; mai aquéu que voudra èstre lou mai grand d'entre vautre, fau que siegue voste serviciau;
27E aquéu d'entre vautre que voudra èstre lou proumié sara voste esclau;
28De meme que lou Fiéu de l'ome noun es vengu sus l'estiganço d'èstre servi, mai de servi, e de douna sa vido pèr la rançoun dóu mounde.
29Coume sourtien de Jericò, un gros mouloun de pople lou seguiguè.
30E veici que dous avugle, asseta de-long dóu camin, entendeguèron dire que Jèsu passavo, em' acò se boutèron à crida: Segnour, Fiéu de Dàvi, agués pieta de nautre.
31Or, lou pople li charpavo pèr li faire teisa; mai éli cridavon que mai, disènt: Segnour, Fiéu de Dàvi, agués pieta de nautre.
32Jèsu s'arrestè e, lis aguènt souna, ié diguè: Dequé voulès que vous fague?
33Ié respoundeguèron: Segnour, que se duerbon nòstis uei.
34Aguè pieta d'éli, Jèsu, ié touquè lis uei, e subran ié veguèron, em'acò lou seguiguèron.
Currently Selected:
Sant Matiéu 20: PROV
Highlight
Share
Copy
Want to have your highlights saved across all your devices? Sign up or sign in
Historical text printed in 1903, maintained by the British and Foreign Bible Society.
