2 Makabi 6
6
Kodonyo Tidilo Iyudayan pi Yei Gi
1Di pwodi likame kare moro okato, i ngei manoni timere, abaka oko cwano adwong moro me Asene pi dino Iyudayan be kiwek lubo Iswilia ka Rubanga gi kede itok ka joakwari gi. 2En oudo da miero epwok tempulo me Yerusalem di ekwere but rubanga Seus me Olimpia, kede eko loko nying tempulo me moru me Gerisim dok “Tempulo ka Seus Rubanga kame gamo jokumbor,” bala kame jo koudo bedo kunono bin lwonge kede.
3Itidil noni oudo gwai twatwal, doko kanyakino en oudo likame twerere. 4Jo kalikame Iyudayan oko donyo timo ibagai gi me kongo i tempulo kede tim apapat me caro. Gin oudo kibuto da kede imalayan kunono. Kiko donyo tero jamini kame Iswil dagi i tempulo, 5kipongo wi alutari kede jamini me giayala kame Iswil wa dagi. 6Gwoko Sabato oudo likame twerere, akadi tedo ibagai wa kasek da, arabo waco awaca da be ibedo Eyudayat. 7Buli duwe ka oudo kotie tedo ebaga me ceng kame bin konywalo iye abaka, oudo kodio Iyudayan tetek pi camo amontena me leini me giayala. Doko da ka oudo kotie tedo ebaga me woro Dionisus, rubanga me bwini, oudo kodio Iyudayan tetek pi ngapo odolo me moros i wi gi di kiko ot i esirit pi woro Dionisus. 8Jo ka Potolemi oko kelo tam be poore mi iswil but jo Gurik kame bin kio kede gi pi gida dino Iyudayan camo giayala nogi; 9gin oudo kipoore neko Iyudayan kame bino dagi lubo itok me jo Gurik. Oudo do eneeno kakaler be kare me kuo atek otieko tuno negi. 10#1 Makabi 1.60-61Anyut ine, bin komako mon mogo are pi kepo imukerun gi, di oko ririmo kede gi bomba di atin me dako acelacel ledo i tuno ka toto mere; di do oko remoro gi piny adule ki wi apama me bomba. 11#1 Makabi 2.32-38Ceng moro ace bobo Iyudayan mogo oudo ocokere i abo pi koto gwoko ceng Sabato i mung. Do ngatamoro oko waco ne Pilipo ngapug, di en eko mako gi di eko wango gi di kikuo. Iyudayan nogi oudo woro ceng Sabato twatwal, omio gin likame kiko tamo akadi yi pi lako kuo gi.
12Aso nataman ango akwao jo kame somo itabu noni be kur gikame bin oko timere nogi dub cunyu. Do poore iterenu gi bala iik ka Rwot pi pwonyo jo mege, do likame pi muducaro gi. 13Ateteni manoni obedo anen me mwolo ka Rubanga; en emio dano alola cucuto ka etimo dub, akaka bedo daro tieko kare kalac. 14Rwot likame tero wan bala kame etero kede jo me atekerin apat; atekerin apat en edire daro paka tuno dub gi yitiriro en amio eko mino gi alola. 15Do emio wan alola cucuto tetekeny i cen mere ka dub wa oyitiriro kur etim onyanga i kom wa. 16Pi mano, Rwot likame kwanyo cuny me kisa mere kibut wa. Bed bala en epwonyo wan i yore me mino wa peko, en likame eweko wa. 17Ango oudo awaco kope nogi pi pono wi wu i ekite kame Rwot tero wan kede. Nataman obino do dok i kop kikokome.
Eleasa Oto pi Yei Mere
18 #
Jolebi 11.7-8; Iburanian 11.35 Adwong moro bin tie kame nyinge Eleasa; en oudo ebedo apwony me Iswil. Jo oudo wore twatwal. Ceng moro acel jo mogo oudo tie tamo ngamo doge tetek pi mine camo ringo me epege. 19Do Eleasa oko yero to i yore me wor akaka kuo komunaun. Aso, en eko ngulo ringo me epege nono di eko ot kabedo kame bin kobungo iye jo pi mit mere kene. 20Manoni en anyut me nwangcuny but jo dedede kame yei dagi camo gikame iswil dagi, akadi di komito neke. 21Cuo koudo lo kop me giayala kame iswil dagi nono oudo onao kede Eleasa pi kare kalac. Aso, gin bin kiko tere tenge di kiko waco ne i yore me mung be, “Kel ringo moro kame iswil wu yei ni camo. Di iko cuko bala itie camo ringo me epege kame abaka ociko wan pi mino bala giayala. 22Tim kamanoni di likame oko bino neki, doko wan obino teri kiber pi awotin wa kasek kedi.” 23Do Eleasa oko moko tam mere pi timo gikame poore kede dano kocato kame koworo bala en. En emoko tam mere pi lubo Iswil ka Rubanga, bala kame oudo ebedo timo pi kare me kuo mere lung. Aso, en eko waco negi cucuto be, “Nekanu kan nan. 24Angalo kacal kamano likame poore kede dano me mwaka nango. Jo atot atino bino tamo be i kare kame mwaka nango me dongo oromo kede ot kanyangon, ako dagi edini na. 25Ecuke na nono, pi wilo medo bedo kuo pi kare moro acecek, bino mino jo atino atot rwenyo yei gi, doko da manono bino mino ango atimo emuna kame kelo na lewic i wi tio na. 26Ango bo nataman atwero pango alola kame jo ajoa twero mina, aso di akadi abed kuo arabo atoi, ango likame atwero bwot kibut Rubanga Won Twer. 27Pi mano, ka ango nataman likame ako lworo to, ango abino nyuto be kuo nango opoore kede tio na noni. 28To na bino bedo anyut aber but jo atino; ebino nyuto negi be likame kipoore lworo to pi iswilia wa kacil, kame koworo.”
Kakame en etieko waco kede kamano, eko yai ot kabedo kame kobungo iye jo. 29Jo koudo oki tere kiber oko nan do loko tam gi tere kirac, pien kope kame en oudo eko waco nogo, kibut gin oudo cal bala kope me dano kopoi. 30Kakame oudo kotieko bungo kede Eleasa paka buco to, eko ngururo di eko waco be, “Etie kakaler but Rwot ki ngec mere kacil be, ango oudo atwero bwot ki alola kede to, do ango nataman atie neno can noni kede kilel pien ango awore.”
31Aso, Eleasa oko to. Do nwangcuny kame en eto kede jo oko bedo yutuno bala anyut me deyo, likame but jo atino kenekene, do but ateker wa lung.
Currently Selected:
2 Makabi 6: BILKDC13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.