Kejadian 40

Yusup kastau arti mimpi

40:1-19

1Brapa waktu begini, raja Mesir pu orang kerja dua ni bikin masala besar deng raja. Satu tu kepala dari tukang minuman,#40:1 kepala dari tukang minuman ‒ Orang yang raja de percaya skali, biasa de tes raja pu anggur kalo ada racun ka trada, baru de kasi raja minum. trus yang satu lagi tu kepala dari tukang masak.#40:1 kepala dari tukang masak ‒ Ini orang yang biasa jaga liat raja pu tukang masak dong pu kerja. 2Raja mara skali sama raja pu orang penting dua ni, kepala dari tukang minuman deng kepala dari tukang masak tu. 3Itu yang, raja de kas masuk dong dua ke dalam penjara. Dong dapa tahan di penjara yang sama deng Yusup, di penjara yang ada di kepala pasukan raja#40:3 pasukan raja ‒ Liat catatan di Kejadian 37:36. pu ruma. 4Kepala pasukan raja ni de kas tugas Yusup untuk jaga liat dong dua ni dalam penjara situ. Jadi begitu suda, dong dua tinggal di penjara ni lama juga.

5Baru satu malam begini, raja Mesir pu orang penting dua yang ada dalam penjara ni, kepala dari tukang minuman deng kepala dari tukang masak tu, dong dua mimpi. Tapi dong pu mimpi tu beda-beda trus de pu arti juga beda. 6Waktu pagi-pagi Yusup pigi liat dong dua begini, dong kliatan macam ada rasa susa skali. 7Jadi Yusup de tanya raja pu orang penting dua tu, “Sodara, knapa hari ini kam kliatan macam susa skali?”

8Baru dong dua jawab, “Tadi malam tong ada mimpi, tapi trada orang yang bisa kas arti tong dua pu mimpi.”

Yusup bilang sama dong dua, “Sodara, cuma Allah saja yang bisa bikin orang tau arti mimpi. Coba, kam crita kam pu mimpi itu dulu, sa dengar.”

9Itu baru kepala dari tukang minuman, de crita de pu mimpi ke Yusup, de bilang begini,

“Di sa pu mimpi tu, sa liat ada tanaman anggur pas depan saya. 10Tanaman tu de pu ranting ada tiga. Pas daun baru mo tumbu di de pu ranting-ranting, begini de pu bunga-bunga su mulai kluar. Langsung begini bua-bua anggur juga su kluar, tapi begini de pu bua anggur su masak-masak. 11Baru di sa pu tangan, sa ada pegang raja pu cangkir. Jadi, sa ambil anggur tu trus sa ramas kas kluar de pu air anggur ke raja pu cangkir itu, baru sa kasi cangkir itu ke raja.”

12Habis dengar mimpi tu, Yusup bilang sama dia,

“Sodara pu mimpi de pu arti begini: Ranting tiga tu, de pu arti tiga hari. 13Tiga hari lagi raja nanti kas naik sodara ke atas. Trus de bikin ko nanti kembali kerja lagi sama raja dia sperti dulu, jadi kepala dari tukang minuman lagi. 14Tapi kalo sodara pu keadaan su baik, jang lupa sa ka. Sodara bisa kas tunjuk sodara pu baik ke saya, deng kastau sa pu masala ini sama raja. Supaya raja bisa kas kluar sa dari penjara sini ka. 15Habis dulu orang paksa bawa sa kesini dari orang Ibrani pu tempat sana. Trus, disini juga, sa tra bikin sala apapa tapi dong kas masuk sa ke penjara.”

16Waktu kepala dari tukang masak de dengar kalo mimpi tu de pu arti bagus, de lagi bilang Yusup,

“Sa juga ada mimpi. Di sa pu mimpi tu sa ada bawa kranjang tiga di sa pu kepala, kranjang itu yang biasa pake untuk isi kue. 17Dalam kranjang yang paling atas tu, ada kue macam-macam yang tukang masak dong bikin untuk nanti sa kasi raja. Tapi burung-burung dong datang trus makan kue-kue itu.”

18Habis de crita, Yusup bilang,

“Sodara pu mimpi de pu arti begini: Kranjang tiga tu, de pu arti tiga hari. 19Jadi, dalam tiga hari ni, raja de nanti kas naik sodara ke atas. De kas naik sodara di atas tiang satu, trus sodara pu badan dapa gantung disitu. Nanti burung-burung makan sodara pu daging-daging di badan.#40:19 burung-burung makan sodara pu daging-daging di badan ‒ Di orang Mesir dong pu adat tu, dapa makan dari burung tu brarti dapa kutuk.”

Mimpi yang Yusup kas arti tu jadi

40:20-23

20Su tiga hari begini, pas raja pu ulang taun, raja de bikin acara deng de pu orang-orang penting smua. Raja panggil kepala dari tukang minuman deng kepala dari tukang masak dari penjara, trus bawa dong dua ke depan orang-orang itu. 21Habis itu, raja panggil kepala dari tukang minuman kembali kerja lagi sama raja. De kembali bawa minuman untuk raja lagi. 22Tapi kepala dari tukang masak ni, raja suru orang gantung de di tiang satu macam yang Yusup su bilang sama dong dua. 23Tapi kepala dari tukang minuman tu, de su tra ingat Yusup sama skali.

Currently Selected:

Kejadian 40: MPapua

Highlight

Copy