Apocalípsis 9

Pitsqa kaq ángel cornëtata töcamunqan

1Tsaypitanam pitsqa kaq ángel cornëtata töcamuptin kay patsaman qoyllur shikwamuqta rikarqä. Tsay qoyllurmi chaskirqan supaykuna qaykuräyanqan alläpa ruri tutapaq patsapa shiminpa llävinta. 2Patsapa shiminta kichaskiptinmi jatun jornupita qoshni yarqamuqnöraq qoshni yarqamurqan.#Gén. 19.28. Tsay qoshni rupayta tsapaskiptinmi patsa tutapaskirqan.

3Tsay qoshnipitanam kay patsaman juntat chukllushkuna yarqayämurqan.#Éxo. 10.12-15. Tsay chukllushkunam atuq kurunö alläpa venënuyuq kayarqan. 4Paykunatam mandarqan qewata ni jachatapis mana ushakätsiyänanpaq. Tsaymi Dios Yayapa sëllunwan urkunchö mana señalashqa runakunallata sufritsiyänanpaq nirqan.#Eze. 9.4. 5Tsaynöllam runakunata sufritsirpis mana wañutsinanpaq mandarqan. Wañutsinqanpa rantinmi pitsqa killa nanaywan sufritsinanllapaq mandarqan. Tsay nanayqa atuq kuru kaninqannöran nanarqan. 6Tsay witsay runakuna alläpa ñakarnin wañuyta munarpis manam imanöpa wañuyanqatsu. Wañuyta munarpis manam tariyanqatsu.#Job 3.21; Jer. 8.3.

7Tsay chukllushkunam guërraman aywayänanpaq alistashqa bestiakunanö kayarqan.#Joel 2.4. Umankunapis qori corönan shukushqanömi kayarqan. Qaqllankunapis runapa qaqllannömi kayarqan. 8Aqtsankunanam imayka warmipa aqtsannö y kirunkunanam imayka leonpa kirunnö karqan.#Joel 1.6. 9Cuerpunkunam fiërru chalëcushqanömi karqan. Päriyaptin riprankuna sapsapyanqanmi wiyakarqan carrëtan qarachashqa bestiakuna guërraman aywaqnöraq.#Joel 2.5. 10Chupannam atuq kurupa chupannö awja punta karqan. Chupanwan kaniptinmi runakuna pitsqa killa qeshyar ñakayarqan. 11Tsay chukllushkunapa mandaqninmi karqan alläpa ruri tutapaq raqrachö ángel. Tsay angelpa shutinmi hebreo idiömachö karqan Abadón y griego idiömachöna Apolión.#9.11 Abadón y Apolión shutikunaqa ushakätsikuq ninanmi.

12Tsay punta kaq ñakay päsaskiptinmi ishkay ñakaykunaraq chämunanpaq kaykan.

Soqta kaq ángel cornëtata töcamunqan

13Soqta kaq ángel cornëtata töcamuptinmi wiyarqä Dios Yayapa puntanchö kaykaq qori altarpa chuskun waqran#Éxo. 30.1-3. chawpinpita parlamuqta. 14Tsaychömi cornëtata töcamuq angelta nirqan: <<Éufrates mayu kuchunchö wataraykaq chusku angelkunata paskamuy>>.

15Paskaskamuptinmi tsay chusku angelkuna mayu kuchunpita aywayarqan kay patsachö cäsi pullan runakunata wañutsiyänanpaq. Tsay angelkunam alli alistakushqa kayarqan tsay höra, tsay junaq, tsay killa, tsay wata runakunata wañutsiq yarquyänanpaq. 16<<¡Tsay angelkunawanmi ishkay pachak millón (200,000,000) soldädukuna bestiankuna montashqa aywaykäyan!>> nimuqtam wiyarqä.

17Soldädukunapa chalëcunmi karqan ninanö puka, zafirunö azul y azufrinö qarwa. Bestiankunapa umankunam leonpa umannö karqan. Shiminpitam ninapis, qoshnipis y azufripis yarqamurqan. Tsaynömi soldädukunatawan bestiankunata revelacionchö rikarqä. 18Shiminpita yarqamuq azufri, nina y qoshnim kay patsachö cäsi pullan runakunata wañutsirqan. 19Manam shiminpita yarqamuqllawantsu runakunata bestiakuna wañutsiyarqan, sinöqa culebranö umayuq chupankunawan kanirmi wañutsiyarqan.

20Peru tsaynö kaykaptinpis mana wañuq runakunam jutsankunapita arrepentikuyarqantsu. Masbienmi supaykunata y ïdulukunata imaypis adorayarqan. Tsay ïdulukunam qoripita, qellaypita broncipita, rumipita y qerupita rurashqa kar rikayta, wiyayta ni puriytapis puëdiyantsu.#Sal. 115.4-7; 135.15-17; Dan. 5.23. 21Tsaynöllam wañutsikuq kayta, brüju kayta, fornicación jutsata y suwakuytapis dëjayarqantsu.#Éxo. 8.15, 19.

Currently Selected:

Apocalípsis 9: qxn

Highlight

Copy