Matesu 16

A bhinga kijimbuete

(Marku 8.11-13; Luka 12.54-56)

1Jifalizeu ni jisaduseu anga eza ku mu londa, a mu bhinga ku a edikiza kijimbuete ku diulu. 2Muène-phe u a vutuila, uiixi. Enu, mu ngoloxi, muixi: Kuma kuanda kúkia kiambote, kuma diulu dia kusuka. 3Mu kimemene, muexi: Lelu mvula! Kuma ku diulu kua kusuka, kualômbo. Akua mangonha! Muejiia kutungula o pholo ia diulu, maji mu lémbua kutungula o ijimbuete ia jithembu! 4Muiji uaiibha, ua akua jiphànda, u sota kijimbuete! Kijimbuete-phe ka a bhana-kiu, kikale ngó o kijimbuete kia Jona, kuabhu! Anga u a-xa bhobho, uia kuengi.

O kithûthume kia Jifalizeu ni Jisaduseu

(Marku 8.14-21)

5Jixibulu anga a zaúka ku sámbua, anga a jimba kuambata jimbolo. 6Jezú anga ua ambela, uixi: Alukenu, mu dimukine o kithûthume kia jifalizeu ni jisaduzeu.

7Ene anga a fueta mudiâ, exi: Muène ua ki zuelela o jimboluʼ ojo, ji tua kambe kuambata.

8Jezú kia ki mono, uixi: Enu tata, mua tolo o kuxikana, muala ku difuetela-hi mudienu, mukonda dia kukamba kuambata o jimbolo? 9Kífua kiluua mu mona, ki mu lembalala o mbolo jitanu ku midi jitanu ja mala ni jingalu ji mua nonene-ku? 10Ni sambuadi dia jimbolo ku midi jiuana, ni inda ioso i mua nonene-ku? 11Ki mu kʼivu kiebhi kuila o jimbolo ki jene ji nga tange? Dimukinenu-phe o kithûthume kia jifalizeu ni jisaduzeu.

12Ene iá a kʼivu kiua kuma o kithûthume ki nanukisa o jimbolo ki kiene kia tange o ku ki dimukina, maji o ulongelu ua jifalizeu ni jisaduzeu.

O kufisala kua Phetele

(Marku 8.27-30; Luka 9.18-21)

13Kiki kieza Jezú mu jimbandu ja Sezaleia ia Felipe, uibhula jixibulu jê, uixi: Eme, Monʼa Muthu, athu ala ku ngʼila kuma eme nanhi?

14Kuala ene: Amoxi exi: Nzuá dia Batizu; amoxi, exi: Elija; amukuá exi: Jelemiia, mba muthu ku jipolofeta.

15Muène anga ua ambela, uixi: Enu-phe, muixi eme nanhi.

16Kuala Ximá Phetele: Eie u Kristu, Monʼa Nzambi ia muenhu.

17Jezú u kumbulula, uixi: Eie ua zediua, Ximá dia Jona! Mukonda o kidi kienhiki eie kua kʼijidila ku xitu ni manhinga, maji a ku bhana-kiu kuala Tata iami uene mu diulu. 18Kala kiki, ngi ku ambela dingi, kuma eie Phetele,#16.18 Pedera Ditadi; Ndànji. o bhu ndànji iíi, bhene bhu ngi tunga o Ngeleja iami, o mielu ia Kalunga ki ia kà tena ku i lundumuna. 19Eme ngi ku bhana o jisabhi ja Utuminu ua Diulu; kioso ki u kuta eie mu ngongo, ni mu diulu ki kala kiókute; kioso ki u jituna eie mu ngongo, ni mu diulu ki jituka.

20Behnhobho Jezú anga u tendelela jixibulu kuila ki ji tangele muthu kuamba Jezú muene Kristu.

Jezú u tanga dingi o kûfua ni kufukunuka kuê

(Marku 8.31—9.1; Luka 9.22-27)

21Tunde bhu thembu ioio Jezú u kuata kuidikiza jixibulu jê kuma muène u bhinga kuia mu Jeluzaleme, kumona jiphaxi javulu ku adiakimi, ni ku jinganga ja makota ni asoneki, ni ku mu jibha, ni kufunuka mu kizuua kia katatu.

22Phetele anga u kuata ku mu funhisa, uixi: Lu ku suke, Ngana! Kienhiki ki ki ku bhite.

23Bhenhobho Jezú-phe u sakuka, u ambela Phetele, uixi: Bhita ku dima diami Satana! Eie ua di bhange u ditadi dia kidibhukanu, ua-lu sota ku ngi bhalesa mu njila iami! Kuma o ima ia Nzambi ki iene i ua bhake muẋima, ni ku i xinganeka, maji o ima ia athu!

24Kienhókio Jezú u ambela jixibulu jê, uixi: Se muthu ua mesena ku ngi kaiela eme, a di fule o kudibanza muène-muene, a zangule dikulusu diê, a ngi kaiele. 25Mukonda uoso ua mesena kubhulula muenhu uê, ua-nda ku u texi; o uoso u texi muenhu uê mukonda diami, ua-nda ku u bonga. 26Muthu u bhanduluka-hi, se ua nganhala ngongo ioso, nʼa te-mu o muenhu uê? Inga muthu u bhanahi mu ta uenji ua muenhu uê? 27Mbata Monʼa Muthu ua kèza mu kijingu kia Tata iê, kumoxi ni ji-anju jê; Thembuʼoio, kala muthu, ua kà mu vutuila kioso kia tokala mu ikalakalu iê. 28Ngi mi ambela kidi, emana bhabha, sai-bhu ni iá ka kà lola kalunga, katé kia kà mona o Monʼa Muthu uala kuiza mu ungana uê.

Currently Selected:

Matesu 16: KMB80

Highlight

Copy