Génesis 11
11
Babelchö törrita rurayanqan
1Tsay witsaymi llapan runakuna juk idiömallata parlayarqan. 2Rupay yarqamunan kaqläpita aywakurmi Sinar#11.2 Sinarqa Babiloniam karqan. ninqanchö jatunkaray pampata tariyarqan. Tsaychömi paykuna llapan täkuyarqan.
3Tsaychö täkuykarmi willanakur niyarqan: <<Maytsika ladrilluta ruraykur jornuchö kuwashun>>.
Tsaynö willanakuskirmi ladrilluta rurayarqan rumipa rantin ladrilluwan perqayänanpaq. Tsay ladrillukunatam breawan perqayarqan. 4Tsaypitam yapay willanakur niyarqan: <<Tsay ladrillukunawan jatun markata rurashun. Tsaynölla ciëluman tinkut törrita shäritsishun. Tsaymi pïmaypis respitamäshun. Tsaynöpam maytsaypa witsikanqantsikpa rantin kayllachöna llapantsikpis paqta täkushun>>.
5Tsaynam Dios Yaya ciëlupita urämurqan markata y törrita shäriykätsiyanqanta rikänanpaq. 6Tsayta rikaykurmi Dios Yaya yarpachakur nirqan: <<Paykunaqa tsay idiömallata parlarmi shumaq willanakur tsaynö ruraykäyan. Tsay markata y törrita shäritsiyta ushaskirqa imaykatapis mastach rurayanqa. 7Tsaynö kaykaptinqa paykunaman aywar pantatsishun juk idiömallata manana parlayänanpaq. Tsaynöpam tukuyläya idiömatana parlar manana tantiyanakuyanqanatsu imata parlayanqantapis>>.
8Tsaynö nirmi Dios Yaya llapan runakunata maytsayman witsikätsirqan. Tsaynöpam shäriykätsiyanqan markata ushayarqannatsu. 9Tsay markachömi Dios Yaya pïmay runakunata pantatsir idiömanta jukläyaman tikratsirqan. Tsaynö pantatsinqanpitam tsay markapa shutin Babel#11.9 Babel ninanqa pantatsin ninanmi. karqan. Mana tantiyanakurnam maytsaypa witsikar aywakuyarqan.
Sempa tsurinkunapita miraqkuna
1 Crónicas 1.24-27
10Kaychömi qellqashqa kaykan Sempa tsurinkunapaq y paykunapita miraqkunapaqpis.
Diluviu kanqanpita ishkay watatam Sempa tsurin Arfaxad yurirqan. Tsay witsaymi Sem kaykarqan pachak (100) watayuqna. 11Tsurin Arfaxad yurinqanpita pitsqa pachak (500) wata masraqmi Sem kawarqan. Sempa tsurinkuna warmipis ollqupis kayarqanraqmi.
12Arfaxad kimsa chunka pitsqa (35) watayuq kaykaptinmi tsurin Sala yurirqan. 13Tsurin Sala yurinqanpita Arfaxad kawarqan chusku pachak kimsa (403) wata masraqmi. Arfaxadpa tsurinkuna warmipis ollqupis kayarqanraqmi.
14Sala kimsa chunka (30) watayuq kaykaptinmi tsurin Heber yurirqan. 15Tsurin Heber yurinqanpita Sala chusku pachak kimsa (403) wata masraqmi kawarqan. Salapa tsurinkunaqa warmipis ollqupis kayarqanmi.
16Heber kimsa chunka chusku (34) watayuq kaykaptinmi tsurin Peleg yurirqan. 17Tsurin Peleg yurinqanpita Heber chusku pachak kimsa chunka (430) wata masraqmi kawarqan. Heberpa tsurinkunaqa warmipis ollqupis kayarqanraqmi.
18Peleg kimsa chunka (30) watayuq kaykaptinnam tsurin Reu yurirqan. 19Tsurin Reu yurinqanpita Peleg ishkay pachak isqun (209) wata masmi kawarqan. Pelegpa tsurinkunaqa warmipis ollqupis kayarqanraqmi.
20Reu kimsa chunka ishkay (32) watayuq kaykaptinmi tsurin Serug yurirqan. 21Tsurin Serug yurinqanpita Reu ishkay pachak qanchis (207) wata masmi kawarqan. Reupa tsurinkunaqa warmipis ollqupis kayarqanraqmi.
22Serug kimsa chunka (30) watayuq kaykaptinmi tsurin Nacor yurirqan. 23Tsurin Nacor yurinqanpita Serug ishkay pachak (200) wata masmi kawarqan. Serugpa tsurinkunaqa warmipis ollqupis kayarqanraqmi.
24Nacor ishkay chunka isqun (29) watayuq kaykaptinmi tsurin Taré#11.24 Wakin traduccionkunachöqa Térah niyanmi. yurirqan. 25Tsurin Taré yurinqanpita Nacor pachak chunka isqun (119) wata masmi kawarqan. Nacorpa tsurinkunaqa warmipis ollqupis kayarqanraqmi.
26Taré qanchis chunka (70) watayuq kaykaptinnam kimsa tsurinkuna karqan. Paykunapa shutinkunam karqan Abram, Nacor y Harán.
Tarépita miraqkuna
27Kaychömi qellqashqa kaykan Tarépa tsurinkunapaq y paykunapita miraqkunapaqpis.
Tarépa tsurinkunam kayarqan Abram, Nacor y Harán. Haránpa tsurinnam karqan Lot. 28Ur markanchö täkuykäyaptinllaraqmi taytanpitapis mas puntata Harán wañukurqan. Tsay markachömi caldeo runakuna täkuyarqan.
29Abrampa warminmi karqan Sarai. Nacorpa warminnam Haránpa tsurin Milca. Milcapa ñañanmi karqan Isca. 30Sarai qolluq kaptinmi wamran karqantsu.
31Ur markachö täkuykarmi Canaánchöna täkunanpaq Taré aywakurqan. Ur markaqa caldeo runakuna täkuyanqan markam karqan. Canaánman aywakurmi tsurin Abramtawan willkan Lotta y llumtsuynin Saraita pusharqan. Tsaynö aywakuykarmi Harán markaman chaykur tsayllachöna täkuyarqan. 32Harán markachömi Taré wañukurqan ishkay pachak pitsqa (205) watayuq kaykar.
Currently Selected:
Génesis 11: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
