Matayo 24

Yesu Owaco Kop me Reto Tempulo

(Marako 13.1-2; Luka 21.5-6)

1Kakame Yesu oyai kede ki tempulo di do oudo etie ot, josiao mege oko bino pi nyuto ne gedo me tempulo. 2Do en eko dwoko ne gi be, “Mam inenunu gigi dedede? Ateteni awaco ne wu be, likame tie engaro moro kame bino dong cungo i wi kidi ocelu; kobino rereto gin dedede piny.”

Peko kede Itidil

(Marako 13.3-13; Luka 21.7-19)

3Kakame Yesu oudo tie bedo kede i wi moru me Olibeti, josiao oko lwidar ot bute, di kiko penye be, “Wac ne wa, awene en kame gini bino timere kede, doko da gianena nyo kame bino nyuto dwogo nin, kede ajikini me piny?”

4Yesu oko dwoko ne gi be, “Gwokerenu me wek kur ngatamoro rweny wu. 5Pien jo atot oyaro bino i nyinga di kiwaco be, ‘Ango en Kirisito,’ di gin kiko bino rwenyo jo atot. 6Doko ibinunu winyo kop me yi kede rwonge me yi, do nenunu be likame imiunu cunyu opoto; pien manono miero timere di ajikini pwodi likame otuno. 7Atekerin bino yi, ajakanut acel bino yi kede ajakanut ocelu, doko kec kede yangere me piny bino bedo tie kabedere atot. 8Magi dedede tie bala agege me aramo me nywal.

9 # Matayo 10.22 “Gin kiko bino mino wu i cing jo kame bino tidilo wu, kiko bino neko wu da. Piny lung bino dagi wu pira. 10Jo atot bino poto ki yei gi, doko kiko donyo timo erupe di kidagere ken gi ken gi. 11Doko inabin me angalo bino neeno, di kiko rwenyo jo atot. 12Pi kite kame tim areco udo onyai kede, amara me jo atot bino dok piny. 13#Matayo 10.22Do ngat kame bino kanyakino tuno i ajikini bino udo alako. 14Koyaro bino tuco ejiri noni me Ajakanut ka Rubanga i piny lung, bala gi me ijura ne atekerin dedede; di do ajikini me piny ko bino tuno.

Gikame Kelo Lworo Adwong

(Marako 13.14-23; Luka 21.20-24)

15 # Danieri 9.27; 11.31; 12.11 “Aso, kame inenunu gikame munao kabedo kacil ka Rubanga, kame bin enabi Danieri owaco kop i kome, di etie cungo i kabedo kacil (ngat kame tie somo poore niang dwong mere) 16jo kame tie Yudea miero do ringi i wi mori; 17#Luka 17.31kede ngat kame tie i wi ot miero kur bobo wok piny pi kwanyo gikame tie i yi ot. 18Doko dano kame tie i poto miero kur dok i paco pi omo egoe. 19Can tin bino bedo dwong benyo ne mon oyac kede kame doto idwe i ceng nogo! 20Kwaunu Rubanga me wek kur ringo timere ne wu i kare me ngico arabo i Ceng Sabato. 21#Danieri 12.1; Gianyuta 7.14I kare no can adwong bino bedo tie, kame epone mere likame pwodi lem otimere geno piny cakere tuno tin, doko da likame ebino medo timere. 22Doko koto Rubanga likame odwoko wel me ceng nogo odoko nonok, koto likame ngatamoro obwot; do pi jo mege kame en eyero, Rubanga bino dwodwoko ceng nogo doko nonok.

23“Pi mano, ka ngatamoro owaco ne wu be, ‘Neni, Kirisito ine!’ Arabo be, ‘En ica!’ Kur iyeunu kop mere. 24Pien jo kame cuko be gin Kirisito, kede inabin me angalo oyaro bino di kiko timo gianena kede gi me isuur, tetekeny ka twerere, kirweny kiton jo kame Rubanga oyero da. 25Winyunu, ango atieko waco ne wu gigi di kare pwodi likame otuno.

26 # Luka 17.23-24 “Aso, ka ngatamoro owaco ne wu be, ‘Nenunu, en etie i wi tim,’ kur iotunu kuno. Arabo be, ‘Nenunu, en etie i agola,’ kur iyeunu kop mere. 27Pien bino me Wot ka dano bino bedo cal bala kot kame meny cako ki tetu kide tuno tetu potoceng. 28#Luka 17.37Kakame gi oto tie iye, kunono en kame acut da cokere iye.

Dwogo ka Wot ka Dano

(Marako 13.24-27; Luka 21.25-28)

29 # Isaya 13.10; 34.4; Esekeri 32.7; Yoweri 2.10, 31; 3.15; Gianyuta 6.12-13 “Cucuto di can me ceng nogo otieko timere, wang ceng bino doko col, duwe likame doko bino rieny, acerin da bino popoto ki malo, kede twer kame tie i malo bino yayangun. 30#Danieri 7.13; Sakaria 12.10-14; Gianyuta 1.7Di gikame nyuto bino me Wot ka dano ko bino neeno i malo; atekerin dedede me wi lobo ko bino bedo kede iturur, di do kiko neno Wot ka dano di tie bino kede idoun me malo kede twer kede twon deyo. 31Di en eko bino cwano imalaikan mege kede koko atek me agwara, di gin kiko coko jo mege kame eyero ki tetu bad ongwon dedede, cako ki agege me piny tuno i ajikini mere.

Pwony kame Yai ki kom Yat Epigi

(Marako 13.28-31; Luka 21.29-33)

32“Siaonu pwony kame yai ki kom yat epigi. Cucuto kame ajange mege odoko yoyom di pote gi oko cako lot, wun ingeunu be kare me iporo do oyapuno. 33Iepone nono da kame inenunu gigi dedede tie timere, ngeunu be en etieko doko iyapiyapi, kom etuno i erute. 34Ateteni ango awaco ne wu be, gigi dedede bino timere di pwodi jo kame nan tie di kuo likame oto. 35Malo kede lobo bino rwenyo, do kope nango likame bino rwenyo.

Likame tie Ngat kame Ngeo Ceng amoto Esawa nono

(Marako 13.32-37; Luka 17.26-30, 34-36)

36“Do likame tie ngat kame ngeo awene kame ceng amotoko esawa nono bino tuno kede. Akadi imalaikan me i malo da likame ngeo, akadi Wot ka Rubanga da likame ngeo, do Papa kenekene en kame ngeo. 37#Ageini 6.5-8Bino me Wot ka dano bino bedo bala gikame bin otimere i kare ka Nua. 38Pien i kare nono, di pwodi alele likame oumo piny, jo oudo tie cam kede amata di kinyomere, doko di kimio anyira gi me anyoma, paka tuno i ceng kame Nua odonyo kede i yi yee; 39#Ageini 7.6-24doko oudo gin likame kingeo gikame tie timere tuno kede alele oko bino di oko neko gi. Bino me Wot ka dano da bino bedo kamanono. 40Cenge no, ka jo are tie pur i poto, kobino kwanyo dano acel oko tero di oweko ngat ocelu. 41Kobino tero dako acel ki kom mon are kame tie riego karacel di oweko ngat acel dong.

42“Pi mano, gwokerenu, pien likame ingeunu ceng kame Rwot wu oyaro bino kede. 43#Luka 12.39-40Do ngeunu kiber be, koto di oudo won ot ngeo esawa me iwor kame ngakuwo tie bino iye, oudo koto egwokere di likame eko weko koturo ode. 44Pi mano, wuda bedunu di itiekunu iikere, pien Wot ka dano bino ngoole dwogo iesawa kame wun likame ingeunu.

Ngatic kame Genere amoto kalikame Genere

(Luka 12.41-48)

45“Ngai do en ngatic kame genere di eriek, kame ngadwong mere kete daro ode kede jame dedede kame tie iye, pi mino jotic icegun cam iesawa kopoore? 46Etie kede winyo ngatic nono ka ngadwong mere bino dwogo ko ude di etie timo kamanono. 47Ateteni awaco ne wu be, en ebino keto ngatic nono pi lono jame mege dedede. 48Do ka en ebedo ngatic arac, en ebino waco kene be, ‘Ngadwong na ogal,’ 49di do en eko gire cako bungo jotic wad gi, di eko donyo cam di emato karacel kede joamera. 50Ngadwong me ngatic nono bino ngoole dwogo i ceng kalikame en egeno be eromo dwogo iye kede iesawa kame en ekwia, 51di eko bino mine alola atek, di eko kete karacel kede joecuke, kakame koko kede mwodo lak bino bedo tie iye.

Currently Selected:

Matayo 24: BILKDC13

Highlight

Copy