2 Makabi 8
8
Jemo ka Yuda Makabi
(1 Makabi 3.1-26)
1Akadi kamanono da, Yuda, ngat kame bin kolwongo da be Makabi, en karacel kede jowote oko bin ot i mung i calere di kiko coko Iyudayan tutumia kanyape (6,000), jo kame bin oko dong di kigenere i edini gi. 2Gin kiko ngangao Rwot pi konyo jo mege kame atekerin dedede oudo tie tero kirac, kede pi bedo kede cuny me kisa i kom tempulo kame jo kalikame woro Rubanga oudo oko pwoko. 3Gin kiko ngangao en da pi bedo kede cuny me kisa i kom Yerusalem, bomba kame oudo kotie muducaro, doko oudo koyapuno tieko rereto en dedede piny. 4Gin bin kiko meede kede kwac gi but Rwot pi nyuto be en edagi gikarac. Gin kikwae be etim onyanga i kom jo koudo tie ngongolo idwe kalikame tie kede raco moro abongo kisa, di kiwaco kope areco i kom Rwot.
5Kakame Makabi bin otieko iiko kede isirikalen mege, jo kalikame Iyudayan oudo likame twero cungo pi yi kede en, pien lilo ka Rwot oudo otieko lokere odoko cuny me kisa. 6Makabi oudo ngeso suro bomban kede calere di eko wango gi. En bin eko mamako kabedere kame pirgi tek di eko mino isirikalen atot me jokwor oringo. 7En bin eudo be esawa me iwor en koudo ber ne me suro jokwor. Jo oko bedo yamo kop i kom nwangcuny mere kabedere dedede.
Potolemi Ocwao Nikanori Ooto Suro Yuda
(1 Makabi 3.38-41)
8Kakame Pilipo, ngapug me Yerusalem, oniang kede be Yuda oudo tie bwono gin momot momot, doko oudo do etie ruruco bwono yi, en eko wandiko baluwa but Potolemi, ngapug me Koelesiria kede Poenisia, pi en bino konyo apugan ka abaka. 9Potolemi awakawaka di yero Nikanori wot ka Paturokulu, ngat acel kikom adieroson ka abaka atek, di en eko cwane ot telo isirikalen kame kalamo tutumia ot are (20,000), kame oudo okwanyo ki atekerin dedede, pi ot muducaro Iyudayan dedede. Potolemi oko yero da Gorogia, ngadwong me isirikalen koudo ipirana i yi, pi upere kede en. 10Abaka Antiokus oudo tie kede banya me jo Roma kame romo sente me siliba kilo tutumia ot kanyape kiwie kanyauni (68,000); Nikanori oudo tie kede iik me cato Iyudayan kame komako ki yi pi culo banya noni.
11Aso en eko cwano kop i bomban me dog nam, di elwongo jo me bomban nogi pi bino wilo Iyudayan i wel me sente me siliba kalikame kalamo kilo acel. Do en oudo likame engeo be Won Twer oudo oyapuno mine alola.
Yuda Ongeo Iik ka Nikanori
(1 Makabi 3.42-54)
12Yuda oko ngeno be Nikanori oudo tie bino kede isirikalen pi suro Yudea, di en eko kwenyaro isirikalen mege. 13Isirikalen mege mogo oudo obedo jolworo, doko oudo jo ace kikom gi likame yei be Rubanga bino mino jokumbor nogo alola. Aso, gin girgi kiko ringo tenge. 14Jo mogo oko cato jamini gi dedede di kingangao Rwot pi lako gi ki cing Nikanori ngat kalikame woro Rubanga, ngat koudo otieko cato gi di pwodi likame yi ocakere. 15Gin kikwao be ka Rubanga oudo likame mito konyo gin pirgi, miero do koto ekonyo gi pi cikere kame bin en etimo but joakwari gi, kede piento en Rubanga adwong me aura, oudo etieko lwongo gi pi bedo jo mege. 16Yuda oko coko isirikalen mege tutumia kanyap (6,000) dedede, di eko yamo kede gi di edio cuny gi be kur kibed kede lworo moro arabo kiringi pi lworo, ka kiko neno twon isirikalen me jokumbor tie sirito pi bino yi kede gi abongo tien kop moro. Gin miero kibed kede nwangcuny me yi kede gi, 17doko poore kur wi gi wil kede tim areco kame jokumbor oudo otimo i kom tempulo, kede kite kame oudo kimio Yerusalem oneno kede can, medo i kom magonogo kite kame kikwanyo kede itok me joakwari me Iyudayan. 18Yuda oko waco be, “Gin kiketo gen gi i kom jamini gi me yi kede i kom tim gi me nwangcuny, do wan oketo gen wa i kom Rubanga Won Twer, en ngat kame etwero yango wie tien acel kenekene di eko muducaro jo kame tie bino pi yi kede wa, akadi ka mitere da, wi lobo lung.”
19Di Yuda oko meede tatamo negi kop di epoo wi gi i kom kite kame bin Rubanga oko konyo kede joakwari gi; ekite kame bin en emuducaro kede jokwor tutumia tol acel kede ot kanyauni kiwie kany (185,000) i kare ka Senakerib, 20kede i kare kame bin Iyudayan tutumia kanyauni (8,000) oko konyo kede jo Makedonia tutumia ongwon (4,000) yi di kiko bwono jo Galatia tutumia tol acel kede ot are (120,000), di kiko tero twon jamini kame oudo kiko yako. Magonogi dedede bin otwerere pien Rubanga oudo oko konyo gi.
Yuda Obwono Nikanori
(1 Makabi 3.55—4.27)
21Kope kame Yuda owaco nogi oko mino isirikalen mege nwangcuny di kiko yei to pi edini gi kede pi piny gi. Di do en eko popoko isirikalen mege i ikodeta ongwon. 22Ekodet acelacel oudo tie kede jo kame romo tutumia acel kede tol kany (1,500). En kede imiegu mege Simoni, Yosepu, kede Jonasan, ngat acelacel oudo telo ekodet acel. 23#1 Makabi 3.48Di do Yuda oko waco ne Eleasa somo iwandik kacil kede dwan amalo. En eko waco ne isirikalen mege ot i yi di kilelemo be, “Rubanga bino konyo wa.” Yuda kikome oko telo ekodet kame oko ot cako yi kede Nikanori.
24Rubanga Won Twer oko konyo gi yi, di gin kiko neko jokwor kame kalamo jo tutumia kanyangon (9,000). Gin kiko wawano isirikalen ka Nikanori atot, di kiko mino gin dedede kiringo. 25Gin kiko mano sente me jo koudo oko ot pi wilo gin bala ipasoi. Ingei wapo gi paka kakabor, gin di do kiko dok pien esawa oudo okato. 26Ceng nono oudo obedo ceng kame oru mere obedo ceng Sabato, pi mano, gin do likame kiko meede kede wapo jokwor. 27Kakame gin oudo kitieko yako kede jame kede coko jamini me yi kibut jokwor oto, gin kiko tedo ebaga me Sabato, di kimio pak kede pwoc adwong but Rwot piento en eko gwoko gi i kare me yi. Manoni oudo obedo anen kame nyuto be Rubanga oudo bobo tie timo ne gin mwolo. 28Kakame Sabato otiek kede, gin kiko mino jamini mogo kame oudo kiyako but jo kame bin kotojo, kede but apuserun kede idwe kic, di kodong mege gin kiko popoko kede idwe gi. 29Di do jo dedede oko lego karacel, di kingangao Rwot ngakisa pi dok i nywak atwal atwala kede jotic mege.
Yuda Obwono Temeseo kede Bakide
30Yuda kede isirikalen mege oko yi kede isirikalen ka Temeseo kede Bakide, di kiko neko isirikalen kame wel gi kalamo tutumia ot are (20,000). Gin kiko mano da kabedere mogo me teko koudo tie malo i wi emukura, kame oudo kocelo kede apama atek, di kiko tero jamini atot kame kiyako, kame gin kiko popoko di rorom, but gin ken gi, but apuserun, but idwe kic, but jo oti, kede jo kame oudo kotojo. 31Gin kiko coko jamini me yi me jokwor di kiko kano gi kiber kabedo kame gin oudo kitwero kwanyo gi kiye oyotoyot pi tic kede gi, do jamini apat duc kame gin oudo kiyako oko yeno di oko tero Yerusalem. 32Gin kiko neko ngatel me isirikalen ka Temeseo, icuo arac adikinicel, doko oudo ebedo lolo Iyudayan twatwal. 33Di bin gin kitie tedo ebaga i bomba ka joakwari gi pi kite kame oudo kibwono kede jokwor, gin kiko wango cuo koudo ocwinyo mac i irutei me tempulo paka to. Cuo nogo bin ribo Kalisitene kede jo ace, gin jo koudo kiko ringo ot pwono i ot moro atitidi. Aso, jo nogi oko udo alola koudo poore kede gi.
34Epone noni en kame bin Nikanori, icuo koudo ikiteso mege reco, ngat koudo okelo jocat wil tutumia acel (1,000) pi wilo Iyudayan, 35bin jo kame en oudo ecao twatwal oko bwone pi kony kame Rwot oudo omio gi. Nikanori bin oko gonyo tenge igoen mege me yi koudo beco twatwal, di eko ringo kene bala epasoit kame tie lwi, paka tuno Antiokia. Gikame en oudo ecobo timo kenekene en muducaro isirikalen mege. 36Aso, en ngat koudo eko tamo culo banya kame abaka oudo tie kede but jo Roma i yore me cato jo me Yerusalem, bin eko nyuto be Iyudayan oudo likame bwonere. Rubanga en koudo yi pirgi, pien gin kilubo iswilia kame en emio gi.
Currently Selected:
2 Makabi 8: BILKDC13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.