2 Makabi 5
5
Gianyuta me Yi
1Tetu kare noni Abaka Antiokus me ongwon oko suro Misiri tien me are. 2Jo me Yerusalem oko bedo neno gianyuta me isirikalen kongapo igoen me yi kame kotimo kede saabu di kiringo kede asigiran i malo i yamo. Isirikalen nogo oudo mako tongini kede ipimai di kiciko gi cuto. 3Gin oudo kiteere bala isirikalen kame tie riamo pi yi. Di gin kiko surere, ngati suro ngat ca, ngat ca da suro ngati kamanono. Ibukui oudo twotwomun, tongini oudo cwei bala kot, di imalia por i yamo. Igoen me yi me epone dedede kede dele me tweno dog asigiran kame kotimo kede saabu, oudo memenyun pi asara me ceng. 4Jo dedede me bomba oko bedo lego be gianyuta nogi koto obedo gianena me gikaber.
Yasoni Osuro Yerusalem
5Kakame kop me abe moro kame waco be Antiokus oudo oto, oko bino kede, Yasoni oko ot kede isirikalen kame kalamo tutumia acel (1,000) di gin kiko ngeso suro Yerusalem. Gin kiko riamo isirikalen koudo tie i wi apama me bomba odok cen, di gin kiko mano bomba. Menelao oko ringo ot gwokere i kabedo atek, i nget emukura kame tempulo tie iye. 6Do Yasoni oko bedo neko Iyudayan wad gi abongo kisa. Yasoni oudo likame niang be bwono yi di in iko lokere muducaro jo ni obedo kei arac twatwal. En oudo etamo be ebwono jokwor, do likame jo mege. 7Do Yasoni bin likame oko gamo apugan. Akaka gamo apugan, bin oko mine eringo bobo i adul me jo Amon, di i atiekini mere gikarac kame en oudo eko timo nono oko kelo ne lewic kenekene. 8I cen mere eko bin to kirac. Aretas ngapug me imwarabun otwee i otkol; jo oudo nene bala ngatur iswil, jo oudo dage piento en eneko Iyudayan wad gi; jo dedede oudo tie dware, omio eko bedo ringo di ekokobo akokob ki bomban. En eko ringo ot gwokere Misiri, 9di eko kobo Guris, di oudo egeno be ebino gwokere i diere me jo Siparata, jo koudo tie wad kede Iyudayan. I atiekini mere, icuo noni kame bin omio jo atot oringo di kiko weko piny gi, oko eda to i lobo me obukui. 10En ngat koudo eneko jo atot di eko weko gi likame koyiko gi, eda kikome eto di likame tie ngatamoro kame oko koke; likame kotimo pwola me koke, doko da likame koyike kede joakwari mege.
Antiokus Osuro Yerusalem
(1 Makabi 1.20-63)
11Kakame rwonge me gi koudo oko timere nono oko tuno kede but Abaka Antiokus, en eko tero bala jo Yuda oudo tie jemo ne. Aso, en eko yai ki Misiri kede wangcuny di eko ot ngole mako Yerusalem. 12En eko mino cik but isirikalen mege pi gin totongo abongo kisa ngatamoroni kenekene kame gin kiriamo kede, kiton jo kame gin kiudo tie pwono i ude gi. 13Gin kiko neneko jo dedede, cuo, mon, awobe kede anyira, kiton imukerun. 14Pi ceng adek kenekene Yerusalem oudo otieko kei jo tutumia ot kanyauni (80,000); jo tutumia ot ongwon (40,000) i yi me wang kede wang, kede jo tutumia ot ongwon (40,000) da bobo oko cato gi bala ipasoi.
Koyako Tempulo
15Do manoni oudo pwodi likame oko romo Abaka Antiokus. En kom wie oko bedo tek di eko ot donyo i tempulo kacil kalamo i wi lobo lung, di Menelao en kame tele, ngat koudo otieko doko ngakwor me edini mere kede me ka jo mege. 16Antiokus oko kwanyo jamini kacil me tempulo kede cinge kopwokere, kiton giamia kame abakai apat oudo omio pi medo deyo kede wor kame komio tempulo. 17Antiokus oudo cunye oko bedo yom twatwal pi bwono yi mere, omio en likame oudo eko niang be Rwot oudo ojalo tempulo mere kacil be pwoki, pien oudo cunye owang kede jo me Yerusalem pi kare katitidi, pi dub gi. 18Ka koto jo me Yerusalem oudo likame otimo dub atot, koto oudo komio Antiokus alola oyotoyot, di oko genge timo gi me mingo kacal kamano. En koto oudo eneno can bala Keliodora, ngat kame bin Abaka Seleukus ocwao pi ot ngingico kabedo me kano lim. 19Do Rwot oudo likame oyero ateker noni pir tempulo; do en ecibo tempulo pirgi. 20Manono en komio tempulo kede jo oko neno can karacel, di i cen mere kiko da udo winyo karacel. Rwot Won twer oudo ojale i kare kame cunye bin owang kede, do eko dwoko ne deyo mere kakame wang cunye okwei kede.
Kosuro Yerusalem bobo
21Antiokus oko bin kwanyo ki tempulo sente me siliba kilo tutumia ot kanyape kiwie are (62,000), di eko onyaro dok Antiokia. Ewaka mere oudo dwong twatwal, omio en oudo etamo be etwero mino imerin kwango i wi lobo kakotuo, arabo isirikalen twero sirito beo i nam kede tien gi. 22Antiokus bin oko yero jo ager pi pugo jo. En ecibo i Yerusalem, Pilipo, dano me Purigia, ngat koudo ikiteso mege reco kalamo en. 23I moru me Gerisim en ecibo iye Anduroniko. Medo i kom jo nogi da oudo tie iye Menelao, ngat kame bin oko tidilo Iyudayan wad gi kalamo kite kame jopug icegun oko tero gi kede. Abaka Antiokus oudo cunye dagi Iyudayan kitek 24omio eko cwano i Yerusalem isirikalen kame kowilo awila ki Misia, gin jo tutumia ot are kiwie are (22,000), di Apoloniasi en kame telo gi. En emio Apoloniasi cik be poore enek cuo dedede koudo tie i bomba, di eko cato mon kede awobe bala ipasoi. 25Apoloniasi oko tuno Yerusalem, di eko cuko be en oudo eoto pi mulem. Di do i ceng Sabato, di Iyudayan dedede oudo tie gwoko ceng me wei, en eko telo isirikalen mege teere ooko me bomba, di gin dedede kimako jamini me yi. 26Jo mogo oudo oko donyo ooko me bomba kunono pi neno gin di kiteere, Apoloniasi oko mino cik but isirikalen mege pi neko gin dedede. I ngei manoni gin kiko ringo i bomba di kiko neko jo atot twatwal.
27Do Yuda Makabi kede jo kanyangon apat oko bwot kiringo i piny kobedo mori mori, kakame gin kiko bedo iye bala leini me obar, di kicamo gikame dongo obar kenekene. Gin kitimo kamanoni tetekeny kur kimunaun.
Currently Selected:
2 Makabi 5: BILKDC13
Highlight
Share
Copy
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.