Konesi 23

1A Paulo diŋe temejik go, a kulyani adi, Luŋasirik, nan a gwolor ko Ŋun i komor ko töili lo ’but logon toyiyikiŋdyö nan adi nan a ko koŋdya arabat tojo ko lo lor.

2A Anania koane duma saŋi ŋutu lo gwo ’dan ko Paulo nyona kulo adi ti se naŋe naŋ lepeŋ i kutuk. 3#Mat 23.27, 28A Paulo kulyani ko lepeŋ adi, Do logon gwoso gorom nagon a wela ko buya lo, Ŋun mo nanaŋ do! Do si ’da ŋini anyen ’duŋgö kulya kwe gwoso i Saresi, ama do a ’beleŋgu Saresi i sarakiŋdya na lepeŋat i naŋgu na nan. 4A ŋutu lo gwo ’dan kanyit nyona kulo pije adi, Do momoröju koane duma lo Ŋun?

5 # Yuö 22.28 A Paulo waddi adi, Luŋasirik, nan a ko den adi lepeŋ a koane duma; kogwon a wurö adi, Do ködyö ti jambu arabat i kulya ti kasaranit lo ŋutu kasu.

6 # Kon 26.5; Pil 3.5 A nagon Paulo aje met adi lele swöt a Sadokejin a lele gwe a Parusijin nu, a lepeŋ kulyajine ki i ŋinu momoret adi, Luŋasirik, nan a Parusityo ŋuro lo Parusijin, kwe nagon nan gwon ni i pipiya na kogwon yi yeŋdu adi lo twatwa ŋiŋien i twan. 7A na kulyari nye sona nu, a Parusijin ko Sadokejin suluje rerenya, a ŋutu lo momora kulo koŋi koŋa. 8#Mat 22.23; Mar 12.18; Luk 20.27Kogwon Sadokejin kulya adi lo twatwa ti ŋien i twan, adi malaikajin ’bayin, köti ködudwölön ’bayin; ama Parusijin a ruk adi kine ŋo liŋ kata. 9Nyena a ŋutu ŋiki i woŋon parik, a kulye katodinok ti Saresi ti Mose logon a ti laŋet na Parusijin ŋine ki, a rerenyajine ki adi, Yi a ko ryeju nene toron ko ŋilo ŋuto. Kode ŋona ködudwö kode a malaikatat lo jambu ko nye. 10a rerenya worani a naron parik, a liwa iŋge kujönö adi lepeŋat de gigin Paulo ka ’de ka ’de, nyena a lepeŋ saŋi kamörök anyen lulurara kak ko lodir yu, anyen riŋuŋdya Paulo kaŋo anyen joŋdya i pirit nagon kamörök si ’da kata na.

11A i ŋilu tukwaje, a Matat gwo ’de ko Paulo nyona, a kulyani adi, Gwe do a iŋgo; do aje tökoŋu kulya kwe a gwak Yerusalema ni, nyena a do mo köti ködyö koŋdi sona Roma yu.

Ŋutu ga ’yu tatuja Paulo

12A nagon kak aje waran nu, a Yudayaki momoruŋdye i pirit na geleŋ i mwön ko Paulo, a milyeji milyeju adi se ködyö ti nyesu kode möju ake ko se a tatuja lepeŋ. 13Ŋutu lo momora a lwön i mwön kulo lwölwöŋ merya iŋwan. 14A kirut lepeŋat iti ko koanejin temejik se ko ŋutu temejik yu a takiŋdye lepeŋat adi, Yi aje milyeju go adi yi ti nyesu nene ŋo ake koyi a tatuja Paulo.

15Nyenagon soŋinana ta se ko ŋutu ti momoret sunyukiŋdye ta liwa lore anyen joŋdya lepeŋ kak kasu ni, gwoso nagon ta ’dek pija kulya kanyit ’bura na. Yi aje teteŋdya ajo i tatuja na lepeŋ i ŋerot nagon nye a ko ’durökin ni nu.

16Ama a ŋuro lo kiaser Paulo aje yiŋ adi ŋutu kulo gwe i domba na lepeŋ nu, a lepeŋ iti a luŋöni i pirit nagon kamörök si ’da kata nu, a tukökiŋdye Paulo. 17A kirut Paulo luŋgi lele duma lo kamörök mia geleŋ a takiŋdye lepeŋ adi, Joŋe ŋilo titinti ko liwa yu, kogwon nye kata ko kulya nagon nye ’dek tukökiŋdyö lepeŋ.

18A ŋilo duma joŋgi lepeŋ a nyömöddi ko liwa yu, a takiŋdye liwa adi, Paulo lo rereka a luŋgu nan a pije nan anyen joŋdya ŋilo titinti konut ni, kogwon lepeŋ kata ko kulya nagon nye ’dek tukökiŋdyö do. 19A liwa morgi ŋilo titinti i könin a jiŋge lepeŋ a swöt, a pije lepeŋ adi, Ŋo a nyo nagon do ’dek tukökiŋdyö nan? 20A lepeŋ waddi adi, Yudayaki aje torukökin i pija na do anyen do joŋga Paulo kak ko ’bure i komŋo na momoret na ŋutu temejik, gwoso nagon se ’dek pija kulya kanyit ’bura na! 21Ama an do ko yiŋ kulya kase, kogwon ŋutu kase lwölwöŋ merya iŋwan domba lepeŋ. Lepeŋat a milyeju adi se ködyö ti nyesu kode möju ake ko se a tatuja lepeŋ. Lepeŋat soŋinana aje teteŋdya ajo möŋdi ruket konut. 22A liwa kölöddi ŋilo titinti, a takiŋdye lepeŋ adi, An do ko tukökin lele ŋuto adi do aje jamakin nan kine kulya.

Paulo a sonyo ko mödir Pelise yu

23A kirut liwa luŋgi dumalak murek ti kamörök mia geleŋ mia geleŋ, a takiŋdye se adi, Teteŋdi ta kamörök kasu miajin murek ajo anyen tu Kaisaria mora ko ŋutu merya buryo lo wörö ko kusanjin, köti ko ŋutu miajin murek lo gwon ko goro. Teteŋdi ta ajo anyen ŋiörö i saa buŋwan na tukwaje. 24Tiki ta Paulo kunie kusanjin anyen wöwöröri, ko joŋe ta lepeŋ ’bura tojo ko mödir Pelise yu. 25a kirut liwa wuŋe waraga ko kulyaesi gwoso kilo adi,

26Nan Kalaudio Lusia roman ko do mödir Pelise lo kukuka. 27Yudayaki a mok ŋilo ŋuto, a se gwe nyona ko tatuja na lepeŋ, a nan iŋge den adi lepeŋ a ŋuto lo Roma, nyena a nan iŋge tu ko kamörök kwe i lwökuŋdyo na lepeŋ. 28a nan ’deke deŋdya ko toron a nyo nagon se a kulya adi lepeŋ a kon. Nyena a nan joŋgi lepeŋ kak kase i momoret na ŋutu temejik. 29A nan iŋge ryöun kaŋo adi lepeŋ poki ko kulya ti rerenyesi i kulya ti Saresi kase ti keri, ama nene po ’bayin nagon jujukin tatuarikin lepeŋ kode tiki i kadi rereket. 30A nagon nan aje tuköki adi Yudayaki ’dek mwön ko lepeŋ nu, nyena a nan soŋdi lepeŋ konut ŋini ’de ’de, a nan takiŋdye kaöŋök kanyit anyen tu jambu kulya kanyit konut i komor.

31Nyena a kamörök koŋdi gwoso na saraki ’e se nu, a se ’dumuŋdye Paulo a joŋgi lepeŋ i ŋilu tukwaje tojo Antipatri. 32Ko ’bure a kamörök lo wörö ko mok kulo yitöni kase i pirit, a kölökiŋdye ŋutu lo wörö ko kusanjin kulo i joŋga na lepeŋ. 33a na ’durökiŋdye se Kaisaria nu, a se tiŋdi modir ŋina waraga, a ŋutukiŋdye Paulo kanyit i komor. 34A mödir ko keŋdi ŋina waraga, a pije Paulo ko lepeŋ a lo nan mödöria, a nagon nye aje den adi lepeŋ a lo Kilikia nu, 35a nye kulyani adi, Nan mo ko yiŋ kulya kunök ko kaöŋök kulök a ’durökin. A nye tiŋdi saret adi ti Paulo tiyuni tiyu i mödöria na ’duk Erode na.

Currently Selected:

Konesi 23: BBE

Highlight

Copy