2 Timoteo 3

Runakuna imanö kawakuyänanpaq ninqan

1Timoteo, shumaq tantiyakuy ultimu tiempuchö runakuna alläpa ñakayänanpaq kanqanta. 2Runakunam kayanqa kikillanpaq imatapis munaq, qellayllapaq ayrajashqa, allish tukuq, Dios Yayapa contran parlaq, mamanta y taytanta mana cäsuq, mana agradëcikuq y Dios Yayapa palabranta manakaqman churaq. 3Manam kuyakuynin ni llakipäkuyninpis kanqatsu. Tsaynöllam kayanqa tumpakuq, mana tantiyakur imatapis llutalla ruraq, runa majinta chikiq y alli ruraqkunapa contran shäriq. 4Tsaynöllam kayanqa traicionëru, mana yarpachakur imatapis ruraq y alläpa yachayyuq tukuq. Dios Yaya munanqanta rurayanqanpa rantinmi shonqunkunapa munayllanta rurayanqa. 5Runakuna rikäyänallanpaqmi Dios Yayaman creyiq tukuyanqa. Peru tsaynö karpis jutsata rurarmi kawayanqa. Tsaynö kawaq runakunapita witikuy.

6Tsay runakunaqa imaykaläya jutsa ruraq warmikunapa wajinkunamanmi engañayänanpaq yaykuyan. 7Tsay warmikunaqa jukta jukta yachakuykarpis Jesucristupa willakuyninta manam ni imaypis yachakuyantsu.

8Janeswan Jambres Moiséspa contran shäriyanqannömi#Éxo. 7.11. llutan yachatsikuqkunapis Jesucristupa willakuyninta willakuqkunapa contran shäriyan. Llutan yarpaykuna umankunachö kaptinmi Jesucristupa willakuyninta imaypis tantiyayantsu. 9Peru tsaynö yachatsikuyaptinpis llutan yachatsikuq kayanqantam tantiyayanqa. Tsaymi Janestawan Jambresta mana cäsuyanqannö tsay llutan yachatsikuqkunatapis cäsuyanqatsu.

Pablo kawakunqannö Timoteupis kawanqanta ninqan

10Peru qamqa yachatsinqäkunata shumaqmi yachakushkanki. Kawanqänömi kawaykanki, yarpanqänömi yarpanki, creyinqänömi creyinki, imaykata sufrirpis awantanqänömi awantanki, kuyakuq kanqänömi kuyakuq kanki, sufritsiyämaptinpis pacienciakunqänömi pacienciakunki. 11Musyankim Antioquíachö,#Hech. 13.14-52. Iconiuchö#Hech. 14.1-7. y Listrachö#Hech. 14.8-20. runakuna chikiyämar qatikachäyämanqanta. Peru tsaynö chikiyämaptinpis Señor Jesucristo salvamashqa. 12Tsaynöllam Jesucristo munanqannö kawaq kaqtaqa pitapis chikir sufritsiyanqa.

13Peru mana alli runakunawan engañakuqkunaqa mas peormi oqrakashqa kayanqa. Wakin kaqta engañayanqannömi kikinkunatapis engañayanqa.

Dios Yayapa palabranta yachakunapaq ninqan

14Peru qamqa Dios Yayapa willakuynin alli kanqanta tantiyar yachakunqaykinölla shumaq kawakuy. Musyankim pï yachatsishuqnikikuna kayanqantapis. 15Tsaynöllam musyanki wamra kanqaykipita Dios Yayapa palabranta yachatsiyäshunqaykita. Diospa palabranmi tantiyatsishushkanki Jesucristuman creyikur salvakänaykipaq kanqanta.

16Dios Yayapa palabranchö llapan qellqashqa kaykaqkunaqa Dios Yayapa yarpayninmi. Tsaymi alli kaykan yachatsinapaq, tantiyatsinapaq, corriginapaq y Dios Yaya munanqannö kawanapaq. 17Dios Yayapa palabranta yachakurmi Dios Yayaman creyikuqkuna imaypis alistakushqa kaykäyanqa alli kaqkunata rurayänanpaq.

Currently Selected:

2 Timoteo 3: qxn

Highlight

Copy