2 Makabi 7
7
Toto kede Awobe Mege Oto pi Yei Gi
1 #
Iburanian 11.35-36
Ceng moro ace bobo, oko mako awobe mogo kanyaare kobedo Iyudayan karacel kede toto gi. Abaka oudo tie mino kodao gi kede del pi mino gi camo ringo me epege, ringo kame iswil likame yei negi camo. 2Ngat acel kikom awobe nogo oko waco be, “Nyo kame wun igenunu be ibinunu udo ka ibungunu wan kamanoni? Wan otieko iikere pi to akaka turo iswilia kame joakwari wa omio wa.”
3Manoni oko mino abaka odoko ger, di eko mino cik be ket agune kede sepulan adongo i mac di kiko dop. 4Di oko timo kamanono awakawaka. Abaka oko mino cik be ngol tel leb awobi koudo oko yamo nono, kede be kis wie di oko ngolo cinge kede tiene tenge, di imiegu mege icegun kede toto gi neno. 5Kakame teko me awobi nono do otiek kede, abaka oko mino cik be tere i mac di pwodi ewei, di oko uce i sepula adwong acel, di oko cele. Kakame oko uce kede i sepula nono, yiro oko duny oromo kabedo nono, do imiegu mege kede toto gi oko mino ngat acelacel nwangcuny pi to abongo lworo moro. Gin kiwaco be, 6#Iswilia 32.36“Rwot Rubanga tie gwoko wa, doko ateteni en etie kede cuny me kisa but wa. Musa bin owaco manoni kakaler i wer mere kakame oudo eronkino kede jo kame bin oko weko Rwot. En ewaco be, ‘Rwot bino bedo kede cuny me kisa i kom jotic mege.’ ”
7I ngei awobi me agege to iepone noni, isirikalen oko mako awobi me are di kiko mine edoko gi me tuko gi. Gin oudo kipoo del me wie di kipenye be, “Benyo, nataman in iyei do camo ringo me epege, arabo imito be wan ongol tenge cingi kede tieni acelacel?”
8En eko dwoko negi kop kede leb joakwari mege be, “Ango likame abino camo atwal!” Aso, isirikalen oko toje, bala kame oudo kitimo ne awobi me agege. 9Kakame do oudo emito omo kede wei me ajikini, en eko waco ne abaka be, “In ngat kame kolamo, kame kony ni li, akadi in inek wan, do Abaka me wi lobo bino yaruno wan, di eko mino wa kuo kame bedo nakanaka, pien wan oto pi lubo iswilia mege.”
10I ngei en, isirikalen oko kobo ne omin gi me adek, kimie edoko gi me tuko gi. Gin kiwaco ne be, “Wot lebi,” di en ewoto negi awakawaka. En eko lubo awakawaka kope gin di eko bedo kede nwangcuny me rieno negi cinge da, 11di ewaco negi kede nwangcuny be, “Rubanga en omia magonogi. Do iswilia mege pirgi tek kibut ango kalamo cinga, doko ango angeo be Rubanga bino dwoko nango gin bobo.” 12Abaka kede jo koudo tie kede en oko uro twatwal nwangcunye, kede yei mere pi neno can.
13I ngei eda to, isirikalen oko donyo tojo omin gi me ongwon iepone acel nono. 14Kakame eyapuno kede to, en ewaco negi be, “Likame tie dano moro kame twero dagi ne jo neke, pi gen kame Rubanga mio, en gen me yaruno i kuo bobo. Do wun likame ibinunu yaruno i kuo!” 15Kakame isirikalen oko mako kede awobi me kany di kiko cako toje, 16en eko neno wang abaka di eko waco ne be, “Pien in itie kede twer i kom jo, bed bala ida ibedo dano, in do tim gikame cunyi mito. Do kur itam be Rubanga otieko jalo jo wa. 17In meede, iko bino neno ekite kame Rubanga bino tic kede twer mere adwong, di eko mini ineno can kede jo me odi.”
18Di do isirikalen oko mako awobi me kanyape mere. Kakame oudo eyapuno to kede, en eko waco be, “Kur ingalerenu kenu! Wan otie neno can kame poore kede wa, piento wan odubo but Rubanga wa. Manono en komio tim areco nogi dedede tie timere i kom wa. 19Do kur itamunu be likame ibinunu udo alola pi tamo yi kede Rubanga.”
20Toto me awobe nogi oudo obedo dako me aura, doko poore yutuno en kede wor. Bed bala en eneno awobe mege kanyaare dedede di to ceng acel, en ekanyakino can noni kede nwangcuny, pien oudo eketo gen mere i kom Rwot. 21En eribo tam mere me dako kede nwangcuny me icuo di eko waco kope kame mio nwangcuny but awobe mege kede leb gi. En ewaco negi be, 22“Ango likame angeo kite kame kuo wu bin ocakere kede i yia. Ango en kalikame bin amio wu kuo kede wei, arabo kame adudupo adulion me komu karacel. 23Pi mano, Ngacwec me wi lobo, ngat kame bin otimo acakini me jo kede acakini me jamini dedede, pi kisa mere, bino dwoko ne wu bobo kuo kede wei, pien wun nataman imarunu iswilia mege kalamo kite kame imarunu kede komu kenu.”
24Antiokus oko neno bala toto me awobe nogo oudo tie yamo kede acae bute. Awobi atidi oudo pwodi tie ekuo. Antiokus oko tamo bala kame etwero, ngangao en be ewek itok me joakwari mege. En eko cikere bute, likame pi mine abar kenekene kede mine doko dano kame nyinge iruo, do pi mine bedo dano me ruom amalo i apugan, kede bedo ngawote kame egeno. 25Do awobi nono likame oko lubo kop mere. Aso, en eko lwongo toto me awobi nono bute di eko tamo kwano cunye pi yamo kede wode me wek elok tam mere di eko lako kuo mere. 26I ngei ngangao en tieko kare kalac, dako nono oko yei kop mere. 27En eko lengere but awobi, di eko yamo kede leb gi yamo me nywaro abaka ager nono. En ewaco be, “Woda, bed kede cuny me kisa buta. Yutuno be ango bin ayei i yia pi dwete kanyangon, di ako doti pi mwakini adek. Ango abedo gwoki di apiti tuno tin. 28Aso atina, ango akwai ingoloro malo kede piny, di iko neno jamini dedede kame tie i yi gi. Rubanga otimo jamini nogi dedede ki gi koudo likame tie. Epone acel nono en kame en bin ecweo kede jo da. 29Kur ilwor nganek noni. Yei to di iko nyuto be in ical acala bala imiegu ni, tetekeny Rubanga pi kisa mere, ebin emi bobo buta, in karacel kede imiegu ni.”
30Di pwodi en oudo etie yamo, awobi nono oko waco be, “Abaka Antiokus, nyo kame wun pwodi itienu daro? Ango likame abino lubo cik ka abaka, do ango alubo cik me Iswil kame bin Musa omio joakwari wa. 31Do in ngat kame itimo gero me epone dedede i kom jo wa, ateteni likame ibino bwot ki cing Rubanga. 32-33Etie kop me ateni be Rubanga wan akuo cunye owang kede wa. En etie mino wan oneno can pi dub wa, tetekeny epwony wa di oko donyo timo gikame poore. Do manoni bino bedo pi kare katitidi, pien wan pwodi obedo jotic mege kamanono. En ebino sasiro wa. 34Do in en ngagero kame rac kalamo, doko in en ngat komunaun kalamo jo dedede. Aso, kur ingalere keni be in idwong twatwal, do di itie tero jo ka Rubanga kirac. 35In likame ibino bwot ki alola ka Won Twer, Rubanga kame neno gi dedede. 36Imiegu na oneno can pi kare katitidi, pi genere kame wan otie kede i kom isikan ka Rubanga, do nataman gin kitieko donyo i kuo kame bedo nakanaka. Do in Rubanga bino ngolo ni kop di iko udo alola kame poore kedi pi ewaka ni. 37Ango nataman ajalo koma kede kuo na pi iswil ka joakwari wa, bala kame imiegu na otieko timo. Do ango akwao Rubanga pi nyuto cuny mere me kisa awakawaka but jo wa, di eko mino in alola atek tuno in yei be en kene ebedo Rubanga. 38Ango akwao be koto ango kede imiegu na en obed jo me ajikini me neno can me gero ka Rubanga Won Twer, can kame en ekelo i kom ateker wa pi gikame poore.”
39Kope me anywar nogi oko mino Abaka Antiokus odoko ger twatwal, di eko mino kobungo awobi noni kede gero kame kalamo kame oudo kobungo kede imiegu mege. 40Aso, awobi noni oko to di eketo gen mere lung but Rwot.
41Me atiekini mere, oko neko toto me awobe nogo.
42Ango atieko waco kop kame romo i kom epone kame kobungo kede Iyudayan, kede kite kame oudo kodio gi kede tetek pi camo amontena me leini kame komio bala giayala.
Currently Selected:
2 Makabi 7: BILKDC13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.