Génesis 23

Sarata pampananpaq chakrata Abraham rantinqan

1Pachak ishkay chunka qanchis (127) watayuq kanqanyaqmi Sara kawarqan. 2Quiriat-arbachö kaykarmi Sara wañukurqan. Quiriat-arbapa jukaq shutinmi karqan Hebrón. Tsay kaykan Canaánchömi. Sara wañuskiptinmi Abraham alläpa waqar lüturqan. 3Warmin sutaraykaptinmi Abraham aywarqan heteo runakunawan parlaq. Chaykurmi nirqan: 4<<Musyayanqaykinö juklä runa#Heb. 11.9, 13. kaykaptïpis sepultürata rantikaykayällämay warmïta pampanäpaq>>.#Hech. 7.16.

5Abraham tsaynö niptinmi heteo runakuna niyarqan: 6<<Taytay, noqakunachömi qamqa Dios Yaya akranqan runa kanki. Warmikitaqa mas alli kaq sepultüraman pampaykuy. Manam mayqäpis michäyäshaykitsu mayqan sepultüraman pampaptikipis>>.

7Tsaynö niyaptinmi heteo runakunapa puntanman Abraham qonqurikuykur 8nirqan: <<Warmïta pampanäpaq rasunpa äniyämarqa Zoharpa tsurin Efrónta rugaykayäpamay 9Macpela chakran kuchunchö machayta rantikaykamänanpaq. Aykata mañamaptinpis pägashaqmi. Tsaynö rantiptïraqmi kikïpaqpis sepultürä kanqa>>.

10Marka majinkuna y tsaypa päsaqkunapis wiyayänanpaqmi markaman yaykunachö Abrahamta Efrón nirqan: 11<<Taytay, rantikunqaqpa rantin voluntänïpita tsay machayta chakrantinta sepultüraykipaq qaraykushayki. Marka majïkunapa puntanchömi qaraykuq. Tsay machayman warmikita pampaykuy>>.

12Tsaynö niptinnam runakunapa puntanchö Abraham yapay qonqurikuykurqan. 13Tsaypitanam llapanpis wiyayänanpaq Efrónta nirqan: <<Taytay, rugakunqaqta wiyaykallämay. Tsay machaypa chaninta chaskimaptikiraqmi warmïta tsayman pampashaq>>.

14Tsaynam Abrahamta Efrón nirqan: 15<<Taytay, wiyaykallämay. Tsay chakraqa chusku pachak (400) siclo qellaypa chaninmi.#23.15 Juk siclo qellayqa juk killa arur gänanqannömi karqan. Tsaynö kaykaptinpis ¿imapaqnatan parlashun? Tsayman warmikita pampaykuy>>.

16Tsaymi Abraham chakrapa chaninta mañanqannölla heteo runakunapa puntanchö qellayta pësapurnin chusku pachak sicluta Efrónta pägarqan. 17Tsaynöpam Efrónpa chakran y tsaychö kaykaq machaypis y jachakunapis Abrahampana karqan. Tsay chakram Mamripa chakranman rupay yarqamuna kaqlächö kaykan. 18Abraham rantinqantam tsaychö kaykaq heteo runakuna y marka yaykunanpa päsaqkunapis rikäyarqan.

19Tsaynö rantiskirnam warmin Sarata Macpelachö machayman Abraham pamparqan. Tsay chakram kaykan Mamripa chakranman rupay yarqamuna kaqlächö. Tsay partipa jukaq shutinmi Hebrón. Tsayqa kaykan Canaánchömi. 20Tsaynöpam chakrawan machaypis Abrahampana karqan. Tsay chakratam heteo runakuna rantikuyarqan Abraham y ayllunkunapis tsayman pampakäyänanpaq.

Currently Selected:

Génesis 23: qxn

Highlight

Copy