JENESIS 26

U Isaak ha Gerar bad ha Beer-sheba

1Bad ka la don ka 'nemsniew ha kata ka ri nalor kata ka 'nemsniew kaba la don mynshuwa ha ki sngi jong u Abraham. Bad u Isaak u la leit sha u Abimelekh u syiem ki Philistia sha Gerar. 2Bad U Trai u la paw ha u, bad u la ong, “Wat leit hiar sha ka ri Ijipt; to shong sah ha kata ka ri ïa kaba ngan ong ha me. 3#Jen. 22:16-18.To shong nongwei katto katne ha kane ka ri, bad nga te ngan long lem bad me, bad ngan kyrkhu ïa me; namar ha me, bad ha u symbai jong me, ngan ai ïa kine ki ri baroh, bad ngan pyndep skhem ïa la ka jingsmai ïa kaba nga la smai ha u Abraham u kpa jong me. 4Bad ngan pynbun ïa u symbai jong me kum ki khlur bneng, bad ngan ai ha u symbai jong me ïa kine ki ri baroh; bad ïa ki jaid bynriew baroh ka pyrthei yn kyrkhu ha u symbai jong me; 5namar ba u Abraham u la shahshkor ïa ka ktien jong nga, bad ba u la sumar ïa kaba nga la hukum ïa u ban sumar ïa ki hukum jong nga, ïa ki rukom jong nga, bad ïa ki tynrai ka jingsneng jong nga.”

6Bad u Isaak u la shong sah ha Gerar. 7#Jen. 12:13; 20:2.Bad ki briew jong kata ka jaka ki la kylli shaphang ka tnga jong u; u te u la ïathuh, “Ka long ka para jong nga keiñ:” naba u la sheptieng ban phla, “Ka long ka tnga jong nga;” u ong “ba ïoh ki briew jong kata ka jaka kin da pynïap noh ïa nga namar ka Rebekka; namar ka la long kaba ibhabriew.” 8Ka la jia ruh, ynda u la don kham bun sngi hangta, ba u Abimelekh u syiem jong ki Philistia u la khmih na ka jingkhang ïit, bad u la ïohi ruh, bad ha khmih, u Isaak u da lehkai bad ka Rebekka ka tnga jong u. 9Te u Abimelekh u la khot ïa u Isaak, bad u la ong, “Ha khmih, shisha ka long ka tnga jong me: hato kumno te me la ong, ‘Ka long ka para jong nga?’ ” Te u Isaak u la ïathuh ha u, “Namar nga la ong ha lade, ‘Ba ïoh nga ïap namar jong ka.’ ” 10Bad u Abimelekh u la ong, “Hato kaei kane ba me la leh ïa ngi? da kaba jem uwei na u paidlang un da lah thiah lem bad ka tnga jong me, bad kumta keiñ, me men da la pynngat ka jingrem halor jong ngi.” 11U Abimelekh, namar kata, u la hukum ïa uta u paidlang baroh, u da ong, “Uta uba ktah ïa une u briew lane ïa ka tnga jong u, yn pynïap noh shisha ïa u.”

12Bad u Isaak u la bet ha kata ka khyndew, bad u la ïoh kynshew ha kata ka snem ïa kaba shispah shah. Bad U Trai u la kyrkhu ïa u. 13Bad uta u briew u la man bha, bad u la nang kham khraw kham khraw, bad u la nang roi ruh ha ban da u la jia long uba khraw eh. 14Namar u la don ruh ka spah da ki kynhun langbrot, bad ka spah da ki kynhun masi, bad ki shakri shynrang batrei lyngkha babun eh; katba ki Philistia ki la ïabishni ïa u. 15Namar kita ki pukri baroh ïa kiba ki shakri u kpa jong u ki la lah ïatih myn ha ki sngi u Abraham u kpa jong u, kita ki Philistia ki la ïaset noh ïa ki, bad ki la ïa-pyndap ïa ki da ka khyndew keiñ. 16Bad u Abimelekh u la ong ha u Isaak, “To khie kynriah noh na ngi; naba me la nang long uba kham don bor shibun ïa ngi.”

17Ynda kumta, u Isaak u la kynriah noh nangta, bad u la pynïeng ïa la ka ïingtrep ha ka pynthor Gerar, bad u la shong sah shato. 18Te u Isaak u la phah tih biang ïa kita ki pukri um, ïa kiba ki la lah ïatih myn ha ki sngi u Abraham u kpa jong u; naba kita ki Philistia ki la lah set noh ïa ki, ynda la ïap u Abraham: bad u la buh ïa kijuh ki kyrteng ha ki da kiba u kpa jong u, u la lah khot ïa ki. 19Bad kumta, ki shakri u Isaak ki la ïatih ha kata ka pynthor, bad ki la ïashem hangta ka pukri ka um bakyrsoi im. 20Bad ki nongap jingri ka Gerar ki la ïakajia bad ki nongap jingri u Isaak, ki da ong, “Ka um ka dei ka jong ngi:” namar kata, u la khot kyrteng ïa kata ka pukri “ka Esek”; naba ki la ïakajia bad u. 21Bad ki la ïatih sa ïa kawei pat ka pukri, bad shaphang kata ruh ki la ïakajia: namar kata, u la khot kyrteng ïa ka, “ka Sitnah”. 22Ynda kumta, te u la kynriah noh nangta, bad u la tih ïa kawei pat ka pukri; hynrei, kim shym la ïakajia shaphang kata: te u la khot kyrteng “ka Rehoboth” ïa ka; bad u la ong, “Naba mynta ba U Trai u la pynkylluid ïa ngi, ngin ïa nang roi ruh ha kane ka khyndew.”

23Bad u la leit kiew nangta sha Beer-sheba. 24Bad U Trai u la mihpaw ha u ha kata ka miet, bad u la ong, “Nga long U Blei u Abraham u kpa jong me: to wat sheptieng, naba ma nga, nga long ryngkat bad me bad ngan kyrkhu ïa me, bad ngan pynroi ïa u symbai jong me na ka bynta u Abraham u shakri jong nga.” 25Bad u la tei ïa ka duwan hangta, bad u la khot kyrpad ïa ka kyrteng U Trai, bad u la pynïeng ïa la ka ïingtrep ruh hangta: bad hangta ki shakri jong u Isaak ki la ïatih ïa ka pukri.

Ka jingïateh kular hapdeng u Isaak bad u Abimelekh

26 # Jen. 21:22. Te u Abimelekh u la leit sha u na Gerar, bad u Ahussath u lok jong u, bad u Phikhol u nongïalam barangbah u paidïapom jong u. 27Bad u Isaak u la ong ha ki, “Hato balei phi wan ha nga, haba phi la isih ïa nga, bad haba phi la beh noh ïa nga na phi?” 28Ki te ki la ïathuh, “Shisha ngi la ïohi ba U Trai u long ryngkat bad me: te ngi la ïa-ong, ‘Mynta to ai ba kan long ka jingsmai hapdeng jong ngi, hapdeng jong ngi bad me keiñ, to ïa ngin ïathaw ka jutang bad me, 29ba men ym leh sniew ïa ngi, kumba ma ngi ngim shym la ktah ïa me, bad kumba ngi ngim shym la leh ei ei ruh em, hynrei, tang ïa ka babha ïa me, bad ngi la phah noh ïa me ruh ha ka jingsuk: me long mynta ïa uba la kyrkhu da U Trai.’ ” 30Bad u la thaw ïa ka jingkhawai ïa ki, bad ki la ïabam ki la ïadih ruh. 31Ynda kumta, ki la ïakhie joit dang step eh, bad ki la ïasmai biang paralok hi: bad u Isaak u la phah noh ïa ki, bad ki la ïaleit noh ruh na u ha kaba suk. 32Ka la jia ruh ha kata kajuh ka sngi, ba ki shakri u Isaak ki la wan ïathuh ha u shaphang ka pukri ïa kaba ki la lah ïatih, bad ki la ong ruh ha u, “Ngi la shem ïa ka um.” 33#Jen. 21:31.Bad u la khot “ka Sheba#26:33 Sheba: Ha ka ktien Hebru, kane ka kyrteng ka dei ka Shiba.” ïa ka: namar kata, ka kyrteng kata ka shnong ka long “ka Beer-sheba” haduh kane ka sngi.

34Te u Iso u la long uba sawphew snem, bad u la shim tnga ïa ka Judith ka khun u Beeri u kynja Hit, bad ïa ka Bashemath ka khun u Elon u kynja Hit: 35te kita ki la long kaba kthang mynsiem ïa u Isaak bad ïa ka Rebekka.

Currently Selected:

JENESIS 26: KHB

Highlight

Copy